མི་ཀཱ 3 - Tibetan Old Testament 2011

མི་ཀཱས་ཨིསི་རཱཨེལ་གྱི་འགོ་འཁྲིད་རྣམས་ལ་སྐྱོན་བརྗོད་བྱས་པ།

¹ ཀྱེ། ཨིསི་རཱཨེལ་གྱི་འགོ་འཁྲི་རྣམས། ཁྱོད་ཚོས་ཁྲིམས་ལུགས་དང་བསྟུན་ཏེ་སྤྱོད་དགོས་པ་ཞིག་ཡིན་ཀྱང་།

² ཁྱོད་ཚོས་བཟང་པོར་སྡང་ཞིང་ངན་པར་ཆགས་ཏེ། ངའི་མི་མང་གི་ལུས་ནས་གསོན་པོར་པགས་པ་ཤུ་ཞིང་རུས་པ་ནས་ཤ་ཡང་བཏོན་ནས་ཟའོ།

³ ངའི་མི་སྡེའི་ཤ་ཟ་ཞིང་། ལུས་ནས་པགས་པ་བཤུ་བ་དང་། ཁོག་མའི་ནང་གི་ཤ་ལྟར་དེ་ཚོའི་རུས་པ་ཚང་མ་དུམ་བུར་གཏུབ་བོ།

⁴ དེ་བས་ན་ཁྱོད་ཚོས་ངུ་འབོད་འདོན་ནས་གཙོ་བོ་དཀོན་མཆོག་ལ་ཞུ་བ་འབུལ་བའི་དུས་ཆོད་སླེབས་བཞིན་ཡོད་པ་དང་། འོན་ཀྱང་ཁོང་གིས་ཁྱོད་ཚོ་ལ་བཀའ་ལན་གནང་མི་ཡོང་། ཁྱོད་ཚོས་ལས་ངན་བྱས་པ་ཡིན་པས། ཁོང་གིས་ཁྱོད་ཚོའི་ཞུ་བར་གསན་མི་ཡོང་།

⁵ ཟ་རྒྱུ་སྟེར་མཁན་རྣམས་ལ་དཀོན་མཆོག་གི་ཞི་བདེ་ཡོད་ཅེས་དང་། དེ་བཞིན་མི་སྟེར་མཁན་རྣམས་ལ་དམག་གི་སྡིག་ར་བསྐུལ་མཁན་ལུང་སྟོན་པ་རྫུན་མ་ཚོས་ངའི་མི་མང་རྣམས་ལམ་ནོར་སླུ་འཁྲིད་བྱས་པ་ཡིན་པས། གཙོ་བོ་དཀོན་མཆོག་གིས་དེ་དག་ལ།

⁶ ཀྱེ། ལུང་སྟོན་པ་རྣམས། ཉི་མ་ལ་ལ་བཞུད་པ་ལྟར། ད་ཁྱོད་ཚོའི་དུས་ཚོད་ཀྱང་རྫོགས་པ་ཡིན། གང་ལགས་ཟེར་ན་ཁྱོད་ཚོས་ངའི་མི་མང་ལམ་ནོར་དུ་འཁྲིད་པ་ཡིན་པས། ད་ཁྱོད་ཚོས་ལུང་བསྟན་བཤད་པའི་ཕྱིར་དུ་སྔོན་ཤེས་དང་ཞལ་གཟིགས་སོགས་གང་ཡང་ཐོབ་མི་ཡོང་།

⁷ གལ་སྲིད་མ་འོངས་པའི་སྐོར་ལུང་བསྟན་བཤད་པ་ཡིན་ནའང་དེ་དག་མ་སྒྲུབ་པས་དེ་ཚོ་ངོ་ཚ་དགོས་པ་བྱུང་ཞིང་། དཀོན་མཆོག་གིས་དེ་ཚོར་བཀའ་ལན་མ་གནང་བའི་རྐྱེན་གྱིས་དེ་ཚོའི་སྤོབས་པ་ཆགས་དགོས་པར་འགྱུར་ངེས་སོ།

⁸ འོན་ཀྱང་ང་ནི་གཙོ་བོ་དཀོན་མཆོག་གི་ཐུགས་ཉིད་དང་ནུས་མཐུས་ཡོངས་སུ་ཁྱབ་པ་དང་། ཁོང་གིས་གནང་བའི་དྲང་བ་ཉིད་དང་བློ་སྟོབས་ཀྱི་སྒོ་ནས་ཨིསི་རཱཨེལ་མི་མང་ཚོའི་ཉེས་སྡིག་རྣམས་གསལ་པོར་བཤད་ཐུབ་པ་ཡིན་ནོ།

⁹ ཨིསི་རཱཨེལ་གྱི་འགོ་འཁྲིད་རྣམས་ཚུར་ཉོན་དང་། ཁྱོད་ཚོས་ཁྲིམས་དྲང་པོར་སྡང་ཞིང་བདེན་པ་བརྫུན་དུ་བསྒྱུར་ཏེ།

¹⁰ ཁྱོད་ཚོས་སྲོག་གཅོད་དང་ཁྲིམས་འགལ་གྱི་རྨང་གཞིའི་ཐོག་ཏུ་དཀོན་མཆོག་གི་གྲོང་ཁྱེར་ཡེ་རུ་ཤ་ལེམ་དེ་རྩིག་བཞིན་པ་དང་།

¹¹ གྲོང་ཁྱེར་གྱི་དཔོན་པོ་ཚོས་ལྐོག་རྔན་ལེན་ཏེ་ཁྲིམས་གཅོད་བྱས་པ་དང་། བླ་མ་རྣམས་ཀྱིས་དངུལ་ལེན་ནས་བཀའ་ཁྲིམས་བསླབས་ཀྱིས་ཡོད་དོ། དེ་བཞིན་ལུང་སྟོན་པ་རྣམས་ཀྱིས་ཀྱང་དངུལ་གྱི་ཆེད་དུ་ལུང་བསྟན་བཤད་ཚུལ་བྱས་པ་དང་། དེ་ཚོ་ཚང་མས། གཙོ་བོ་དཀོན་མཆོག་ཁོ་ཚོ་དང་མཉམ་དུ་འགྲོགས་ཡོད་ཟེར་ཤོད་ཚུལ་བྱས་པ་དང་། ང་ཚོར་གནོད་འཚེ་གང་ཡང་འབྱུང་མི་ཡོང་། གང་ལ་ཟེར་ན། གཙོ་བོ་དཀོན་མཆོག་ང་ཚོའི་ཁྲོད་དུ་བཞུགས་ཡོད་ཟེར་ནས་དེ་ཚོས་བརྗོད་དོ།

¹² དེ་བས་ན་ཁྱོད་ཚོའི་རྐྱེན་གྱིས་རི་བོ་ཛི་ཡོན་ཞིང་ལྟར་རྨོ་རྒྱུ་དང་། ཡེ་རུ་ཤ་ལེམ་ནི་བཞིག་རུལ་གྱི་ཕུང་པོར་འགྱུར་རྒྱུ་ཡིན་པ་དང་། མཆོད་ཁང་གི་རི་བོ་ཤིང་ནགས་མཐུག་པོ་བཞིན་དུ་ནགས་ཚལ་གྱིས་གང་བར་འགྱུར་རོ༎