གྲངས་ཀ 20 - Tibetan Old Testament 2011

ཀ་དྷེཤི་ལ་བྱུང་བའི་ལོ་རྒྱུས།

¹ ཟླ་བ་དང་པོར་ཨིསི་རཱཨེལ་པའི་མི་སྡེ་ཡོངས་རྫོགས་ཛིན་གྱི་འབྲོག་སྟོང་ཁུལ་དུ་འབྱོར་ནས་ཀ་དྷེཤི་ལ་སྒར་ས་བརྒྱབ་པ་དང་། དེར་མིར་ཡམ་ཚེ་ལས་འདས་ནས་ས་གནས་དེ་རང་དུ་དུར་སར་སྦས་སོ།

² དེ་ཚོ་སྒར་ས་བརྒྱབ་པའི་གནས་དེར་ཆུ་མེད་པས། མི་མང་ཚོས་མོ་ཤེ་དང་ཨ་རོན་གཉིས་ལ་མཐའ་སྐོར་ནས།

³ རྙོག་བརྗོད་བྱེད་གསལ། ང་ཚོའང་ཨིསི་རཱཨེལ་པ་གཞན་རྣམས་དང་མཉམ་དུ་གཙོ་བོ་དཀོན་མཆོག་གི་དབུ་གུར་དམ་པའི་མདུན་དུ་ཤི་བ་ཡིན་ན་ཅི་མ་རུང་།

⁴ ཁྱོད་ཚོས་ག་རེའི་དོན་དུ་ང་ཚོ་ལ་འབྲོག་སྟོང་འདི་འདྲར་འཁྲིད་ཡོང་བ་ཡིན་ནམ། འདིར་ང་ཚོ་སེམས་ཅན་རྣམས་དང་མཉམ་དུ་ཤི་བཅུག་པའི་ཕྱིར་འཁྲིད་ཡོང་བ་ཡིན་ནམ།

⁵ ཁྱོད་ཚོས་ང་ཚོ་ལ་ཨི་ཇིབ་ནས་བཏོན་ཏེ། ཐོན་སྐྱེད་སོགས་གང་ཡང་མེད་པའི་གནས་སྐྱོ་པོ་འདི་འདྲར་འཁྲིད་ཡོང་བ་དེ་གང་ཡིན་ནམ། གནས་དེར་འབྲུ་དང་སེ་ཡབ་ཤིང་གི་འབྲས་བུ་དང་རྒུན་འབྲུམ་དང་སེ་འབྲུ་སོགས་གང་ཡང་མེད་པ་མ་ཟད། འཐུང་ཆུ་ཙམ་ཡང་མི་འདུག་ཅེས་སྨྲས་པ་དང་།

⁶ མོ་ཤེ་དང་ཨ་རོན་གཉིས་མི་ཚོགས་ཡོད་ས་ནས་ལོག་སུ་ཕྱིན་ཏེ། དབུ་གུར་དམ་པའི་སྒོར་ལངས་ཤིང་། ས་ཁར་མགོ་བོ་སྒུར་བ་དང་། གཙོ་བོ་དཀོན་མཆོག་གི་གཟི་བརྗིད་ལྔན་པའི་འོད་ཟེར་བཀྲག་མདངས་ཆེན་པོ་དེ་ཁོ་ཚོའི་ཐོག་ཏུ་མངོན་ནོ།

⁷ གཙོ་བོ་དཀོན་མཆོག་གིས་མོ་ཤེ་ལ་གསུངས་པ།

⁸ དམ་བཅའི་སྒྲོམ་གྱི་མདུན་དུ་ཡོད་པའི་འཁར་རྒྱུག་དེ་ལག་ཏུ་བླངས་ཏེ། ཨ་རོན་དང་ཁྱོད་གཉིས་ཀྱིས་ཨིསི་རཱཨེལ་པའི་མི་སྡེ་ཡོངས་རྫོགས་བཀོང་ནས་ཁོ་ཚོས་མཐོང་སར་བྲག་རི་དེ་ལ་གཏམ་གླེང་བྱོས་ཤིག་དང་། བྲག་རི་དེ་ནས་ཆུ་ཤུགས་ཆེན་པོ་ཞིག་ཐོན་པར་འགྱུར། དེ་ལྟར་ཁྱོད་ཚོ་མི་དང་སེམས་ཅན་ཚང་མའི་དོན་དུ་བྲག་རི་ནས་འཐུང་ཆུ་ཐོབ་པར་འགྱུར།

⁹ དེ་ནས་གཙོ་བོ་དཀོན་མཆོག་གིས་བཀའ་གང་གནང་བ་བཞིན་མོ་ཤེས་འཁར་རྒྱུག་དེ་བླངས་ནས།

¹⁰ ཁོ་དང་ཨ་རོན་གཉིས་ཀྱིས་མི་སྡེ་ཡོངས་རྫོགས་བྲག་རིའི་མདུན་དུ་བཀོང་ནས་མོ་ཤེས་སྨྲས་པ། ཀྱེ་ངོ་ལོག་པ་རྣམས་ཚུར་ཉོན་ཅིག ད་ང་ཚོ་བྲག་རི་འདི་ལས་ཁྱོད་ཚོའི་དོན་དུ་ཆུ་བཏོན་དགོས་སམ།

¹¹ དེ་ནས་མོ་ཤེས་འཁར་རྒྱུག་དེ་ཡར་འཕྱར་ནས་བྲག་གི་ཁར་ལན་གཉིས་ཞུས་པ་དང་། དེ་ལས་ཆུ་ཤུགས་ཆེན་པོ་ཞིག་ཐོན་ནས་མི་དང་སེམས་ཅན་ཚང་མས་དེ་ལས་འཐུང་བ་ཡིན་ནོ།

¹² འོན་ཀྱང་གཙོ་བོ་དཀོན་མཆོག་གིས་མོ་ཤེ་དང་ཨ་རོན་གཉིས་ལ་བཀའ་བཀྱོན་གནང་ཞིང་གསུངས་པ། ངའི་ནུས་མཐུ་དམ་པ་དེ་ཁྱོད་ཚོས་མི་མང་རྣམས་ཀྱི་མདུན་དུ་ངོས་ལེན་བྱེད་པའི་དད་པ་ཆ་ཚང་མེད་པའི་རྐྱེན་གྱིས། སྔར་ངས་ཁོ་ཚོར་སྤྲོད་རྒྱུའི་དམ་བཅའ་བྱས་པའི་ཡུལ་དེར་ཁྱོད་ཚོས་དེ་དག་འཁྲིད་དེ་འགྲོ་མི་ཡོང་།

¹³ ལོ་རྒྱུས་འདི་ནི་མེ་རི་བཱ་རུ་བྱུང་བ་ཡིན་ནོ། དེར་མི་མང་ཚོས་གཙོ་བོ་དཀོན་མཆོག་ལ་རྒོལ་ཞིང་རྙོག་བརྗོད་ཞུས་པ་དང་། ཁོང་གིས་རང་ཉིད་དམ་པ་ཡིན་པའི་མངོན་རྟགས་དེ་ཚོར་བསྟན་པ་གནང་བ་ཡིན་ནོ༎

ཨེ་དྷོམ་གྱི་རྒྱལ་པོས་ཨིསི་རཱཨེལ་པ་རྣམས་ལ་རྒལ་མ་བཅུག་པ།

¹⁴ མོ་ཤེས་ཀ་དྷེཤི་ནས་ཨེ་དྷོམ་གྱི་རྒྱལ་པོའི་དྲུང་དུ་བང་ཆེན་རྣམས་བཏང་ཞིང་། དེ་དག་གིས། ཨིསི་རཱཨེལ་གྱི་སྡེ་རིགས་ཀྱི་ཁོངས་ནས་ཁྱེད་ཀྱི་སྐུ་མཆེད་ཡིན་པ་རྣམས་ནས་ལོན་འདི་བསྐུར་ཡོད། ང་ཚོས་མྱང་དགོས་པའི་དཀའ་ངལ་གྱི་སྐོར་ལ་ཁྱེད་ཀྱིས་མཁྱེན་གསལ་ལྟར།

¹⁵ སྔར་ང་ཚོའི་ཕ་མེས་རྣམས་ཇི་ལྟར་ཨི་ཇིབ་དུ་ཕྱིན་ནས་དེར་ང་ཚོ་ལོ་མང་བསྡད་དགོས་བྱུང་བ་དང་། དེ་བཞིན་ཨི་ཇིབ་པ་ཚོས་ང་ཚོའི་ཕ་མེས་དང་ང་ཚོར་སྡུག་སྤྱོད་བྱེད་སྐབས།

¹⁶ ང་ཚོས་གཙོ་བོ་དཀོན་མཆོག་ལ་མགོན་སྐྱབས་ཀྱི་ཞུ་འབོད་བྱས་པ་ཡིན། ཁོང་གིས་ང་ཚོའི་ཞུ་བར་གསན་ནས་ཕོ་ཉ་ཞིག་གཏོང་བ་གནང་ཞིང་། དེས་ང་ཚོ་ཨི་ཇིབ་ནས་བཏོན་ཏེ་འཁྲིད་ཕེབས་ཤིང་། ད་ལྟ་ང་ཚོ་ཁྱེད་ཀྱི་ཡུལ་གྱི་ས་མཚམས་སུ་ཡོད་པའི་ས་གནས་ཀ་དྷེཤི་ཞེས་པར་འབྱོར་ཡོད།

¹⁷ ང་ཚོ་ལ་ཁྱེད་ཀྱི་ཡུལ་བརྒྱུད་ནས་འགྲོ་བཅུག་རོགས་གནང་། ང་ཚོ་རང་གི་ཕྱུགས་ཟོག་དང་བཅས་པས་ཁྱེད་ཀྱི་ཡུལ་གྱི་གཞུང་ལམ་སྤངས་ནས་ཞིང་དང་རྒུན་ཚལ་ཁག་ཏུ་འཛུལ་མི་ཡོང་། ང་ཚོས་ཁྱེད་ཀྱི་ཡུལ་གྱི་ཁྲོན་པ་ཁག་ནས་ཆུ་ཡང་འཐུང་མི་ཡོང་། ཁྱེད་ཀྱི་ཡུལ་གྱི་ས་མཚམས་མ་རྒལ་བར་དུ་ང་ཚོ་གཞུང་ལམ་ཁོ་ན་བརྒྱུད་ནས་འགྲོ་རྒྱུ་ཡིན་ཞེས་སྨྲས་མོད།

¹⁸ འོན་ཀྱང་དེའི་ལན་དུ་ཨེ་དྷོམ་པ་ཚོས་ཁྱོད་ཚོ་ང་ཚོའི་ཡུལ་བརྒྱུད་ནས་འགྲོ་བཅུག་གི་མིན། གལ་སྲིད་ཁྱོད་ཚོས་དེ་འདྲ་བྱེད་པ་ཡིན་ན་ང་ཚོས་ཁྱོད་ཚོའི་ཐོག་ཏུ་འཐབ་རྒོལ་བྱེད་རྒྱུ་ཡིན་ཞེས་སྨྲས་སོ།

¹⁹ ཨིསི་རཱཨེལ་པ་ཚོས་སྨྲས་པ། ང་ཚོ་གཞུང་ལམ་ཁོ་ན་བརྒྱུད་ནས་འགྲོ་རྒྱུ་ཡིན་པ་དང། གལ་སྲིད་ང་ཚོ་དང་ང་ཚོའི་ཕྱུགས་ཟོག་དང་བཅས་པས་ཁྱེད་ཀྱི་ཡུལ་གྱི་ཆུ་ལས་འཐུང་བ་ཡིན་ན། ང་ཚོས་ཁྱེད་ལ་ཆུ་རིན་འབུལ་ཆོག་པ་ཞུ་རྒྱུ་ཡིན། ད་ང་ཚོ་ཁྱེད་ཀྱི་ཡུལ་བརྒྱུད་ནས་གཅིག་པོ་འགྲོ་བར་འདོད་དོ།

²⁰ ཨེ་དྷོམ་པ་ཚོས་སྐྱར་དུ། ང་ཚོས་ཁྱོད་ཚོ་འགྲོ་རུ་བཅུག་གི་མིན་ཞེས་སྨྲས་ནས། ཨིསི་རཱཨེལ་པ་རྣམས་ལ་དམག་འཐབ་བྱེད་ཕྱིར་དམག་དཔུང་སྟོབས་ཤུགས་ཆེན་པོ་ཞིག་འཁྲིད་ནས་ཐོན་ནོ།

²¹ ཨེ་དྷོམ་པ་ཚོས་ཨིསི་རཱཨེལ་པ་རྣམས་ལ་རང་གི་ས་ཁུལ་ནས་འགྲོ་མ་བཅུག་པའི་རྐྱེན་གྱིས་ཁོ་ཚོ་ལམ་གཞན་བརྒྱུད་ནས་ཕྱིན་ནོ༎

ཨ་རོན་ཚེ་ལས་འདས་པ།

²² ཨིསི་རཱཨེལ་པའི་མི་སྡེ་ཡོངས་རྫོགས་ཡུལ་ཀ་དྷེཤི་ནས་ཐོན་ཏེ།

²³ ཨེ་དྷོམ་གྱི་ས་མཚམས་སུ་ཡོད་པའི་ཧོར་ཞེས་པའི་རི་བོར་བསླེབས་སོ། དེར་གཙོ་བོ་དཀོན་མཆོག་གིས་མོ་ཤེ་དང་ཨ་རོན་གཉིས་ལ་གསུངས་པ།

²⁴ ངས་ཨིསི་རཱཨེལ་པ་རྣམས་ལ་སྤྲོད་རྒྱུའི་དམ་བཅའ་བྱས་པའི་ཡུལ་དེར་འཛུལ་ཐུབ་མི་ཡོང་། ཁོ་ནི་ཤི་བར་འགྱུར། གང་ལགས་ཟེར་ན། མེ་རི་བཱ་རུ་ཁྱོད་གཉིས་ཀྱིས་ངའི་བཀའ་ལ་ངོ་ལོག་བྱས་པས་སོ།

²⁵ ཨ་རོན་དང་ཁོའི་བུ་ཨེ་ལི་ཟར་རི་བོ་ཧོར་དུ་འཁྲིད་དེ།

²⁶ དེར་ཨ་རོན་ལས་བླ་མའི་གོས་དེ་མར་ཕུད་དེ་ཨེ་ལི་ཛར་ལ་གཡོགས་དགོས་སོ། དེ་རྗེས་ཨ་རོན་གནས་དེར་ཤི་བར་འགྱུར།

²⁷ མོ་ཤེས་གཙོ་བོ་དཀོན་མཆོག་གིས་བཀའ་གང་གནང་བ་བཞིན་བྱས་ཏེ། ཨིསི་རཱཨེལ་པའི་མི་སྡེ་ཡོངས་རྫོགས་ཀྱིས་བལྟ་བཞིན་རི་བོ་ཧོར་དུ་ཕྱིན་ནོ།

²⁸ དེར་མོ་ཤེས་བླ་མ་ཨ་རོན་གྱི་གོས་དེ་མར་ཕུད་ནས་ཨེ་ལི་ཛར་ལ་གཡོག་སོ། དེ་རྗེས་རི་བོའི་རྩེ་རུ་ཨ་རོན་ཚེ་ལས་འདས་ཤིང་། མོ་ཤེ་དང་ཨེ་ལི་ཟར་གཉིས་མར་ཕྱིར་ལོག་བབསོ།

²⁹ ཨ་རོན་གྲོངས་པའི་སྐོར་མི་སྡེ་ཡོངས་ཀྱི་ཧ་གོ་ནས་ཉིན་ཞག་གསུམ་བཅུ་བར་དུ་མྱ་ངན་བསྲུངས་སོ༎