མི་ཀཱ 4 - Tibetan Old Testament 2011

གཙོ་བོ་དཀོན་མཆོག་གིས་འཛམ་གླིང་ཡོངས་ལ་ཞི་བདེས་སྲིད་སྐྱོང་གནང་བ།

¹ མ་འོངས་པའི་ཉིན་ཞག་ཚོར་གཙོ་བོ་དཀོན་མཆོག་གི་མཆོད་ཁང་ཡོད་པའི་རི་བོ་དེ་ནི་རི་རྩེ་ཀུན་ལས་མཐོ་ཞིང་། རི་ཕྲན་རྣམས་ཀྱི་དབུས་སུ་མཐོ་པོར་མཐོང་ཐུབ་པས། མི་རིགས་མང་པོ་དེར་འཛོམས་ནས༎

² མི་རིགས་རྣམས་ཡོང་ནས་དེ་ལྟར་སྨྲས་པ། ང་ཚོ་གཙོ་བོ་དཀོན་མཆོག་གི་རི་བོར་ཡར་འཛེགས་ཏེ། ཨིསི་རཱཨེལ་གྱི་དཀོན་མཆོག་གི་ཕོ་བྲང་དུ་བཅར་དགོས། གང་ལགས་ཟེར་ན་ཁོང་གིས་ང་ཚོར་ཉིད་ཀྱི་ཐུགས་དགོངས་དང་བསྟུན་པའི་འགྲུལ་ལམ་བཟང་པོ་ཞིག་བསྟན་པ་གནང་བ་དེར་ང་ཚོ་འགྲུལ་རྒྱུ་ཡིན། གང་ལགས་ཟེར་ན་གཙོ་བོ་དཀོན་མཆོག་གི་བཀའ་སློབ་དེ་ནི་ཡེ་རུ་ཤ་ལེམ་ནས་བྱུང་ཞིང་། རི་བོ་ཛི་ཡོན་ནས་ཁོང་གིས་ཉིད་ཀྱི་མི་འབངས་རྣམས་ལ་གསུང་གླེང་མཛད་པ་ཡིན་ནོ།

³ ཁོང་གིས་མི་རིགས་རྣམས་ཀྱི་བར་གྱི་རྩོད་གླེང་རྣམས་སྒྲིག་འཇགས་གནང་ཞིང་། ཡུལ་གྲུ་ཐག་རིང་ཁུལ་གྱི་ནུས་སྟོབས་ལྡན་པའི་མི་བརྒྱུད་ཁག་གི་བར་ལ་ཡོད་པའི་རྩོད་རྙོག་རྣམས་ཐག་གཅོད་གནང་གི་རེད། དེ་རྗེས་ཁོ་ཚོས་རང་གི་རལ་གྲི་རྣམས་ལས་གཤོལ་ལྕགས་དང་། མདུང་རྣམས་ལས་ཟོར་བ་བཟོས་ཏེ། རྒྱལ་ཁམས་ཕན་ཚུན་གྱི་བར་ལ་དམག་འཁྲུགས་སོགས་མཚམས་འཇོག་ཡོང་རྒྱུ་དང་། སླར་ཡང་དམག་གི་གྲ་སྒྲིག་སོགས་ནམ་ཡང་བྱེད་ཀྱི་མ་རེད།

⁴ མི་ཚང་མ་དུས་བདེ་ཞི་འཇམ་གྱི་ངང་དུ་རང་རང་སོ་སོའི་རྒུན་ཚལ་དང་སེ་ཡབ་ཤིང་གི་ཚལ་ཞིང་ཁུལ་དུ་གནས་ཤིང་། སུས་ཀྱང་ཕན་ཚུན་གཅིག་གིས་གཅིག་ལ་འཇིག་སྣང་བསྐུལ་མི་ཡོང་ཞེས་ཀུན་དབང་ལྡན་པའི་གཙོ་བོ་དཀོན་མཆོག་གིས་ཞལ་བཞེས་གནང་ཡོད།

⁵ མི་བརྒྱུད་གཞན་གྱིས་རང་གི་ལྷ་རྟེན་སོགས་ལ་བསྙེན་བཀུར་ཞུས་ཏེ་དེ་ཚོའི་བཀའ་ལ་རྩིས་སྲུང་བྱས་མོད། འོན་ཀྱང་ང་ཚོ་ནི་དུས་གཏན་དུ་རང་གི་དཀོན་མཆོག་གཙོ་བོ་དཀོན་མཆོག་ལ་བསྙེན་བཀུར་ཞུས་ཤིང་ཁོང་གི་བཀའ་ལ་རྩིས་སྲུང་ཞུ་རྒྱུ་ཡིན༎

ཨིསི་རཱཨེལ་པ་རྣམས་བཙན་བྱོལ་ནས་ཕྱིར་ལོག་བྱེད་པ།

⁶ གཙོ་བོ་དཀོན་མཆོག་གིས། སྔར་ངས་ཉེས་ཆད་བཏང་ཞིང་བཙོན་དུ་དཀའ་སྡུག་མྱངས་པའི་མི་རྣམས་ད་ངས་སླར་ཡང་བསྡུ་འཛོམས་བྱེད་པའི་དུས་རན་པ་ཡིན།

⁷ དེ་ཚོའི་ཡན་ལག་ཚང་མ་ཆག་སྐྱོན་ཤོར་ཏེ་རང་གི་སྡོད་ཁང་ནས་ཐག་རིང་དུ་གནས་དགོས་བྱུང་མོད། འོན་ཀྱང་དེ་ཚོའི་ལྷག་ལུས་མི་མང་དེ་ལས་ངས་རྒྱལ་ཁབ་ཆེན་པོ་ཞིག་འཛུག་བསྐྲུན་བྱས་ཤིང་། དེ་ཚོ་མི་རིགས་རླབས་ཆེན་དུ་འགྱུར་རོ། ཁོ་ཚོའི་ཐོག་ཏུ་ངས་རི་བོ་ཛི་ཡོན་ཁར་དུས་དེ་ནས་བཟུང་གཏན་དུ་སྲིད་སྐྱོང་བྱེད་རྒྱུ་ཡིན།

⁸ ཁྱོད་ཡེ་རུ་ཤ་ལེམ་དུ་དཀོན་མཆོག་ནི་ལུག་རྫི་ལྟར་ཁོང་གིས་མཁར་ཛོང་ནས་རང་གི་མི་མང་ཐོག་ཏུ་གཟིགས་བཞིན་ཡོད་པས། ཁྱོད་ནི་སྐྱར་དུ་རང་གི་རྒྱ་ཁབ་ཀྱི་རྒྱལ་སར་འགྱུར་རོ།

⁹ ཁྱོད་ཚོས་བུད་མེད་སྐྱེ་ཟུག་ལྡན་པའི་ཟུག་ཟེར་གྱིས་མནར་བ་བཞིན་ངུ་འབོད་ཤུགས་ཆེ་བྱེད་དགོས་པ་གང་ཡིན་ནམ། ཁྱོད་ཚོའི་ཐོག་ཏུ་རྒྱལ་པོ་མེད་པའམ། ཡང་ན་ཁྱོད་ཚོའི་གྲོས་དཔོན་ཐམས་ཅད་ཤི་བའི་རྐྱེན་གྱིས་དེ་ལྟར་བྱུང་བ་ཡིན་ནམ།

¹⁰ ཀྱེ། ཡེ་རུ་ཤ་ལེམ་གྱི་ཡུལ་མི་རྣམས། ཁྱོད་ཚོ་བུད་མེད་མངལ་ཟུག་ཅན་དང་འདྲ་བར་ཟུག་ཟེར་གྱིས་ཚ་གི་ཚི་གི་བྱོས་ཤིག གང་ལགས་ཟེར་ན་ཁྱོད་ཚོ་གྲོང་ཁྱེར་སྤངས་ནས་ཐང་སྟོང་དུ་གནས་དགོས་བྱེད་ཅིང་། དེ་རྗེས་ཁྱོད་ཚོ་བེ་བི་ལོན་དུ་འགྲོ་དགོས་སོ། འོན་ཀྱང་དེར་གཙོ་བོ་དཀོན་མཆོག་གིས་ཁྱོད་ཚོའི་དགྲ་བོའི་ལག་ནས་ཁྱོད་ཚོར་སྐྱབས་གྲོགས་མཛད་པ་གནང་གི་རེད།

¹¹ རྒྱལ་ཁབ་མང་པོ་འཛོམས་ནས་ཁྱོད་ལ་རྒོལ་ཅིང་། དེ་ཚོས་ཡེ་རུ་ཤ་ལེམ་སྟོར་བཤིག་བཏང་ནས་དེ་ནི་གྱང་གོག་ཏུ་བཏང་བ་མཐོང་བར་འགྱུར།

¹² འོན་ཀྱང་རྒྱལ་ཁབ་དེ་ཚོས་གཙོ་བོ་དཀོན་མཆོག་གི་ཐུགས་དགོངས་མ་ཤེས་པ་དང་། འབྲུའི་སྙེ་མ་བརྡུང་ཕྱིར་ཕྱོགས་གཅིག་་ཏུ་སྤུངས་པ་བཞིན་གཙོ་བོ་དཀོན་མཆོག་གིས་དེ་ཚོར་ཉེས་ཆད་གནང་ཕྱིར་ས་ཕྱོགས་གཅིག་ཏུ་འདུ་འཛོམས་གནང་བ་དེའང་ཁོ་ཚོས་རྟོགས་མ་ཐུབ་བོ།

¹³ གཙོ་བོ་དཀོན་མཆོག་གིས། ཀྱེ་ཡེ་རུ་ཤ་ལེམ་གྱི་ཡུལ་མི་རྣམས། སོང་ནས་ཁྱོད་ཚོས་རང་གི་དགྲ་བོ་རྣམས་ལ་ཉེས་ཆད་གཏོང་ཞིག ངས་ཁྱོད་ལ་ལྕགས་ཀྱི་ར་ཅོ་དང་ལིའི་རྨིག་པ་ལྡན་པའི་གླང་སྟོབས་ཆེན་ཞིག་དང་འདྲ་བར་བཟོས་ཏེ། ཁྱོད་ཚོས་རྒྱལ་ཁབ་མང་པོ་རྩ་མེད་བཏང་ནས། དེ་ཚོས་དྲག་ཤུལ་སྒོ་ནས་བསགས་པའི་བཅོམ་ནོར་དེ་དག་ཁྱོད་ཚོས་ས་གཞི་ཡོངས་ཀྱི་གཙོ་བོ་ང་ལ་འབུལ་བར་འགྱུར༎