གྲངས་ཀ 17 - Tibetan Old Testament 2011

ཨ་རོན་གྱི་འཁར་རྒྱུག།

¹ གཙོ་བོ་དཀོན་མཆོག་གིས་མོ་ཤེ་ལ་གསུངས་པ།

² སྡེ་རིགས་སོ་སོའི་འགོ་ཁྲིད་རེ་ནས་འཁར་རྒྱུག་རེར་བརྩིས་པས་འཁར་རྒྱུག་བཅུ་གཉིས་ཁྱོད་ལ་སྤྲོད་དགོས་ཅེས་ཨིསི་རཱཨེལ་མི་དམངས་ལ་སྨྲོས་ཤིག མི་རེ་རེས་སོ་སོའི་འཁར་རྒྱུག་གི་ཐོག་ཏུ་རང་གི་མིང་བྲིས་དགོས།

³ ལེ་ཝིའི་ཁོངས་གཏོགས་ཀྱི་འཁར་རྒྱུག་ལ་ཨ་རོན་གྱི་མིང་བྲིས་དགོས། དེ་བཞིན་སྡེ་རིགས་སོ་སོའི་འགོ་འཁྲིད་རེར་འཁར་རྒྱུག་རེ་བྱུང་དགོས་པ་ཡིན།

⁴ ང་གནས་པའི་དབུ་གུར་དམ་པར་འཁར་རྒྱུག་དེ་ཚོ་འཁྱེར་ནས་ང་གཉིས་ཐུགས་འཕྲད་བྱེད་སའི་དམ་བཅའི་སྒྲོམ་གྱི་མདུན་དུ་ཞོགས་ཅིག

⁵ དེ་ནས་ངས་འདེམས་བསྐོ་བྱད་པའི་མི་དེའི་འཁར་རྒྱུག་ནས་ཉུ་གུ་སྐྱེས་པར་འགྱུར། དེ་ལྟར་བྱས་པའི་སྒོ་ནས་ཨིསི་རཱཨེལ་པ་ཚོས་ཁྱོད་ལ་སྐྱོན་བརྗོད་ཡང་ཡང་བྱས་པ་དེའང་ངས་བཀག་འགོག་བྱེད་རྒྱུ་ཡིན།

⁶ དེ་ནས་མོ་ཤེས་ཨིསི་རཱཨེལ་པ་རྣམས་ལ་གཏམ་གླེང་བྱས་པ་དང་། དེ་ཚོའི་འགོ་འཁྲིད་རེ་རེས་འཁར་རྒྱུག་རེ་བརྩིས་པས་སྡེ་རིགས་བཅུ་གཉིས་ནས་འཁར་རྒྱུག་བཅུ་གཉིས་མོ་ཤེ་ལ་ཕུལ་ལོ། ཨ་རོན་གྱི་འཁར་རྒྱུག་ཡང་དེ་ཚོ་དང་མཉམ་དུ་ཡོད་དོ།

⁷ དེ་ནས་མོ་ཤེས་འཁར་རྒྱུག་ཚང་མ་དབུ་གུར་དམ་པར་གཙོ་བོ་དཀོན་མཆོག་གི་དམ་བཅའི་སྒྲོམ་གྱི་མདུན་དུ་བཞག་གོ

⁸ དེའི་སང་ཉིན་མོ་ཤེ་དབུ་གུར་དམ་པར་བཅར་བས། ལེ་ཝིའི་སྡེ་རིགས་ནས་ཨ་རོན་གྱི་འཁར་རྒྱུག་དེར་ཉུ་གུ་སྐྱེས་པ་མཐོང་ངོ། དེར་ཐེའུ་དང་མེ་ཏོག་དང་སྟར་ཀ་སྨིན་པ་སོགས་མཐོང་ངོ་།

⁹ མོ་ཤེས་འཁར་རྒྱུག་ཚང་མ་འཁྱེར་ནས་ཨིསི་རཱཨེལ་པ་རྣམས་ལ་བསྟན་པས། དེར་གང་བྱུང་བ་དེ་དག་ཁོ་ཚོས་མཐོང་ནས། འགོ་འཁྲིད་སོ་སོས་རང་རང་གི་འཁར་རྒྱུག་རྣམས་བླངས་སོ།

¹⁰ གཙོ་བོ་དཀོན་མཆོག་གིས་མོ་ཤེ་ལ་གསུངས་པ། ཨ་རོན་གྱི་འཁར་རྒྱུག་དེ་དམ་བཅའི་སྒྲོམ་གྱི་མདུན་དུ་བཞག་དགོས། ངོ་ལོག་བརྒྱབ་མཁན་ཨིསི་རཱཨེལ་པ་ཚོས་རྙོག་གཏམ་ཤོད་རྒྱུ་དེ་མཚམས་འཇོགས་མ་བྱེད་ན། དེ་ཚོ་ངེས་པར་ཤི་དགོས་རྒྱུའི་ཟོན་བརྡའི་ཚུལ་དུ་བཞག་དགོས་པ་ཡིན་ནོ།

¹¹ གཙོ་བོ་དཀོན་མཆོག་གིས་ཇི་ལྟར་བཀའ་གནང་བ་བཞིན་མོ་ཤེས་ཚང་མ་བྱས་སོ།

¹² ཨིསི་རཱཨེལ་པ་ཚོས་མོ་ཤེས་ལ་སྨྲས་པ། དེ་ལྟར་ཡིན་ན་ང་ཚོ་མེད་པར་སོང་བཞག།

¹³ དབུ་གུར་དམ་པའི་ཉེ་འགྲམ་དུ་ཡོང་བ་ཙམ་གྱིས་ཤི་དགོས་རྒྱུ་ཡིན་ན། ང་ཚོ་ཚང་མ་ཤི་ཚར་བ་དང་ཁྱད་མེད་པ་ཡིན་ནོ༎