ལེ་ཝི 20 - Tibetan Old Testament 2011

བཀའ་མ་སྲུང་མཁན་རྣམས་ལ་ཆད་པ།

¹ གཙོ་བོ་དཀོན་མཆོག་གིས་མོ་ཤེ་ལ་བཀའ་གནང་བ།

² ཁྱོད་ཀྱིས་ཨིསི་རཱཨེལ་རྣམས་ལ་བཀའ་འདི་ལྟར་སྨྲོས་ཤིག ཁྱོད་ཚོའམ་ཁྱོད་ཚོའི་ཁྲོད་དུ་གནས་པའི་ཕྱི་རྒྱལ་བ་སུ་ཞིག་གིས་རང་གི་བུ་ཕྲུག་རྣམས་ལྷ་མོ་ལེག་ལ་མཆོད་འབུལ་བྱེད་ཕྱིར་སྤྲད་པ་ཡིན་ན། ཁོ་ལ་ཨིསི་རཱཨེལ་མི་མང་ཚང་མས་རྡོ་རུབ་རྒྱབ་ནས་གསོད་དགོས།

³ གལ་ཏེ་སུ་ཞིག་གིས་རང་གི་ཕྲུ་གུ་མོ་ལེག་ལ་མཆོད་འབུལ་བྱས་ཏེ་ངའི་དབུ་གུར་དམ་པ་དེ་མི་གཙང་བར་བྱས་པ་དང་། མ་ཟད་ངའི་མིང་དམ་པ་དེ་སྨད་པར་བྱེད་པ་ཡིན་ན། ངས་ཁོ་ལ་རྒྱབ་འགལ་བྱེད་རྒྱུ་ཡིན། ཁོ་ངའི་མི་འབངས་སུ་བརྩི་བར་མི་འགྱུར་རོ།

⁴ མི་མང་ཚང་མས་ཁོའི་ལས་ངན་དེ་ལ་དོ་སྣང་མ་བྱེད་པར་ཁོ་ལ་ཉེས་པ་སྲོག་ཐོག་ཏུ་མ་བཏང་བ་ཡིན་ན།

⁵ ང་ལ་དད་ལོག་སྐྱེད་དེ་མོ་ལེག་ལ་མཆོད་ཕྱིར་ཁོ་དང་ལག་འབྲེལ་བྱེད་མཁན་ཚང་མ་དང་། ཁོ་དང་ཁོའི་ནང་མི་བཅས་པར་ངས་རྒོལ་བར་བྱེད་རྒྱུ་ཡིན། མ་ཟད་དེ་ཚོ་ལ་ངའི་མི་འབངས་སུ་བརྩི་བར་མི་འགྱུར་རོ།

⁶ གཤིན་པོའི་གླ་བཀུག་སྟེ་གཏོར་བཅོམ་བྱེད་མཁན་སྔགས་པ་རྟེན་མཁན་རྣམས་ལ་ངས་རྒྱབ་འགལ་བྱེད་རྒྱུ་ཡིན། དེ་ཚོ་ངའི་མི་འབངས་སུ་བརྩི་བར་མི་འགྱུར་རོ།

⁷ ཁྱོད་ཚོ་རང་ཉིད་ལ་དམ་པར་ཞོག་ཅིག། གང་ལ་ཟེར་ན། ང་ནི་ཁྱོད་ཚོའི་དཀོན་མཆོག་གཙོ་བོ་དཀོན་མཆོག་ཡིན།

⁸ ངའི་བཀའ་ཁྲིམས་རྣམས་སྲུང་ཞིག། གང་ལ་ཟེར་ན། ང་ནི་དཀོན་མཆོག་གཙོ་བོ་དཀོན་མཆོག་ཡིན་པས་ངས་ཁྱོད་ཚོ་དམ་པར་བཟོ་རྒྱུ་ཡིན།

⁹ གཙོ་བོ་དཀོན་མཆོག་གིས་གཤམ་གསལ་བཀའ་ཁྲིམས་རྣམས་གནང་ངོ་། སུ་ཞིག་གིས་རང་གི་ཕའམ་མ་ལ་སྨོད་པའམ་སྨོན་ལོག་འདེབས་པ་ཡིན་ན་དེ་ནི་ངེས་པར་བསད་དགོས། ཁོའི་སྲོག་གི་ཉེས་ལན་དེ་ཁོ་རང་གི་ཐོག་ཏུ་འཕོག་རྒྱུ་ཡིན།

¹⁰ མི་སུ་ཞིག་གིས་རང་རིགས་གཅིག་པ་ཨིསི་རཱཨེལ་པ་ཞིག་གི་ཆུང་མར་ལོག་གཡེམ་བྱས་པ་ཡིན་ན། མི་དེ་དང་བུད་མེད་གཉིས་ཀ་བསད་དགོས།

¹¹ རང་གི་ཕ་ཡི་སྐྱེ་དམན་ཞིག་དང་ཆགས་པ་སྤྱོད་མཁན་དེས་རང་གི་ཕ་ལ་དམའ་འབེབས་བྱས་པ་ཡིན་པས། མི་དེ་དང་བུད་མེད་གཉིས་ཀ་བསད་དགོས། ཁོ་ཚོའི་སྲོག་གི་ཉེས་ལན་དེ་ཁོ་ཚོ་རང་ཉིད་ཀྱི་ཐོག་ཏུ་འཕོག་རྒྱུ་ཡིན་ནོ།

¹² དེ་བཞིན་མི་ཞིག་གིས་རང་གི་བུའི་ཆུང་མ་ལ་ཆགས་པ་སྤྱོད་པ་ཡིན་ན། མི་དེ་དང་བུད་མེད་གཉིས་ཀ་བསད་དགོས་པ་དང་དེ་ཚོས་གཉེན་ཚན་དང་ཚུལ་མིན་གྱི་ལས་གྱིས་ཡོད་པས། དེ་ཚོའི་སྲོག་གི་ཉེས་ལན་དེ་ཁོ་ཚོ་རང་གི་ཐོག་ཏུ་འཕོག་པར་འགྱུར།

¹³ གལ་ཏེ་སྐྱེས་པས་སྐྱེས་པ་ཞིག་ལ་ཆགས་པ་སྤྱོད་པ་ཡིན་ན། དེ་ནི་ངོ་ཚ་ཁྲེལ་མེད་ཀྱི་ལས་ངན་ཞིག་ཡིན་པས་དེ་ཚོ་གཉིས་ཀ་བསད་དགོས། དེ་ཚོའི་སྲོག་གི་ཉེས་ལན་དེ་ཁོ་ཚོ་རང་གི་ཐོག་ཏུ་ཕོག་རྒྱུ་ཡིན།

¹⁴ མི་སུ་ཞིག་གིས་ཨ་མ་དང་བུ་མོ་གཉིས་ཀར་རང་གི་ཆུང་མར་བཞག་པ་ཡིན་ན། དེ་ཚོས་ངོ་ཚ་ཁྲེལ་མེད་ཀྱི་ལས་ངན་ཞིག་བྱས་པ་ཡིན་པས། དེ་ཚོ་གསུམ་ཆ་མེར་སྲེག་བཏང་ནས་བསད་དགོས། ཁྱོད་ཚོའི་ཁྲོད་དུ་དེ་ལྟ་བུའི་ལས་ངན་ཞིག་ཡོད་མི་རུང་ངོ་།

¹⁵ མི་སུ་ཞིག་གིས་དུད་འགྲོ་དང་ཆགས་པ་སྤྱོད་པ་ཡིན་ན། མི་དང་དུད་འགྲ་གཉིས་ཀ་བསད་དགོས།

¹⁶ བུད་མེད་ཞིག་གིས་དུད་འགྲོ་དང་ཆགས་པ་སྤྱོད་ཐབས་བྱེད་པ་ཡིན་ན། བུད་མེད་དེ་དང་དུད་འགྲོ་གཉིས་ཀ་བསད་དགོས། དེ་ཚོའི་སྲོག་གི་ཉེས་ལན་དེ་ཁོ་ཚོ་རང་གི་ཐོག་ཏུ་འཕོག་པར་འགྱུར།

¹⁷ མི་སུ་ཞིག་གིས་རང་གི་སྲིང་མོའམ་ཕ་ཡར་ཡང་ན་མ་ཡར་ནས་སྐྱེས་པའི་སྲིང་མོ་ཞིག་དང་ཆང་ས་རྒྱབ་པ་ཡིན་ན། དེ་ཚོར་མི་ཚང་མའི་མདུན་དུ་ངོ་ཚ་དགོས་པ་བཟོས་ནས། མི་སྡེའི་ཁྲོད་ནས་ཕྱིར་ཕུད་བྱེད་དགོས། ཁོས་རང་གི་སྲིང་མོ་དང་ཆགས་པ་སྤྱོད་པ་ཡིན་པས་དེའི་ཉེས་ལན་དུ་དེ་འཁུར་དགོས།

¹⁸ མི་སུ་ཞིག་གིས་ཟླ་མཚན་བབས་བཞིན་པའི་བུད་མེད་ཞིག་དང་ཆགས་པ་སྤྱོད་པ་ཡིན་ན། དེ་གཉིས་མི་མང་གི་ཁྲོད་ནས་ཕྱིར་བཏོན་བྱེད་དགོས། གང་ལ་ཟེར་ན། དེ་ཚོས་དག་འབྱངས་བྱེད་ཆོག་སྐོར་གྱི་ཆོས་ཁྲིམས་དང་འགལ་བས་ཕྱིར་རོ།

¹⁹ མི་སུ་ཞིག་གིས་རང་གི་ཕའམ་མ་ཡི་སྲིང་མོ་ཞིག་དང་ཆགས་པ་སྤྱོད་པ་ཡིན་ན། གཉེན་ཚན་དང་ཚུལ་མིན་གྱི་ལས་གྱིས་པའི་ཉེས་མིག་དེ་ཁོ་ཚོས་འཁྱེར་དགོས།

²⁰ མི་ཞིག་གིས་རང་གི་ཨ་ཁུའི་ཆུང་མའམ་ཨ་ཞང་གི་ཆུང་མ་དང་ཆགས་པ་སྤྱོད་པ་ཡིན་ན། ཁོས་དེ་ཚོར་དམའ་འབེབས་བྱས་པ་ཡིན་པས། མི་དེ་དང་བུད་མེད་གཉིས་ཀས་དེའི་ཉེས་མིག་འཁྱེར་དགོས་པ་ཡིན། དེ་ཚོ་གཉིས་ཀ་རབས་ཆད་དུ་འགྱུར་རྒྱུ་ཡིན་ནོ།

²¹ གལ་ཏེ་མི་ཞིག་གིས་རང་གི་སྤུན་གྱི་ཆུང་མ་དང་གཉེན་འབྲེལ་བྱས་པ་ཡིན་ན། དེ་གཉིས་ཀ་མ་ཤི་བར་དུ་རབས་ཆད་ཀྱི་གནས་སྟངས་སུ་གནས་དགོས། ཁོས་སྲོལ་བཞིན་མི་གཙང་བའི་ལས་ངན་ཞིག་བྱས་ཏེ། རང་གི་སྤུན་ལ་དམའ་འབེབས་བྱེད་པ་ཡིན་ནོ།

²² གཙོ་བོ་དཀོན་མཆོག་གིས་གསུངས་པ། ངའི་བཀའ་ཁྲིམས་ཚང་མ་སྲུང་ཞིག། དེ་ལྟར་བྱས་པ་ཡིན་ན། ངས་ཁྱོད་ཚོ་འཁྲིད་བཞིན་པའི་ཡུལ་ཀ་ནན་གྱི་ཁྱོད་ཚོར་ཕྱིར་འབུད་གཏོང་བར་མི་འགྱུར།

²³ ཡུལ་དེར་གནས་པའི་མི་ཚོའི་ལམ་སྲོལ་རྣམས་ཁྱོད་ཚོས་མ་བླངས་ཤིག ཁྱོད་ཚོ་ཡུལ་དེར་འགྲོ་ཐུབ་པར་བྱེད་པའི་ཕྱིར། དེར་ཡོད་པའི་ཕྱི་པ་རྣམས་ཕྱིར་བཏོན་རྒྱུ་ཡིན། ཁོ་ཚོའི་ལམ་སྲོལ་ངན་པ་རྣམས་ལ་ངས་ཞེན་ལོག་བྱེད་ཀྱི་ཡོད།

²⁴ འོན་ཀྱང་ངས་ཕྱུག་པོ་དང་ས་ལུད་འཛོམས་པོའི་ཡུལ་དེ་ཁྱོད་ཚོའི་བདག་དབང་དུ་སྤྲོད་རྒྱུའི་སྔར་དམ་བཅའ་བྱས་པ་བཞིན་ཡུལ་དེ་ད་ལྟ་ཁྱོད་ཚོར་སྤྲོད་བཞིན་པ་ཡིན། ང་ཁྱོད་ཚོའི་དཀོན་མཆོག་གཙོ་བོ་དཀོན་མཆོག་ཡིན་པས། ངས་ཁྱོད་ཚོའི་མི་རིགས་གཞན་གྱི་དཀྱིལ་ནས་དབྱེ་སྟེ་ལོགས་སུ་བཞག་ཡོད།

²⁵ དེ་བས་ན་ཁྱོད་ཚོས་དུད་འགྲོ་དང་འདབ་ཆགས་རྣམས་སྲོལ་བཞིན་གཙང་མ་ཡིན་མིན་གྱི་དབྱེ་བ་ཡག་པོ་བྱེད་དགོས། མི་གཙང་བའི་དུད་འགྲོའམ་འདབ་ཆགས་སོགས་ཟ་མི་རུང་། ངས་དེ་དག་མི་གཙང་བའི་ཁོངས་སུ་རྩིས་ཡོད་པ་ཡིན་པས། དེ་དག་ཟ་བ་ཡིན་ན་ཁྱོད་ཚོ་མི་གཙང་བར་འགྱུར་རྒྱུ་ཡིན།

²⁶ ཁྱོད་ཚོ་དམ་པ་ཡིན་དགོས། ང་རང་གཅིག་པོའི་ཁོངས་སུ་གཏོགས་པའི་ཕྱིར་ངས་ཁྱོད་ཚོ་མི་རིགས་གཞན་གྱི་དཀྱིལ་ནས་བཏོན་ཏེ་ལོགས་སུ་དབྱེ་བ་བྱས་ཡོད་དོ།

²⁷ སྐྱེས་པའམ་བུད་མེད་ཞིག་གིས་གཤིན་པོའི་གླ་བཀུག་སྟེ་དེ་དག་ལ་གཏམ་བྱེད་པ་ཡིན་ན། དེ་ཚོར་རྡོ་རུབ་བཏང་ནས་བསད་དགོས། དེ་ཚོའི་སྲོག་གི་འགན་ནི་དེ་ཚོ་རང་ཐོག་ཏུ་འཕོག་པར་འགྱུར༎