ཡོ་ཤུ་ཨ 24 - Tibetan Old Testament 2011

ཡོ་ཤུ་ཨས་ཤེ་ཀེམ་དུ་མི་མང་ཚོ་དང་གཏམ་སྨྲས་པ།

¹ ཡོ་ཤུ་ཨས་ཨིསི་རཱཨེལ་པའི་སྡེ་རིགས་ཡོངས་རྫོགས་ཤེ་ཀེམ་དུ་བཀོང་བ་དང་། ཁོང་གིས་ཨིསི་རཱཨེལ་གྱི་རྒན་པོ་རྣམས་དང་འགོ་བྱེད་དང་ཁྲིམས་དཔོན་དང་ལས་སྣེ་རྣམས་དེར་བོས་ཤིང་དེ་ཚོ་གཙོ་བོ་དཀོན་མཆོག་གི་སྤྱན་སྔར་བཅར་རོ།

² དེ་ནས་ཡོ་ཤུ་ཨས་མི་དམངས་ཚང་མར་སྨྲས་པ། ཨིསི་རཱཨེལ་གྱི་དཀོན་མཆོག་གཙོ་བོ་དཀོན་མཆོག་གིས་གསུངས་པའི་བཀའ་ནི་འདི་རང་ཡིན། ལོ་མང་སྔོན་དུ་ཁྱོད་ཚོའི་མེས་པོ་རྣམས་གཙང་པོ་ཡུབ་རད་ཀྱི་ཕ་རོལ་ཏུ་གནས་ཏེ་ཕྱི་པའི་ལྷ་རྟེན་སོགས་ལ་བསྙེན་བཀུར་བྱས་མཁན་ཡིན་པ་དང་། མེས་པོ་དེ་ཚོའི་ནང་ནས་གཅིག་ནི་ཨབ་ར་ཧམ་དང་ན་ཧོར་གྱི་ཕ་ཏེ་རཱ་ཡིན་ནོ།

³ དེ་ནས་ངས་ཁྱོད་ཚོའི་མེས་པོ་ཨབ་ར་ཧམ་ལ་གཙང་པོ་ཡུབ་རད་ཀྱི་ཕར་ཕྱོགས་ཀྱི་ཡུལ་ནས་འཁྲིད་ཡོང་སྟེ་ཡུལ་ཀ་ནན་ཀུན་ཏུ་འཁྲིད་ཅིང་། ངས་ཁོ་ལ་ཨི་སཱག་གིས་གཙོས་པས་རིགས་བརྒྱུད་མང་པོ་སྤྲད་པ་ཡིན།

⁴ ངས་ཨི་སཱག་ལ་ཡ་ཀོབ་དང་ཨེ་སའོ་སྤྲད་དེ། ཨེ་དྷོམ་རི་བརྒྱུད་ཁག་གི་ཡུལ་དེ་ཨེ་སའོ་ལ་ས་སྐལ་དུ་སྤྲད་མོད། འོན་ཀྱང་ཁྱོད་ཚོའི་མེས་པོ་ཡ་ཀོབ་དང་ཁོའི་བུ་རྣམས་ཨི་ཇིབ་དུ་ཕྱིན་པ་རེད།

⁵ དེ་རྗེས་ངས་མོ་ཤེ་དང་ཨ་རོན་གཉིས་བཏང་ནས། ཨི་ཇིབ་དུ་ངས་དཀའ་སྡུག་ཆེན་པོ་འཁྱེར་ཡོང་བ་ཡིན་པ་དང། འོན་ཀྱང་ངས་ཁྱོད་ཚོ་ཡུལ་དེ་ནས་བཏོན་ཏེ་འཁྲིད་ཡོང་བ་ཡིན།

⁶ ངས་ཁྱོད་ཚོའི་མེས་པོ་རྣམས་ཨི་ཇིབ་ནས་ཕྱིར་བཏོན་ཏེ་འཁྲིད་ཡོང་ཡིན། ཨི་ཇིབ་པའི་ཤིང་རྟ་འཁོར་ལོ་རྣམས་དང་རྟ་དམག་ཀྱིས་རྗེས་དེད་བྱས་ཏེ། འོན་ཀྱང་ཁྱོད་ཚོའི་མེས་པོ་རྣམས་རྒྱ་མཚོ་དམར་པོ་སླེབས་སྐབས།

⁷ དེ་ཚོས་ང་ལ་སྐྱབས་གྲོགས་ཆེད་དུ་ཞུ་བ་ཕུལ་བས། ངས་ཁོ་ཚོ་དང་ཨི་ཇིབ་པ་ཚོའི་བར་ལ་མུན་ནག་བཟོས་ཏེ། ཨི་ཇིབ་པ་རྣམས་རྒྱ་མཚོའི་རྦ་རླབས་དྲག་པོས་ཡོངས་སུ་ནུབ་བཅུག་པ་ཡིན། ངས་ཨི་ཇིབ་གྱི་ཐོག་ཏུ་གང་བྱས་པ་དེ་ཁྱོད་ཚོས་ཤེས་གསལ་ལྟར་ཡིན་ནོ། ཁྱོད་ཚོ་དུས་ཡུན་རིང་པོའི་བར་འབྲོག་སྟོང་ནང་དུ་གནས་སོ།

⁸ ངས་ཁྱོད་ཚོ་ཡོར་དན་ཤར་ཕྱོགས་སུ་སྡོད་མི་ཨ་མོར་པ་ཚོའི་ཡུལ་དུ་འཁྲིད་ཡོང་བ་ཡིན། དེ་ཚོས་ཁྱོད་ཚོའི་ཐོག་ཏུ་དམག་འཐབ་བྱས་ཀྱང་ངས་ཁྱོད་ཚོར་རྒྱལ་ཁ་སྤྲད་པ་ཡིན། ཁྱོད་ཚོས་ཁོ་ཚོའི་ཡུལ་དེ་བདག་འཛིན་བྱས་ནས། ཁྱོད་ཚོ་འགྲུལ་སྐྱོད་བྱེད་སྐབས་ངས་ཁོ་ཚོ་ཚར་བཅད་པ་ཡིན།

⁹ དེ་རྗེས་མོ་ཨབ་ཀྱི་རྒྱལ་པོ་ཛིབ་པོར་གྱི་བུ་བྷ་ལག་གིས་ཁྱོད་ཚོར་དམག་དྲངས་ཤིང་། ཁྱོད་ཚོར་དམོད་པ་བཏང་བའི་ཕྱིར་བྷི་ཨོར་གྱི་བུ་བྷ་ལམ་ལ་ལན་བཏང་མོད།

¹⁰ འོན་ཀྱང་ངས་བྷ་ལམ་གྱི་སྐད་ཆ་མ་ཉན་པས། ཁོས་ཁྱོད་ཚོ་ལ་བྱིན་རླབས་སྤྲད་དོ། དེ་ལྟར་ངས་ཁྱོད་ཚོ་ལ་བྷ་ལག་གི་ལག་ནས་སྐྱབས་པ་ཡིན།

¹¹ དེ་རྗེས་ཁྱོད་ཚོ་ཡོར་དན་རྒལ་ནས་ཡེ་རི་ཀོ་རུ་བསླེབས་པ་དང་། ཡེ་རི་ཀོའི་ཡུལ་མི་དང་། ཨ་མོར་པ། པེ་རི་ཛི་པ་དང་། ཀ་ནན་པ། ཧི་ཏི་པ། གྷིར་ག་ཤི་པ་རྣམས། ཧི་ཝི་པ་དང་། ཡ་བྷུ་སི་པ་ཚོས་ཁྱོད་ཚོ་དང་མཉམ་དུ་དམག་འཐབ་བྱས་མོད། འོན་ཀྱང་ངས་ཁྱོད་ཚོ་ལ་དེ་ཚོ་ཚང་མའི་ཐོག་ཏུ་རྒྱལ་ཁ་སྤྲད་པ་ཡིན།

¹² ཁྱོད་ཚོ་ལམ་དུ་འགྲུལ་སྐྱོད་བྱེད་སྐབས་ངས་ཁོ་ཚོར་དངས་སྐྲག་ཆེན་པོ་སྐྱེད་བཅུག་ནས་ཨ་མོར་པའི་རྒྱལ་པོ་གཉིས་ཡུལ་ནས་ཕྱིར་སྐྲོད་བྱས་པ་ཡིན། དེ་ནི་ཁྱོད་ཚོའི་རལ་གྲི་དང་མདའ་གཞུའི་ནུས་པ་ལ་བརྟེན་ནས་མ་ཡིན།

¹³ ཁྱོད་ཚོས་ད་བར་ཞིང་རྨོས་མ་རྒྱབ་པའི་ཡུལ་ཞིག་དང་། སོ་སོས་འཛུག་བསྐྲུན་མ་བྱས་པའི་གྲོང་ཁྱེར་རྣམས་ངས་ཁྱོད་ཚོ་ལ་སྤྲད་ཡོད་པས། དེར་ཁོང་ཚོ་གནས་སྡོད་བྱས་ཤིང་། ཁྱོད་ཚོས་མ་བཙུགས་པའི་རྒུན་ཚལ་དང་ཁ་སྐྱུར་པོའི་ཤིང་འབྲས་རྣམས་ལས་ཟས་སུ་ལོངས་སྤྱོད་བཞིན་ཡོད་དོ།

¹⁴ དེ་བས་ན་ཡོ་ཤུ་ཨས་མུ་མཐུད་ནས་སྨྲས་པ། གཙོ་བོ་དཀོན་མཆོག་ལ་མོས་གུས་ཞུས་ཏེ། ལྷག་བསམ་རྣམ་དག་གི་སྒོ་ནས་ཁོང་ལ་སྲི་ཞུ་ཞུ་དགོས། ཁྱོད་ཚོའི་མེས་པོ་རྣམས་ཀྱིས་མེ་སོ་པོ་ཊ་མི་ཡ་དང་ཨི་ཇིབ་དུ་མཆོད་པའི་ལྷ་རྟེན་རྣམས་སྤངས་ཤིག་དང་། གཙོ་བོ་དཀོན་མཆོག་གཅིག་པུར་སྲི་ཞུ་ཞུས་ཞིག

¹⁵ གལ་ཏེ་ཁྱོད་ཚོས་གཙོ་བོ་དཀོན་མཆོག་ལ་སྲི་ཞུ་མ་ཞུས་ན། གཞན་སུ་ཞིག་ལ་སྲི་ཞུ་ཞུ་འདོད་ཡོད་དམ། ཁྱོད་ཚོའི་མེས་པོ་ཚོས་མེ་སོ་པོ་ཊ་མི་ཡ་རུ་མཆོད་པའི་ལྷ་རྟེན་ནམ། ད་ལྟ་ཁྱོད་ཚོ་གནས་སྡོད་བྱེད་བཞིན་པའི་ཡུལ་ཨ་མོར་པའི་སྐུ་འདྲ་ལ་མཆོད་དམ། དེའི་སྐོར་ལ་དེ་རིང་རང་ཐག་གཅོད་བྱེད་དགོས། ང་དང་ངའི་ནང་མི་རྣམས་ནི་གཙོ་བོ་དཀོན་མཆོག་རང་ལ་སྲི་ཞུ་ཞུ་རྒྱུ་ཡིན།

¹⁶ མི་དམངས་ཚོས་ལན་དུ། ང་ཚོ་གཙོ་བོ་དཀོན་མཆོག་ལ་སྤངས་ནས། ལྷ་རྟེན་གཞན་ལ་ནམ་ཡང་ཞབས་ཕྱི་ཞུ་གི་མིན།

¹⁷ གཙོ་བོ་དཀོན་མཆོག་གིས་ང་ཚོ་ཕ་མེས་རྣམས་དང་བཅས་པ་ཨི་ཇིབ་ཀྱི་བྲན་འཁོལ་འོག་ནས་བླུས་ཏེ་འཁྲིད་ཕེབས་པ་དང། ཁོང་གིས་གནང་བའི་ངོ་མཚར་ཆེ་བའི་མཛད་འཕྲིན་དག་ང་ཚོའི་མིག་ངོར་མཐོང་ཞིང་། ང་ཚོ་ཡུལ་ཕྱོགས་གང་དུ་ཕྱིན་རུང་མི་རིགས་ཚང་མའི་དཀྱིལ་ནས་ཁོང་གིས་ང་ཚོ་ལ་སྲུང་སྐྱོབ་གནང་བྱུང་།

¹⁸ ང་ཚོ་ཡུལ་འདིར་བསླེབས་སྐབས་ཁོང་གིས་ཨ་མོར་པ་ཚང་མ་ཡུལ་དེ་ནས་ཕྱིར་སྐྲོད་གནང་བ་ཡིན་པས། ད་ང་ཚོའང་གཙོ་བོ་དཀོན་མཆོག་རང་ལ་བསྙེན་བཀུར་ཞུ་གི་ཡིན། ཁོང་ནི་ང་ཚོའི་དཀོན་མཆོག་ཡིན་ཞེས་སྨྲས་སོ།

¹⁹ ཡོ་ཤུ་ཨས་མི་དམངས་ལ། ཁྱོད་ཚོས་གཙོ་བོ་དཀོན་མཆོག་ལ་ཞབས་ཕྱི་ཞུ་མི་ཐུབ། ཁོང་ནི་དམ་པའི་དཀོན་མཆོག་ཡིན་པ་དང་། ཁོང་ནི་ཞེ་སྡང་གནང་མཁན་དཀོན་མཆོག་ཡིན་པས། ཁོང་གིས་ཁྱོད་ཚོའི་ངོ་ལོག་དང་སྡིག་པར་བཤགས་པ་མི་གནང་ངོ།

²⁰ ཁྱོད་ཚོས་གཙོ་བོ་དཀོན་མཆོག་ལ་སྤངས་ནས་ལྷ་རྟེན་གཞན་ལ་བསྙེན་བཀུར་ཞུས་པ་ཡིན་ན། ཁོང་གི་ས་ཁྱོད་ཚོར་རྒོལ་བ་དང་། ཆད་པ་གཏོང་གནང་བར་འགྱུར། སྔོན་དུ་ཁྱོད་ཚོར་ཁོང་གིས་བཟང་པོ་གནང་ཡོད་ན་ཡང་། ད་ཁྱོད་ཚོར་ཁོང་གིས་ཚར་བཅད་པར་འགྱུར་ཅེས་སྨྲས་སོ།

²¹ མི་དམངས་ཚོས་ཡོ་ཤུ་ཨ་ལ་སྨྲས་པ། དེ་ལྟར་མ་ཡིན། ང་ཚོ་གཙོ་བོ་དཀོན་མཆོག་རང་ལ་ཞབས་ཕྱི་ཞུ་གི་ཡིན།

²² དེ་ནས་ཡོ་ཤུ་ཨས་དེ་དག་ལ། ཁྱོད་ཚོས་གཙོ་བོ་དཀོན་མོཆག་ལ་བསྙེན་བཀུར་ཞུ་གི་ཡིན་ཞེས་སྨྲས་པ་དེ་ལ་ཁྱོད་ཚོ་རང་ཉིད་དཔང་པོར་འགྱུར་ཡོད་བཅས་སྨྲས་སོ། དེ་ཚོས་ལན་དུ། དེའི་དཔང་དེ་ང་ཚོ་རང་གིས་བྱེད་ཆོག་ཅེས་སྨྲས་སོ།

²³ ཡོ་ཤུ་ཨས། འོ་ན་ཁྱོད་ཚོའི་ཁྲོད་དུ་ཡོད་པའི་ཕྱི་པའི་ལྷ་རྟེན་རྣམས་སྤངས་ནས། ཁྱོད་ཚོའི་ཨིསི་རཱཨེལ་གྱི་དཀོན་མཆོག་གཙོ་བོ་དཀོན་མཆོག་ལ་ནམ་ཡང་དད་ལོག་ཞུ་གི་མིན་ཞེས་དམ་བཅའ་འབུལ་ཞིག་ཅེས་སྨྲས་སོ།

²⁴ མི་དམངས་ཚོས་ཡོ་ཤུ་ཨ་ལ། ང་ཚོས་གཙོ་བོ་དཀོན་ནཆོག་ང་ཚོའི་དཀོན་མཆོག་རང་ལ་ཞབས་ཕྱི་ཞུས་ཏེ་ཁོང་གི་བཀའ་ལ་བརྩི་སྲུང་ཞུ་གི་ཡིན་ཞེས་སྨྲས་སོ།

²⁵ དེར་བརྟེན་ཡོ་ཤུ་ཨས་དེ་ཉིན་མི་དམངས་ཀྱི་ཚབ་ཞུས་ཏེ་གཙོ་བོ་དཀོན་མཆོག་ལ་དམ་བཅའ་ཕུལ་ཏེ། ཤེ་ཀེམ་དུ་མི་མང་ལ་ཁྲིམས་རྣམས་གནང་ངོ་།

²⁶ ཡོ་ཤུ་ཨས་ཁྲིམས་དེ་དག་གཙོ་བོ་དཀོན་མཆོག་གི་ཁྲིམས་ཀྱི་དེབ་ནང་བྲིས་ཏེ། རྡོ་ཆེན་པོ་ཞིག་འཁྱེར་ཡོང་ནས་གཙོ་བོ་དཀོན་མཆོག་གི་གནས་མཆོག་དམ་པའི་ཉེ་འགྲམ་དུ་ཡོད་པའི་བེ་ཤིང་གི་སྡོང་པོ་ཞིག་གི་འོག་ཏུ་བཞག་ཅིང་།

²⁷ ཡོ་ཤུ་ཨས་མི་དམངས་ཡོངས་ལ་སྨྲས་པ། རྡོ་འདིས་ང་ཚོའི་ཕྱིར་དཔང་པོའི་ཚུལ་དུ་བཞག་ཡོད། གཙོ་བོ་དཀོན་མཆོག་གིས་ང་ཚོ་ལ་གང་གསུངས་པ་ཚང་མ་རྡོ་འདིས་ཐོས་ཡོད་པས། ཁྱོད་ཚོས་གཙོ་བོ་དཀོན་མཆོག་ལ་ངོ་ལོག་མ་ཞུས་པའི་ཕྱིར་རྡོ་འདིས་ཁྱོད་ཚོར་དཔང་པོ་བྱེད་རྒྱུ་ཡིན།

²⁸ དེ་ནས་ཡོ་ཤུ་ཨས་མི་དམངས་དེ་ཚོ་ལ་བཏང་ནས། རང་རང་སོ་སོའི་ས་སྐལ་ཐོབ་པའི་གནས་སུ་ལོག་གོ།

ཡོ་ཤུ་ཨ་དང་ཨེ་ལི་ཟར་གྲོངས་པ།

²⁹ དེ་རྗེས་ནུན་གྱི་བུ་གཙོ་བོ་དཀོན་མཆོག་གི་ཞབས་ཏོག་པ་ཡོ་ཤུ་ཨ་ལོ་ ༡༡༠ ལོན་ནས་གྲོངས་སོ།

³⁰ དེ་ཚོས་ཁོང་ལ་རི་བོ་གྷཤའི་བྱང་ཕྱོགས་སུ་ཨེཕ་ར་ཡིམ་རི་བརྒྱུད་ཁུལ་གྱི་ཏིམ་ནད་སེ་རཱ་ཞེས་པའི་ས་གནས་སུ་དུར་དུ་སྦས་སོ།

³¹ ས་གནས་དེ་ནི་ཡོ་ཤུ་ཨའི་མི་ཚེའི་རིང་དང་། དེ་རྗེས་ཨིསི་རཱཨེལ་ཡུལ་དུ་གཙོ་བོ་དཀོན་མཆོག་གི་མཛད་འཕྲིན་གང་དང་གང་གནང་བ་རྣམས་རང་གི་མིག་གིས་མཐོང་མྱོང་མཁན་འགོ་བྱེད་རྣམས་གསོན་པོར་གནས་ཡུན་རིང་ལ་ཨིསི་རཱཨེལ་པ་ཚོས་གཙོ་བོ་དཀོན་མཆོག་རང་ལ་ཞབས་ཕྱི་ཞུས་པ་སོ།

³² ཨིསི་རཱཨེལ་པ་ཚོས་ཨི་ཇིབ་ནས་འཁྱེར་ཡོང་བའི་ཡོ་སེབ་ཀྱི་སྐུ་ཕུང་དེ་ཤེ་ཀེམ་དུ་སྦས་སོ། སྐུ་ཕུང་སྦས་སར་ས་ཆ་དེ་ནི་སྔར་ཡ་ཀོབ་ཀྱིས་ཤེ་ཀེམ་གྱི་ཕ་ཧ་མོར་གྱི་བུ་རྣམས་ཀྱི་ལག་ནས་དངུལ་ཊམ་ ༡༠༠ ཐམ་པར་ཉོས་པའི་ས་ཞིང་དེ་ཡིན་ཏེ། ས་གནས་དེ་ནི་ཡོ་སེབ་ཀྱི་བུ་བརྒྱུད་ཚོའི་ས་སྐལ་དུ་ཐོབ་པ་ཡིན་ནོ།

³³ ཨ་རོན་གྱི་བུ་ཨེ་ལི་ཛར་ཡང་གྲོངས་ནས། རི་བརྒྱུད་ཁུལ་གྱི་ཡུལ་ཨེ་ཕ་ར་ཨེམ་གྱི་གྲོང་ཁྱེར་གྷི་བི་ཨཱ་ཞེས་པར་དུར་དུ་སྦས་ཤིང་། གྲོང་ཁྱེར་དེ་ནི་ཨེཕ་ར་ཡིམ་གྱི་བུ་ཕིན་ཧསི་ལ་ས་སྐལ་དུ་ཐོབ་ཡོད་བ་ཡིན་ནོ༎