ལེ་ཝི 9 - Tibetan Old Testament 2011

ཨ་རོན་གྱིས་དམར་མཆོད་འབུལ་བ།

¹ བསྔོ་འབུལ་གྱི་མཆོད་པ་ཆ་ཚང་སྒྲུབ་པའི་ཕྱི་ཉིན་དེ། མོ་ཤེས་ཨ་རོན་དང་ཁོའི་བུ་རྣམས་དང་དེ་བཞིན་ཨིསི་རཱཨེལ་གྱི་འགོ་བྱེད་རྣམས་བོས་ཏེ།

² ཁོང་གིས་ཨ་རོན་ལ་སྨྲས་པ། གླང་གཞོན་པ་ཞིག་དང་ཕོ་ལུག་སྐྱོན་མེད་པ་དེ་འཁྲིད་ཡོང་ཞིང་། གླང་དེ་སྡིག་སེལ་གྱི་མཆོད་པ་དང་ཕོ་ལུག་དེ་སྦྱིན་སྲེག་གི་མཆོད་པའི་ཚུལ་དུ་གཅོ་བོ་དཀོན་མཆོག་ལ་འབུལ་དགོས།

³ དེ་རྗེས་ཨིསི་རཱཨེལ་མི་དམངས་རྣམས་ལ་སྨྲོས་ཤིག སྡིག་སེལ་གྱི་མཆོད་པའི་དོན་དུ་ར་ཕོ་གཅིག་དང་། སྦྱིན་སྲེག་གི་མཆོད་པའི་དོན་དུ་སྐྱོན་མེད་པ་བེའུ་ལོ་གཅིག་ལོན་པ་ཞིག་དང་། སྐྱོན་མེད་པ་ལུག་ཐུག་ལོ་གཅིག་ལོན་པ་རེ་འཁྱེར་ཡོང་དགོས།

⁴ དེ་བཞིན་མཐུན་འབྲེལ་གྱི་མཆོད་པའི་དོན་དུ་གླང་ཞིག་དང་ཕོ་ལུག་རེ་འཁྲིད་ཡོང་དགོས། དེ་ཚོས་སེམས་ཅན་དེ་དག་སྣུམ་བསྲེས་པའི་འབྲུའི་མཆོད་པ་དང་མཉམ་དུ་གཙོ་བོ་དཀོན་མཆོག་ལ་དམར་མཆོད་འབུལ་དགོས། གང་ལ་ཟེར་ན། དེ་རིང་གཙོ་བོ་དཀོན་མཆོག་གིས་ཨིསི་རཱཨེལ་པ་རྣམས་ལ་མངོན་པར་མཛད་རྒྱུ་ཡིན་པའི་ཕྱིར་རོ།

⁵ དེ་ཚོས་མོ་ཤེས་གང་སྨྲས་པ་ཐམས་ཅད་དབུ་གུར་དམ་པའི་མདུན་དུ་འཁྱེར་ཡོང་ཞིང་། ཨིསི་རཱཨེལ་མི་མང་ཚང་མ་གཙོ་བོ་དཀོན་མཆོག་ལ་མཆོད་འབུལ་བྱེད་ཕྱིར་དེར་འཛོམས་སོ།

⁶ དེ་ནས་མོ་ཤེས་སྨྲས་པ། ཁོང་བཞུགས་ཡོད་པའི་བཀྲག་མདངས་ཀྱི་འོད་དེ་ཁྱོད་ཚོའི་ཙར་མངོན་པར་འགྱུར་བའི་ཆེད་དུ་གཙོ་བོ་དཀོན་མཆོག་གི་ཁྱོད་ཚོར་དེ་ཚོ་ཆང་མ་བྱེད་ཕྱིར་བཀའ་གནང་བ་ཡིན་ནོ།

⁷ དེ་ནས་ཁོང་གིས་ཨ་རོན་ལ། མཆོད་ཁྲིའི་རྩར་ཕྱིན་ནས་ཁྱོད་ཀྱི་སྡིག་པ་དང་མི་མང་གི་སྡིག་པ་སེལ་བའིི་ཆེད་དུ་སྡིག་སེལ་གྱི་མཆོད་པ་དང་སྦྱིན་སྲེག་གི་མཆོད་པ་འབུལ་དགོས། གཙོ་བོ་དཀོན་མཆོག་གིས་བཀའ་གནང་བ་བཞིན་མི་དམངས་ཀྱི་སྡིག་པ་སེལ་བའི་ཕྱིར་དུ་གོང་གསལ་མཆོད་པ་དེ་འབུལ་དགོས་ཅེས་སྨྲས་སོ།

⁸ དེ་རྗེས་ཨ་རོན་མཆོད་ཁྲིའི་རྩར་ཕྱིན་ནས་རང་གི་སྡིག་སེལ་གྱི་དོན་དུ་ཕོ་གླང་གཞོན་པ་དེ་བསད་དོ།

⁹ ཁོའི་བུ་རྣམས་ཀྱིས་ཁྲག་དེ་འཁྱེར་ཡོང་བ་དང་། ཁོས་དེའི་ནང་རང་གི་མཛུབ་མོ་བཅུག་སྟེ། མཆོད་ཁྲིའི་རྭ་ཅོ་སོ་སོར་གཏོར་བ་དང་། ཁྲག་ལྷག་མ་དེ་མཆོད་ཁྲིའི་ཞབས་རར་བླུགས་སོ།

¹⁰ གཙོ་བོ་དཀོན་མཆོག་གིས་མོ་ཤེ་ལ་བཀའ་གནང་བ་བཞིན་ཁོས་ཚིལ་ལུ་དང་མཁལ་མ་རྣམས་དང་། མཆིན་པའི་ཆ་ཤས་ལེགས་ཤོས་བཅས་པ་མཆོད་ཁྲིའི་སྟེང་དུ་མེར་སྲེག་བཏང་ངོ་།

¹¹ འོན་ཀྱང་ཤ་དང་པགས་པ་ནི་སྒར་གྱི་ཕྱི་རོལ་དུ་མེར་སྲེག་བཏང་ངོ་།

¹² ཁོས་རང་གི་སྦྱིན་སྲེག་གི་ཆེད་དུ་དུད་འགྲོ་དེ་བསད་པ་དང་། ཁོའི་བུ་རྣམས་ཀྱིས་ཁྲག་དེ་འཁྱེར་ཡོང་ཞིང་། ཁོས་ཁྲག་དེ་མཆོད་ཁྲིའི་ཕྱོགས་བཞིར་གཏོར་རོ།

¹³ དེ་རྗེས་ཁོ་ཚོས་དུད་འགྲོའི་མགོ་དང་ཆ་ཤས་གཞན་རྣམས་ཁོ་ལ་རྩིས་སྤྲད་ནས། ཁོས་དེ་དག་མཆོད་ཁྲིའི་སྟེང་དུ་མེར་སྲེག་བཏང་ངོ་།

¹⁴ ནང་ཁྲོལ་དང་རྐང་པ་རྣམས་འཁྲུད་ནས་མཆོད་ཁྲིའི་ཁར་མཆོད་རྫས་གཞན་རྣམས་ཀྱི་སྟེང་དུ་བཞག་ནས་སྲེགས་སོ།

¹⁵ དེ་རྗེས་ཨ་རོན་གྱིས་མི་མང་གི་འབུལ་བ་རྣམས་ཕུལ་བ་དང་། མི་མང་གི་སྡིག་སེལ་གྱི་དོན་དུ་འབུལ་དགོས་པའི་ར་དེ་འཁྲིད་ཡོང་ནས་དེ་བསད་ཅིང་རང་གི་སྡིག་སེལ་གྱི་མཆོད་པ་འབུལ་བ་ལྟར་ཕུལ་ལོ།

¹⁶ དེ་བཞིན་ཁོས་སྦྱིན་སྲེག་གི་དོན་དུ་འབུལ་དགོས་པའི་སེམས་ཅན་དེ་འཁྲིད་ཡོང་སྟེ། ཁྲིམས་སྲོལ་ལྟར་དེའང་མཆོད་པར་ཕུལ་ལོ།

¹⁷ ཁོས་འབྲུ་སྣའི་མཆོད་འབུལ་བྱས་ཏེ། གྲོ་ཞིབ་སྦར་ར་གང་བླངས་ནས་མཆོད་ཁྲིའི་ཁར་མེར་སྲེག་བཏང་ཞིང་། དེ་ནི་དུས་རྒྱུན་དུ་འབུལ་དགོས་པའི་སྦྱིན་སྲེག་གི་འབུལ་བའི་ཁར་འབུལ་བ་འཕར་མ་ཞིག་ཡིན་པ་དང་།

¹⁸ ཁོས་མི་མང་གི་དོན་དུ་མཐུན་འབྲེལ་གྱི་མཆོད་པར་གླང་ཞིག་དང་ཕོ་ལུག་ཞིག་ཀྱང་བསད་དེ། ཁོའི་བུ་རྣམས་ཀྱིས་སེམས་ཅན་གྱི་ཁྲག་དེ་འཁྱེར་ཡོང་བ་དང་། ཁོས་ཁྲག་དེ་མཆོད་ཁྲིའི་ཕྱོགས་བཞིར་གཏོར་རོ།

¹⁹ དེ་རྗེས་ཨ་རོན་གྱིས་གླང་དང་ལུག་གི་ཚིལ་རྣམས།

²⁰ བྲང་ཤའི་སྟེང་དུ་བཞག་སྟེ། མཆོད་ཁྲིའི་རྩར་འཁྱེར་ཞིང་ཚིལ་ལུ་དེ་དག་མཆོད་ཁྲིའི་ཁར་མེར་སྲེག་བཏང་ངོ་།

²¹ མོ་ཤེས་བཀའ་གནང་བ་བཞིན་བྲང་ཤ་དང་རྒྱབ་རྐང་པ་གཡས་པ་རྣམས་བླ་མ་ཚོའི་དོན་དུ་གཙོ་བོ་དཀོན་མཆོག་ལ་དམིགས་བསལ་གྱི་འབུལ་བར་ཕུལ་ལོ།

²² དེ་ནས་ཨ་རོན་གྱིས་དམར་མཆོད་ཚང་མ་ཕུལ་ཚར་བའི་རྗེས་སུ། རང་གི་ལག་པ་མི་དམངས་ཀྱི་ཕྱོགས་སུ་ཡར་བརྐྱངས་ནས་དེ་དག་ལ་བྱིན་རླབས་གནང་ཞིང་མར་བབས་སོ།

²³ དེ་ནས་མོ་ཤེ་དང་ཨ་རོན་གཉིས་གཙོ་བོ་དཀོན་མཆོག་གནས་པའི་དབུ་གུར་དམ་པའི་ནང་དུ་འཛུལ་ནས་ཕྱིར་ཐོན་ཏེ་མི་མང་ལ་བྱིན་གྱིས་རླབས་པ་དང་། གཙོ་བོ་དཀོན་མཆོག་བཞུགས་ཡོད་པའི་བཀྲག་མདངས་ཀྱི་འོད་ཟེར་དེ་མི་མང་ཚང་མས་མདུན་མངོན་ནོོ།

²⁴ དེ་ནས་བློ་བུར་དུ་གཙོ་བོ་དཀོན་མཆོག་གིས་མེ་ཞིག་གཏོང་བ་གནང་ཞིང་། དེས་སྦྱིན་སྲེག་གི་མཆོད་པ་དང་མཆོད་ཁྲིའི་ཁར་ཡོད་པའི་ཚིལ་རྣམས་ཡོངས་སུ་འཚིགས་སོ། དེ་མཐོང་ནས་མི་རྣམས་ཀྱིས་སྐད་ཅོར་ཆེན་པོ་རྒྱབ་ཅིང་ལུས་ས་ལ་བརྡབས་ཏེ་ཕྱག་འཚལ་ཞུས་སོ༎