ལེ་ཝི 10 - Tibetan Old Testament 2011

ན་དྷབ་དང་ཨ་བྷི་ཧུའི་ཉེས་སྡིག།

¹ ཨ་རོན་གྱི་བུ་ན་དྷབ་དང་ཨ་བྷི་ཧུ་གཉིས་ཀྱིས་རང་རང་སོ་སོའི་མེ་ཕོར་ནང་མེ་འཁྱེར་ནས་དེའི་ནང་བསང་བླུགས་ཏེ་གཙོ་བོ་དཀོན་མཆོག་ལ་བདུག་སྤོས་ཕུལ་ལོ། འོན་ཀྱང་མེ་དེ་ནི་དམ་པ་མ་ཡིན་ནོ། གང་ལ་ཟེར་ན། གཙོ་བོ་དཀོན་མཆོག་གིས་དེ་དག་ལ་དེ་འབུལ་དགོས་ཅེས་བཀའ་གནང་མེད་པས་ཕྱིར་རོ།

² དེ་ནས་བློ་བུར་དུ་གཙོ་བོ་དཀོན་མཆོག་གི་མེ་ཞིག་གཏོང་བ་གནང་ཞིང་། དེས་མི་དེ་གཉིས་གཙོ་བོ་དཀོན་མཆོག་གི་སྤྱན་སྔར་འཚིགས་ཏེ་གནས་དེ་ག་རང་དུ་ཤིའོ།

³ དེ་ནས་མོ་ཤེས་ཨ་རོན་ལ་སྨྲས་པ། གཙོ་བོ་དཀོན་མཆོག་གིས་གསུངས་པའི་བཀའ་ནི་འདི་ལྟར་ཡིན། ང་ལ་ཞབས་ཏོག་བྱེད་མི་ཚོས་ང་དམ་པ་ཡིན་པ་དེ་ལ་གུས་ཞབས་བྱེད་དགོས། ངས་ཀྱང་རང་གི་མི་འབངས་ལ་ངའི་གཟི་བརྗིད་མངོན་པར་བྱེད་རྒྱུ་ཡིན་ཞེས་གསུངས་སོ། འོན་ཀྱང་ཨ་རོན་གྱིས་གང་ཡང་མ་སྨྲས་པར་ཁ་རོག་བསྡད་དོ།

⁴ དེ་ནས་མོ་ཤེས་མི་ཤ་ཨེལ་དང་ཨེལ་ཛ་ཕན་གཉིས་ལ་བོས་ནས་སྨྲས་པ། ཁྱོད་ཚོས་རང་གི་སྤུན་གྱི་རོ་དེ་དག་དབུ་གུར་དམ་པའི་ནང་ནས་འཁྱེར་ཏེ་སྒར་གྱི་ཕྱི་རུ་སྐྱོལ་ཞིག དེ་གཉིས་ནི་ཨ་རོན་གྱི་ཨ་ཁུ་ཨུ་ཛི་ཨེལ་གྱི་བུ་རྣམས་ཡིན་ནོ།

⁵ ཁོ་ཚོ་ཡོང་ནས་རོ་གོས་ཀྱི་སྣེ་ནས་བཟུང་སྟེ། མོ་ཤེས་སྨྲས་པ་བཞིན་རོ་དེ་ཚོ་སྒར་གྱི་ཕྱི་རོལ་དུ་སྐྱེལ་ལོ།

⁶ དེ་ནས་མོ་ཤེས་ཨ་རོན་དང་ཁོའི་བུ་ཨེ་ལི་ཛར་དང་ཨི་ཐ་མར་གཉིས་ལ་སྨྲས་པ། ཁྱོད་ཚོས་ང་ཚོ་མྱ་ངན་ནང་ཡོད་ཟེར་བསྟན་ནས་རང་གི་སྐྲ་ཤད་མ་རྒྱབ་པར་མ་སྡོད་ཅིག རང་གི་གྱོན་གོས་མ་ཧྲལ་ཅིག། དེ་ལྟར་བྱས་པ་ཡིན་ན་ཁྱོད་ཚོ་ཤི་དགོས་སོ། ཨིསི་རཱཨེལ་མི་མང་ཡོངས་ལ་གཙོ་བོ་དཀོན་མཆོག་ཐུགས་ཁྲོ་བར་འགྱུར་རོ། འོན་ཀྱང་གཙོ་བོ་དཀོན་མཆོག་གིས་གཏོང་གནང་བའི་མེ་དེས་ཤི་སྐྱོན་བྱུང་བའི་སྐོར་ལ་ཨིསི་རཱཨེལ་མི་མང་བྱིངས་ནས་མྱ་ངན་བྱེད་ཆོག་པ་ཡིན་ནོ།

⁷ ཁྱོད་ཚོ་དབུ་གུར་དམ་པའི་གཟིམ་སྒོ་སྤངས་ནས་འགྲོ་མི་ཆོག དེ་མིན་ཁྱོད་ཚོ་ཤི་ངེས་པ་ཡིན་ནོ། གང་ལ་ཟེར་ན། ཁྱོད་ཚོ་གཙོ་བོ་དཀོན་མཆོག་གི་བསྔོ་འབུལ་གྱི་སྣུམ་བྱུགས་པའི་སྒོ་ནས་དམ་པ་བྱས་ཟིན་པའི་ཕྱིར་རོ། དེ་བས་ན་ཁོ་ཚོས་མོ་ཤེས་གང་སྨྲས་པ་ལྟར་བྱས་སོ༎

བླ་མ་རྣམས་ཀྱིས་སྲུང་དགོས་པའི་བཀའ་ཁྲིམས།

⁸ གཙོ་བོ་དཀོན་མཆོག་གིས་ཨ་རོན་ལ་གསུངས་པ།

⁹ ཁྱོད་དང་ཁྱོད་ཀྱི་བུ་ཚོས་ཆང་རག་སོགས་འཐུང་ནས་ངའི་དབུ་གུར་དམ་པའི་ནང་དུ་འཛུལ་མི་ཆོག གལ་ཏེ་འཛུལ་བ་ཡིན་ན་ཁྱོད་ཚོ་ཤི་ངེས་པ་ཡིན་ནོ། བཀའ་ཁྲིམས་འདི་ནི་ཁྱོད་ཚོའི་མི་བརྒྱུད་ཚང་མས་སྲུང་དགོས།

¹⁰ དཀོན་མཆོག་གི་དངོས་རྫས་དང་སྤྱིར་བཏང་བེད་སྤྱོད་བྱེད་པའི་དངོས་རྫས་རྣམས་ཀྱི་བར་ལ་ཁྱོད་ཀྱི་དབྱེ་བ་བྱེད་དགོས་པ་དང་། གཞན་ཡང་དངོས་རྫས་གང་རུང་སྲོལ་བཞིན་དག་འབྱངས་བྱེད་ཡོད་མེད་ཀྱང་དབྱེ་བ་བྱེད་ཐུབ་པ་དགོས།

¹¹ ངས་མོ་ཤེའི་བརྒྱུད་ནས་སྤྲད་པའི་བཀའ་ཁྲིམས་ཚང་མ་ཁྱོད་ཀྱིས་ཨིསི་རཱཨེལ་པ་རྣམས་ལ་སློབ་སྟོན་བྱེད་དགོས།

¹² མོ་ཤེས་ཨ་རོན་དང་གསོན་པོར་ལུས་པའི་ཁོའི་བུ་ཨེ་ལི་ཛར་དང་ཨི་ཐ་མར་གཉིས་ལ་སྨྲས་པ། གཙོ་བོ་དཀོན་མཆོག་ལ་ཕུལ་བའི་ཞལ་ཟས་ཀྱི་འབུལ་བ་ལྷག་འཕྲོས་ལུས་པའི་འབྲུ་སྣའི་འབུལ་བའི་རྫས་རྣམས་བླངས་ནས། དེ་ལས་ཆི་མན་མེད་པའི་བག་ལེབ་བཟོས་ཏེ་མཆོད་ཁྲིའི་འགྲམ་དུ་ཟ་དགོས། གང་ལ་ཟེར་ན། མཆོད་པ་དེ་ནི་ཧ་ཅང་དམ་པ་ཡིན་པས་ཕྱིར་རོ།

¹³ དེ་ནི་གནས་དམ་པ་རུ་ཟ་དགོས་ཤིང་། དེ་ནི་གཙོ་བོ་དཀོན་མཆོག་ལ་ཕུལ་བའི་ཞལ་ཟས་ཀྱི་འབུལ་བ་ལས་ཁྱོད་དང་ཁྱོད་ཀྱི་བུ་རྣམས་ལ་ཐོབ་པའི་སྐལ་བ་ཡིན་ནོ་ཞེས་གཙོ་བོ་དཀོན་མཆོག་གིས་ང་ལ་གནང་བ་ཡིན་ནོ།

¹⁴ འོན་ཀྱང་བླ་མའི་ཆེད་དུ་གཙོ་བོ་དཀོན་མཆོག་ལ་དམིགས་བསལ་གྱི་འབུལ་བའི་ཚུལ་དུ་ཕུལ་བའི་དུད་འགྲོའི་བྲང་ཤ་དང་རྒྱབ་རྐང་བཅས་ཁྱོད་དང་ཁྱོད་ཀྱི་ནང་མི་ཚོས་ཟ་ཆོག དེ་ནི་ཁྱོད་ཀྱི་སྲོལ་བཞིན་དག་འབྱངས་བྱས་པའི་གནས་གཙང་མ་གང་རུང་ཞིག་ཏུ་ཟ་ཆོག འབུལ་བ་དེ་ཚོ་ནི་ཨིསི་རཱཨེལ་མི་མང་ཚོས་ཕུལ་བའི་མཐུན་འབྲེལ་གྱི་འབུལ་བ་ལས་ཁྱོད་དང་ཁྱོད་ཀྱི་བུ་ཕྲུག་རྣམས་ལ་ཐོབ་འོས་པའི་སྐལ་བ་ཡིན་ནོ།

¹⁵ གཙོ་བོ་དཀོན་མཆོག་ལ་ཞལ་ཟས་ཀྱི་འབུལ་བར་ཚིལ་དེ་འབུལ་བའི་སྐབས་སུ། དེ་ཚོས་བྲང་དང་རྒྱབ་རྐང་རྣམས་འཁྱེར་ཡོང་དགོས་ཤིང་། གཙོ་བོ་དཀོན་མཆོག་གིས་བཀའ་གནང་བ་བཞིན་འབུལ་བ་དེ་དག་ནི་ཁྱོད་དང་ཁྱོད་ཀྱི་བུ་རྒྱུད་རྣམས་ཀྱི་ཆེད་དུ་དུས་རྒྱུན་དུ་ཐོབ་འོས་པའི་སྐལ་བ་ཡིན་ནོ།

¹⁶ མོ་ཤེས་སྡིག་སེལ་གྱི་མཆོད་པར་འབུལ་དགོས་པའི་ར་ཕོའི་སྐོར་ལ་འདྲི་རྩད་བྱས་པས། དེ་སྔོན་ནས་མེར་སྲེག་བཏང་ཟིན་པའི་སྐོར་ཤེས་པ་དང་། ཁོས་ཨེ་ལི་ཛར་དང་ཨི་ཐ་མར་གཉིས་ལ་ཁྲོས་ཤིང་སྨྲས་པ།

¹⁷ ཁྱོད་ཚོས་སྡིག་སེལ་གྱི་མཆོད་པ་དེ་གནས་དམ་པ་ཞིག་ཏུ་མ་ཟ་བ་དེ་གང་ཡིན་ནམ། དེ་ནི་ཤིན་ཏུ་དམ་པ་ཡིན་ནོ། གཙོ་བོ་དཀོན་མཆོག་གིས་མི་སྡེ་ཚང་མའི་སྡིག་སེལ་གྱི་དོན་དུ་ཁྱོད་ཚོར་གནང་བ་ཡིན་ནོ།

¹⁸ དེའི་ཁྲག་དེ་གནས་དམ་པའི་ནང་དུ་འཁྱེར་མ་ཡོང་བ་ཡིན་པས། དམར་མཆོད་དེ་ནི་ངས་སྨྲས་པ་བཞིན་ཁྱོད་ཚོས་གནས་དེ་རང་དུ་ཟ་དགོས་པ་ཡིན་ནོ།

¹⁹ དེ་ནས་ཨ་རོན་གྱིས་ལན་དུ། ངས་སྡིག་སེལ་གྱི་མཆོད་པ་དེ་ལས་དེ་རིང་ཟས་པ་ཡིན་ན། དེས་གཙོ་བོ་དཀོན་མཆོག་ཐུགས་མཉེས་པར་འགྱུར་རམ། མི་མང་གིས་གཙོ་བོ་དཀོན་མཆོག་ལ་སྡིག་སེལ་གྱི་མཆོད་པ་དེ་དེ་རིང་ཕུལ་བ་དང་། དེ་ཚོས་སྦྱིན་སྲེག་གི་མཆོད་པ་དེའང་འཁྱེར་ཡོད་དོ། འོན་ཀྱང་ངའི་ཐོག་ལ་དེ་ལྟ་བུའི་དཀའ་ངལ་དག་བྱུང་སོང་ཞེས་སྨྲས་སོ།

²⁰ མོ་ཤེས་གཏམ་དེ་ཐོས་ནས་བློ་ཁ་ཚིམས་པར་འགྱུར་རོ༎