ལེ་ཝི 23 - Tibetan Old Testament 2011

ཆོས་ཀྱི་དུས་ཆེན་ཁག།

¹ གཙོ་བོ་དཀོན་མཆོག་གིས་མོ་ཤེ་ལ་གསུངས་པ།

² ཨིསི་རཱཨེལ་པ་ཚོ་ལ་སྨྲོས་ཤིག། ཁྱོ་ཚོ་གཙོ་བོ་དཀོན་མཆོག་ལ་མཆོད་འབུལ་བྱེད་ཕྱིར་ཕྱོགས་གཅིག་ཏུ་འཛོམས་སྐབས། གཙོ་བོ་དཀོན་མཆོག་གི་གནང་བའི་གཤམ་གསལ་གྱི་ཆོས་ཀྱི་དུས་ཆེན་ཁག་རྣམས་སྲུང་དགོས་པ་ཡིན།

³ ཁྱོད་ཚོར་རང་གི་ལས་བྱེད་ཕྱིར་ཉིན་ཞག་དྲུག་ཐོབ་ཡོད། འོན་ཀྱང་ཉིན་ཞག་བདུན་པ་དེ་ནི་ངལ་གསོ་བའི་ཞག་དམ་པ་ཡིན་པ་དེ་མ་བརྗེད་པར་བྱོས་ཤིག དེ་ཉིན་ཁྱོད་ཚོས་ལས་གང་ཡང་མ་བྱེད་པར་མཆོད་འབུལ་བྱེད་ཕྱིར་མཉམ་དུ་འཛོམས་དགོས། ཁྱོད་ཚོས་ཕྱོགས་གང་དུ་བསྡད་ཀྱང་ངལ་གསོ་བའི་ཞག་དམ་པ་དེ་ནི་གཙོ་བོ་དཀོན་མཆོག་གི་ཡིན་པ་དེ་མ་བརྗེད་པར་བྱོས་ཤིག

⁴ གཏན་འབེབས་ཟིན་པའི་ནམ་དུས་ཚེས་གྲངས་སོ་སོར་དུ་ཆེན་དེ་དག་སྲུང་བརྩི་བྱེད་དགོས་ཅེས་ཁྱབ་བསྒྲགས་བྱེད་དགོས༎

ཐར་གྲོལ་དང་ཆི་མན་མེད་པའི་བག་ལེབ་ཀྱི་དུས་སྟོན།

⁵ གཙོ་བོ་དཀོན་མཆོག་ལ་གུས་བཀུར་ཞུ་ཕྱིར་བཤམས་པའི་ཐར་གྲོལ་གྱི་དུས་སྟོན་དེ་ནི་ཟླ་བ་དང་པོའི་ཚེས་བཅུ་བཞིའི་དགོང་དྲོ་ཉི་མ་བཞུད་སྐབས་ནས་འགོ་ཚུགས་རྒྱུ་དང་།

⁶ ཚེས་བཅོ་ལྔར་ཆི་མན་མེད་པའི་བག་ལེབ་ཀྱི་དུས་ཆེན་དེ་འགོ་ཚུགས་ཤིང་། ཉིན་ཞག་བདུན་བར་དུ་ཁྱོད་ཚོས་ཆི་མན་ཡོད་པའི་བག་ལེབ་ཟ་མི་རུང་།

⁷ དུས་ཆེན་གྱི་ཞག་དང་པོའི་ཉིན་མཆོད་འབུལ་བྱེད་ཕྱིར་ཚོགས་འདུ་ཞིག་ཚོགས་དགོས་རྒྱུ་དང་། དེ་ཉིན་རང་གི་ཉིན་རེའི་ལས་སོགས་གང་ཡང་བྱེད་མི་ཆོག

⁸ ཉིན་ཞག་བདུན་བར་དུ་གཙོ་བོ་དཀོན་མཆོག་ལ་ཁ་ཟས་ཀྱི་མཆོད་པ་འབུལ་དགོས། ཉིན་ཞག་བདུན་པའི་ཐོག་ཡང་སྐྱར་ཁྱོད་ཚོ་མཆོད་འབུལ་བྱེད་ཕྱིར་འཛོམས་དགོས་པ་ལས། དེ་ཉིན་རང་གི་ཉིན་རེའི་ལས་དོན་སོགས་གང་ཡང་བྱེད་མི་ཆོག

^9-10 གཙོ་བོ་དཀོན་མཆོག་གིས་ཁྱོད་ཚོར་གནང་བཞིན་པའི་ཡུལ་དེར་སླེབས་ཏེ། དེར་སྟོན་ཐོག་བསྡུ་སྒྲུག་བྱེད་སྐབས་སྙེ་མའི་ཆག་པ་དང་པོ་དེ་བླ་མའི་རྩར་འཁྱེར་ཡོང་དགོས།

¹¹ བླ་མས་དེ་ནི་དམིགས་བསལ་གྱི་འབུལ་བའི་ཚུལ་དུ་གཙོ་བོ་དཀོན་མཆོག་ལ་འབུལ་དགོས། དེ་ལྟར་བྱས་པའི་སྒོ་ནས་གཙོ་བོ་དཀོན་མཆོག་གིས་ཁྱོད་ཚོར་ངོས་ལེན་གནང་བར་འགྱུར། བླ་མས་འབུལ་བ་དེ་ནི་ངལ་གསོ་བའི་ཞག་དམ་པའི་སང་ཉིན་འབུལ་དགོས།

¹² ཁྱོད་ཚོས་འབྲུ་སྣའི་མཆོད་པ་འབུལ་བའི་ཉིན་མོར་ལོ་གཅིག་ལོན་པའི་ལུག་གུ་ཕོ་སྐྱོན་མེད་པ་ཞིག་ཀྱང་སྦྱིན་སྲེག་གི་མཆོད་པར་འབུལ་དགོས།

¹³ དེ་དང་མཉམ་དུ་ཁ་སྐྱུར་པོའི་སྣུམ་བསྲེས་པའི་གྲོ་ཞིབ་ཀི་ལོ་དོ་ཙམ་ཁ་ཟས་ཀྱི་མཆོད་པའི་ཚུལ་དུ་འབུལ་དགོས། འབུལ་བ་དེའི་དྲི་ཞིམ་གྱིས་གཙོ་བོ་དཀོན་མཆོག་ཐུགས་མཉེས་པར་འགྱུར། དེ་དང་མཉམ་དུ་རྒུན་ཆང་ལི་ཊར་གཅིག་ཙམ་ཞིག་ཁྱོད་ཚོས་འབུལ་བར་འབུལ་དགོས།

¹⁴ འབུལ་བ་དེ་ནི་གཙོ་བོ་དཀོན་མཆོག་ལ་མ་འབུལ་བར་དུ་ཁྱོད་ཚོས་འབྲུ་གསར་པ་དེ་ལས་རྗེན་པའམ་སྲེག་པའམ། བག་ལེབ་བཟོས་ནས་མ་ཟ་ཞིག། བཀའ་ཁྲིམས་དེ་ནི་ཁྱོད་ཚོའི་རིགས་བརྒྱུད་ཚང་མས་མ་འོངས་པར་དུས་ཀུན་ཏུ་སྲུང་དགོས་སོ༎

སྙེ་མ་རྔ་བའི་དུས་ཆེན།

¹⁵ ཁྱོད་ཚོས་ངལ་གསོ་བའི་ཞག་གི་སང་ཉིན་གཙོ་བོ་དཀོན་མཆོག་གི་སྤྱན་སྔར་སྙེ་མའི་ཆག་པ་འབུལ་བའི་ཉིན་མོ་ནས་བཟུང་བདུན་ཕྲག་བདུན་བར་བརྩིས་ཞིག

¹⁶ ཉིན་ཞག་ལྔ་བཅུ་པའམ་ངལ་གསོ་བའི་ཞག་བདུན་པའི་སང་ཉིན་ཁྱོད་ཚོས་གསར་དུ་འབྲུའི་མཆོད་པ་ཞིག་གཙོ་བོ་དཀོན་མཆོག་ལ་འབུལ་དགོས།

¹⁷ ཁྱིམ་ཚང་རེ་རེས་བག་ལེབ་གཉིས་རེ་འཁྱེར་ཡོང་ནས་གཙོ་བོ་དཀོན་མཆོག་ལ་དམིགས་བསལ་གྱི་འབུལ་བའི་ཚུལ་དུ་འབུལ་དགོས། གྲོ་ཞིབ་ཀི་ལོ་དོ་དང་བཅས་ཆི་མན་བསྲེས་ཏེ་དེ་ལས་བག་ལེབ་ཆེན་པོ་ཞིག་སྲེག་ནས་སྟོན་ཐོག་གི་ཕུད་ཀྱི་མཆོད་འབུལ་དུ་གཙོ་བོ་དཀོན་མཆོག་ལ་འབུལ་དགོས།

¹⁸ བག་ལེབ་དང་མཉམ་དུ་མི་མང་སྤྱི་ཡོངས་ནས་ལོ་གཅིག་ལོན་པའི་ལུག་གུ་བདུན་དང་། གླང་གཅིག་དང་། ཕོ་ལུག་གཉིས་བཅས་གཙོ་བོ་དཀོན་མཆོག་ལ་སྦྱིན་སྲེག་གི་མཆོད་པར་འབུལ་དགོས། དུད་འགྲོ་དེ་དག་ནི་སྐྱོན་མེད་པ་ཞིག་ཡིན་དགོས། གོང་གསལ་སྦྱིན་སྲེག་གི་མཆོད་པ་དེ་དང་མཉམ་དུ་འབྲུའི་མཆོད་པ་དང་རྒུན་ཆང་གི་མཆོད་པའང་འབུལ་དགོས། འབུལ་བ་དེའི་དྲི་ཞིམ་གྱིས་གཙོ་བོ་དཀོན་མཆོག་ཐུགས་མཉེས་པར་འགྱུར།

¹⁹ ར་ཕོ་གཅིག་སྡིག་སེལ་གྱི་མཆོད་པའི་ཕྱིར་དང་། ལོ་གཅིག་ལོན་པའི་ལུག་གུ་ཕོ་ལུག་ཆ་གཅིག་མཐུན་འབྲེལ་གྱི་མཆོད་པར་འབུལ་དགོས།

²⁰ དེ་རྗེས་བླ་མས་བག་ལེབ་དེ་དང་ལོ་གཅིག་ལོན་པའི་ལུག་གུ་ཆ་གཅིག་དེ་བླ་མ་རྣམས་ཀྱི་ཆེད་དུ་གཙོ་བོ་དཀོན་མཆོག་ལ་དམིགས་བསལ་གྱི་འབུལ་བའི་ཚུལ་དུ་འབུལ་དགོས། འབུལ་བ་དེ་དག་ནི་དམ་པར་བརྩི་དགོས་པ་ཡིན་ནོ།

²¹ དེ་ཉིན་རང་གི་དུས་རྒྱུན་གྱི་ལས་དོན་སོགས་གང་ཡང་མ་བྱེད་པར། མཆོད་འབུལ་བྱེད་ཕྱིར་ཚང་མས་ཕྱོགས་གཅིག་ཏུ་འཛོམས་དགོས། ཁྱོད་ཚོའི་བུ་བརྒྱུད་རྣམས་ས་ཕྱོགས་གང་དུ་ཡོད་རུང་། དེ་ཚོས་བཀའ་ཁྲིམས་འདི་དག་མ་འོངས་པར་དུས་རྒྱུན་དུ་སྲུང་དགོས་པ་ཡིན་ནོ།

²² ཁྱོད་ཚོས་ཞིང་ནས་སྙེ་མ་བསྡུ་སྒྲུག་བྱེད་སྐབས་ཞིང་གི་མཐའ་རུ་ཡོད་པའི་སྙེ་མ་དེ་ཚོ་མ་བསྡུ་ཤིག དེ་བཞིན་བསྡུ་འཕྲོ་ལུས་པའི་སྙེ་མ་བསྡུ་བར་ཡང་སྐྱར་ཞིང་ལ་མ་འགྲོ་ཞིག དེ་དག་དབུལ་པོ་དང་ཕྱི་རྒྱལ་ཚོའི་ཆེད་དུ་བཞག་དགོས། གཙོ་བོ་དཀོན་མཆོག་ནི་ཁྱོད་ཚོའི་དཀོན་མཆོག་ཡིན་ནོ༎

ལོ་གསར་པའི་དུས་ཆེན།

^23-24 ཟླ་བ་བདུན་པའི་ཚེས་གཅིག་གི་ཉིན་མོ་དེ་ནི་དམིགས་བསལ་གྱི་ངལ་གསོའི་ཉི་མ་སྲུང་དགོས་པ་དང་། དེ་ཉིན་དུང་སྐད་ཐོས་མ་ཐག་ཏུ་མཆོད་འབུལ་བྱེད་ཕྱིར་ཚང་མ་འཛོམས་དགོས།

²⁵ གཙོ་བོ་དཀོན་མཆོག་ལ་ཁ་ཟས་ཀྱི་མཆོད་པ་འབུལ་ནས་དེ་ཉིན་ཁྱོད་ཚོའི་ཉིན་རེའི་ལས་དོན་སོགས་གང་ཡང་མ་བྱེད་ཅིག།

སྡིག་བཤགས་ཀྱི་ཉིན་མོ།

^26-27 ཟླ་བ་བདུན་པའི་ཚེས་བཅུ་ནི་ཨིསི་རཱཨེལ་མི་དམངས་ཀྱི་སྡིག་བཤགས་ཀྱི་ཆེད་དུ་སྲོལ་དེ་སྲུང་བའི་ཉིན་མོ་ཡིན། དེ་ཉིན་རང་ཉིད་ལ་ཉམ་ཆུང་བྱེད་ནས་དམ་པའི་འདུ་ཚོགས་སུ་འཛོམས་དགོས། ཡང་གཙོ་བོ་དཀོན་མཆོག་ལ་མེའི་སྒོ་ནས་མཆོད་པ་འབུལ་དགོས།

²⁸ དེ་ཉིན་ལས་ཀ་གང་ཡང་མ་བྱེད་ཅིག། གང་ལ་ཟེར་ན། དེ་ཉིན་སྡིག་བཤགས་ཀྱི་ཆོ་ག་བཤམས་པའི་ཉིན་མོ་དེ་ཡིན་པས་སོ།

²⁹ དེ་ཉིན་སུ་ཞིག་གིས་ཁ་ཟས་ཟ་བ་ཡིན་ན། དེ་ནི་དཀོན་མཆོག་གི་མི་འབངས་སུ་བརྩི་བར་མི་འགྱུར།

³⁰ དེ་ཉིན་སུ་ཞིག་གིས་ལས་ཀ་སོགས་བྱས་པ་ཡིན་ན། གཙོ་བོ་དཀོན་མཆོག་རང་ཉིད་ཀྱིས་ཁོ་ལ་གསོད་གནང་རྒྱུ་ཡིན།

³¹ ཁྱོད་ཀྱི་རིགས་བརྒྱུད་རྣམས་ས་ཕྱོགས་གང་དུ་ཡོད་ནའང། དེ་ཚོས་བཀའ་ཁྲིམས་འདི་དག་སྲུང་དགོས།

³² ཟླ་བ་དེའི་ཚེས་དགུའི་དགོང་དྲོ་ཉི་མ་བཞུད་པ་ནས་བཟུང་སང་དགོང་ཚེས་བཅུའི་དགོང་དྲོ་ཉི་མ་བཞུད་པའི་བར་དུ་ཉིན་མོ་དེ་ནི་དམིགས་བསལ་གྱི་ངལ་གསོའི་ཉིན་ཞིག་ཏུ་སྲུང་དགོས་པས། དེ་ཉིན་ཁ་ཟས་སོགས་གང་ཡང་ཟ་མི་ཆོག།

རྩ་གཡབ་ཀྱི་དུས་སྟོན།

^33-34 རྩ་གཡབ་ཀྱི་དུས་ཆེན་དེ་ནི་ཟླ་བ་བདུན་པའི་ཚེས་བཅོ་ལྔར་འགོ་ཚུགས་ཏེ་ཉིན་ཞག་བདུན་བར་དུ་སྲུང་དགོས།

³⁵ ཉིན་ཞག་དང་པོར་ཁྱོད་ཚོ་མཆོད་འབུལ་བྱེད་ཕྱིར་འཛོམས་དགོས་པ་དང་། དེ་ཉིན་ལས་སོགས་གང་ཡང་བྱེད་མི་ཆོག

³⁶ ཉིན་ཞག་བདུན་བར་དུ་ཁ་ཟས་ཀྱི་མཆོད་པ་འབུལ་དགོས། ཉིན་ཞག་བརྒྱད་པར་ཁྱོད་ཚོ་ཚང་མ་ཕྱོགས་གཅིག་ཏུ་མཆོད་འབུལ་བྱེད་ཕྱིར་འཛོམས་ནས་ཁ་ཟས་ཀྱི་མཆོད་པ་འབུལ་དགོས་རྒྱུ་དང་། ཉིན་མོ་དེ་ནི་མཆོད་འབུལ་བྱེད་པའི་ཉིན་མོ་ཡིན་པས། ལས་གང་ཡང་བྱེད་མི་རུང་ངོ་།

³⁷ དུས་ཆེན་དེ་དག་ནི་ཆོས་ཀྱི་དུས་ཆེན་རྣམས་ཡིན་པས། ཁྱོད་ཚོ་མཆོད་འབུལ་གྱི་ཆེད་དུ་ས་ཕྱོགས་གཅིག་ཏུ་འཛོམས་ནས། ཉིན་རེ་བཞིན་བྱེད་དགོས་པའི་མེའི་སྒོ་ནས་འབུལ་དགོས་པའི་འབུལ་བ་རྣམས་ནི། སྦྱིན་སྲེག་དང་། འབྲུའི་མཆོད་པ་དང་། དམར་མཆོད་ཀྱི་འབུལ་བ་དང་། རྒུན་ཆང་གི་འབུལ་བ་ཕུལ་ནས་གཙོ་བོ་དཀོན་མཆོག་ལ་གུས་བཀུར་བྱེད་པར་འགྱུར།

³⁸ རྒྱུན་དུ་སྲུང་དགོས་པའི་དམ་པའི་ངལ་གསོ་བའི་ཞག་དམ་པ་རྣམས་ཀྱི་ཁར་དུས་ཆེན་འདི་ཚོ་ཡང་སྲུང་དགོས། གཙོ་བོ་དཀོན་མཆོག་ལ་འབུལ་དགོས་པའི་འབུལ་བ་དང་། དམ་བཅའ་སྒྲུབ་པའི་མཚོན་རྟགས་སུ་འབུལ་བའི་འབུལ་བ་དང་། དེ་བཞིན་འདོད་མོས་ཀྱི་མཆོད་འབུལ་སོགས་ཀྱི་ཁར་འབུལ་དགོས་པའི་འབུལ་བ་ཡིན་ནོ།

³⁹ རང་གི་ཞིང་ཁའི་སྙེ་མ་བསྡུ་སྒྲུག་བྱས་ཚར་བའི་རྗེས་སུ། ཟླ་བ་བདུན་པའི་ཚེས་བཅོ་ལྔ་ནས་འགོ་ཚུགས་ཏེ། ཉིན་ཞག་བདུན་བར་དུ་དུས་ཆེན་དེ་སྲུང་དགོས་པ་དང་། ཉིན་ཞག་དང་པོ་དེ་ནི་དམིགས་བསལ་གྱི་ངལ་གསོ་བའི་ཞག་དམ་པ་ཞིག་ཏུ་རྩིས་དགོས།

⁴⁰ དེ་ཉིན་རང་གི་ཤིང་འབྲས་བཟང་ཤོས་དང་། ཁ་ཟུར་ཤིང་གི་ཡལ་ག་དང་། གཞན་ཡང་ལོ་མ་ཡོད་པའི་ཤིང་སྡོང་གི་ཡལ་ག་རྣམས་བླངས་ཏེ་རང་གི་དཀོན་མཆོག་གཙོ་བོ་དཀོན་མཆོག་ལ་བཀུར་སྟི་ཞུ་ཕྱིར་ཆོས་ཀྱི་དུས་ཆེན་དེ་དག་སྲུང་བར་འགོ་འཛུགས་ཤིག

⁴¹ ཉིན་ཞག་བདུན་བར་དུ་དུས་ཆེན་དེ་སྲུང་དགོས། ཁྱོད་ཚོའི་རིགས་བརྒྱུད་ཚང་མས་མ་འོངས་པར་དུས་རྒྱུན་དུ་བཀའ་ཁྲིམས་དེ་དག་སྲུང་དགོས་པ་ཡིན་ནོ།

⁴² ཨིསི་རཱཨེལ་མི་དམངས་ཚང་མ་ཉིན་ཞག་བདུན་བར་དུ་རྩ་གཡབ་ཀྱི་བཟོས་པའི་ཁང་པའི་ནང་དུ་བསྡད་དགོས།

⁴³ གང་ལ་ཟེར་ན། སྔར་གཙོ་བོ་དཀོན་མཆོག་གིས་ཨིསི་རཱཨེལ་པ་རྣམས་ལ་ཨི་ཇིབ་ནས་བཏོན་ཏེ་འཁྲིད་ཕེབས་སྐབས། དེ་དག་ལམ་དུ་རྩ་ཁང་ནང་དུ་སྡོད་དགོས་བྱུང་བ་དེ་ཁྱོད་ཚོའི་བུ་བརྒྱུད་ཚོས་ཤེས་ཐུབ་པས་ཕྱིར་རོ། ཁོང་ནི་ཁྱོད་ཚོའི་དཀོན་མཆོག་གཙོ་བོ་དཀོན་མཆོག་ཡིན།

⁴⁴ དེ་བཞིན་མོ་ཤེས་གཅོ་བོ་དཀོན་མཆོག་ལ་བཀུར་སྟི་ཞུ་ཕྱིར་ཆོས་ཀྱི་དུས་ཆེན་རྣམས་སྲུང་ཆོག་སྐོར་གྱི་བཀའ་ཁྲིམས་རྣམས་ཨིསི་རཱཨེལ་པ་རྣམས་ལ་གནང་བ་ཡིན་ནོ༎