ཡོ་ནཱ། 2 - Tibetan Old Testament 2011

ཡོ་ནཱས་སྨོན་ལམ་འདེབས་པ།

¹ ཡོ་ནཱས་ཉའི་ཁོག་པའི་ནང་ནས་རང་གི་དཀོན་མཆོག་གཅོ་བོ་དཀོན་མཆོག་ལ་གསོལ་འདེབས་ཞུས་ཤིང་སྨྲས་པ།

² ངས་རང་གི་དཀའ་སྡུག་དྲག་པོའི་ནང། ཁྱེད་གཙོ་བོ་དཀོན་མཆོག་ལ་བོས་པས། ཁྱེད་ཀྱི་ང་ལ་བཀའ་ལན་གནང་། གཤིན་པོའི་གནས་ཁམས་གཏིང་རིང་ནས། མགོན་སྐྱབས་ཞུས་པས་ཁྱེད་ཀྱིས་གསན།

³ ཁྱེད་ཀྱིས་ང་ལ་མཚོའི་གཏིང་། ཧ་ཅང་མཐིལ་བར་ཁྱེད་ཀྱིས་ང་ལ་ཕངས་གནང་ངོ་། ཆུ་ཡིས་ང་ལ་ཕྱོགས་བཞིར་བསྐོར། ཁྱེད་ཀྱིས་མཛད་པའི་རྦ་རླབས་རྣམས། ང་ཡི་སྟེང་དུ་འཁོར་ཞིང་རྒྱུག།

⁴ ང་ཡིས་བསམ་པར་ཁྱེད་ཀྱི་སྐུ་མདུན་ནས། ང་ནི་གཡོལ་བ་དང་། ཁྱེད་ཀྱི་མཆོད་ཁང་དམ་པ་དེ། ནམ་ཡང་མཇལ་མི་ཐུབ་བོ།

⁵ རྒྱ་མཚོའི་ཆུ་ཡིས་ཡོངས་བསྐོར་ཏེ། དབུགས་ཀྱང་ལེན་པར་བློ་ཟུབ་རྒྱབ། རྒྱ་མཚོས་ང་ནི་ཡོངས་འགེབས་ཤིང་། མགོ་ནི་ཆུ་ནང་རྒྱ་མཚོའི་རྩ་ཡིས་དཀྲིས།

⁶ ང་ནི་རི་བོའི་མཐིལ་དུ་བབས། ཡུལ་དེའི་སྒོ་རྣམས་གཏན་དུ་རྒྱབ། འོན་ཀྱང་ཁྱེད་ང་ཡི་དཀོན་མཆོག་གཙོ་བོ་དཀོན་མཆོག་གིས། གཤིན་ཁམས་གཏིང་ནས་ང་སྐྱབས་མཇོད།

⁷ ང་ནི་འཆི་ཁར་ཐུག་དུས་སུ། གཙོ་བོ་དཀོན་མཆོག་ཁྱེད་འདྲེན་ནས་ངའི་སྨོན་ལམ་འདེབས་པ་ཡིན། ཁྱེད་ཀྱིས་རང་གི་མཆོད་ཁང་དམ་པ་ནས། ང་ཡི་ཞུ་བ་གསན་པར་མཛད།

⁸ སྙིང་པོ་མེད་པའི་ལྷ་སྐུ་དག། བསྟེན་ཅིང་བསྙེན་བཀུར་བྱེད་མཁན་ཚོས། ཁྱེད་ལ་དད་གུས་མ་ཞུས་པར། ཁྱེད་ཀྱི་ཐུགས་རྗེ་ཡོངས་སུ་ཤོར།

⁹ འོན་ཀྱང་ངས་ནི་ཁྱེད་ལ་བསྟོད། ཁྱེད་དྲུང་དམར་མཆོད་འབུལ་བ་དང་། དམ་བཅའ་གང་ཞུས་བསྒྲུབ་པར་བྱ། ཐར་ལམ་གཙོ་བོ་དཀོན་མཆོག་ཕྱོགས་ནས་འབྱུང་།

¹⁰ དེ་ནས་གཙོ་བོ་དཀོན་མཆོག་གིས་ཉ་དེ་ལ་བཀའ་གནང་ནས། དེས་ཡོ་ནཱ་སྐྱུགས་ནས་མཚོ་འགྲམ་དུ་བཏོན་པ་རེད༎