གྲངས་ཀ 13 - Tibetan Old Testament 2011

སོ་ཉུལ་བ་རྣམས།

¹ གཙོ་བོ་དཀོན་མཆོག་གིས་མོ་ཤེ་ལ།

² ཨིསི་རཱཨེལ་གྱི་སྡེ་རིགས་བཅུ་གཉིས་ལས་འགོ་བྱེད་རེ་རེ་འདེམས་སྒྲུག་བྱས་ནས། ཨིསི་རཱཨེལ་པ་རྣམས་ལ་སྤྲོད་རྒྱུ་ཡིན་པའི་ཡུལ་ཀ་ནན་དུ་དེ་དག་སོ་ཉུལ་བའི་ཚུལ་དུ་གཏོང་དགོས་ཅེས་གསུངས་པ་དང་།

^3-15 དཀོན་མཆོག་གིས་བཀའ་བསྒོས་གནང་བ་བཞིན་མོ་ཤེས་པ་རན་གྱི་འབྲོག་སྟོང་ནས་གཤམ་གསལ་འགོ་བྱེད་རྣམས་བཏང་བ་ཡིན་ནོ། སྡེ་རིགས འགོ་དཔོན རུ་བྷེན ཛ་ཀུར་གྱི་བུ་ཤམ་མུ་ཨ སིམ་ཨོན ཧོ་རིའི་བུ་ཤ་ཕཏ ཡ་ཧུ་དཱ ཡེ་ཕུ་ནཱེའི་བུ་ཀ་ལེབ ཨི་ས་ཀར ཡོ་སེབ་ཀྱི་བུ་ཨི་གྷལ ཨེཕ་ར་ཡིམ ནུན་གྱི་བུ་ཧོ་ཤེ བྷེན་ཡ་མིན ར་ཕུའི་བུ་པལ་ཏི ཛེ་བུ་ལུན སོ་དྷིའི་བུ་གྷ་དྷི་ཨེལ མ་ནསེ་སཱེ སུ་སིའི་བུ་གྷ་ཌི དཱན གྷེ་མལ་ལིའི་བུ་ཨམ་མི་ཨེལ ཨ་ཤེར མི་ཀ་ཨེལ་གྱི་བུ་སེ་ཐུར ནཕ་ཏ་ལི ཝོཕ་སིའི་བུ་ནཱ་བྷི གྷཌ མ་ཀིའི་བུ་གྷུ་ཨེལ

སྡེ་རིགས འགོ་དཔོན

¹⁶ ཡུལ་དེའི་གསང་བ་རྟོགས་ཕྱིར་མོ་ཤེས་བཏང་བའི་སོ་ཉུལ་བ་རྣམས་ནི་གོང་གསལ་ལྟར་ཡིན་ནོ། ཁོས་ནུན་གྱི་བུ་ཧོ་ཤེའི་མིང་དེ་བརྗེ་ནས་ཡོ་ཤུ་ཨ་ཞེས་བཏགས་སོ།

¹⁷ མོ་ཤེས་མི་དེ་ཚོ་གཏོང་སྐབས་དེ་དག་ལ་སྨྲས་པ། ཁྱོད་ཚོ་འདི་ནས་བྱང་ཕྱོགས་སུ་ཕྱིན་ནས་ཀ་ནན་ཡུལ་གྱི་ལྷོ་ངོས་ནས་འཛུལ་ཏེ། རི་བརྒྱུད་ས་ཁུལ་ཁག་ཏུ་ཕྱིན་ནས།

¹⁸ ཡུལ་དེ་གང་འདྲ་ཞིག་ཡོད་པ་དང་། དེར་མི་མང་ཉུང་ཇི་ཙམ་ཡོད་པ་དང་། དེ་ཚོར་སྟོབས་ཤུགས་ཆེ་ཆུང་གང་འདྲ་ཡོད་མེད་དང་།

¹⁹ ས་གཞི་བཟང་ངན་གང་འདྲ་ཡོད་མེད་དང་། དེ་བཞིན་ཡུལ་དེའི་མི་རྣམས་ལྕགས་རི་མེད་པའི་གྲོང་ཁྱེར་རམ། ཡང་ན་ལྕགས་རི་བཙན་པོས་བསྐོར་བའི་གྲོང་ཁྱེར་ཁག་ཏུ་སྡོད་ཀྱི་ཡོད་དམ།

²⁰ ས་ལུད་འཛོམས་པོ་དང་། དེར་ཤིང་ནགས་སོགས་ཡོད་མེད་བཅས་བལྟ་དགོས་པ་མ་ཟད། ཡུལ་དེར་སྐྱེས་པའི་ཤིང་འབྲས་འགའ་ཤས་ངེས་པར་དུ་འཁྱེར་ཡོང་དགོས། (དེ་དུས་ནི་རྒུན་འབྲུམ་སྨིན་རན་པའི་ནམ་དུས་ཡིན་ནོ།)

²¹ དེ་ནས་མི་དེ་ཚོ་བྱང་ཕྱོགས་སུ་ཕྱིན་ཏེ། ཡུལ་དེའི་ལྷོ་ཕྱོགས་སུ་ཡོད་པའི་ཛིན་ཞེས་པའི་འབྲོག་སྟོང་ནས་འཛུལ་ཏེ། བྱང་ཕྱོགས་སུ་ཧ་མད་ཞེས་པའི་ལ་མོའི་འགྲམ་དུ་ཡོད་པའི་ས་གནས་རེ་ཧོབ་བར་དུ་ཕྱིན་ནས། ཡུལ་དེའི་གསང་བའི་གནས་ཚུལ་རྣམས་རྟོགས་ཞིབ་བྱས་སོ།

²² དེ་ཚོས་ཐོག་མར་ཡུལ་དེའི་ལྷོ་ཕྱོགས་ནས་འཛུལ་ཏེ་ཧེབ་རོན་དུ་སླེབས་ཤིང་། དེར་ཨ་ན་ཀིམ་ཞེས་པའི་མི་བོ་ཆེའི་རིགས་བརྒྱུད་ཀྱི་སྡེ་རིགས་ཨ་ཧི་མན་དང་། ཤེ་ཤའི་དང་། ཏལ་མཨེ་བཅས་གནས་སྡོད་བྱེད་ཀྱི་ཡོད་དོ། (ཨི་ཇིབ་ཀྱི་གྲོང་ཁྱེར་ཛོ་ཨན་མ་ཆགས་པའི་ལོ་བདུན་གྱི་སྔོན་ནས་ཧེབ་རོན་གྲོང་ཁྱེར་དེ་ཆགས་ཟིན་ཡོད་དོ།)

²³ དེ་ནས་ཁོ་ཚོ་ཨེཤ་ཀོལ་གྱི་ལུང་གཤོང་དུ་བསླེབས་ནས་དེར་རྒུན་འབྲུམ་ཆག་པ་ཡོད་པའི་རྒུན་ཤིང་གི་ཡལ་ག་ཞིག་བཅད་པ་དང་། རྒུན་འབྲུམ་གྱི་ཆག་པ་དེ་ནི་ལྗིད་དྲགས་པས་རྒྱུག་པ་གཅིག་གི་ཁར་མི་གཉིས་ཀྱིས་འཁྱེར་དགོས་བྱུང་ངོ་། ཡང་དེ་ཚོས་སེ་འབྲུ་དང་སེ་ཡབ་ཤིང་གི་འབྲས་བུའང་འཁྱེར་ཡོང་བ་ཡིན་ནོ།

²⁴ (ས་གནས་དེའི་མིང་ལ་ཨེཤ་ཀོལ་གྱི་ལུང་གཤོང་ཞེས་བཏགས་སོ། གང་ལགས་ཟེར་ན། དེར་ཨིསི་རཱཨེལ་པ་ཚོས་རྒུན་འབྲུམ་ཡོད་པའི་ཤིང་ཡལ་ག་བཅད་པས་ཕྱིར་རོ།)

²⁵ ཉིན་ཞག་བཞི་བཅུ་བར་དུ་ཡུལ་དེའི་གསང་བ་རྟོགས་ཞིབ་བྱས་ནས་སོ་ཉུལ་བ་རྣམས་ཕྱིར་ལོག་བྱས་ཏེ། པ་རན་གྱི་འབྲོག་སྟོང་དུ།

²⁶ མོ་ཤེ་དང་། ཨ་རོན་དང་ཨིསི་རཱཨེལ་པ་ཡོངས་རྫོགས་གནས་བཞིན་ཡོད་པའི་ཀ་དྷེཤི་ཟེར་བའི་གནས་དེར་བསླེབས་ཏེ། དེ་ཚོས་གང་མཐོང་བའི་སྐོར་ལ་སྙན་གསན་ཞུས་པ་དང། དེ་ཚོས་འཁྱེར་ཡོང་བའི་ཤིང་འབྲས་དེའང་བསྟན་པ་ཡིན་ནོ།

²⁷ དེ་ཚོས་མོ་ཤེ་ལ་སྨྲས་པ། ང་ཚོས་ཡུལ་དེར་ཕྱིན་ནས་རྟོགས་ཞིབ་ལེགས་པར་བྱས་པ་ཡིན། ཡུལ་དེ་ནི་ཕྱུག་པོ་དང་ས་ལུད་འཛོམས་པོ་ཞིག་འདུག ཡང་ཡུལ་དེའི་ཤིང་འབྲས་འགའ་ཤས་ང་ཚོས་འདིར་འཁྱེར་ཡོད།

²⁸ འོན་ཀྱང་དེར་གནས་སྡོད་བྱེད་མཁན་རྣམས་ནི་སྟོབས་ཤུགས་ཆེ་བ་མ་ཟད། དེ་ཚོའི་གྲོང་ཁྱེར་རྣམས་ནི་ཧ་ཅང་རྒྱ་ཆེ་བ་དང་ལྕགས་རི་བཙན་པོ་དག་གིས་བསྐོར་ནས་འདུག ང་ཚོས་དེར་མི་བོ་ཆེའི་རིགས་བརྒྱུད་རྣམས་ཀྱང་མཐོང་བྱུང་།

²⁹ ཡུལ་དེའི་ལྷོ་ཕྱོགས་སུ་ཨ་མ་ལེག་པ་རྣམས་གནས་སྡོད་བྱེད་ཀྱི་ཡོད་པ་དང་། ཧི་ཏི་པ་དང་། ཡ་བུ་ཟི་པ། ཨ་མོར་པ་རྣམས་རི་བརྒྱུད་ཁག་ཏུ་གནས་ཤིང་། དེ་བཞིན་ཀ་ནན་པ་རྣམས་ནི་མེ་ཌི་ཊ་རེ་ནི་ཡན་རྒྱ་མཚོའི་འགྲམ་གྱི་གཙང་པོ་ཡོར་དན་གྱི་འགྲམ་དུ་གནས་སྡོད་བྱེད་ཀྱི་འདུག

³⁰ མོ་ཤེ་ལ་རྙོག་གཏམ་བཤད་མཁན་རྣམས་ལ་ཀ་ལེབ་ཀྱིས་ཁ་ཁག་སྡད་བཅུག་སྨྲས་པ། ང་ཚོས་ད་ལྟ་ཉིད་དུ་འཐབ་འཛིང་བྱས་ནས་ཡུལ་དེ་ལེན་དགོས། ཡུལ་དེ་དབང་དུ་འདུ་བའི་སྟོབས་ཤུགས་ནི་ང་ཚོ་ལ་ཡོད།

³¹ འོན་ཀྱང་ཀ་ལེབ་དང་མཉམ་དུ་ཕྱིན་པའི་མི་གཞན་ཚོས་ཁོ་ཚོར་འཐབ་རྒོལ་བྱེད་པའི་སྟོབས་ཤུགས་ང་ཚོ་ལ་མེད། དེ་གའི་མི་རྣམས་ནི་ང་ཚོ་ལས་སྟོབས་ཤུགས་ཆེ་བ་འདུག་ཅེས་སྨྲས་སོ།

³² རང་གིས་ཉམས་ཞིབ་བྱས་ནས་ཡོང་བའི་ཡུལ་དེའི་སྐོར་ལ་དེ་ཚོས་ཨིསི་རཱཨེལ་པ་རྣམས་ཀྱི་ཁྲོད་དུ་རྫུན་གཏམ་སྤེལ་ཞིང་སྨྲས་པ། ཡུལ་དེར་རང་གི་ཡུལ་མི་རྣམས་ལའང་ལྡང་ངེས་བཞིན་པའི་སྟོན་ཐོག་སྐྱེས་ཀྱི་མེད་པ་དང་། དེར་ང་ཚོས་མཐོང་བའི་མི་ཚང་མ་གཟུགས་ཚད་རིང་པོ་ཤ་སྟག་ཡོད་པ་དང་།

³³ དེར་ང་ཚོས་ཨ་ནག་གི་རིགས་བརྒྱུད་ནས་ཡིན་པའི་མི་བོ་ཆེ་རྣམས་མཐོང་བྱུང་། དེ་ཚོའི་མདུན་དུ་ང་ཚོ་ནི་ཚལ་འབུ་ཞིག་དང་འདྲ་བའི་འཚོར་སྣང་བྱུང་བ་མ་ཟད། ཁོ་ཚོས་བལྟ་སྣང་དུའང་ང་ཚོ་དེ་བཞིན་མཐོང་སྲིད་པ་ཡིན་ནོ༎