ལེ་ཝི 12 - Tibetan Old Testament 2011

ཕྲུ་གུ་སྐྱེས་ཚར་བའི་བུད་མེད་ལ་དག་འབྱངས་བྱེད་པ།

^1-2 གཙོ་བོ་དཀོན་མཆོག་གིས་ཨིསི་རཱཨེལ་པ་རྣམས་ཀྱི་ཆེད་དུ་མོ་ཤེ་ལ་བཀའ་ཁྲིམས་གནང་གསལ། བུད་མེད་གཅིག་ལ་བུ་ཞིག་སྐྱེས་པའི་རྗེས་སུ། མཆོད་ཁྲིམས་ལྟར་མོ་ནི་ཉིན་ཞག་བདུན་བར་དུ་མི་གཙང་བར་གནས་དགོས། ཇི་ལྟར་མོ་ནི་ཟླ་མཚན་བབས་དུས་མི་གཙང་བར་བྱུང་བ་དང་།

³ ཉིན་ཞག་བརྒྱད་པར་བུ་དེ་ནི་མདུན་ལྤགས་གཅོད་དགོས།

⁴ དེ་རྗེས་ཉིན་ཞག་སུམ་ཅུ་སོ་གསུམ་ཚང་བའི་རྗེས་སུ་བུད་མེད་དེའི་རང་གི་ཁྲག་བབས་པའི་གནས་སྟངས་ལས་སྲོལ་བཞིན་གཙང་མར་འགྱུར་རྒྱུ་ཡིན་པ་དང་། རང་ཉིད་སྲོལ་བཞིན་དག་འབྱངས་མ་བྱུང་བར་དུ་བུད་མེད་དེས་དངོས་པོ་དམ་པ་རྣམས་ལ་འཆང་བའམ་དབུ་གུར་དམ་པའི་ནང་དུ་འཛུལ་མི་རུང་།

⁵ བུད་མེད་ཞིག་ལ་བུ་མོ་ཞིག་སྐྱེས་པ་ཡིན་ན་ཉིན་ཞག་བཅུ་བཞི་བར་དུ་མོ་ནི་མཆོད་ཁྲིམས་ལྟར་མི་གཙང་བར་གནས་དགོས། ཇི་ལྟར་མོ་ནི་ཟླ་མཚན་བབས་དུས་མི་གཙང་བར་བྱུང་བ་དང་། ཉིན་ཞག་དྲུག་ཅུ་རེ་དྲུག་གི་རྗེས་སུ་བུད་མེད་དེ་ཁྲག་བབས་པའི་གནས་སྟངས་དེ་ལས་སྲོལ་ལྟར་གཙང་མར་འགྱུར་རྒྱུ་ཡིན།

⁶ བུད་མེད་ཞིག་ལ་བུའམ་བུ་མོ་གང་རུང་ཞིག་སྐྱེས་ཏེ། རང་ཉིད་སྲོལ་བཞིན་གཙང་མར་འགྱུར་བའི་ཞག་དུས་ཚང་བའི་རྗེས་སུ་བུད་མེད་དེས་སྦྱིན་སྲེག་གི་འབུལ་བའི་ཆེད་ལོ་གཅིག་ལོན་པའི་ལུ་གུ་གཅིག་དང་། སྡིག་སེལ་གྱི་མཆོད་པའི་ཆེད་དུ་དི་དི་གུ་གུའམ་ཕུག་རོན་གཅིག་གཙོ་བོ་དཀོན་མཆོག་གནས་པའི་དབུ་གུར་དམ་པའི་གཟིམ་སྒོར་བླ་མའི་རྩར་འཁྱེར་ཡོང་དགོས།

⁷ དེ་རྗེས་བླ་མས་མོའི་འབུལ་བ་དེ་དག་གཙོ་བོ་དཀོན་མཆོག་ལ་ཕུལ་ཏེ། དག་འབྱངས་ཀྱི་འབུལ་བ་བྱས་པ་ཡིན་ན་བུད་མེད་དེ་སྲོལ་བཞིན་གཙང་བར་འགྱུར་རྒྱུ་ཡིན། ཕྲུ་གུ་སྐྱེས་པའི་རྗེས་སུ་བུད་མེད་ཚོ་ལྟ་བུ་བྱེད་དགོས་པ་ཡིན་ནོ།

⁸ གལ་ཏེ་བུད་མེད་དེས་ལུག་གུ་ཞིག་འབུལ་མ་ཐུབ་པ་ཡིན་ན། འང་གུའམ་ཕུག་རོན་གཉིས་རེ་འཁྱེར་ཡོང་དགོས། དེ་ནི་སྦྱིན་སྲེག་གི་འབུལ་བའི་ཆེད་དུ་གཅིག་དང་། སྡིག་སེལ་གྱི་འབུལ་བའི་ཆེད་དུ་གཅིག་ཡིན་ནོ། བླ་མས་དག་འབྱངས་བྱེད་པའི་འབུལ་བ་དེ་དག་བྱས་ཟིན་པའི་རྗེས་སུ་བུད་མེད་དེ་སྲོལ་བཞིན་གཙང་བར་འགྱུར་རྒྱུ་ཡིན་ནོ༎