ལེ་ཝི 16 - Tibetan Old Testament 2011

སྡིག་བཤགས་ཀྱི་ཉིན་མོ།

¹ ཨ་རོན་གྱི་བུ་གཉིས་ཀྱིས་གཙོ་བོ་དཀོན་མཆོག་ལ་མི་གཙང་བའི་མེ་ཞིག་འབུལ་བའི་རྐྱེན་གྱིས་འཆི་བའི་རྗེས་སུ། གཙོ་བོ་དཀོན་མཆོག་གིས་མོ་ཤེ་དང་གསུང་གླེང་མཛད་དེ་བཀའ་གནང་བ།

² གཙོ་དཀོན་མཆོག་གི་གསུངས་པ། ཁྱོད་ཀྱིས་རང་གི་ཨ་ཇོ་ཨ་རོན་ལ། ཡོལ་བའི་རྒྱབ་ཏུ་ཡོད་པའི་ཤིན་ཏུ་གནས་མཆོག་དམ་པར་དུས་ཚོད་གཏན་འབེབས་གཅིག་པུར་ཐོག་འགྲོ་དགོས། གང་ལ་ཟེར་ན། ང་ནི་དམ་བཅའི་སྒྲོམ་གྱི་ཁེབས་ཀྱི་ཐོད་དུ་སྤྲིན་པའི་དཀྱིལ་དུ་མངོན་རྒྱུ་ཡིན། གལ་ཏེ་ཁོས་བཀའ་རྒྱ་འདི་མ་སྲུང་བ་ཡིན་ན་ཁོ་ཤི་ངེས་པ་ཡིན།

³ སྡིག་སེལ་གྱི་མཆོད་པར་གླང་གཞོན་པ་ཞིག་དང་། དེ་བཞིན་སྦྱིན་སྲེག་གི་མཆོད་པར་ཕོ་ལུག་གཅིག་འཁྲིད་ཡོང་བའི་རྗེས་སུ་ཁོ་ཤིན་ཏུ་གནས་མཆོག་དམ་པའི་ནང་དུ་འཛུལ་ཆོག་ཅེས་སྨྲོས་ཤིག

⁴ དེ་ནས་གཙོ་བོ་དཀོན་མཆོག་གིས་གཤམ་གསལ་ལྟར་བཀའ་ཁྲིམས་འདི་དག་གནང་ངོ་། ཨ་རོན་ཤིན་ཏུ་གནས་མཆོག་དམ་པའི་ནང་དུ་མ་འཛུལ་སྔོན་དུ་རང་ཉིད་གཟུགས་པོ་འཁྲུ་ནས་བླ་མའི་གོས་སོགས་གྱོན་དགོས། བླ་མའི་གྱོན་ཆས་ནི་རས་ཀྱི་ཆོས་གོས་དང་སྨད་གོས་དང་། སྐེ་རག་དང་ཐོད་དཀྲིས་བཅས་ཡིན་ནོ།

⁵ ཨིསི་རཱཨེལ་མི་སྡེ་སྤྱི་ཡོངས་ནས་ཨ་རོན་ལ་སྡིག་སེལ་གྱི་མཆོད་པར་ར་ཕོ་ཆ་གཅིག་དང་སྦྱིན་སྲེག་གི་མཆོད་པར་ཕོ་ལུག་གཅིག་འབུལ་དགོས།

⁶ ཁོས་རང་དང་རང་གི་ནང་མིའི་སྡིག་སེལ་གྱི་ཕྱིར་དུ་ཕོ་གླང་ཞིག་དམར་མཆོད་དུ་འབུལ་དགོས།

⁷ དེ་རྗེས་ཁོས་ར་ཕོ་ཆ་གཅིག་དེ་གཙོ་བོ་དཀོན་མཆོག་གནས་པའི་དབུ་གུར་དམ་པའི་གཟིམ་སྒོར་འཁྱེར་ཡོང་སྟེ།

⁸ དེར་ཁོས་རྡོ་གཉིས་ཀྱི་སྒོ་ནས་ཁོས་ར་ཕོ་གཉིས་ཀྱི་རྒྱན་རྒྱབ་ཅིང་། རྡོ་གཅིག་གི་ཁར་གཙོ་བོ་དཀོན་མཆོག་གི་དོན་དུ་ཞེས་དང་། གཞན་དེའི་ཁར་ཨེ་ཛ་ཛེལ་གྱི་ཆེད་དུ་ཞེས་བྲིས་ཡོད་པ་ཡིན་ནོ།

⁹ གཙོ་བོ་དཀོན་མཆོག་གི་ཆེད་དུ་རྒྱན་ལ་བབས་པའི་ར་ཕོ་དེ་ནི་སྡིག་སེལ་གྱི་མཆོད་པར་ཨ་རོན་གྱི་འབུལ་དགོས་སོ།

¹⁰ ཨ་ཛ་ཛེལ་གྱི་ཆེད་དུ་འདམས་པའི་ར་ཕོ་དེ་ནི་གཙོ་བོ་དཀོན་མཆོག་ལ་གསོན་པོར་འབུལ་བའི་རྗེས་སུ་མི་མང་གི་སྡིག་སེལ་གྱི་ཆེད་དུ་འབྲོག་སྟོང་ནས་ཨ་ཛ་ཛེལ་གྱི་རྩར་བཏང་དགོས་སོ།

¹¹ ཨ་རོན་གྱིས་རང་དང་རང་གི་ནང་མིའི་སྡིག་སེལ་གྱི་ཆེད་དུ་ཕོ་གླང་དེ་མཆོད་པར་འབུལ་སྐབས།

¹² ཁོས་མཆོད་ཁྲི་ལས་འབར་བཞིན་པའི་མེ་སོལ་དམར་པོ་སྤོས་ཕོར་གང་དང་། སྤོས་སྦར་ར་དོ་བླངས་ཏེ། ཤིན་ཏུ་གནས་མཆོག་དམ་པར་འཁྱེར་ཡོང་དགོས།

¹³ དེ་རྗེས་ཁོས་གཙོ་བོ་དཀོན་མཆོག་གི་མདུན་དུ་སྤོས་དེ་མེའི་ཁར་བླུགས་ཏེ། སྤོས་ཀྱི་དུ་བས་དམ་བཅའི་སྒྲོམ་གྱི་ཁེབས་དེ་ཡོངས་སུ་ཀབ་པ་དང་། དེར་བརྟེན་ཁོས་དེ་མཐོང་ནས་ཤི་མ་དགོས་སོ།

¹⁴ ཁོས་ཕོ་གླང་གི་ཁྲག་དེ་ལས་ཏོག་ཙམ་ཞིག་བླངས་ཏེ། རང་གི་མཛུག་གུས་དམ་བཅའི་སྒྲོམ་གྱི་ཁེབས་ཀྱི་མདུན་ཕྱོགས་སུ་གཏོར་དགོས། དམ་བཅའི་སྒྲོམ་གྱི་མདུན་ངོས་སུ་གོང་བཞིན་ཐེངས་བདུན་གཏོར་དགོས།

¹⁵ དེ་རྗེས་ཁོས་མི་རྣམས་ཀྱི་ཆེད་དུ་སྡིག་སེལ་གྱི་ར་ཕོ་དེ་བསད་དགོས། དེའི་ཁྲག་དེ་ཤིན་ཏུ་གནས་མཆོག་དམ་པར་འཁྱེར་ཡོང་དགོས་པ་དང་། ཁྲག་དེ་ཕོ་གླང་གི་ཁྲག་གཏོར་བ་བཞིན་ཁེབས་ཀྱི་སྟེང་དང་དམ་བཅའི་སྒྲོམ་གྱི་མདུན་ངོས་སུ་གཏོར་དགོས།

¹⁶ དེ་བཞིན་ཨིསི་རཱཨེལ་མི་མང་གི་གྲིབ་རྩོག་དང། དེ་ཚོའི་སྡིག་པ་ཆང་མའི་ཆེད་དུ་ཤིན་ཏུ་གནས་མཆོག་དམ་པ་དེ་ལ་དག་འབྱངས་ཀྱི་ཆོ་ག་དེ་ཆ་ཚང་བྱེད་དགོས། དེ་ནི་ཁོས་དབུ་གུར་དམ་པ་ལ་ཡང་དེ་བཞིན་བྱེད་དགོས། གང་ལ་ཟེར་ན། དེས་ཆོ་ག་གཞིར་བཟུང་ལྟར་མི་གཙང་བའི་སྒར་གྱི་ཁྲོད་དུ་ཕུབ་ཡོད་པ་ཡིན་ནོ།

¹⁷ ཨ་རོན་ནི་དག་འབྱངས་ཀྱི་མཆོད་འབུལ་བྱེད་ཕྱིར་ཤིན་ཏུ་གནས་མཆོག་དམ་པའི་ནང་དུ་འཛུལ་ནས་ཕྱིར་མ་ཐོན་བར་དུ་དབུ་གུར་དམ་པའི་ནང་མི་སུ་ཞིག་ཀྱང་ཡོད་པ་མི་རུང་ངོ་། ཁོས་རང་ཉིད་དང་རང་གི་ནང་མི་དང་དེ་བཞིན་མི་མང་ཡོངས་ཀྱི་ཕྱིར་དུ་མཆོད་འབུལ་བྱས་ཟིན་པའི་རྗེས་སུ།

¹⁸ ཁོ་ཕྱིར་ཐོན་ནས་སྦྱིན་སྲེག་གི་མཆོད་འབུལ་བྱེད་སའི་མཆོད་ཁྲི་དེ་ལ་དག་འབྱངས་བྱེད་དགོས། དེ་རྗེས་གླང་དང་རའི་ཁྲག་དེ་ལས་ཏོག་ཙམ་ཞིག་བླངས་ནས་མཆོད་ཁྲིའི་ཟུར་གྱི་རྭ་ཅོ་ཡོངས་སུ་བླུགས་དགོས།

¹⁹ ཁོས་རང་གི་མཛུག་གུས་ཁྲག་གང་ཙམ་ཞིག་མཆོད་ཁྲིར་ལན་བདུན་གཏོར་དགོས། དེ་ལྟར་བྱས་པའི་སྒོ་ནས་ཁོས་ཨིསི་རཱཨེལ་མི་མང་གི་སྡིག་སྒྲིབ་ལས་མཆོད་ཁྲི་དེ་གཙང་ཞིང་དམ་པར་བྱེད་དགོས་སོ།

²⁰ ཨ་རོན་གྱིས་ཤིན་ཏུ་གནས་མཆོག་དམ་པ་དང་ལྷག་འཕྲོས་ལུས་པའི་གཙོ་བོ་དཀོན་མཆོག་གནས་པའི་དབུ་གུར་དམ་པ་དང་། མཆོད་ཁྲི་བཅས་ལ་དག་འབྱངས་བྱས་ཟིན་པའི་རྗེས་སུ། ཁོས་ཨ་ཛ་ཛེལ་གྱི་ཆེད་དུ་འདམས་པའི་ར་ཕོ་གསོན་པོ་དེ་གཙོ་བོ་དཀོན་མཆོག་ལ་འབུལ་དགོས།

²¹ ཁོས་རང་གི་ལག་པ་གཉིས་ར་ཕོའི་མགོ་ལ་བཞག་ནས། ཨིསི་རཱཨེལ་མི་དམངས་ཀྱིས་བྱས་པའི་སྡིག་པའི་ལས་ངན་ཁག་དང་། ཁོ་ཚོས་གཙོ་བོ་དཀོན་མཆོག་ལ་རྒོལ་སེམས་ཞུས་པའི་སྡིག་པ་ཚང་མ་ངོས་ལེན་ཞུ་པ་དང་། སྡིག་པ་དེ་དག་སེམས་ཅན་དེའི་ཐོག་ཏུ་བཀལ་དགོས། ཆེད་མངགས་བསྐོ་གཞག་བྱས་པའི་མི་ཞིག་གིས་ར་ཕོ་དེ་འབྲོག་སྟོང་ཁུལ་དུ་དེད་དགོས།

²² ར་ཕོ་དེས་མི་ཚང་མའི་སྡིག་པ་འཁྱེར་ནས་མི་མེད་ལུང་སྟོང་ཞིག་ཏུ་འགྲོ་བར་འགྱུར།

²³ དེ་རྗེས་ཨ་རོན་དབུ་གུར་དམ་པའི་ནང་དུ་འཛུལ་ནས། ཤིན་ཏུ་གནས་མཆོག་དམ་པར་མ་བཅར་གོང་དུ་རང་གིས་གྱོན་པའི་བླ་མའི་གོས་དེ་དག་ཕུད་ནས་གནས་དེ་རང་ལ་བཞག་དགོས།

²⁴ དེ་རྗེས་ས་གནས་དམ་པ་ཞིག་ཏུ་གཟུགས་པོ་འཁྲུ་ནས་རང་གི་གོས་དེ་གྱོན་དགོས། དེ་རྗེས་ཕྱིར་ཐོན་ཏེ་ཁོས་རང་ཉིད་དང་མི་མང་གི་སྡིག་པ་སེལ་ཕྱིར་སྦྱིན་སྲེག་གི་མཆོད་པ་དེ་འབུལ་དགོས་སོ།

²⁵ ཁོས་སེམས་ཅན་གྱི་ཚིལ་དེ་མཆོད་ཁྲིའི་སྟེང་དུ་མེར་སྲེག་བཏང་ནས་སྡིག་སེལ་གྱི་མཆོད་པར་འབུལ་དགོས།

²⁶ འབྲོག་སྟོང་ནས་ཨ་ཛ་ཛེལ་གྱི་ཆེད་དུ་ར་ཕོ་དེད་མཁན་མི་དེ་སྒར་དུ་ཕྱིར་ལོག་མ་བྱེད་སྔོན་དུ་དེས་རང་གི་གོས་དང་གཟུགས་པོ་ལེགས་པར་འཁྲུ་དགོས།

²⁷ སྡིག་སེལ་གྱི་མཆོད་པར་ཕུལ་བའི་ཕོ་གླང་དང་ར་ཕོ་བཅས་ཀྱི་ཁྲག་དེ་སྡིག་སེལ་གྱི་ཆེད་དུ་ཤིན་ཏུ་གནས་མཆོག་དམ་པའི་ནང་དུ་འཁྱེར་ཡོང་ནས་སྒར་གྱི་ཕྱི་རོལ་དུ་མེར་སྲེག་གཏོང་དགོས། དེའི་པགས་པ་དང་ཤ་དང་ནང་ཁྲོལ་བཅས་པ་ཆ་ཚང་མེར་སྲེག་གཏོང་དགོས།

²⁸ དེ་དག་ཆང་མར་མེར་སྲེག་གཏོང་མཁན་མི་དེས་སྒར་སར་ཕྱིར་ལོག་མ་བྱེད་གོང་དུ་རང་གི་གོས་དང་གཟུགས་པོ་འཁྲུ་དགོས་སོ༎

སྡིག་བཤགས་ཀྱི་ཉིན།

²⁹ གཤམ་གསལ་བཀའ་ཁྲིམས་ནི་མ་འོངས་པའི་དུས་ཀུན་ཏུ་སྲུང་དགོས་པ་ནི། ཟླ་བ་བདུན་པའི་ཉིན་ཞག་ བཅུ་པར་ཨིསི་རཱཨེལ་པ་རྣམས་དང་དེ་ཚོའི་དཀྱིལ་དུ་གནས་སྡོད་བྱེད་པའི་ཕྱི་རྒྱལ་བ་རྣམས་ནས་མྱུང་གནས་སྲུང་སྟེ་ལས་གང་ཡང་བྱེད་མི་ཆོག

³⁰ དེ་ཉིན་རང་ལ་སྡིག་པ་ཚང་མ་ནས་གཙང་བར་འགྱུར་བའི་ཕྱིར་དག་འབྱངས་ཀྱི་ཆོ་ག་དེ་བཤམས་དགོས་པ་དང་། དེ་ཚོ་སྲོལ་བཞིན་གཙང་བར་འགྱུར་རྒྱུ་ཡིན།

³¹ ཉིན་ཞག་དེ་ནི་ཧ་ཅང་དམ་པར་རྩིས་དགོས་པ་ཡིན་ནོ། དེ་ཉིན་མྱུང་གནས་སྲུང་ཞིང་ལས་གང་ཡང་བྱེད་མི་ཆོག་པ་ཡིན་ནོ། བཀའ་ཁྲིམས་འདི་དག་ནི་མ་འོངས་པའི་དུས་ཀུན་ཏུ་སྲུང་དགོས་སོ།

³² ཕ་ཤི་བའི་རྗེས་སུ་ཕའི་ཚབ་ཏུ་བསྐོ་གཞག་བྱེད་ནས་བསྔོ་འབུལ་བྱེད་པའི་བླ་ཆེན་གྱིས་དག་འབྱངས་ཀྱི་ཆོ་ག་དེ་ཆ་ཚང་བྱེད་དགོས། ཁོས་བླ་མའི་གོས་གྱོན་ནས།

³³ ཤིན་ཏུ་གནས་མཆོག་དམ་པ་དང་གཙོ་བོ་དཀོན་མཆོག་གནས་པའི་དབུ་གུར་དམ་པ་དང་། མཆོད་ཁྲི་བཅས་དང་། དེ་བཞིན་བླ་མ་རྣམས་དང་མི་མང་ཡོངས་རྫོགས་གཙང་བར་བྱེད་པའི་དག་འབྱངས་ཀྱི་ཆོ་ག་དེ་བྱེད་དགོས།

³⁴ བཀའ་ཁྲིམས་དེ་དག་ནི་མ་འོངས་པའི་དུས་ཀུན་ཏུ་སྲུང་དགོས་པ་དང་། ཨིསི་རཱཨེལ་མི་མང་རྣམས་སྡིག་པ་ཚང་མའི་གྲིབ་རྩོག་ལས་གཙང་བར་བྱེད་ཕྱིར་གོང་གསལ་ཆོ་ག་དེ་ལོ་རེ་ཐེངས་རེ་ཆ་ཚང་བྱེད་དགོས་པ་ཡིན་ནོ། དེར་བརྟེན་གཙོ་བོ་དཀོན་མཆོག་གིས་བཀའ་གང་གནང་བ་བཞིན་མོ་ཤེས་ཆ་ཚང་སྒྲུབ་བོ༎