གྲངས་ཀ 11 - Tibetan Old Testament 2011

ཏ་བྷེ་རཱ་ཟེར་བའི་ས་གནས།

¹ མི་རྣམས་ཀྱིས་རང་གི་དཀའ་ངལ་གྱི་སྐོར་ལ་གཙོ་བོ་དཀོན་མཆོག་ལ་རྙོག་གྲ་ཞུས་འགོ་ཚུགས་སོ། གཙོ་བོ་དཀོན་མཆོག་གིས་དེ་གསན་ནས་ཐུགས་ཁྲོས་ཏེ་དེ་ཚོའི་ཐོག་ཏུ་མེ་བཏང་བ་གནང་ཞིང་། དེ་ཚོའི་དཀྱིལ་དུ་མེ་འབར་ཏེ་སྒར་གྱི་མཐའ་གཅིག་མེས་ཡོངས་སུ་འཇིག་སྐྱོན་བཏང་ངོ།

² མི་རྣམས་སྐད་ཅོར་བརྒྱབ་བཞིན་མོ་ཤེའི་རྩར་སྐྱབས་ཞུ་བར་ཡོངས་སྐབས། མོ་ཤེས་གཙོ་བོ་དཀོན་མཆོག་ལ་སྨོན་ལམ་ཞུས་པས་མེ་དེ་མར་འཇོམས་སོ།

³ དེ་བཞིན་ས་གནས་དེའི་མིང་ལ་ཏ་བྷེ་རཱ་ཞེས་ཐོགས་སོ། གང་ལགས་ཟེར་ན་དེར་གཙོ་བོ་དཀོན་མཆོག་གི་མེ་དེ་དེ་ཚོའི་དཀྱིལ་དུ་འབར་བས་ཕྱིར་རོ༎

མོ་ཤེས་འགོ་དཔོན་བདུན་བཅུ་འདམས་པ།

⁴ ཨིསི་རཱཨེལ་པ་རྣམས་དང་མཉམ་དུ་ཕྱི་རྒྱལ་བ་ཚོའང་ཕྱོགས་ཐོན་བྱེད་ཀྱི་ཡོད་པ་དང་། དེ་ཚོར་ཤ་ཟ་འདོད་ཆེན་པོ་ལངས་པ་མ་ཟད། ཨིསི་རཱཨེལ་པ་ཚོས་ཀྱང་རྙོག་གྲ་བཤད་དེ་སྨྲས་པ། ང་ཚོར་ཤ་ཟ་རྒྱུ་བྱུང་ན་ཅི་མ་རུང་།

⁵ སྔར་ང་ཚོ་ཨི་ཇིབ་དུ་ཡོད་སྐབས་ཉ་ཤ་འདོད་པ་གང་ཡོད་ཟ་རྒྱུ་ཡོད་པ་མ་ཟད། དེར་རིན་པའང་སྤྲོད་མི་དགོས་ཤིང་། དེར་ང་ཚོས་ཟས་པའི་ཁ་ཟས་ཀྱི་རིགས་ནི་ཆུ་འབྲས་ཀག་རཱ་དང་ཁར་བུ་ཇཱ་དང་། རམ་པ་དང་། ཙོང་སྒོག་སོགས་ཡིན་པས། དེ་དག་དྲན་གསོས་ཀྱི་འདུག་གམ།

⁶ ད་ང་ཚོར་ཟ་རྒྱུ་གང་ཡང་མེད་པས། ང་ཚོའི་ལུས་སྟོབས་ཀྱང་ཉམས་ཚར་བཞག། ཟ་ནའང་མ་ཟ་ནའང་ཉིན་ལྟར་རེ་བཞིན་མན་ནཱ་འདི་མ་གཏོགས་གཞན་གང་ཡང་ཟ་རྒྱུ་མི་འདུག

⁷ (མན་ནཱ་དེ་ནི་ཁ་མདོག་སེར་སྐྱ་ཡིན་པ་ལ་ས་བོན་གྱི་འབྲུ་ཆུང་ཆུང་དང་འདྲ་བ་ཞིག་ཡོད་པ་ཡིན་ཏེ།

^8-9 དེ་ནི་སྒར་གྱི་སྟེང་དུ་མཚན་མོར་བ་མོ་དང་མཉམ་དུ་བབས་ཀྱི་ཡོད་པ་དང་། མི་རྣམས་ཞོག་པ་སྔ་པོར་ཕྱིན་ནས་དེ་བསྡུ་སྒྲུག་བྱེད་དེ། འཐག་པའམ་རྡུང་ནས་ཙམ་པ་ལྟར་བཟོས་ཏེ་ཆུའི་ནང་བཙོས་པའམ་བག་ལེབ་བཟོས་ཀྱི་ཡོད་དོ། དེའི་བྲོ་བ་ནི་ཁ་སྐྱུར་པོའི་སྣུམ་ནང་བསྲེག་པའི་བག་ལེབ་དང་འདྲ་པོ་ཡོད་པ་ཡིན་ནོ།)

¹⁰ མི་རྣམས་རང་རང་གི་གུར་གྱི་སྒོ་འགྲམ་དུ་ཁག་སོ་སོར་འཛོམས་ནས་ལངས་ཤིང་རྙོག་གཏམ་བརྗོད་པ་དེ་མོ་ཤེས་ཐོས་པ་དང་། ཁོ་ལ་བློ་ཕམ་ཆེན་པོ་བྱུང་ངོ་། གང་ལགས་ཟེར་ན། གཙོ་བོ་དཀོན་མཆོག་ནི་དེ་ཚོ་དང་མཉམ་དུ་ཐུགས་དགོངས་འཚོངས་ཡོད་དོ།

¹¹ ཁོས་གཙོ་བོ་དཀོན་མཆོག་ལ་ཞུས་པ། ཁྱེད་ཀྱིས་ང་ལ་འདི་ལྟ་བུའི་ངན་པ་གནང་དགོས་པ་དེ་གང་ཡིན་ནམ། ཅིའི་ཕྱིར་ང་དང་ཐུགས་ཁྲོ་གནང་བ་ཡིན་ནམ། ཅིའི་ཕྱིར་མི་འདི་ཚོའི་འགན་དེ་ང་ལ་གནང་བ་ཡིན་ནམ།

¹² ངས་ནི་དེ་ཚོ་ལ་བཟོ་བཀོད་བྱེད་རྒྱུ་མ་བྱུང་བ་མ་ཟད། དེ་ཚོ་ང་ལས་སྐྱེས་པའང་མ་ཡིན། དེ་བས་ན་ཅིའི་ཕྱིར་ཁྱེད་ཀྱིས་ང་ལ་དེ་ཚོའི་མ་ཚབ་ལྟ་བུས་དེ་ཆོར་གཅེས་སྐྱོང་བྱེད་དུ་བཅུག་པ་གནང་ཞིང་། ངས་དེ་ཆོ་ཕྲུ་གུ་བཞིན་དུ་པང་པར་འཁྱེར་ནས། ཁྱེད་ཀྱིས་དེ་ཚོའི་ཕ་མེས་རྣམས་ལ་ཞལ་ཆད་གནང་བའི་ཡུལ་དེར་སྐྱེལ་བཅུག་པ་ཡིན་ནམ།

¹³ མི་དེ་ཚོ་ཚང་མར་ལྡང་བའི་ཤ་ཞིག་ངས་ག་ནས་ཐོབ་བམ། དེ་ཚོས་ཤའི་དོན་དུ་སྐད་ཅོར་བརྒྱབ་བཞིན་བསྡད་འདུག

¹⁴ ང་རང་མི་གཅིག་པུས་མི་འདི་ཚོའི་འགན་འཁྱེར་ཐུབ་པ་མི་འདུག ལས་འགན་དེ་ནི་ཧ་ཅང་ལྗིད་པོ་ཞིག་འདུག

¹⁵ གལ་ཏེ་ཁྱེད་ཀྱིས་ང་ལ་ད་དུང་འདི་ལྟ་བུའི་སྤྱོད་པ་གནང་རྒྱུ་ཡིན་ན། ཐུགས་རྗེ་གཟིགས་ནས་ང་ལ་གསོད་པ་གནང་རོགས་གནང་། ད་ནས་བཟུང་ངས་ཁྱེད་ཀྱི་སྡུག་ཙུབ་ཅན་གྱི་མཛད་སྤྱོད་དེ་བཟོད་མི་དགོས་པར་ཤོག།

¹⁶ གཙོ་བོ་དཀོན་མཆོག་གིས་མོ་ཤེ་ལ་གསུངས་པ། མི་མང་གི་འགོ་དཔོན་དུ་ངོས་འཛིན་བྱུང་བའི་མི་གཙོ་གྲགས་བདུན་བཅུ་ཐམ་པ་འདུ་བཀོང་བྱས་ཏེ། ང་གནས་པའི་དབུ་གུར་དམ་པར་ངའི་མདུན་དུ་འཁྲིད་ཡོང་ནས་ཁྱོད་དང་མཉམ་དུ་ལངས་ཆུག་ཅིག

¹⁷ ང་དེར་ཡོང་ནས་ཁྱོད་ལ་གཏམ་གླེང་བྱེད་རྒྱུ་ཡིན། ངས་ཁྱོད་ལ་སྤྲད་པའི་སེམས་ཉིད་ནས་ཕྲན་བུ་ཞིག་བཏོན་ཏེ་དེ་ཚོར་སྤྲོད་རྒྱུ་ཡིན། དེ་རྗེས་ཁོ་ཚོས་མི་དེ་ཚོའི་འགན་འཁུར་བའི་རོགས་བྱེད་ཅིང་། ཁྱོད་རང་གཅིག་པུས་འགན་དེ་འཁུར་མི་དགོས་པ་ཡིན་ནོ།

¹⁸ ད་ཁྱོད་ཀྱིས་མི་ཚོགས་ལ་འདི་ལྟར་སྨྲོས་ཤིག སང་ཉིན་གྱི་དོན་དུ་ཁྱོད་ཚོ་རང་ཉིད་དག་འབྱངས་བྱེད་དགོས། ཁྱོད་ཚོས་ཤ་ཟ་རྒྱུ་ཐོབ་པ་ཡོད། ཁྱོད་ཚོས་ཤ་ཟ་འདོད་བྱས་པ་དང་། སྔར་ཁྱོད་ཚོ་ཨི་ཇིབ་དུ་ཡོད་སྐབས་ཁྱོད་ཚོའི་གནས་སྟངས་ཡག་པོ་ཡོད་ལུགས་སྐོར་ལ་ཁྱོད་ཚོས་རྙོག་གཏམ་བརྗོད་པ་དེ་གཙོ་བོ་དཀོན་མཆོག་གིས་གསན་ཡོད་པས། ད་གཙོ་བོ་དཀོན་མཆོག་གིས་ཁྱོད་ཚོ་ལ་ཤ་གནང་རྒྱུ་ཡིན་པས། དེ་ནི་ཁྱོད་ཚོས་ཟ་དགོས།

¹⁹ དེ་ནི་ཉིན་གཅིག་གཉིས་མ་ཡིན་པར་ཉིན་ལྔའམ་བཅུའམ་ཉི་ཤུ་ཙམ་ཡང་མ་ཡིན་མོད།

²⁰ འོན་ཀྱང་ཟླ་བ་གཅིག་བར་དུ་ཤ་དེ་རྣ་བ་ནས་མ་དོན་བར་དང་ཞེ་མེར་མ་ལངས་བར་བཟའ་དགོས་རྒྱུ་དང་། དེ་འདྲ་བྱུང་དགོས་དོན་ནི། ཁྱོད་ཚོས་རང་གི་ཁྲོད་དུ་བཞུགས་ཡོད་པའི་གཙོ་བོ་དཀོན་མཆོག་ལ་སྤངས་སོ། ང་ཚོས་ཨི་ཇིབ་དེ་སྤངས་ནས་མ་ཡོང་ནའང་འགྲིགས་པ་ཡོད་ཅེས་ཁོང་ལ་རྙོག་གཏམ་བཤད་པས་རྐྱེན་གྱིས་ཡིན་ནོ།

²¹ དེ་རྗེས་མོ་ཤེས་གཙོ་བོ་དཀོན་མཆོག་ལ་ཞུས་པ། ངས་མི་ཚོགས་ ༦༠༠,༠༠༠ གི་འགོ་ཁྲིད་བྱེད་ཀྱི་ཡོད་པས། ཁྱེད་ཀྱིས་དེ་ཚོར་ཟླ་བ་གཅིག་བར་དུ་ལྡང་བའི་ཤ་གནང་གི་ཡིན་ཞེས་གསུངས་ཡོད།

²² དེ་ཚོས་འདོད་པ་ཚིམ་པར་བྱེད་ཕྱིར་གླང་དང་ལུག་ལྡང་ངེས་བཞིན་པ་ཞིག་གསོད་ཐུབ་བམ། རྒྱ་མཚོའི་ཉ་ཡོངས་རྫོགས་ཀྱིས་ཀྱང་ལྡང་ཡོང་ངམ།

²³ དེའི་ལན་དུ་གཙོ་བོ་དཀོན་མཆོག་གིས་བཀའ་གནང་བ། ངའི་ནུས་པར་མཚམས་ཤིག་ཡོད་དམ། ངས་སྨྲས་པའི་གཏམ་དེ་འགྲུབ་དང་མི་འགྲུབ་ཁྱོད་ཀྱིས་རིང་མིན་མཐོང་བ་ཡོད།

²⁴ དེར་བརྟེན་མོ་ཤེས་ཕྱིར་ཐོན་ནས་གཙོ་བོ་དཀོན་མཆོག་གིས་བཀའ་གནང་བ་དེ་མི་དམངས་ལ་བཤད་ཅིང་། ཁོས་འགོ་དཔོན་བདུན་ཅུ་ཐམ་པ་འདུ་བཀོང་བྱས་ཏེ་དབུ་གུར་དམ་པའི་མཐའ་འཁོར་དུ་ལངས་བཅུག་གོ

²⁵ དེ་ནས་གཙོ་བོ་དཀོན་མཆོག་སྤྲིན་གྱི་ནང་དུ་ཕེབས་ནས་ཁོ་དང་གཏམ་གླེང་གནང་ཞིང་། ཁོང་གིས་མོ་ཤེ་ལ་གནང་བའི་ཐུགས་ཉིད་ནས་ཕྲན་བུ་ཞིག་བཏོན་པ་གནང་ནས་འགོ་དཔོན་བདུན་ཅུ་ཐམ་པར་གནང་ངོ་། དེ་ཚོའི་སྟེང་དུ་ཐུགས་ཉིད་བབས་པའི་རྗེས་སུ་དེ་ཚོས་ལུང་བསྟན་བཤད་ཚུལ་བྱས་མོད། འོན་ཀྱང་དེ་ནི་དུས་ཡུན་རིང་བར་དུ་མ་བྱས་སོ།

²⁶ འགོ་དཔོན་བདུན་ཅུ་ཐམ་པའི་ནང་ནས་ཨེལ་དཱད་དང་མེ་དཱད་ཞེས་པའི་འགོ་དཔོན་གཉིས་ནི་སྒར་གྱི་ནང་དུ་བསྡད་དེ། དབུ་གུར་དམ་པར་བཅར་མེད་པ་ཡིན་ཀྱང་། སྒར་སའི་ནང་དུ་དེ་ཚོའི་སྟེང་དུ་ཐུགས་ཉིས་བབས་སྐབས་དེ་དག་གིས་ཀྱང་ལུང་བསྟན་བཤད་དོ།

²⁷ ཨེལ་དཱད་དང་མེ་དཱད་གཉིས་ཀྱིས་གང་བྱས་པ་དེའི་སྐོར་མོ་ཤེ་ལ་ཞུ་བར་མི་གཞོན་པ་ཞིག་རྒྱུག་ནས་ཕྱིན་ནོ།

²⁸ ནུན་གྱི་བུ་ཡོ་ཤུ་ཨ་ནི་ན་གཞོན་སྐབས་ནས་མོ་ཤེའི་ཞབས་ཏོག་ཞུས་ནས་བསྡད་པ་དེས། སྐད་བརྒྱབ་ཅིང་མོ་ཤེ་ལ། ཀྱེ་གཙོ་བོ་ལགས། ཁོ་གཉིས་ལ་བཀག་འདོམ་གནང་རོགས་གནང་ཞེས་ཞུས་པའི།

²⁹ ལན་དུ་མོ་ཤེས། ཁྱོད་རང་ངའི་དོན་དུ་སེམས་འཁྲལ་བྱེད་ཀྱི་ཡོད་དམ། ངའི་རེ་འདོད་ལྟར་ན། གཙོ་བོ་དཀོན་མཆོག་ཉིད་ཀྱི་ཐུགས་ཉིད་དེ། སྐུ་ཉིད་ཀྱི་མི་འབངས་ཚང་མར་གནང་ཞིང་། ཚང་མས་ལུང་བསྟན་བཤད་ཐུབ་པ་བྱུང་ན་ཅི་མ་རུང་ཞེས་སྨྲས་སོ།

³⁰ དེ་ནས་མོ་ཤེ་དང་ཨིསི་རཱཨེལ་པའི་འགོ་དཔོན་བདུན་བཅུ་རྣམས་སྒར་སར་ཕྱིར་ལོག་བྱས་སོ༎

གཙོ་བོ་དཀོན་མཆོག་གིས་བྱ་སྲེག་པ་རྣམས་གཏོང་གནང་བ།

³¹ གཙོ་བོ་དཀོན་མཆོག་གིས་བློ་བུར་དུ་རླུང་ཞིག་བཏང་བ་གནང་ཞིང་། རླུང་གིས་རྒྱ་མཚོ་ནས་བྱ་སྲེག་པ་རྣམས་འཁྱེར་ཡོང་བ་དང་། བྱ་དེ་ཚོ་སའི་སྒང་ནས་མཐོ་ཚད་མི་ཊར་གང་ཙམ་ཞིག་ལྡིང་ཞིང་། སྒར་གྱི་ཕྱོགས་གང་སར་ཀི་ལོ་མི་ཊར་མང་པོའི་རྒྱ་ཁྱོན་བར་དུ་ཁྱབ་བོ།

³² དེ་ནས་ཁོ་ཚོས་དེ་ཉིན་གང་དང་། མཚན་གང་། ཡང་དེའི་སང་ཉིན་ཉིན་གང་རིང་ལ་བྱ་སྲེག་པ་རྣམས་འཇུས་པ་དང་། ཀི་ལོ་གྷ་རམ་ ༡,༠༠༠ ལས་ཉུང་བ་སུས་ཀྱང་མ་བསྡུས་སོ། དེ་ནས་ཁོ་ཚོས་བྱ་དེ་དག་སྒར་གྱི་ཕྱོགས་བཞི་རུ་བཀྲམ་ནས་སྐམ་བཞག་གོ

³³ དེ་ཚོས་ཤ་དེ་ཟས་མ་ཚར་གོང་དུ་གཙོ་བོ་དཀོན་མཆོག་ཁོ་ཚོ་དང་ཐུགས་ཁྲོས་ཤིང་དེ་ཚོའི་ཁྲོད་དུ་ནད་རིམས་ཤིག་གཏོང་བ་གནངོ།

³⁴ ས་གནས་དེའི་མིང་ལ་ཀི་བྷོརོཐ་ཧ་ཏ་བ་བཏགས་སོ། དེའི་དོན་ནི་འདོད་རྔམ་གྱི་དུར་ས་ཞེས་པའོ། གང་ལགས་ཟེར་ན། དེར་ཁོ་ཚོས་ཤའི་འདོད་རྔམ་བྱེད་མཁན་རྣམས་ཀྱི་རོ་སྦས་ཡོད་པ་ཡིན་ནོ།

³⁵ དེ་རྗེས་མི་མང་རྣམས་ས་ཁུལ་དེ་ནས་ཧ་ཛེ་རོཐ་ཞེས་པའི་གནས་སུ་ཕྱིན་ནས་དེར་སྒར་བརྒྱབ་ནས་བསྡད་དོ༎