ལེ་ཝི 27 - Tibetan Old Testament 2011

གཙོ་བོ་དཀོན་མཆོག་ལ་ཕུལ་བའི་འབུལ་བའི་སྐོར་གྱི་ཁྲིམས།

^1-2 གཙོ་བོ་དཀོན་མཆོག་གིས་མོ་ཤེ་ལ་གསུངས་པ། ཨིསི་རཱཨེལ་པ་ཚོ་ལ་སྨྲོས་ཤིག། གཙོ་བོ་དཀོན་མཆོག་ལ་ཕུལ་བའི་དམིགས་བསལ་གྱི་དམ་བཅའ་སྒྲུབ་པའི་ཆེད་དུ། ཁོང་ལ་མི་ཞིག་བསྔོ་འབུལ་བྱེད་པ་ཡིན་ན། གཤམ་གསལ་གོང་ཚད་བཞིན་དུ་བླུ་རིན་འཇལ་ནས་མི་དེ་རང་དབང་དུ་འགྱུར་ཡོང་།

^3-7 བླུ་རིན་དེ་ནི་གཞུང་གི་ཁྲིམས་སྲོལ་ལྟར་གཏན་འབེབས་བྱས་པ་ཞིག་དགོས། - རང་ལོ་ཉི་ཤུ་ནས་དྲུག་ཅུ་བར་གྱི་སྐྱེས་པ་ཞིག་གི་ཆེད་དུ་དངུལ་དུམ་བུ་ལྔ་བཅུ་དང་། - ལོ་ན་ལོན་པའི་བུད་མེད་གཅིག་གི་ཆེད་དུ་དངུལ་དུམ་བུ་སུམ་ཅུ་དང་། - རང་ལོ་ལྔ་ནས་ཉི་ཤུ་བར་གྱི་ལོ་གཞོན་པ་ཞིག་གི་ཆེད་དུ་དངུལ་དུམ་བུ་ཉི་ཤུ། - བུ་མོ་ན་གཞོན་མ་ཞིག་གི་ཆེད་དུ་དངུལ་དུམ་བུ་བཅུ། - རང་ལོ་ལྔ་མ་ལོན་པའི་བུ་ཞིག་གི་ཆེད་དུ་དངུལ་དུམ་བུ་ལྔ། - ལོ་ལྔ་ལས་ཆུང་བ་བུ་མོ་ཞིག་ལ་དངུལ་དུམ་བུ་གསུམ། - རང་ལོ་དྲུག་ཅུ་ལས་ལྷག་པའི་སྐྱེས་པ་ཞིག་གི་ཆེད་དུ་དངུལ་དུམ་བུ་བཅོ་ལྔ། - རང་ལོ་དྲུག་ཅུ་ལས་ལྷག་པའི་བུད་མེད་གཅིག་གི་ཆེད་དུ་དངུལ་དུམ་བུ་བཅུ།

⁸ གལ་ཏེ་དམ་བཅའ་བྱེད་མཁན་མི་དེ་དབུལ་པོ་ཞིག་ཡིན་པས། གཏན་འབེབས་བྱེད་པའི་བླུ་རིན་དེ་འཇལ་མ་ཐུབ་པ་ཡིན་ན། ཁོས་མི་དེ་བླ་མའི་རྩར་འཁྲིད་ཡོང་དགོས། བླ་མས་མི་དེའི་གནས་སྟངས་ལ་གཞིགས་ཏེ་བླུ་རིན་ཆག་ཡང་བྱེད་པར་འགྱུར།

⁹ གལ་ཏེ་དུད་འགྲོ་ཞིག་འབུལ་རྒྱུའི་དམ་བཅའ་བྱེད་ཡོད་རུང་། དུད་འགྲོ་དེ་གཙོ་བོ་དཀོན་མཆོག་ལ་འབུལ་འོས་པ་ཞིག་ཡིན་ན། འབུལ་བ་ཚང་མ་དམ་པར་བརྩི་དགོས་རྒྱུ་དང་།

¹⁰ དམ་བཅའ་བྱེད་མཁན་མི་དེས་དུད་འགྲོ་ཞིག་འབུལ་རྒྱུའི་ཐག་གཅོད་བྱས་ཟིན་པ་ཡིན་ན། དུད་འགྲོ་དེའི་ཚབ་ཏུ་དུད་འགྲོ་གཞན་ཞིག་འབུལ་མི་ཆོག དེ་འདྲ་བྱས་པ་ཡིན་ན་དུད་འགྲོ་གཉིས་ཀ་གཙོ་བོ་དཀོན་མཆོག་ལ་བདག་པ་ཡིན་ནོ།

¹¹ གལ་ཏེ་དམ་བཅའ་བྱེད་པའི་དུད་འགྲོ་དེ་སྲོལ་བཞིན་མི་གཙང་བར་ཡོད་པ་ཡིན་ན། འབུལ་བ་དེ་གཙོ་བོ་དཀོན་མཆོག་ལ་འབུལ་འོས་པ་ཞིག་མེད་པ་ཡིན་ན། ཁོས་དུད་འགྲོ་དེ་བླ་མའི་རྩར་འཁྲིད་ཡོང་དགོས།

¹² བླ་མས་དུད་འགྲོ་དེ་ཡག་ཉེས་ལ་གཞིགས་ནས་དེའི་རིན་གོང་གཏན་འབེབས་བྱེད་དགོས། དེ་ལྟར་གཏན་འབེབས་བྱས་ཟིན་པའི་གོང་ཚད་དེ་ལ་གོང་བཅག་རྒྱུ་མེད་པ་ཡིན་ནོ།

¹³ མི་དེས་དུད་འགྲོ་དེ་ཕྱིར་སློག་ཉོ་འདོད་བྱེད་ན། དུད་འགྲོའི་རིན་གོང་གི་ཁར་བརྒྱ་ཆ་ཉི་ཤུ་ཙམ་འཕར་སྣོན་འབུལ་དགོས།

¹⁴ སུ་ཞིག་གིས་རང་གི་ཁྱིམ་དེ་གཙོ་བོ་དཀོན་མཆོག་ལ་བསྔོ་འབུལ་བྱེད་པར་འདོད་སྐབས། བླ་མས་ཁང་པ་དེའི་གནས་སྟངས་བཟང་ངན་ལ་གཞིགས་ནས་དེའི་གོང་ཚད་གཏན་འབེབས་བྱེད་དགོས། གོང་ཚད་གཏན་འབེབས་བྱས་ཟིན་པ་དེར་གོང་བཅག་རྒྱུ་མེད་པ་ཡིན་ནོ།

¹⁵ ཁང་པ་བསྔོ་འབུལ་བྱེད་མཁན་དེས་སླར་ཡང་ཁང་པ་དེ་ཕྱིར་སློག་ཉོས་འདོད་བྱེད་པ་ཡིན་ན། ཁོས་ཁང་པའི་གོང་ཚད་ཀྱི་ཁར་བརྒྱ་ཆ་ཉི་ཤུ་ཙམ་འཕར་སྣོན་འབུལ་དགོས།

¹⁶ སུ་ཞིག་གིས་རང་གི་ས་ཞིང་གི་ཆ་ཤས་ཤིག་གཙོ་བོ་དཀོན་མཆོག་ལ་འབུལ་བ་ཡིན་ན། དེའི་རིན་གོང་ནི་ཞིང་དེར་ས་བོན་མང་ཉུང་ཇི་ཙམ་འགྲོ་བའི་འབོར་ཚད་ལ་གཞིགས་ཏེ། འབྲུ་ཀི་ལོ་ཉི་ཤུ་རེར་དངུལ་དུམ་བུ་བཅུ་རེ་བྱེད་དེ་བརྩི་དགོས་ཤིང་།

¹⁷ ཁོས་རང་གི་ཞིང་དེ་སྐྱར་གསོའི་ལོ་དུས་ཡོལ་མ་ཐག་ཏུ་བསྔོ་འབུལ་བྱེད་པ་ཡིན་ན། དེའི་རིན་གོང་ཆ་ཚང་འབུལ་དགོས།

¹⁸ དེའི་རྗེས་སུ་ས་ཞིང་དེ་བསྔོ་འབུལ་བྱེད་པ་ཡིན་ན། སྐྱར་གསོའི་ལོ་དུས་རྗེས་མ་དེ་མ་རན་པར་དུས་ཚོད་མང་ཉུང་ཇི་ཡོད་ལ་གཞིགས་ཏེ། བླ་མས་དེ་བཞིན་རྩིས་བརྒྱབ་ནས་ཞིང་གི་གོང་ཚད་བཅག་ནས་གཏན་འབེབས་བྱེད་དགོས།

¹⁹ ས་ཞིང་བསྔོ་འབུལ་བྱེད་མཁན་དེས་སྐྱར་དུ་ཞིང་དེ་ཕྱིར་སློག་ཉོ་བར་འདོད་ན། ཁོས་ཞིང་གི་རིན་གོང་ཇི་ཡོད་ཁར་བརྒྱ་ཆ་ཉི་ཤུ་འཕར་སྣོན་འབུལ་དགོས།

²⁰ གལ་ཏེ་ཁོས་གཙོ་བོ་དཀོན་མཆོག་ལ་ཞིང་གི་རིན་གོང་མ་འབུལ་བར་མི་གཞན་ཞིག་ལ་བཙོང་པ་ཡིན་ན། ཁོས་ཞིང་དེ་སྐྱར་དུ་ཕྱིར་སློག་ཉོས་ཆོག་པའི་དབང་ཆ་དོར་དགོས་རྒྱུ་ཡིན།

²¹ དེ་རྗེས་སྐྱར་གསོའི་ལོ་དུས་རྗེས་མ་ནས་བཟུང་ས་ཞིང་དེ་དུས་གཏན་གྱི་ཆེད་དུ་གཙོ་བོ་དཀོན་མཆོག་གི་དངོས་རྫས་སུ་རྟོགས་ཤིང་། དེ་ནི་བླ་མ་རྣམས་ལ་ཐོབ་པར་འགྱུར།

²² སུ་ཞིག་གིས་སོ་སོས་ཉོས་པའི་ཞིང་དེ་གཙོ་བོ་དཀོན་མཆོག་ལ་བསྔོ་འབུལ་བྱེད་པར་འདོད་ན།

²³ བླ་མས་སྐྱར་གསོའི་ལོ་དུས་མ་རན་བར་ལོ་གྲངས་ཇི་ཡོད་ལ་གཞིགས་ཏེ། དེའི་རིན་གོང་གཏན་འབེབས་བྱེད་དགོས། མི་དེས་ཞིང་གི་རིན་གོང་དེ་ཉིན་རང་ལ་ཆ་ཚང་འབུལ་དགོས། དངུལ་དེ་ནི་གཙོ་བོ་དཀོན་མཆོག་གི་ཡིན་པར་འགྱུར།

²⁴ སྐྱར་གསོའི་ལོ་དུས་ཀྱི་སྐབས་སུ་ས་ཞིང་དེ་བདག་པོ་ངོ་མའམ་དེའི་བུ་བརྒྱུད་རྣམས་ལ་ཕྱིར་སློག་སྤྲོད་དགོས་པ་ཡིན་ནོ།

²⁵ གཞུང་གི་ཁྲིམས་སྲོལ་ལྟར་གཏན་འབེབས་བྱས་པའི་གོང་ཚད་དང་བསྟུན་ཏེ་རིན་གོང་རྒྱབ་དགོས།

²⁶ དུད་འགྲོའི་ནང་ནས་སྔོན་སྐྱེས་དེ་གཙོ་བོ་དཀོན་མཆོག་གི་ཡིན་བཞིན་དུ། སུས་ཀྱང་དེ་ནི་འདོད་མོས་ཀྱི་འབུལ་བའི་ཚུལ་དུ་ཁོང་ལ་འབུལ་མི་ཆོག བེའུ་དང་ལུག་གུའམ་ར་ཕྲུག་བཅས་གཙོ་བོ་དཀོན་མཆོག་གི་ཡིན་ནོ།

²⁷ འོན་ཀྱང་མི་གཙང་བའི་དུད་འགྲོ་སྔོན་སྐྱེས་གཏན་འབེབས་བྱས་པའི་གོང་ཚད་ཀྱི་ཁར་བརྒྱ་ཆ་ཉི་ཤུ་འཕར་སྣོན་འབུལ་ཏེ་ཉོ་དགོས། གལ་སྲིད་དེ་ཕྱིར་སློག་མ་ཉོས་ན། མི་གཞན་ཞིག་ལ་གཏན་འབེསབ་བྱས་པའི་གོང་ཚད་ལ་ཚོང་ཆོག་པ་ཡིན་ནོ།

²⁸ གཙོ་བོ་དཀོན་མཆོག་ལ་ཆ་རྐྱེན་མེད་པར་མིའམ་དུད་འགྲོའམ་ས་ཞིང་སོགས་བསྔོ་འབུལ་བྱས་པ་ཡིན་ན། དེ་ནི་སླར་ཡང་ཉོ་ཚོང་བྱེད་མི་ཆོག། དེ་ནི་དུས་གཏན་གྱི་ཆེད་དུ་གཙོ་བོ་དཀོན་མཆོག་གི་ཡིན་པར་འགྱུར།

²⁹ ཆ་རྐྱེན་མེད་པར་བསྔོ་འབུལ་བྱས་པའི་མི་ཞིག་ལ་ཡང་ཕྱིར་སློག་ཉོས་ཏེ་བླུ་མི་ཆོག་གོ ཁོ་ནི་ངེས་པར་དུ་གསོད་དགོས་པ་ཡིན་ནོ།

³⁰ ས་ཞིང་ཐོན་སྐྱེད་ཀྱི་འབྲུའམ་ཤིང་འབྲས་གང་རུང་གི་བཅུ་ཆ་དེ་ནི་གཙོ་བོ་དཀོན་མཆོག་གི་ཡིན་ནོ།

³¹ གལ་ཏེ་སུ་ཞིག་གིས་བཅུ་ཆའི་འབུལ་བ་དེ་ལས་ཉོ་བར་འདོད་ན། ཁྲིམས་སྲོལ་བཞིན་གཏན་འབེསབས་བྱས་པའི་གོང་ཚད་ཀྱི་ཐོག་ཏུ་བརྒྱ་ཆ་ཉི་ཤུ་འཕར་སྣོན་འབུལ་དགོས།

³² རང་གི་ཁང་པར་གསོས་པའི་དུད་འགྲོ་བཅུའི་ནང་ནས་གཅིག་ནི་གཙོ་བོ་དཀོན་མཆོག་གི་ཡིན། དུད་འགྲོའི་གྲངས་ཁ་བརྒྱབ་དུས་བཅུ་ཆ་དེ་གཙོ་བོ་དཀོན་མཆོག་གི་ཡིན་ནོ།

³³ དུད་འགྲོའི་བདག་པོས་གཙོ་བོ་དཀོན་མཆོག་ལ་འབུལ་བའི་ཕྱིར་དུད་འགྲོ་ཤ་སྐམ་པོ་རྣམས་སྒྲིག་ནས་བཞག་པའམ། ཡག་ཉེས་དབྱེ་བ་ཕྱེ་བའམ་བརྗེ་ལེན་སོགས་བྱེད་མི་ཆོག གལ་ཏེ་དུད་འགྲོ་བརྗེ་ལེན་བྱས་པ་ཡིན་ན། དུད་འགྲོ་ཡག་ཉེས་གཉིས་ཀ་གཙོ་བོ་དཀོན་མཆོག་གི་ཡིན་པར་འགྱུར། དེ་དག་བླུ་རིན་འབུལ་ནས་སླར་ཕྱིར་སློག་ཉོ་མི་ཆོག་པ་ཡིན་ནོ།

³⁴ གོང་གསལ་བཀའ་རྒྱ་དེ་རྣམས་ནི་གཙོ་བོ་དཀོན་མཆོག་གིས་མོ་ཤེ་ལ་རི་བོ་སི་ནཨེ་སྒང་ནས་ཨིསི་རཱཨེལ་མི་མང་རྣམས་ཀྱི་ཆེད་དུ་གནང་བ་ཡིན་ནོ༎