ཡོ་ཤུ་ཨ 3 - Tibetan Old Testament 2011

ཨིསི་རཱཨེལ་མི་མང་རྣམས་ཡོར་དན་རྒལ་བ།

¹ ཡོ་ཤུ་ཨ་ཐོ་རངས་སྔ་པོ་ལངས་ཏེ་ཨ་ཀ་སི་ཡ་ནས་ཐོན་ཞིང་། ཁོ་རང་དང་ཨིསི་རཱཨེལ་མི་མང་རྣམས་གཙང་པོ་ཡོར་དན་གྱི་འགྲམ་དུ་ཕྱིན་ནས་གཙང་པོ་དེ་མ་རྒལ་བར་དུ་ས་ཁུལ་དེ་ག་རང་དུ་སྒར་བརྒྱབ་ནས་བསྡད་དོ།

² ཉིན་ཞག་གསུམ་གྱི་རྗེས་སུ་འགོ་བྱེད་རྣམས་སྒར་གྱི་དཀྱིལ་དུ་ཕྱིན་ནས།

³ མི་མང་རྣམས་ལ། ཁྱོད་ཚོས་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གི་དམ་བཅའི་སྒྲོམ་དེ་བླ་མ་ཚོས་འཁྱེར་བཞིན་པ་མཐོང་ན། ཁྱོད་ཚོ་བསྡད་པའི་གནས་དེ་སྤངས་ནས་ཁོ་ཚོའི་རྗེས་སུ་འབྲངས་དགོས།

⁴ ཁྱོད་ཚོ་ས་ཁུལ་འདིར་དེ་སྔ་ནམ་ཡང་བསླེབ་མ་མྱོང་བ་ཡིན་པས། དེ་ཚོས་ཁྱོད་ཚོར་ལམ་སྟོན་བྱེད་ཡོང་། འོན་ཀྱང་དམ་བཅའི་སྒྲོམ་དང་ཉེ་བར་མ་འགྲོ་ཞིག ཀི་ལོ་མི་ཊར་གཅིག་ཙམ་གྱི་གཞུག་ལ་འགྲོ་དགོས་ཅེས་སྨས་སོ།

⁵ ཡོ་ཤུ་ཨས་མི་མང་རྣམས་ལ། སང་ཉིན་གཙོ་བོ་དཀོན་མཆོག་གིས་ཁྱོད་ཚོའི་དཀྱིལ་དུ་འཕྲིན་ལས་ངོ་མཚར་ཆེན་པོ་ཞིག་བསྟན་པ་གནང་རྒྱུ་ཡིན་པས། ཁྱོད་ཚོ་རང་ཉིད་ལ་གཙང་མ་བྱས་ཏེ་བསྡད་དགོས་ཅེས་སྨྲས་སོ།

⁶ དེ་བཞིན་བླ་མ་ཚོ་ལ་ཡང་དམ་བཅའི་སྒྲོམ་དེ་འཁྱེར་ནས་མི་མང་གི་མདུན་དུ་འགྲོ་དགོས་ཅེས་སྨྲས་པ་དང་། ཁོ་ཚོས་ཀྱང་དེ་བཞིན་བྱས་སོ།

⁷ གཙོ་བོ་དཀོན་མཆོག་གིས་ཡོ་ཤུ་ཨ་ལ། དེ་རིང་ངས་གང་བྱེད་པ་དེའི་སྒོ་ནས་ཨིསི་རཱཨེལ་མི་མང་ཚང་མས་ཁྱོད་ལ་སྐྱེ་བོ་མངའ་ཐང་ཆེན་པོ་ཞིག་ཏུ་བརྩི་གུས་བྱས་པ་དང། སྔར་ང་མོ་ཤེ་དང་མཉམ་དུ་གནས་པ་བཞིན་ད་ལྟ་ཁྱོད་དང་མཉམ་དུ་གནས་བཞིན་ཡོད་པ་དེའང་ཁོ་ཚོས་ཤེས་རྟོགས་བྱེད་ཐུབ་ཡོང་།

⁸ དམ་བཅའི་སྒྲོམ་འཁྱེར་མཁན་བླ་མ་རྣམས་ལ། ཁྱོད་ཚོ་གཙང་པོ་ཡོར་དན་གྱི་འགྲམ་དུ་བསླེབས་སྐབས། གཙང་པོའི་ཟུར་དུ་ལངས་ནས་སྡོད་དགོས་ཅེས་སྨྲོས་ཤིག་ཞེས་བཀའ་གནང་ངོ་།

⁹ དེ་ནས་ཡོ་ཤུ་ཨས་མི་མང་རྣམས་ལ། གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གི་བཀའ་ཉན་པར་ཚུར་ཤོག་ཅིག

¹⁰ ཁྱོད་ཚོ་ལམ་དུ་འགྲོ་སྐབས་གཙོ་བོ་དཀོན་མཆོག་གིས་ཀ་ནན་པ་དང་། ཧི་ཏི་པ། ཧི་ཝི་པ། པེ་རི་ཛི་པ། གྷིར་ག་ཤི་པ་རྣམས། ཨ་མོར་པ་དང་། གཞན་ཡང་ཡེ་བུ་སི་པ་རྣམས་ཁྱོད་ཚོའི་མདུན་ནས་ཕྱིར་སྐྲོད་གནང་ངེས་པ་ཡིན་ནོ།

¹¹ ས་གཞི་ཡོངས་ཀྱི་གཙོ་བོ་དཀོན་མཆོག་དེ་ཉིད་ཀྱི་དམ་བཅའི་སྒྲོམ་དེ་ཁྱོད་ཚོའི་མདུན་དུ་གཙང་པོ་ཡོར་དན་རྒལ་ནས་འཁྱེར་འགྲོ་སྐབས། ཁྱོད་ཚོའི་ཁྲོད་དུ་གཙོ་བོ་དཀོན་མཆོག་སྐུ་གསོན་པོར་བཞུག་ཡོད་པ་དེ་ཁྱོད་ཚོས་ཤེས་ཡོང་།

¹² ད་ཨིསི་རཱཨེལ་གྱི་སྡེ་རིགས་རེ་ནས་མི་སྐྱེ་པ་བཅུ་གཉིས་འདེམས་བསྐོ་བྱོས་ཤིག

¹³ ས་གཞི་ཡོངས་ཀྱི་གཙོ་བོ་དཀོན་མཆོག་གི་དམ་བཅའི་སྒྲོམ་དེ་འཁྱེར་བའི་བླ་མ་རྣམས་ཀྱི་རྐང་པ་ཡོར་དན་གཙང་པོའི་ནང་དུ་བཅུག་མ་ཐག་ཏུ། གཙང་ཆུ་མ་རྒྱུག་པར་ཕྱོགས་གཅིག་ཏུ་སྤུངས་ཡོང་ཞེས་སྨྲས་སོ།

^14-15 སྐབས་དེར་སྟོན་ཐོག་རྔ་བའི་དུས་རན་ཞིང་གཙང་ཆུ་རྒྱས་ཏེ་ཆུ་ལོག་རྒྱུག་བཞིན་ཡོད་པ་དང་། མི་མང་རྣམས་སྒར་ས་བཞག་ནས་ཡོར་དན་རྒལ་ཕྱིར་ཐོན་སྐབས། བླ་མ་རྣམས་དམ་བཅའི་སྒྲོམ་དེ་འཁྱེར་ནས་མི་མང་གི་མདུན་དུ་ཕྱིན་ནོ། དེ་ཚོའི་རྐང་པ་གཙང་ཆུའི་ནང་དུ་བཅུག་མ་ཐག་ཏུ།

¹⁶ གཙང་ཆུ་མ་རྒྱུག་པར་རྒྱང་རིང་དུ་ཟར་ཐན་གྱི་མཐའ་ལ་ཡོད་པའི་གྲོང་ཁྱེར་ཨ་དམ་དང་ཉེ་བར་ཕྱོགས་གཅིག་ཏུ་སྤུངས་སོ། གཙང་ཆུ་ཆད་མཚམས་ནས་འཆི་བའི་རྒྱ་མཚོ་བར་དུ་ཆུ་རྣམས་ཡོངས་སུ་བསྐམས་ཏེ། མི་མང་རྣམས་དེ་ནས་རྒལ་ཏེ་ཡེ་རི་ཀོ་དང་ཉེ་བར་ཕྱིན་ནོ།

¹⁷ མི་མང་ཚང་མ་སྐམ་ས་བརྒྱུད་ནས་ཕྱིན་ཏེ་ཕར་ཕྱོགས་སུ་མ་སླེབས་བར་གཙོ་བོ་དཀོན་མཆོག་གི་དམ་བཅའི་སྒྲོམ་འཁྱེར་བའི་བླ་མ་རྣམས་ཡོར་དན་གཙང་པོའི་དཀྱིལ་དུ་ལང་ནས་བསྡད་དོ༎