ཡོ་ནཱ། 3 - Tibetan Old Testament 2011

ཡོ་ནཱས་གཅོ་བོ་དཀོན་མཆོག་གི་བཀའ་ལ་བརྩི་འཁུར་ཞུས་པ།

¹ ཡོ་ནཱ་ལ་སྐྱར་དུ་གཙོ་བོ་དཀོན་མཆོག་གི་བཀའ་ཕེབས་ནས།

² ད་ཁྱོད་གྲོང་ཁྱེར་རླབས་ཆེན་ནི་ན་ཝཱེ་ལ་ཕྱིན་ནས། སྔར་ངས་ཁྱོད་ལ་སྨྲས་པའི་འཕྲིན་དེ་ཁྱབ་བསྒྲགས་བྱོས་ཤིག་ཅེས་གསུངས་སོ།

³ དེར་བརྟེན་ཡོ་ནཱས་གཙོ་བོ་དཀོན་མཆོག་གི་བཀའ་ལ་བརྩི་འཁུར་ཞུས་ཏེ་ནི་ན་ཝཱེ་ལ་ཕྱིན་ནོ། གྲོང་ཁྱེར་དེ་ནི་ཧ་ཅང་ཆེ་ཞིང་། དེའི་དཀྱུས་ཀྱི་རིང་ཐུང་ནི་ཉིན་ལམ་གསུམ་ཡོད་པ་ཡིན་ནོ།

⁴ ཡོ་ནཱ་གྲོང་ཁྱེར་བརྒྱུད་ནས་ཉིན་ལམ་གཅིག་བར་ཕྱིན་པའི་རྗེས་ལ། སྐད་ཤུགས་ཆེན་པོས་ཁྱབ་བསྒྲགས་བྱེད་ཅིང་། ད་ཉིན་ཞག་བཞི་བཅུའི་ནང་ལ་ནི་ན་ཝཱེ་འཇིག་འགྲོ་གི་རེད་ཅེས་སྨྲས་སོ།

⁵ ནི་ན་ཝཱེའི་མི་རྣམས་དཀོན་མཆོག་གི་བཀའ་ལ་ཡིད་ཆེས་ཞུས་ཏེ། ཚང་མས་སྨྱུང་གནས་སྲུང་རྒྱུའི་ཐག་ཆོད་བྱས་ཤིང་། མི་དྲག་ཞན་ཚང་མས་འགྱོད་སེམས་བསྐྱེད་པའི་ཚུལ་དུ་རྩ་་རས་ཀྱི་གོས་གྱོན་པ་རེད།

⁶ ཡང་ནི་ན་ཝཱེའི་རྒྱལ་པོས་གནས་ཚུལ་དེ་ཐོས་སྐབས་རང་གི་ཁྲི་ལས་ཡར་ལང་ནས་ན་བཟའ་ཕུད་དེ་རྩ་རས་ཀྱི་གོས་གྱོན་ཅིང་། གོག་ཐལ་དཀྱིལ་དུ་བསྡད་པ་རེད།

⁷ དེ་རྗེས་རྒྱལ་པོ་དང་ཁོང་གི་ལས་བྱེད་པ་ཚོས་བཀའ་ཤོག་ཅིག་ནི་ན་ཝཱེའི་ཡུལ་མི་ཚོར་ཁྱབ་བསྒྲགས་བྱས་ཏེ། མིའམ་ཕྱུགས་དང་ལུག་ཁྱུ་ཚང་མས་བཟའ་བཏུང་གང་ཡང་བྱེད་མི་ཆོག་པ་དང་།

⁸ མི་དང་དུད་འགྲོ་ཚང་མས་རྩ་རས་གྱོན་དགོས། ཚང་མས་དད་སེམས་ཆེན་པོས་གཙོ་བོ་དཀོན་མཆོག་ལ་སྨོན་ལམ་ཞུས་ཏེ། རང་རང་སོ་སོའི་བྱ་སྤྱོད་དང་ལས་ངན་པ་རྣམས་ངེས་པར་སྤངས་དགོས།

⁹ དེ་ལྟར་བྱས་ན་དཀོན་མཆོག་གི་ཐུགས་དགོངས་སྒྱུར་ཏེ། ཁོང་གི་ཐུགས་ཁྲོ་ཞི་ཞིང་ང་ཚོ་འཆི་བ་ལས་ཐར་བར་ཡང་སྲིད་ཅེས་སྨྲས་སོ།

¹⁰ དེ་ནས་ཁོ་ཚོས་བྱ་སྤྱོད་ངན་པ་རྣམས་སྤངས་བ་དེ་དཀོན་མཆོག་གིས་གཟིགས་ནས་ཁོང་གི་ཐུགས་དགོངས་སྒྱུར་ཞིང་སྔར་ཁོང་གིས་ཉེས་ཆད་གནང་རྒྱུ་ཡིན་པ་དེའང་ཕྱི་བཤོལ་གནང་བ་རེད༎