མ་ལ་ཀི 4 - Tibetan Old Testament 2011

གཙོ་བོ་དཀོན་མཆོག་གི་ཉིན་མོ།

¹ ཀུན་དབང་ལྡན་པའི་གཙོ་བོ་དཀོན་མཆོག་གིས་གསུངས་པ། རྩྭ་སྐམ་པོ་མེས་འཚིག་པ་བཞིན་ང་རྒྱལ་ཅན་དང་མི་ངན་ཚང་མ་མེས་ཡོངས་སུ་འཚིག་པའི་ཉིན་མོ་དེ་ཡོང་རྒྱུ་ཡིན་པ་དང་། ཉིན་མོ་དེ་ལ་ཁོ་ཚོ་མེས་ཡོངས་སུ་འཚིག་ཅིང་ཤུལ་ཙམ་ཡང་མི་གནས་སོ།

² འོན་ཀྱང་ཁྱོད་ཚོ་ངའི་བཀའ་ལ་རྩིས་སྲུང་ཞུ་མཁན་ཚོའི་ཐོག་ཏུ་ངས་སྐྱོབ་པར་བྱེད་པའི་ནུས་མཐུ་དེ་ཉི་མ་ཤར་བ་བཞིན་དུ་ཤར་ཞིང་། དེའི་འོད་ཟེར་གྱིས་ཁྱོད་ཚོ་ནད་ལས་གསོ་རྒྱུ་ཡིན། བ་རའི་ནང་དུ་བཏགས་པའི་བེའུ་གློད་བཀྲོལ་བཏང་བ་བཞིན་ཁྱོད་ཚོ་རང་དབང་དང་དགའ་སྤྲོད་ངང་དུ་གནས་རྒྱུ་ཡིན།

³ ངས་ལས་བྱེད་པའི་ཉིན་མོ་དེར་ཁྱོད་ཚོས་མི་ངན་རྣམས་དབང་དུ་བསྡུས་ཤིང་། དེ་རྣམས་ཁྱོད་ཚོའི་རྐང་མཐིལ་གྱི་རྡུལ་བཞིན་དུ་འགྱུར་ངེས་པ་ཡིན་ནོ།

⁴ སྔར་ངས་རང་གི་ཞབས་ཏོག་པ་མོ་ཤེའི་བརྒྱུད་ནས་རི་བོ་སི་ནཨེ་སྒང་དུ་ཨིསི་རཱཨེལ་མི་མང་རྣམས་ཀྱིས་སྲུང་ཕྱིར་སྤྲད་པའི་བཀའ་ཁྲིམས་ཀྱི་སློབ་སྟོན་རྣམས་ཁྱོད་ཚོས་སེམས་ལ་དྲན་གསོ་བྱོས་ཤིག

⁵ འོན་ཀྱང་འཇིགས་སུ་རུང་བའི་གཙོ་བོ་དཀོན་མཆོག་གི་ཉིན་ཞག་ཆེན་པོ་དེ་མ་ཡོང་གོང་དུ་ལུང་སྟོན་པ་ཨེ་ལི་ཡཱ་དེ་ངས་ཁྱོད་ཚོའི་ཁྲོད་དུ་གཏོང་རྒྱུ་ཡིན།

⁶ དེས་ཕ་དང་བུ་ཕྲུག་རྣམས་ཀྱི་བར་ལ་མཐུན་ལམ་བྱེད་རྒྱུ་ཡིན་པ་ལས། དེ་མིན་ང་ཡོང་ནས་ངས་ཁྱོད་ཚོའི་ཡུལ་དེ་འཇིག་པར་བྱེད་རྒྱུ་ཡིན་ནོ།།