མ་ལ་ཀི 2 - Tibetan Old Testament 2011

¹ ཀུན་དབང་ལྡན་པའི་གཙོ་བོ་དཀོན་མཆོག་གིས་བླ་མ་རྣམས་ལ་འདི་ལྟར་གསུངས་པ། བཀའ་བསྒོ་བ་འདི་ནི་ཁྱོད་ཚོའི་དོན་དུ་ཡིན་ནོ།

² ཁྱོད་ཚོའི་བྱ་སྤྱོད་ཀྱི་སྒོ་ནས་ང་ལ་གུས་བཀུར་བྱེད་དགོས་པ་ཡིན་ཅིང་། ངས་སྨྲས་པའི་ཚིག་ལ་མི་ཉན་ན་ངས་ཁྱོད་ཚོའི་ཐོག་ཏུ་དམོད་པ་གཏོང་རྒྱུ་ཡིན། ཁྱོད་ཚོའི་ཐོབ་པའི་བྱིན་རླབས་སོགས་ལའང་ངའི་དམོད་པ་བཏོང་རྒྱུ་ཡིན། དོན་དམ་དུ་བྱས་ན་ངས་དེ་ཚོའི་ཐོག་ཏུ་དམོད་པ་བཏང་ཟིན་པ་ཡིན་ནོ། གང་ལ་ཟེར་ན། ཁྱོད་ཚོས་ངའི་བཀའ་ལ་བརྩི་སྲུང་ཡག་པོ་མ་བྱས་པའི་རྐྱེན་གྱིས་ཡིན་ནོ།

³ ངས་ཁྱོད་ཚོའི་བུ་ཕྲུག་རྣམས་ལ་ཉེས་ཆད་གཏོང་རྒྱུ་ཡིན་པ་དང་། ཁྱོད་ཚོས་དམར་མཆོད་བྱས་པའི་སེམས་ཅན་གྱི་ལྕི་བ་ལ་ཁྱོད་ཚོའི་གདོང་པར་འཕུར་རྒྱུ་ཡིན། ཡང་ལྕི་བ་སྤུངས་སར་ཁྱོད་ཚོར་དབྱུགས་རྒྱུ་ཡིན་ནོ།

⁴ སྔར་ངས་ལེ་ཝིའི་རིགས་བརྒྱུད་ནས་ཡིན་པའི་བླ་མ་རྣམས་དང་མཉམ་དུ་དམ་བཅའ་བྱས་པ་དེ་བརྟན་པོར་གནས་པའི་ཕྱིར་དུ། ངས་སྤྲད་པའི་བཀའ་བསྒོས་འདི་ཁྱོད་ཚོས་ཧ་གོ་བར་འགྱུར་རོ།

⁵ ངས་ཁོ་ཚོར་སྲོག་དང་བདེ་བ་སྤྲོད་རྒྱུའི་དམ་བཅའ་བྱས་པ་བཞིན་ངས་དེ་ལྟར་སྤྲད་པས། ཁོ་ཚོས་ང་ལ་གུས་བཀུར་བྱེད་དགོས་པ་ཡིན། སྔར་ཁོ་ཚོས་ང་ལ་གུས་ཞབས་བྱེད་པ་དང་འཇིག་གི་ཡོད་དོ།

⁶ དེ་ཚོས་ཇི་བདེན་པ་ཡིན་པ་དེ་བསླབ་ཀྱི་ཡོད་པ་དང་། ཇི་བདེན་པ་མ་ཡིན་པ་དེ་བསླབ་ཀྱི་མེད་པ་ཡིན་ནོ། དེ་ཚོ་ང་མཉམ་དུ་ཞི་བདེ་དང་དྲང་བ་ཉིད་ནང་འགྲུལ་བར་བྱསོ། དེ་ཚོས་མི་མང་པོར་སྡིག་པ་ནས་བསྒྱུར་བཅུག་གོ

⁷ དཀོན་མཆོག་གི་ཤེས་བྱ་བདེན་པའི་སྐོར་ལ་སློབ་སྟོན་བྱེད་རྒྱུ་དེ་བླ་མ་རྣམས་ཀྱི་ལས་འགན་ཡིན་ཅིང་། དེ་ཚོ་ནི་ཀུན་དབང་ལྡན་པའི་གཙོ་བོ་དཀོན་མཆོག་གི་བང་ཆེན་ཡིན་པའི་རྐྱེན་གྱིས། ངའི་བསམ་ཚུལ་རྟོགས་པའི་ཕྱིར་དུ་མི་མང་རྣམས་ཁོ་ཚོའི་རྩར་འགྲོ་དགོས་པ་ཡིན་ནོ།

⁸ འོན་ཀྱང་ཁྱོད་ཚོ་བླ་མ་རྣམས་ཀྱིས་ལམ་བདེན་པ་དེ་སྤངས་པས། ཁྱོད་ཚོའི་སློབ་སྟོན་གྱིས་མི་མང་པོ་ལམ་ལོག་ཏུ་འཁྲིད་ཅིང་། ངས་ཁྱོད་ཚོའི་ཕ་མེས་ལེ་ཝི་དང་མཉམ་དུ་བཞག་པའི་དམ་བཅའ་དེ་ཁྱོད་ཚོས་སྟོར་བ་ཡིན་ནོ།

⁹ ཁྱོད་ཚོས་ངའི་འདོད་པར་མ་སྲུང་པ་དང་། ངའི་མི་མང་ལ་སློབ་སྟོན་བྱེད་སྐབས་དེ་ཚོར་ཉེ་རིང་བྱས་པའི་རྐྱེན་གྱིས། ངས་ཨིསི་རཱཨེལ་མི་མང་རྣམས་ལ་ཁྱོད་ཚོར་མི་དགའ་ཞིང་དམའ་འབེབས་བྱེད་བཅུག་རྒྱུ་ཡིན་ནོ༎

མི་མང་ཚོས་དཀོན་མཆོག་ལ་དད་ལོག་ཞུས་པ།

¹⁰ ང་ཚོ་ཚང་མའི་ཡབ་གཅིག་རང་མ་ཡིན་ནམ། དཀོན་མཆོག་གཅིག་རང་གིས་ང་ཚོ་ཚང་མ་བཀོད་གནང་མཛད་པ་མ་ཡིན་ནམ། དེ་ལྟར་ཡིན་ན་ང་ཚོས་ཕན་ཚུན་ཁ་ཆད་བྱས་པ་རྣམས་ལ་ཅི་ཕྱིར་མ་སྒྲུབ་པ་དང་། དཀོན་མཆོག་གིས་ང་ཚོའི་མེས་པོ་རྣམས་དང་དམ་བཅའ་གནང་བ་དེར་ང་ཚོས་སྡང་སེམས་བྱེད་དགོས་པ་དེ་གང་ཡིན་ནམ།

¹¹ ཡ་ཧུ་དཱའི་མི་རྣམས་ཀྱིས་སྔར་དཀོན་མཆོག་ལ་ཕུལ་བའི་དམ་བཅའ་དེ་དང་འགལ་ཞིང་། ཡེ་རུ་ཤ་ལེམ་དང་ཡུལ་ཀུན་ཏུ་ཁོ་ཚོས་ལས་སྡུག་ཅག་ཞེད་པོ་ཅིག་བྱས་བཞག། གཙོ་བོ་དཀོན་མཆོག་ཐུགས་མཉེས་པའི་མཆོད་ཁང་དེ་དེ་ཚོས་མི་གཙང་བར་བྱས་པ་དང་། སྐྱེས་པ་རྣམས་ཀྱིས་ཕྱི་པའི་ལྷ་རྟེན་སོགས་ལ་བསྙེན་བཀུར་བྱེད་མཁན་བུད་མེད་རྣམས་དང་ཆང་ས་རྒྱབ་པ་ཡིན་པས།

¹² དེ་ལྟར་བྱེད་མཁན་རྣམས་ལ་གཙོ་བོ་དཀོན་མཆོག་གིས་ཨིསི་རཱཨེལ་གྱི་སྡེ་ནས་ཕྱིར་བཏོན་གནང་བར་ཤོག། ང་ཚོའི་མི་རིགས་ཀྱི་ཀུན་དབང་ལྡན་པའི་གཙོ་བོ་དཀོན་མཆོག་ལ་འཁྱེར་ཡོང་བའི་མཆོད་པའི་ནང་ནམ་ཡང་གཞུགས་མ་འཇུག་ཅིག

¹³ ཁྱོད་ཚོས་དོན་གནད་གཞན་ཞིག་བྱེད་ཀྱི་ཡོད་པ་དང་། དེ་གང་ཡིན་ན། ཁྱོད་ཚོས་མྱ་ངན་དང་སྨྲེ་ངག་འདོན་ཏེ། གཙོ་བོ་དཀོན་མཆོག་གི་མཆོད་ཁྲི་དེ་མིག་ཆུས་ཡོངས་སུ་སྦངས་བར་བྱསོ། དེ་གང་ལག་ཟེར་ན། ཁོང་གིས་ཁྱོད་ཚོའི་འབུལ་པར་ངོས་ལེན་མི་གནང་བས་ཕྱིར་རོ།

¹⁴ ང་ཚོའི་འབུལ་བ་རྣམས་ཁོང་གི་ཅི་ཕྱིར་ངོས་ལེན་མ་གནང་བ་ཡིན་ནམ་ཟེར་དྲིས་བ་བྱས་སོ། གང་ཡིན་ཟེར་ན། ཁྱོད་ཚོས་གཞོན་དུས་སུ་ཆང་ས་རྒྱབ་པའི་རང་གི་ཆུང་མ་དང་དམ་ཚིག་འགལ་བ་དང་། སྔར་ཁྱོད་ཚོས་དཀོན་མཆོག་གི་སྤྱན་སྔར་རང་གི་ཆུང་མ་དང་དམ་ཚིག་སྲུང་རྒྱུ་དང་། མོ་ལ་རང་གི་མཛའ་གྲོགས་སུ་ཁས་ལེན་པའི་དམ་བཅའ་བྱས་པ་དེ་ད་ལྟ་རྒྱབ་འགལ་ཕྱིན་ཡོད་པ་དེ་ཁོང་གིས་མཁྱེན་པས་ཕྱིར་རོ།

¹⁵ ཐོག་མར་གཙོ་བོ་དཀོན་མཆོག་གིས་ཁྱོད་དང་ཁྱོད་ཀྱི་ཆུང་མར་ལུས་སེམས་གཅིག་བཟོས་གནང་བ་མ་ཡིན་ནམ། དེ་ལ་ཁོང་གི་དམིགས་ཡུལ་གང་ཡོད་དམ། དེ་ནི་ཁྱོད་ཚོའི་བུ་ཕྲུག་རྣམས་ཁོང་གི་ཐུགས་དགོངས་བཞིན་དུ་སྤྱོད་མཁན་ཞིག་བྱུང་ཐུབ་པའི་ཕྱིར་རོ། དེ་བས་ན་ཁྱོད་ཚོས་རང་གི་ཆུང་མར་དམ་བཅའ་བྱས་པ་རྣམས་དང་མི་འགལ་ཞིང་དམ་ཚིག་བརྟན་པོར་སྲུང་དགོས།

¹⁶ གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་གསུངས་སོ། ང་ནི་བཟའ་ཚང་ཁ་བྲལ་བ་རྣམས་ལ་སྡང་ཞིང་། སུས་ཀྱང་རང་གི་ཆུང་མར་དེ་ལྟ་བུའི་སྙིང་རྗེ་མེད་པའི་ལས་ངན་བྱེད་མཁན་རྣམས་ལ་ངས་སྡང་བ་བྱེད་རྒྱུ་ཡིན་པས། ཁྱོད་ཚོས་རང་གི་ཆུང་མ་དང་དམ་བཅའ་བྱས་པ་རྣམས་མི་འགལ་ཞིང་དམ་ཚིག་བརྟན་པོར་གནས་ཐུབ་པ་ངེས་པར་དུ་བྱེད་དགོས༎

ཁྲིམས་གཅོད་ཀྱི་ཉིན་མོ་དེ་ཉེ་བར་བསླེབས་པ།

¹⁷ ཁྱོད་ཚོས་རང་གི་གཏམ་གླེང་གི་སྒོ་ནས་གཙོ་བོ་དཀོན་མཆོག་ལ་སྐུ་ཐང་ཆད་བཅུག་ཡོད་དོ། འོན་ཀྱང་ཁྱོད་ཚོས་དྲིས་པ། ང་ཚོས་ཁོང་ལ་ཇི་ལྟར་སྐུ་ཐང་ཆད་བཅུག་ཡོད་དམ། དེ་ལྟར་བརྗོད་ནས། ཀུན་དབང་ལྡན་པའི་གཙོ་བོ་དཀོན་མཆོག་གིས་ལས་ངན་བྱེད་མཁན་ཚང་མ་ལེགས་པར་དགོངས་པ་དང་། དོན་དམ་དུ་ཁོང་གིས་དེ་ཚོར་ཐུགས་མཉེས་པ་དང་། ཡང་ན་དེ་ལྟར་འདྲི་རྩད་བྱེད་ནས། དྲང་བདེན་ཡིན་ཚུལ་ལགས་པའི་དཀོན་མཆོག་དེ་གང་དུ་ཡོད་དམ་ཞེས་བརྗོད་པས། ཁྱོད་ཚོས་ཁོང་ལ་སྐུ་ཐང་ཆད་བཅུག་གོ།