ལེ་ཝི 19 - Tibetan Old Testament 2011

དམ་པ་དང་ཁྲིམས་གཅོད་དྲང་པོའི་ཁྲིམས་རྣམས།

¹ གཙོ་བོ་དཀོན་མཆོག་གིས་མོ་ཤེ་ལ་གསུངས་པ།

² ཁྱོད་ཀྱིས་ཨིསི་རཱཨེལ་གྱི་མི་སྡེ་ཡོངས་ལ་བཀའ་འདི་ལྟར་སྨྲོས་ཤིག ཁྱོད་ཚོའི་དཀོན་མཆོག་གཙོ་བོ་དཀོན་མཆོག་དམ་པ་ཡིན་པས། ཁྱོད་ཚོའང་དམ་པ་ཡིན་དགོས།

³ ཁྱོད་ཚོ་རེ་རེས་རང་གི་ཕ་མ་གཉིས་ལ་བརྩེ་གདུང་ཞུས་དགོས་པ་དང་། ངས་བཀའ་བསྒོས་པ་བཞིན་ངལ་གསོ་བའི་ཞག་དེ་སྲུང་དགོས། ང་ནི་ཁྱོད་ཚོའི་དཀོན་མཆོག་གཙོ་བོ་དཀོན་མཆོག་ཡིན།

⁴ ང་ལ་སྤངས་ཏེ་སྐུ་འདྲར་མ་མཆོད་ཅིག། གསེར་དངུལ་ཟངས་ལྕགས་སོགས་ལས་བཟོས་པའི་སྐུ་འདྲ་ལ་མ་མཆོད་ཅིག ང་ནི་ཁྱོད་ཚོའི་དཀོན་མཆོག་གཙོ་བོ་དཀོན་མཆོག་ཡིན།

⁵ ཁྱོད་ཚོས་མཐུན་འབྲེལ་གྱི་མཆོད་པའི་ཆེད་དུ་དུད་འགྲོ་བསད་སྐབས། ངའི་བཀའ་ཁྲིམས་རྣམས་སྲུང་བ་ཡིན་ན་ངས་མཆོད་པ་དེ་ཁས་ལེན་བྱེད་རྒྱུ་ཡིན།

⁶ དུད་འགྲོ་བསད་པའི་ཉིན་མོའམ་དེའི་སང་ཞོག་བར་དུ་ཤ་དེ་ཟས་ཚར་དགོས། ཉིན་ཞག་གསུམ་བར་དུ་ལྷག་འཕྲོས་ལུས་པའི་ཤ་དེ་མེར་སྲེག་གཏོང་དགོས།

⁷ གང་ལ་ཟེར་ན། དེ་ནི་སྲོལ་བཞིན་མི་གཙང་བ་ཡིན་པས། སུ་ཞིག་གིས་དེ་ཟ་བ་ཡིན་ན་ངས་མཆོད་པ་དེ་ཁས་ལེན་མི་བྱེད་དོ།

⁸ དེ་བཞིན་ཤ་ཟ་མཁན་དེས་ང་ལ་བསྔོ་འབུལ་བྱས་པའི་མཆོད་རྫས་དེ་དག་མི་གཙང་བར་བཟོས་པའི་ཉེས་ཆད་དེ་ཁོ་ལ་འཕོག་པར་འགྱུར། ཁོ་ནི་ངའི་མི་འབངས་སུ་བརྩི་བར་མི་འགྱུར།

⁹ ཁྱོད་ཚོས་རང་གི་ཞིང་ཁར་སྟོན་ཐོག་བརྔ་བར་འགྲོ་སྐབས། ཞིང་གི་ཟུར་དུ་ཡོད་པའི་སྟོན་ཐོག་མ་བརྔ་ཞིག དེ་བཞིན་རྔ་འཕྲོས་ལུས་པའི་སྟོན་ཐོག་བརྔ་བར་ཞིང་ཁར་ཡང་སྐྱར་མ་འགྲོ་ཞིག

¹⁰ བསྡུས་རྒྱུ་ལུས་པའམ་ས་རུ་འཛག་པའིི་རྒུན་འབྲུམ་སྒྲུག་ཕྱིར་རྒུན་ཚལ་དུ་ཡང་སྐྱར་མ་འགྲོ་ཞིག དེ་ནི་དབུལ་པོ་དང་ཕྱི་རྒྱལ་བ་ཚོའི་དོན་དུ་བཞག་དགོས། ང་ནི་ཁྱོད་ཚོའི་དཀོན་མཆོག་གཙོ་བོ་དཀོན་མཆོག་ཡིན།

¹¹ ཁྱོད་ཚོས་བརྐུ་བའམ། གཞན་ལ་མགོ་བསྐོར་གཏོང་བའམ། རྫུན་གཏམ་སོགས་མ་ཤོད་ཅིག།

¹² ང་མཉམ་དུ་བཞག་པའི་དམ་བཅའ་དེ་ཆ་ཚང་ཁོས་བྱེད་འདོད་མེད་ན། ངའི་མིང་བརྗོད་དེ་མནའ་མ་སྐྱེལ་ཞིག དེ་མིན་ཁོས་ངའི་མིང་དེ་སྨད་པར་བྱེད་རྒྱུ་ཡིན། ང་ནི་ཁྱོད་ཚོའི་དཀོན་མཆོག་གཙོ་བོ་དཀོན་མཆོག་ཡིན།

¹³ མི་གཞན་ནས་མཁེ་ཕན་ལེན་པའམ་སུ་ཞིག་ལ་འཕྲོག་བཅོམ་མ་བྱེད་ཅིག གླ་མི་ཞིག་ལ་གླ་ཆ་མ་སྤྲད་པར་མཚན་གཅིག་ཡང་མ་བཞག་ཅིག

¹⁴ འོན་པ་ལ་སྨོན་ལོག་མ་འདེབས་ཤིག། དེ་བཞིན་ལོང་བའི་མདུན་དུ་འཁོན་བྱད་སོགས་མ་བཞག་ཅིག དེ་མིན་ཁོ་དེ་ལ་འཁོན་ནས་འགྱེལ་ཉེན་ཡོད། ངའི་བཀའ་ལ་ཉོན་ཤིག། ང་ནི་ཁྱོད་ཚོའི་དཀོན་མཆོག་གཙོ་བོ་དཀོན་མཆོག་ཡིན།

¹⁵ ཁྲིམས་གཅོད་བྱེད་སྐབས་དྲང་པོ་བྱེད་དགོས། དབུལ་པོར་ཕྱོགས་ཞེན་བྱེད་པའམ། ཕྱུག་པོར་འཇིགས་སྣང་བྱེད་མི་ཉན།

¹⁶ མི་གཞན་གྱི་སྐོར་ལ་རྫུན་གཏམ་མ་སྤེལ་ཞིག གལ་ཏེ་མི་ཞིག་ཁྲིམས་སར་ཐུག་སྟེ་ཁོའི་སྲོག་ཉེན་ཁའི་ནང་དུ་ཚུད་ཡོད་པ་དང་། ཁྱོད་ཀྱི་དཔང་པོའི་སྒོ་ནས་ཁོ་ལ་ཕན་ཐོག་བྱུང་ན། ཁོ་ལ་རྒྱབ་སྐྱོར་བྱེད་དེ་དཔང་པོ་བྱོས་ཤིག ང་ནི་གཙོ་བོ་དཀོན་མཆོག་ཡིན་ནོ།

¹⁷ སུ་ཞིག་ལ་གཏིང་ནད་མ་བྱེད་ཅིག། འོན་ཀྱང་མི་མཐུན་པའི་རྒྱུ་རྣམས་སྒྲིག་ཐབས་བྱས་ཤིག དེ་ལྟར་བྱས་ན་ཁོའི་རྐྱེན་གྱིས་ཁྱོད་ཀྱིས་སྡིག་པ་བྱེད་མི་དགོས་སོ།

¹⁸ སུ་ཞིག་ལ་དགྲ་ལེན་འཇལ་བའམ། རྒྱུན་དུ་སྡང་སེམས་མ་བྱེད་ཅིག། འོན་ཀྱང་རང་གི་ཁྱིམ་མཚེས་ལ་རང་དང་འདྲ་བར་བྱམས་སྐྱོང་བྱོས་ཤིག ང་ནི་གཙོ་བོ་དཀོན་མཆོག་ཡིན།

¹⁹ ངའི་བཀའ་རྣམས་སྲུང་ཤིག། ནང་དུ་གསོས་པའི་དུད་འགྲོའི་རིགས་མ་གཅིག་པ་རྣམས་ཕན་ཚུན་མ་བསྲེས་ཤིག ཞིང་གཅིག་ལ་ས་བོན་མི་འདྲ་བ་གཉིས་མ་འདེབས་ཤིག དེ་བཞིན་མི་འདྲ་བའི་རྒྱུ་གཉིས་ལས་འཐག་པའི་གོས་མ་གྱོན་ཤིག

²⁰ གལ་ཏེ་སུ་ཞིག་གིས་བྲན་གཡོག་མ་ཞིག་རང་གི་ཟུར་གྲོགས་མར་བཞག་ཡོད་པ་དང་། མོའི་རིན་གོང་ཡང་སྤྲད་མེད་ཅིང་། མོ་ལ་རང་དབང་ཡང་སྤྲད་མེ་དོ། དེ་ལྟ་བུའི་གནས་སྟངས་སུ་མི་གཞན་དང་མོའི་ལུས་འབྲེལ་བྱད་པ་ཡིན་ན། དེ་ཚོར་ཉེས་ཆད་གཏོང་དགོས། འོན་ཀྱང་སྲོག་གི་ཉེས་ཆད་འཁྱེར་མི་དགོས། གང་ཡིན་ཟེར་ན། མོ་ནི་དེའི་བྲན་གཡོག་ཡིན་པས་ཕྱིར་རོ།

²¹ མི་དེས་ང་གནས་པའི་དབུ་གུར་དམ་པའི་སྒོ་ཡོད་སར་ཕོ་ལུག་གཅིག་ཉེས་པ་སེལ་བའི་མཆོད་པའི་ཚུལ་དུ་འཁྲིད་ཡོང་དགོས།

²² བླ་མས་དུད་འགྲོ་དེ་བླངས་ནས་མི་དེའི་སྡིག་པ་སེལ་ཕྱིར་དག་འབྱངས་ཀྱི་མཆོད་པ་འབུལ་དགོས། དེ་རྗེས་དཀོན་མཆོག་གིས་མི་དེ་ལ་ཐུགས་བཟོད་གནང་བར་འགྱུར།

²³ ཁྱོད་ཚོ་ཀ་ནན་ཡུལ་དུ་སླེབས་ནས། ཤིང་འབྲས་མི་འདྲ་བ་སོགས་བཏབ་པ་ཡིན་ན། ཐོག་མའི་ལོ་གསུམ་བར་དུ་ཤིང་འབྲས་དེ་དག་སྲོལ་བཞིན་མི་གཙང་བར་བརྩིས་ཏེ། དུས་ཡུན་དེའི་རིང་ལ་ཤིང་འབྲས་དེ་དག་ཟ་མི་ཉན།

²⁴ ལོ་བཞི་པར་གཙོ་བོ་དཀོན་མཆོག་ང་ལ་ཐུགས་རྗེ་ལེགས་འབུལ་ཞུ་ཕྱིར་ཁྱོད་ཚོས་ཤིང་འབྲས་ཚང་མ་ང་ལ་བསྔོ་འབུལ་བྱེད་དགོས།

²⁵ འོན་ཀྱང་ལོ་ལྔ་པར་ཁྱོད་ཚོས་ཤིང་འབྲས་དེ་དག་ཟ་ཆོག ཁྱོད་ཚོས་གོང་གསལ་བཀའ་ཁྲིམས་དེ་དག་སྲུང་བ་ཡིན་ན་ཤིང་འབྲས་ཀྱང་གང་མང་འཕེལ་བར་འགྱུར། ང་ནི་ཁྱོད་ཚོའི་དཀོན་མཆོག་གཙོ་བོ་དཀོན་མཆོག་ཡིན།

²⁶ ཁྲག་འབྲེལ་བའི་ཤ་ཟ་མི་ཆོག། མིག་འཕྲུལ་མཁན་དང་ངན་སྔགས་སོགས་ལ་མ་རྟེན་ཞིག

²⁷ མགོའི་ཟུར་གཉིས་ཀྱི་སྐྲ་བཅད་པའམ་ཨ་རའི་རྩེ་རྣམས་མ་བཏུབས་ཤིག

²⁸ རང་གི་གཟུགས་པོ་བཅད་པའམ་ཡང་ན་རི་མོ་སོགས་བྲིས་ཏེ་གཤིན་པོའི་དོན་དུ་མྱ་ངན་མ་བྱེད་ཅིག ང་ནི་གཙོ་བོ་དཀོན་མཆོག་ཡིན།

²⁹ རང་གི་བུ་མོ་རྣམས་ལྷ་ཁང་གི་ སྨད་ཚོང་མ་བཟོས་ཏེ་དེ་དག་ངོ་ཚ་དགོས་པ་མ་བཟོ་ཞིག དེ་ལྟར་བྱེད་པ་ཡིན་ན། ཁྱོད་ཚོ་ལྷ་རྟེན་གཞན་གྱི་ཕྱོགས་སུ་བློ་བསྒྱུར་ཏེ། ཡུལ་དེ་ཚུལ་མིན་ལམ་སྲོལ་ངན་པས་གང་བར་འགྱུར།

³⁰ ངལ་གསོ་བའི་ཞག་སྲུང་བ་དང་། ང་ལ་མཆོད་འབུལ་བྱེད་སའི་གནས་དེ་ལ་གུས་བརྩི་བྱོས་ཤིག ང་ནི་གཙི་བོ་དཀོན་མཆོག་ཡིན།

³¹ གཤིན་པོའི་གླ་བཀུག་ནས་གཏོར་བཅོས་བྱེད་མཁན་སྔགས་པ་རྣམས་ཀྱི་རྩར་གྲོས་འཆར་ལེན་པར་མ་སོང་ཞིག དེ་ལྟར་བྱེད་པ་ཡིན་ན། ཁྱོད་ཚོ་སྲོལ་བཞིན་མི་གཙང་བར་འགྱུར་རྒྱུ་ཡིན། ང་ནི་ཁྱོད་ཚོའི་དཀོན་མཆོག་གཙོ་བོ་དཀོན་མཆོག་ཡིན།

³² ལོ་རྒན་པ་རྣམས་ལ་གུས་ཞབས་དང་བཀུར་སྟི་བྱོས་ཤིག ང་ལའང་འཇིགས་པའི་ངང་ནས་ངའི་བཀའ་ལ་ཉོན་ཤིག ང་ནི་གཙོ་བོ་དཀོན་མཆོག་ཡིན།

³³ རང་གི་ཡུལ་དུ་གནས་པའི་ཕྱི་རྒྱལ་བ་རྣམས་ལ་སྤྱོད་ངན་མ་སྟོན་ཞིག

³⁴ རང་རིགས་གཅིག་པ་ཨིསི་རཱཨེལ་པ་རྣམས་ལ་འབྲེལ་ལམ་བཟང་པོ་བསྟན་པ་བཞིན་དེ་དག་ལའང་དེ་བཞིན་བྱེད་དེ། རང་དང་འདྲ་བར་གཅེས་སྐྱོང་བྱོས་ཤིག། ཁྱོད་ཚོའང་ཨི་ཇིབ་དུ་ཕྱི་མི་ལྟར་གནས་པ་དེ་དྲན་གསོ་བྱོས་ཤིག ང་ནི་ཁྱོད་ཚོའི་དཀོན་མཆོག་གཙོ་བོ་དཀོན་མཆོག་ཡིན།

³⁵ ཐིག་ཤིང་དང་། ཉག་རྡོ་དང་། འབོ་རྫུན་མ་སོགས་བེད་སྤྱོད་བཏང་ནས་མི་གཞན་ལ་མགོ་བསྐོར་མ་བཏོང་ཞིག

³⁶ གནས་ཚད་ལྡན་པའི་ཐིག་ཤིང་དང་། ཉག་རྡོ་དང་། འབོ་དྲང་པོར་བེད་སྤྱོད་བྱེད་དགོས། ཁྱོད་ཚོ་ཨི་ཇིབ་ནས་བཏོན་མཁན་ཁྱོད་ཚོའི་དཀོན་མཆོག་གཙོ་བོ་དཀོན་མཆོག་ང་ཡིན།

³⁷ ངའི་བཀའ་ཁྲིམས་ཚང་མ་སྲུང་ཞིག། ང་ནི་གཙོ་བོ་དཀོན་མཆོག་ཡིན་ནོ༎