གྲངས་ཀ 19 - Tibetan Old Testament 2011

བ་ཕྱུགས་དམར་པོའི་གོ་ཐལ།

¹ གཙོ་བོ་དཀོན་མཆོག་གིས་མོ་ཤེ་དང་ཨ་རོན་ལ།

² གཤམ་གསལ་བཀའ་ཁྲིམས་རྣམས་ཨིསི་རཱཨེལ་པ་རྣམས་ལ་སྤྲོད་དགོས་ཅེས་གསུངས་སོ། དེ་སྔ་ནམ་ཡང་གཉའ་ཤིང་མ་བཀལ་བའི་བ་ཕྱུགས་དམར་པོ་སྐྱོན་མེད་པ་ཞིག་འཁྲིད་ཡོང་ནས།

³ བླ་མ་ཨེ་ལི་ཛར་ལ་སྤྲོད་དགོས། དེ་ནི་སྒར་གྱི་ཕྱི་རོལ་དུ་འཁྲིད་ནས་ཨེ་ལི་ཛར་གྱི་མདུན་དུ་གསོད་དགོས་སོ།

⁴ དེ་རྗེས་ཨེ་ལི་ཛར་གྱིས་ཁྲག་ཏོག་ཙམ་ཞིག་བླངས་ནས་དབུ་གུར་དམ་པའི་མདུན་ངོས་སུ་མཛུབ་མོས་ལན་བདུན་གཏོར་དགོས་པ་དང་།

⁵ བླ་མ་གྱི་མདུན་དུ་བ་ཕྱུགས་དེའི་པགས་པ་དང་། ཤ་ཁྲག་དང་རྒྱུ་མ་དང་བཅས་པ་མེར་བསྲེག་གཏོང་དགོས།

⁶ དེ་རྗེས་བླ་མས་འགྱམ་ཤིང་དང་། ཧི་སོབ་ཅེས་པའི་ཤིང་གི་ཡལ་ག་ཞིག་དང་སྐུད་པ་དམར་པོ་ཞིག་མེའི་དཀྱིལ་དུ་དབྱུགས་དགོས།

⁷ དེ་རྗེས་ཁོས་རང་གི་གྱོན་གོས་ཁྲུས་ནས་སོ་སོའི་ཐོག་ཏུ་ཆུ་བླུགས་ཤིང་སྒར་གྱི་ནང་དུ་འཛུལ་ཆོག་མོད། འོན་ཀྱང་དགོང་དྲོ་བར་དུ་ཁོ་ནི་མི་གཙང་བར་རྩིས་དགོས་པ་ཡིན་ནོ།

⁸ དེ་བཞིན་མེར་བསྲེག་གཏོང་མཁན་དེས་ཀྱང་རང་གི་གྱོན་གོས་ཁྲུས་ནས་སོ་སོའི་ཐོག་ཏུ་ཆུ་བླུགས་དགོས། འོན་ཀྱང་ཁོ་ལའང་དགོང་དྲོ་བར་དུ་མི་གཙང་བར་རྩིས་དགོས་སོ།

⁹ དག་འབྱངས་བྱས་པའི་མི་གཙང་མ་ཞིག་གིས་བ་ཕྱུགས་སྲེག་པའི་གོ་ཐལ་དེ་བསྡུས་ནས་སྒར་གྱི་ཕྱི་རོལ་དུ་དག་འབྱངས་བྱས་པའི་གནས་གཙང་མ་ཞིག་ཏུ་བཞག་དགོས། དེ་ནི་ཨིསི་རཱཨེལ་པ་ཚོས་དག་འབྱངས་ཀྱི་མཆོད་པར་མཁོ་བའི་ཁྲུས་ཆུ་བཟོ་བར་བེད་སྤྱོད་གཏོང་རྒྱུ་ཡིན་ཅིང་། ཆོ་ག་དེ་ནི་སྡིག་པ་འབྱངས་པའི་ཆེད་དུ་བཤམས་དགོས་པ་ཡིན་ནོ།

¹⁰ གོ་ཐལ་བསྡུས་མཁན་དེས་རང་གི་གྱོན་གོས་འཁྲུ་དགོས་མོད། འོན་ཀྱང་དེ་ནི་དགོང་དྲོ་བར་དུ་མི་གཙང་བར་བརྩིས་དགོས་སོ། ཁྲིམས་སྲོལ་དེ་ནི་ད་ཕྱིན་དུས་གཏན་དུ་ཨིསི་རཱཨེལ་པ་དང་དེ་ཚོའི་ཁྲོད་དུ་གནས་པའི་ཕྱི་རྒྱལ་བ་ཚོས་བརྩིས་སྲུང་བྱེད་དགོས་པ་ཡིན་ནོ༎

ཕུང་པོར་འཆང་བ།

¹¹ ཕུང་པོར་འཆང་བའི་མི་སུ་ཞིག་ཉིན་ཞག་བདུན་བར་དུ་མི་གཙང་བར་གནས་རྒྱུ་ཡིན།

¹² ཁོས་དག་འབྱངས་བྱེད་པའི་ཆུ་བླངས་ནས་ཉིན་ཞག་གསུམ་པ་དང་བདུན་པའི་ཐོག་ཏུ་རང་ཉིད་ཁྲུས་ཏེ་དག་འབྱངས་བྱེད་དགོས། དེ་རྗེས་ཁོ་གཙང་བར་འགྱུར་རྒྱུ་ཡིན་མོད། འོན་ཀྱང་ཁོས་ཉིན་ཞག་གསུམ་པ་དང་བདུན་པའི་ཐོག་ཏུ་རང་ཉིད་འཁྲུས་ཏེ་དག་འབྱངས་མ་བྱས་པ་ཡིན་ན་ཁོ་གཙང་བར་མི་འགྱུར་རོ།

¹³ སུ་ཞིག་གིས་ཕུང་པོར་ལག་པ་འཆང་བའི་རྗེས་སུ་རང་ཉིད་དག་འབྱངས་མ་བྱས་ན་ཁོ་མི་གཙང་བར་བརྩིས་དགོས་རྒྱུ་ཡིན། གང་ལགས་ཟེར་ན། དེའི་སྟེང་དུ་དག་འབྱངས་བྱས་པའི་ཁྲུས་ཆུ་དེ་མ་བླུགས་པའི་རྐྱེན་གྱིས་གཙོ་བོ་དཀོན་མཆོག་གི་དབུ་གུར་དམ་པ་དེ་མི་གཙང་བར་བཟོས་པ་ཡིན་པས། མི་དེ་ནི་གཙོ་བོ་དཀོན་མཆོག་གི་མི་འབངས་སུ་གཏོགས་པར་མི་འགྱུར་རོ།

¹⁴ གལ་ཏེ་སུ་ཞིག་གུར་གྱི་ནང་དུ་ཤི་བ་ཡིན་ན། སྐབས་དེར་གུར་ནང་ཡོད་པའི་མི་དང་དེ་བཞིན་ཕྱི་ནས་གུར་དེའི་ནང་ཡོང་མཁན་རྣམས་ཉིན་ཞག་བདུན་བར་དུ་མི་གཙང་བར་བརྩིས་དགོས་སོ།

¹⁵ གུར་དེའི་ནང་ཁབ་གཅོད་མེད་པའི་སྣོད་ཆས་ཚང་མ་མི་གཙང་བར་འགྱུར་རྒྱུ་ཡིན།

¹⁶ གལ་ཏེ་ཁང་པའི་ཕྱི་རོལ་དུ་མི་བསད་པ་ཞིག་གམ་ཡང་ན་རང་བཞིན་གྱིས་ཤི་བའི་རོ་ལ་འཆང་བའམ། དེ་བཞིན་མིའི་རུས་པའམ་དུར་སོགས་ལ་འཆང་བ་ཡིན་ན། མི་དེ་ཉིན་ཞག་བདུན་བར་དུ་མི་གཙང་བར་བརྩིས་དགོས་པ་ཡིན་ནོ།

¹⁷ མི་གཙང་བ་དེ་དག་པར་བྱེད་པའི་ཕྱིར་དུ་སྡིག་སེལ་གྱི་སྦྱིན་སྲེག་ཏུ་ཕུལ་བའི་བ་ཕྱུགས་དམར་པོའི་གོ་ཐལ་དེ་ནས་ཏོག་ཙམ་ཞིག་བླངས་ནས་སྣོད་ཅིག་གི་ནང་དུ་བླུགས་ཏེ། དེར་ཆུ་གཙང་མ་བླུགས་དགོས།

¹⁸ དང་པོར་དག་འབྱངས་བྱེད་པའི་མི་གཙང་མ་ཞིག་གིས་ཧི་སོབ་ཞེས་པའི་ཤིང་གི་ཡལ་ག་གཅིག་ཆུའི་ནང་བཅུག་ནས། གུར་དང་དེའི་ནང་ཡོད་པའི་དངོས་རིགས་དང་མི་རྣམས་ཀྱི་ཁར་གཏོར་དགོས། གཉིས་པར་དག་འབྱངས་བྱེད་པའི་མི་གཙང་མ་དེས་མིའི་རུས་པའམ་ཕུང་པོ་དང་དུར་སར་འཆང་བའི་མི་དེའི་ཐོག་ཡང་གཏོར་དགོས།

¹⁹ ཉིན་ཞག་གསུམ་པ་དང་བདུན་པའི་ཉིན་མོར་དག་འབྱངས་བྱེད་པའི་མི་གཙང་མ་དེས་མི་གཙང་བའི་མི་དེའི་ཐོག་ཏུ་གཏོར་ནས། ཉིན་ཞག་བདུན་པའི་ཐོག་ཏུ་མི་དེ་ལ་དག་འབྱངས་བྱེད་དགོས། ཁོས་རང་གི་གྱོན་གོས་འཁྲུད་དེ་སོ་སོའི་ཐོག་ཏུ་ཁྲུས་ཆུ་བླུགས་ནས་ཉི་མ་ནུབ་མཚམས་སུ་ཁོ་གཙང་བར་འགྱུར་རྒྱུ་ཡིན།

²⁰ མི་གཙང་བའི་མི་ཞིག་གིས་ཆོ་ག་ལྟར་རང་ཉིད་དག་འབྱངས་མ་བྱེད་བར་དུ་མི་གཙང་བར་གནས་དགོས། གང་ལགས་ཟེར་ན། དག་འབྱངས་བྱེད་པའི་ཁྲུས་ཆུ་དེ་ཁོའི་ཐོག་ཏུ་མ་བླུགས་པ་ཡིན་པས་ཕྱིར་རོ། ཁོས་གཙོ་བོ་དཀོན་མཆོག་གི་དབུ་གུར་དམ་པ་དེ་མི་གཙང་བར་བཟོས་པའི་རྐྱེན་གྱིས་ཁོ་ནི་དཀོན་མཆོག་གི་མི་འབངས་སུ་བརྩི་བར་མི་འགྱུར།

²¹ ཁྲིམས་སྲོལ་དེ་ནི་ཁྱོད་ཚོས་དུས་རྒྱུན་དུ་སྲུང་དགོས་སོ། དག་འབྱངས་བྱེད་པའི་ཁྲུས་ཆུ་གཏོར་མཁན་དེས་ཀྱང་རང་གི་གྱོན་གོས་སོགས་འཁྲུ་དགོས་པ་ཡིན། དག་འབྱངས་བྱེད་པའི་ཁྲུས་ཆུ་དེར་ལག་པ་འཆང་མཁན་དེ་ནི་དགོང་དྲོ་བར་མི་གཙང་བར་གནས་རྒྱུ་ཡིན།

²² སྐྱེ་བོ་མི་གཙང་བ་ཞིག་གིས་རེག་པའི་དངོས་པོ་ཚང་མ་མི་གཙང་བར་འགྱུར་རྒྱུ་ཡིན་པ་མ་ཟད། དེ་དག་ལ་འཆང་བ་ཡིན་ན། དེ་ནི་དགོང་དྲོ་བར་དུ་མི་གཙང་བར་གནས་རྒྱུ་ཡིན༎