ཡོ་ཤུ་ཨ 23 - Tibetan Old Testament 2011

ཡོ་ཤུ་ཨའི་མཐའ་མའི་བཀའ་སློབ།

¹ དུས་ཡུན་རིང་པོའི་རྗེས་སུ་གཙོ་བོ་དཀོན་མཆོག་གིས་ཨིསི་རཱཨེལ་པ་རྣམས་ལ་མཐའ་འཁོར་གྱི་དགྲ་བོ་ལས་སྲུང་སྐྱོབ་གནང་བ་དང་། སྐབས་དེར་ཡོ་ཤུ་ཨ་ནི་ལོ་ན་ཧ་ཅང་རྒས་ཤིང་།

² ཁོང་གིས་ཨིསི་རཱཨེལ་པ་རྣམས་དང་། དེ་ཚོའི་རྒན་པོ་རྣམས་དང་། འགོ་བྱེད་དང་ཁྲིམས་དཔོན་དང་དེ་བཞིན་ལས་སྣེ་རྣམས་བོས་ཏེ་དེ་ཚོ་ལ། ད་ང་ནི་ལོ་ན་ཧ་ཅང་རྒས་ཡོད།

³ གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁྱེད་ཚོའི་ཕྱིར་དུ། མི་རིགས་འདི་ཚོ་ལ་ཁོང་གིས་ག་རེ་གནང་བ་དེ་ཁྱོད་ཚོས་མཐོང་ཡོད་དོ། གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁྱོད་ཚོའི་ཆེད་དུ་འཐབ་བཞིན་ཡོད་དོ།

⁴ ཤར་ཕྱོགས་ཡོར་དན་ནས་ནུབ་ཕྱོགས་རྒྱ་མཚོ་མེ་ཌི་ཊ་རེ་ནི་ཡན་བར་མི་རིགས་དེ་ཚོའི་ཡུལ་དབང་དུ་བསྡུ་བའམ་ཡང་ན་བསྡུ་རྒྱུ་ལྷག་འཕྲོས་ལུས་ཡོད་པ་དང་། དེ་དག་ཚང་མ་ངས་ཁྱོད་ཀྱི་སྡེ་རིགས་རྣམས་ལ་རྒྱུ་ནོར་གྱི་ཚུལ་དུ་བགོས་རྒྱུ་ཡིན།

⁵ གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་དེ་དག་ལ་ཁྱོད་ཚོ་ནས་ཕྱི་ནུར་བརྒྱབ་བཅུག་པ་གནང་བ་དང་། ཁྱོད་ཚོའི་མདུན་སྐྱོད་བྱེད་སྐབས་དེ་ཚོར་ཕྱིར་སྐྲོད་གནང་ཡོང་། གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁྱོད་ཚོར་ཞལ་བཞེས་གནང་བ་བཞིན་ཁྱོད་ཚོས་དེ་དག་གི་ཡུལ་རྣམས་དབང་འཛིན་བྱེད་ཡོང་།

⁶ དེ་བས་ན་ཟབ་ཟབ་བྱས་ནས་མོ་ཤེའི་ཁྲིམས་ཀྱི་དེབ་ནང་འབྲིས་ཡོད་པ་ཚང་མ་ཉེན་པ་དང་སྲུང་མཁན་བྱོས་ཤིག དེའི་ཆ་ཤས་གང་ཞིག་ལ་མ་སྤངས་ཤིག

⁷ ཁྱོད་ཚོའི་ཁྲོད་དུ་ལུད་པའི་མི་རིགས་དེ་དག་དང་མཉམ་དུ་མཐུན་ལམ་མ་བྱེད་ཅིག དེ་ཚོའི་ལྷ་རྣམས་ཀྱི་མིང་ཡང་མ་ལེན་ཅིག དེ་ཚོའི་མིང་དུ་མནའ་སྐྱེལ་བའམ། ལྷ་བརྟན་དེ་ཚོར་མཚོད་པའམ་དེ་ཚོའི་མདུན་དུ་མགོ་ཡང་མ་སྒུར་ཞིག

⁸ ད་བར་གནས་པ་བཞིན་གཙོ་བོ་དཀོན་མཆོག་གི་ཕྱོགས་སུ་དམ་ཚིག་དང་ལྡན་པར་གནས་ཤིག

⁹ གཙོ་བོ་དཀོན་མཆོག་གིས་ཁྱོད་ཚོ་མདུན་སྐྱོད་བྱེད་སྐབས་དཔའ་རྩལ་ལྡན་པའི་མི་རིགས་རྣམས་ལ་མཐར་སྐྲོད་གནང་ཞིང་། དེ་ཚོའི་ནང་ནས་སུས་ཀྱང་ཁྱོད་ཚོ་དང་གདོང་ལེན་བྱེད་མ་ཐུབ་པ་དང་།

¹⁰ ཁྱོད་ཚོ་སུ་ཞིག་གིས་མི་སྟོང་ཕྲག་གཅིག་མཐར་སྐྲོད་བཏང་ཐུབ་པ་ཡོད། གང་ལགས་ཟེར་ན། གཙོ་བོ་དཀོན་མཆོག་གི་ཞལ་བཞེས་གནང་བ་བཞིན་ཁོང་གིས་ཁྱོད་ཚོའི་ཆེད་དུ་དམག་འཐབ་པ་གནང་བཞིན་ཡོད།

¹¹ དེ་བས་ན་ཟབ་ཟབ་བྱས་ནས་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་ལ་བརྩེ་བ་ཞུས་ཤིག

¹² གལ་སྲིད་ཁྱོད་ཚོས་ཤ་ཤན་ཉམས་ནས་ཁྱོད་ཚོའི་ཁྲོད་དུ་ཡོད་པའི་ཕྱིའི་མི་རིགས་རྣམས་དང་འབྲེལ་ལས་ཀྱིས་དེ་དག་དང་ཆང་ས་སོགས་བྱས་པ་ཡིན་ན།

¹³ འདི་ངེས་པར་ཤེས་པར་བྱོས་ཤིག་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁྱོད་ཚོ་མདུན་སྐྱོད་བྱས་སྐབས། མི་རིགས་དེ་རྣམས་ནམ་ཡང་མཐར་སྐྲོད་མི་གནང་ངོ་། འོན་ཀྱང་དེ་དག་ཁྱོད་ཚོའི་དོན་དུ་རྙི་དང་ལམ་གྱི་ས་དོང་ལྟ་བུའི་ཉེན་ཁའི་རྒྱུ་ཞིག་དང་རྒྱབ་ལ་རྟ་ལྕགས་ཡང་ན་མིག་ལ་ཚེར་མ་ཟུག་པ་བཞིན་ངན་ཟུག་བྱུང་བར་འགྱུར། གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཁྱོད་ཚོ་ལ་ལ་གནང་བའི་ས་གནས་བཟང་པོ་འདི་ནས་ཁྱོད་ཚོ་ཆ་ཚང་མ་འཇིག་བར་དུ་གནས་ཚུལ་དེ་འབྱུང་བཞིན་གནས་པར་འགྱུར།

¹⁴ ད་ང་ནི་འཆི་ཁར་ཐུག་ཡོད་ཅིང་། སྔར་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གིས་ཞལ་བཞེས་གནང་བའི་གནང་སྦྱིན་བཟང་པོ་ཚང་མ་ཁྱོད་ཚོར་གནང་ཡོད་དེ། ཞལ་བཞེས་གཅིག་ཀྱང་དོན་མེད་དུ་ཕྱིན་མེད་པ་དེ་ནི་ཁྱོད་ཚོ་ཚང་མས་སྙིང་དང་སེམས་ནས་ཤེས་གསལ་ཡིན་ནོ།

¹⁵ འོན་ཀྱང་ཁོང་གིས་དམ་བཅའ་གནང་བ་ཚང་མ་སྒྲུབ་པ་བཞིན་ཁོང་གིས་ཁྱོད་ཚོའི་ཐོག་ཏུ་རྐྱེན་ངན་ཚང་མ་ཡང་འཁྱེར་ཡོང་བར་འགྱུར།

¹⁶ གལ་ཏེ་ཁྱོད་ཚོས་གཙོ་བོ་དཀོན་མཆོག་ཁྱོད་ཚོའི་དཀོན་མཆོག་གི་གནང་བའི་དམ་བཅའ་དང་འགལ་ནས་ཕྱི་པའི་ལྷ་རྟེན་སོགས་ལ་བསྙེན་བཀུར་དང་མཆོད་འབུལ་སོགས་བྱས་ན། ཁོང་གིས་ཐུགས་ཁྲོ་བ་ཆེན་པོའི་ངང་དུ་ཁྱོད་ཚོར་ཉེས་ཆད་གནང་རྒྱུ་ཡིན་པ་དང། ཁྱོད་ཚོའི་ནང་ནས་སུའང་ཁོང་གིས་གནང་བའི་ཡུལ་བཟང་པོ་འདིའི་ནང་དུ་གནས་སྡོད་བྱེད་མི་ཐུབ་བོ༎