མི་ཀཱ 6 - Tibetan Old Testament 2011

ཨིསི་རཱཨེལ་པའི་ཐོག་ཏུ་གཙོ་བོ་དཀོན་མཆོག་གི་ཁ་མཆུ།

¹ ཨིསི་རཱཨེལ་པའི་ཐོག་གཙོ་བོ་དཀོན་མཆོག་གི་ཁ་མཆུ་ལ་ཉོན་ཞིག ཀྱེ། གཙོ་བོ་དཀོན་མཆོག་ད་ཡར་བཞེངས་ནས་ཉིད་ཀྱི་ཁ་མཆུ་དེ་བཀའ་གནང་བར་མཛོད། རི་བོ་དང་རི་ཕྲན་རྣམས་ཀྱིས་ཁྱེད་ཀྱི་གསུང་དེ་ཐོས་བཅུག་ཅིག

² ཀྱེ། རི་བོ་རྣམས་དང་ཁྱོད་གཏན་དུ་གནས་པའི་ས་གཞིའི་རྨང་རྣམས་གཙོ་བོ་དཀོན་མཆོག་གི་ཁ་མཆུ་ལ་ཉོན་ཞིག ཁོང་གི་ཉིད་ཀྱི་མི་འབངས་རྣམས་ཀྱི་ཐོག་ཏུ་ཁ་མཆུ་ཞིག་ཡོད། ཨིསི་རཱཨེལ་ཐོག་ཏུ་ཁོང་གིས་སྐྱོན་བརྗོད་གནང་བར་འགྱུར།

³ གཙོ་བོ་དཀོན་མཆོག་གིས། ཀྱེ་ངའི་མི་འབངས་རྣམས། ངས་ཁྱོད་ཚོ་ལ་གནོད་འཚེ་ཇི་བྱས་དང་ཁྱོད་ཚོའི་དོན་དུ་ང་དཀའ་ངལ་ཞིག་ཏུ་འགྱུར་ཡོད་པ་ཡིན་ན། ཁྱོད་ཚོས་ང་ལ་དེ་བཞིན་ལན་འདེབས་བྱོས་ཤིག།

⁴ མོ་ཤེ་དང་ཨ་རོན་དང་མིར་ཡམ་བཅས་ཀྱི་འགོ་འཁྲིད་འོག་ཏུ་ངས་ཁྱོད་ཚོ་ཨི་ཇིབ་ནས་བཏོན་ཏེ་བྲན་འཁོལ་ལས་ཐར་བར་བྱས་པ་ཡིན།

⁵ ཀྱེ། ངའི་མི་འབངས་རྣམས། སྔར་མོ་ཨབ་ཀྱི་རྒྱལ་པོ་བ་ལག་གིས་ཁྱོད་ཚོའི་ཐོག་ཏུ་འཆར་གཞི་གང་བྱས་པ་དང་། དེ་བཞིན་བྷི་ཨོར་གྱི་བུ་བ་ལམ་གྱིས་ལན་འདེབས་གང་བྱས་པའི་སྐོར་ལ་དྲན་གསོ་བྱོས་ཤིག་དང་། ཨ་ཀ་སི་ཡ་སྒར་ས་ནས། གྷིལ་གཱལ་གྱི་ལམ་བར་ན་གནས་ཚུལ་གང་བྱུང་བ་བཅས་དྲན་གསོ་བྱས་ན། ངས་ཁྱོད་ཚོ་སྐྱབས་པའི་ཆེད་དུ་ཐབས་ཤེས་གང་བྱས་པ་དེ་ཁྱོད་ཚོས་ཤེས་རྟོགས་བྱེད་ཐུབ་ཡོང་༎

གཙོ་བོ་དཀོན་མཆོག་གང་ལ་ཐུགས་མཉེས་པ།

⁶ མཐོ་རིས་ཀྱི་དཀོན་མཆོག་གཙོ་བོ་དཀོན་མཆོག་ལ་བསྙེན་བཀུར་ཞུ་བར་བཅར་སྐབས་ངས་ཁོང་ལ་འབུལ་བ་གང་འབུལ་དགོས་སམ། བེའུ་ཚང་མ་ལས་སྤུས་ལེགས་དག་ཁོང་ལ་དམར་མཆོད་ཀྱི་སྦྱིན་སྲེག་ཏུ་འབུལ་དགོས་སམ།

⁷ ར་ལུག་སྟོང་ཕྲག་མང་པོ་དང་། གཙང་པོའི་ཆུ་རྒྱུན་བཞིན་དུ་སྐྱུ་རུའི་སྣུམ་རྒྱུན་ཆད་མེད་པར་འབུལ་བ་དང་། རང་གི་ཉེས་པའི་སྡིག་བཤགས་སུ་ངའི་ཕྲུ་གུ་སྔོན་སྐྱེས་དེ་ཁོང་ལ་འབུལ་ན་ཐུགས་མཉེས་སམ།

⁸ དེ་ལྟར་མ་ཡིན། གཙོ་བོ་དཀོན་མཆོག་གིས་ང་ཚོར་བཟང་པོ་གང་ཡིན་པ་དེའི་སྐོར་སློབ་སྟོན་གནང་ཟིན་ཅིང་། ཁོང་གི་ཐུགས་དགོངས་བཞིན་དུ་ང་ཚོས་སྤྱོད་ལམ་དྲང་ཞིང་རྒྱུན་དུ་བྱམས་སེམས་བྱེད་དགོས་པ་དང་། ང་ཚོའི་དཀོན་མཆོག་དང་མཉམ་དུ་ཉམས་ཆུང་གི་ཚུལ་དུ་འགྲུལ་དགོས་པ་ཡིན་ནོ།

⁹ གཙོ་བོ་དཀོན་མཆོག་ལ་འཇིགས་རྒྱུ་དེ་ནི་ཤེས་རབ་ཅན་ཞིག་ཡིན་ནོ། གྲོང་ཁྱེར་ལ་འདུ་ཚོགས་བྱས་པའི་ཡུལ་མི་རྣམས་ཁོང་གིས་བོས་པའི་གསུང་ལ་ཉོན་ཞིག

¹⁰ མི་ངན་རྣམས་ཀྱི་ཁང་ཁྱིམ་དུ་དྲང་བདེན་མེད་བའི་ཐོག་ནས་ཐོབ་པའིརྒྱུ་དངོས་རྣམས་ཡོད་དོ། ཁོ་ཚོས་འབོ་དང་རྒྱ་མར་རྫུན་མར་བེད་སྤྱོད་བཏང་གི་ཡོད་པས་ངས་དེ་ལ་སྡང་བ་བྱེད་ཀྱིས་ཡོད།

¹¹ སྲང་དང་ཉག་རྡོ་བརྫུན་མར་བེད་སྤྱོད་གཏོང་མཁན་རྣམས་ལ་ངས་མནོང་མེད་དུ་རྩིས་སྲིད་དམ།

¹² ཁྱོད་ཚོ་ཕྱུག་པོ་རྣམས་ཀྱིས་སོ་སོའི་ཁེ་ཕན་ཁོ་ནའི་དོན་དུ་དབུལ་ཕོངས་རྣམས་ལ་བེད་སྤྱོད་ལོག་པ་བཏང་ཞིང་། ཁྱོད་ཚོ་ཚང་མ་རྫུན་དང་ཕྲ་མ་ཅན་ཡིན་ནོ།

¹³ ཁྱོད་ཚོའི་ཉེས་སྡིག་རྐྱེན་གྱིས་ངས་ཁྱོད་ཚོ་ལ་འཇིག་པར་བྱེད་པའི་འགོ་བཙུགས་ཚར་ཡོད།

¹⁴ ཁྱོད་ཚོས་ཁ་ཟས་ཇི་ཙམ་བཟས་ནའང་མི་འགྲང་ཞིང་ལྟོགས་པར་ལུས་རྒྱུ་ཡིན་པ་དང་། ཁྱོད་ཚོས་རྒྱུ་དངོས་མང་པོ་འཁྱེར་ཡོང་ནའང་དེ་དག་གསོག་འཇོག་བྱེད་མི་ཐུབ་ཅིང་། གལ་ཏེ་གསོག་འཇོག་བྱེད་ཐུབ་པ་ཡིན་ནའང་ངས་དེ་དག་དམག་འཐབ་ཀྱི་སྒོ་ནས་མེད་པ་བཟོ་རྒྱུ་ཡིན།

¹⁵ ཁྱོད་ཚོས་ས་བོན་བཏབ་རུང་སྟོན་ཐོག་བསྡུ་རྒྱུ་མི་ཡོང་། སྐྱུ་རུའི་འབྲས་བུ་ནས་སྣུམ་བཙིར་རུང་དེ་དག་བེད་སྤྱོད་བཏང་མི་ཐུབ་ཅིང་། དེ་བཞིན་རྒུན་ཆང་བཟོས་ཀྱང་ནམ་ཡང་འཐུང་བའི་ལོང་ཐོབ་མི་ཡོང་།

¹⁶ ཁྱོད་ཚོའི་ཐོག་ཏུ་རྐྱེན་ངན་དེ་འདྲ་ཡོང་དགོས་པ་དེ་ནི་ཁྱོད་ཚོས་རྒྱལ་པོ་ཨོམ་རི་དང་དེའི་བུ་རྒྱལ་པོ་ཨ་ཧབ་གཉིས་ཀྱི་ལུགས་སྲོལ་ངན་པའི་རྗེས་སུ་འབྲངས་ཤིང་། དེ་དག་མུ་མཐུད་ནས་ལག་ལེན་བསྟར་བ་ཡིན་པས། ངས་ཁྱོད་ཆོ་འཇིག་པར་བྱེད་རྒྱུ་ཡིན་པ་དང་། ཁྱོད་ཚོར་མཐོང་མཁན་མི་རྣམས་ཀྱིས་ཁྱོད་ཚོར་འཕྱ་ཞིང་སྡང་བར་བྱེད་རྒྱུ་ཡིན་ནོ་ཞེས་གསུངས་སོ༎