གྲངས་ཀ 12 - Tibetan Old Testament 2011

མིར་ཡམ་ལ་ཉེས་ཆད་ཕོག་པ།

¹ མོ་ཤེས་ཀུཤ་ཡུལ་གྱི་བུད་མེད་ཅིག་དང་ཆང་ས་བརྒྱབ་ཡོད་པ་དང་། མིར་ཡམ་དང་ཨ་རོན་གཉིས་ཀྱིས་ཁོ་ལ་སྐྱོན་བརྗོད་བྱས་སོ།

² དེ་ཚོས་སྨྲས་པ། གཙོ་བོ་དཀོན་མཆོག་གིས་མོ་ཤེ་བརྒྱུད་ནས་གཅིག་པུར་གསུང་གླེང་མཛད་པ་ཡིན་ནམ། ང་ཚོའི་བརྒྱུད་ནས་ཀྱང་གསུང་གླེང་མཛད་པ་མ་ཡིན་ནམ། ཁོ་ཚོས་གང་སྨྲས་པ་དེ་གཙོ་བོ་དཀོན་མཆོག་གིས་གསན་པ་ཡིན་ནོ།

³ (མོ་ཤེ་འཛམ་གླིང་ཡོངས་སུ་མི་ཉམ་ཆུང་ཞིག་ཡིན་ནོ། ཁོ་ལས་ཉམ་ཆུང་ཞིག་ས་གཞིའི་ནང་གཞན་སུའང་མེད་པ་ཡིན་ནོ།)

⁴ དེ་མ་ཉིད་དུ་གཙོ་བོ་དཀོན་མཆོག་གིས་མོ་ཤེ་དང་། ཨ་རོན་དང་མིར་ཡམ་བཅས་ལ་ཁྱོད་ཚོ་གསུམ་ཀ་ང་གནས་པའི་དབུ་གུར་དམ་པར་ཡོང་དགོས་ཅེས་གསུངས་པ་བཞིན། ཁོ་ཚོ་དེར་བཅར་ཞིང་།

⁵ ཡང་གཙོ་བོ་དཀོན་མཆོག་ནི་སྤྲིན་གྱི་ཀ་བ་ཞིག་གི་ནང་མར་ཕེབས་ཏེ་དབུ་གུར་དམ་པའི་གཟིམས་སྒོའི་རྩར་བཞེངས་ནས། ཁོང་གིས་ཨ་རོན་མིར་ཡམ་ཞེས་བོས་པ་གནང་བ་དང་། དེ་གཉིས་མདུན་དུ་སོང་བ།

⁶ དེ་ནས་གཙོ་བོ་དཀོན་མཆོག་གིས་གསུངས་པ། ངས་གང་བཤད་པ་དེ་ལ་ཉོན་ཅིག། ཁྱོད་ཚོའི་ཁྲོད་དུ་ལུང་སྟོན་པ་རྣམས་ཡོད་སྐབས། ངས་ཞལ་གཟིགས་ཀྱི་སྒོ་ནས་ཁོ་ཚོར་རང་ཉིད་མངོན་པར་བྱེད་ཅིང་། རྨི་ལམ་དུ་དེ་ཚོར་གཏམ་གླེང་བྱེད་མོད།

⁷ འོན་ཀྱང་ངས་རང་གི་ཞབས་ཏོག་པ་མོ་ཤེ་དང་གཏམ་གླེང་བྱེད་སྟངས་ནི་དེ་ལྟར་མ་ཡིན་ནོ། ངས་ཁོ་ལ་ངའི་མི་འབངས་ཨིསི་རཱཨེལ་ཡོངས་ཀྱི་དོ་དམ་པར་བསྐོས་པ་ཡིན་པས།

⁸ དེའི་ཕྱིར་ངས་ཁོ་དང་ཐད་ཀར་གཏམ་གླེང་བྱེད་པ་ཡིན། གསང་གཏམ་སོགས་མ་ཡིན། ཁོས་ངའི་དབྱིབས་ཀྱང་མཐོང་ཡོད་དོ། ཁྱོད་ཚོས་ངའི་ཞབས་ཏོག་པ་མོ་ཤེ་ལ་རྒོལ་གཏམ་ཇི་ལྟརབྱེད་ནུས་ཅེས་གསུངས་སོ།

⁹ དེ་ནས་གཙོ་བོ་དཀོན་མཆོག་ཁོ་ཚོ་དང་མཉམ་དུ་ཐུགས་ཁྲོས་ཤིང་ཕར་གཤེགས་པ་དང་།

¹⁰ དབུ་གརུ་དམ་པའི་སྟེང་ནས་སྤྲིན་དེའང་ཡར་ཕྱིན་ནོ། མིར་ཡམ་ལ་གློ་བུར་དུ་པགས་ནད་དྲག་པོ་ཞིག་ཐེབས་ནས་ཁ་བ་ལྟར་དཀར་པོར་འགྱུར་རོ། ཨ་རོན་གྱིས་མི་རི་ཡམ་ལ་པགས་ནད་དྲག་པོས་ཟིན་ཡོད་པ་དེ་མཐོང་ནས།

¹¹ ཁོས་མོ་ཤེ་ལ། ཀྱེ་གཙོ་བོ། ང་ཚོས་རྨོངས་པའི་དབང་གིས་བྱས་པའི་སྡིག་པའི་ཉེས་ཆད་དེ་ང་ཚོའི་འཁྱེར་མ་དགོས་པ་ཅིག་གནང་རོགས་གནང་།

¹² མོ་ནི་སྐྱེས་དུས་ནས་ཤི་བ་དང་འདྲ་བར་གཟུགས་པོ་ཕྱེད་ཀ་རུལ་བའི་གནས་སྟངས་འདིར་བཞག་པ་མ་གནང་རོགས་གནང་ཞེས་ཞུས་སོ།

¹³ དེར་བརྟེན་མོ་ཤེས་གཙོ་བོ་དཀོན་མཆོག་ལ་ཞུ་འབོད་བྱེད་པ། ཀྱེ་དཀོན་མཆོག། མོ་ལ་དྲག་གསོ་བ་གནང་རོགས་གནང་།

¹⁴ དེའི་ལན་དུ་གཙོ་བོ་དཀོན་མཆོག་གིས། གལ་ཏེ་མོའི་ཕས་མོའི་གདོང་ལ་མཚིལ་མ་གཏོར་བ་ཡིན་ན། མོ་ནི་ངོ་ཚ་དགོས་པའི་གནས་སྟངས་དེའི་ནང་དུ་ཉིན་ཞག་བདུན་བར་དུ་གནས་དགོས། དེ་བས་ན། མོ་ལ་ཉིན་ཞག་བདུན་བར་དུ་སྒར་གྱི་ཕྱི་རོལ་དུ་གནས་བཅུག་སྟེ། དེ་རྗེས་མོ་ནང་དུ་འཁྲིད་ཡོང་ནའང་ཆོག་པ་ཡིན་ནོ་ཞེས་གསུངས་པ་དང་།

¹⁵ ཉིན་ཞག་བདུན་བར་དུ་མིར་ཡམ་སྒར་གྱི་ཕྱི་རུ་བཞག་ནས། མོ་ནང་དུ་འཁྲིད་མ་ཡོང་བར་དུ་མི་རྣམས་འགྲུལ་སྐྱོད་མ་བྱས་སོ།

¹⁶ དེ་རྗེས་ཁོ་ཚོ་ཧ་ཛེ་རོཐ་ནས་ཐོན་ཏེ་པ་རན་གྱི་འབྲོག་སྟོང་ཁུལ་དུ་སྒར་བརྒྱབ་ནས་བསྡད་དོ༎