ཡེར་མི་ཡཱ 9 - Tibetan Old Testament 2011

¹ ང་ཡི་མི་མང་བསད་པ་རྣམས་ཀྱི་ཆེད། ཉིན་མཚན་མེད་པར་ངུ་ནི་ཐུབ་པའི་ཆེད། ང་ཡི་འདོད་པར་ངའི་མགོ་ཆུའི་ཁྲོན་པ་དང། མིག་ནི་མིག་ཆུའི་ཆུ་མིག་ལྟ་བུ་འགྱུར་བར་འདོད།

² ང་ཡི་མི་མང་ཚོ་ལས་ཐག་རིང་སྡོད། ང་ལ་སྡོད་ཡུལ་འབྲོག་སྟོང་དུ་ཡོད་འདོད། དེ་ཚོ་ཐམས་ཅད་དམ་ཚིག་མི་གཙང་བའི། བསླུ་འཁྲིད་བྱ་མཁན་རྣམས་ཀྱི་ཚོགས་ཤིག་ཡིན།

³ དེ་ཚོ་རྟག་ཏུ་རྫུན་སྨྲར་གྲ་སྒྲིགས་ཡོད། དྲང་པོའི་ཚབ་ཏུ་དྲང་མིན་ཡུལ་ཁམས་སྐྱོངས། གཙོ་བོ་དཀོན་མཆོག་ཁོང་གིས་བཀའ་གནང་བ། ང་ཡི་མི་ཚོས་ངན་ལས་གཅིག་རྗེས་གཉིས་བྱེད། ང་ལ་དེ་ཚོའི་དཀོན་མཆོག་ཁས་མི་ལེན།

⁴ ཚང་མས་རང་གི་གྲོགས་པོར་དྭོགས་ཟོན་དགོས། སུས་ཀྱང་རང་གི་སྤུན་ལ་བློ་བསྐྱལ་མི་ཐུབ། སྤུན་རྣམས་ཡ་ཀོབ་ལྟ་བུ་བསླུ་ཅན་ཡིན། ཚང་མས་རང་གི་གྲོགས་པོར་དམའ་འབེབས་བྱེད།

^5-6 དེ་ཚོས་རང་གི་གྲོགས་ལ་བསླུ་འཁྲིད་བྱས། སུས་ཀྱང་དྲང་པོ་ཤོད་པར་མི་བྱེད་ཅིང་། དེ་ཚོའི་ལྕེ་ལ་རྫུན་ཤོད་བསླབ་ཡོད་ཅིང་། དེ་ཚོས་སྡིག་པ་བྱ་རྒྱུ་སྤངས་མི་ཡོང་། དེ་ཚོས་དྲག་ལས་གཅིག་རྗེས་གཉིས་བྱེད་ཅིང་། གཡོ་སྒྱུའི་བྱ་བ་གཅིག་རྗེས་གཞན་བྱེད་དོ། གཙོ་བོ་དཀོན་མཆོག་ཁོང་གིས་རང་མིས་ཁོང་སྤངས་གསུངས།

⁷ དེ་ཡི་རྐྱེན་གིས་གཙོ་བོ་དཀོན་མཆོག་ནི། ཀུན་དབང་ཅན་གྱི་ཁོང་གིས་བཀའ་གནང་གསལ། ང་ཡི་རང་གི་མི་མང་ལྕགས་རིགས་ལྟར། སྤུས་གཙང་བཟོ་ཞིང་དེ་ལ་རྟགས་དཔྱད་བྱེད། ང་ཡི་མི་མང་ངན་པའི་ལས་གྱིས་ནས། དེ་མིན་ང་ཡི་དེ་ཚོར་ཅི་བྱེད་ཐུབ།

⁸ དེ་ཚོའི་ལྕེ་ནི་སྡུག་རྩུབ་མདའ་དང་འདྲ། དེ་ཚོས་རྒྱུན་དུ་རྫུན་གཏམ་ཤོད་པར་བྱེད། ཚང་མས་ཁྱིམ་མཚེར་མཐུན་པའི་གཏམ་སྨྲའོ། འོན་ཀྱང་ཁོའི་ཆེད་དུ་དངོས་སུ་རྙི་བཙུགས་སོ།

⁹ ང་ཡིས་ལས་དེར་ཆད་པ་མི་གཏོང་ངམ། མི་མང་དེ་ཚོར་དགྲ་ཤ་མི་ལེན་ནམ། གཙོ་བོ་དཀོན་མཆོག་ང་ཡིས་སྨྲས་པ་ཡིན།

¹⁰ ང་ཡིས་རི་བོའི་ཆེད་དུ་མྱ་ངན་བྱེད། རྩྭ་ཁ་ཁག་གི་ཆེད་དུ་ངུ་བར་བྱེད། གང་ལ་ཟེར་ན་དེ་ཚོ་སྐམ་ཡོད་དོ། སུ་ཡང་དེ་ལ་བརྒྱུད་ནས་མི་འགྲོའོ། དུད་འགྲོའི་སྐད་ཀྱང་ཐོས་པར་མི་འགྱུར་ཞིང་། བྱ་དང་གཅན་གཟན་བྲོས་ནས་སོང་ཡོད་དོ།

¹¹ གཙོ་བོ་དཀོན་མཆོག་ཁོང་གིས་བཀའ་གནང་བ། ཡེ་རུ་ཤ་ལེམ་ཁྱི་སྤྱང་སྡོད་པའི་གནས། ང་ཡིས་གྱང་གོག་ཕུང་པོ་བཟོ་བར་བྱ། ཡ་ཧུ་དཱ་ཡི་གྲོང་ཁྱེར་ཁག་གི་ནང་། སུ་ཡང་མེད་པའི་འབྲོག་སྟོང་ཞིག་ཏུ་འགྱུར།

¹² གཙོ་བོ་དཀོན་མཆོག་གི་ཡུལ་སྟོར་རླག་ཏུ་འགྱུར་ནས་བྱེ་ཐང་ལྟར་སྐམ་ནས་དེ་བརྒྱུད་སུ་ཡང་མི་འགྲོ་བ་ཅི་ལ་ཡོད། དེ་ལྟར་རྟོགས་པར་འགྱུར་བའི་ཤེས་རབ་སུ་ལ་ཡོད། ཁྱེད་ཀྱིས་དེ་ལྟར་གཞན་ལ་ཤོད་པའི་གསལ་བཤད་སུ་ལ་གནང་ཡོད་དམ་ཞེས་ངས་བཀའ་འདྲི་ཞུས་པ་ཡིན།

¹³ གཙོ་བོ་དཀོན་མཆོག་གིས་བཀའ་ལན་གནང་བ། ངའི་མི་མང་རྣམས་ནས་ངས་སློབ་སྟོན་གྱིས་པ་རྣམས་སྤངས་ཡོད་སྟབས་དེ་ལྟར་བྱུང་བ་ཡིན། དེ་ཚོས་ང་ལ་མ་ཉན་པར་ངས་བཤད་པ་ལྟར་གྱིས་མེད་དོ།

¹⁴ དེ་ལས་ལྡོག་ཏེ་དེ་ཚོའི་ཕ་མེས་ཚོས་སློབ་སྟོན་གྱིས་པ་ལྟར་གྱོང་པོར་འགྱུར་བ་དང་། བྷལ་གྱི་སྐུ་འདྲར་མཆོད་ཡོད་དོ།

¹⁵ དེ་བས་ང་ཀུན་དབང་ཅན་གྱིས་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་ཇི་ལྟར་སྨྲས་པ་ལ་ཉོན་ཞིག ངས་ངའི་མི་མང་ལ་ཟ་བར་རྩི་ཤིང་ཁ་ཏིག་དང་འཐུང་བར་དུག་ཆུ་སྤྲོད་རྒྱུ་ཡིན།

¹⁶ ངས་དེ་ཚོ་དང་དེ་ཚོའི་ཕ་མེས་ཚོས་ཀྱང་མ་ཐོས་པའི་མི་མང་ཚོའི་ཁྲོད་དུ་ཁ་སྟོར་བ་དང་། དེ་ཚོ་ཚང་མ་མེད་པར་མ་བཟོས་བར་དུ་དེ་ཚོའི་ཐོག་ཏུ་དམག་མི་གཏོང་རྒྱུ་ཡིན་ནོ༎

ཡེ་རུ་ཤ་ལེམ་གྱི་མི་མང་ཚོས་རོགས་རམ་ཆེད་ཞུ་འབོད་བྱས་པ།

¹⁷ གཙོ་བོ་དཀོན་མཆོག་ཁོང་གིས་བཀའ་གནང་བ། ཇི་ལྟར་ཡོང་བཞིན་པ་ལ་བསམ་བློ་གཏོང་། མྱ་ངན་བྱེད་མི་ཡོང་བའི་ཆེད། རོ་འདོན་ཆེད་དུ་མགུར་ལེན་མཁན་བུད་མེད་བོས།

¹⁸ མི་ཚོས་ང་ཚོའི་མིག་ལ་མིག་ཆུས་ཁེངས་བ་དང། མིག་ལྤགས་ངུ་བ་རློན་དུ་མི་འགྱུར་བར་དུ། དེ་ཚོ་མགྱོགས་པར་ཡོང་ནས་ང་ཚོའི་ཆེད། རོ་འདོན་ཆེད་དུ་མགུར་མ་ལེན་ཞིག་གསུངས།

¹⁹ ཛི་ཡོན་དུ་ངུ་བའི་སྒྲ་ལ་ཉན་པར་གྱིས། ང་ཚོ་མེད་པར་འགྱུར་སོང་། ང་ཚོར་དམའ་འབེབས་ཆ་ཚང་བྱུང་སོང་བས། ང་ཚོའི་ཁྱིམ་རྣམས་བཤིགས་པར་འགྱུར་ཡོད། ང་ཚོ་ཚང་མ་ཡུལ་ནས་ཐོན་པར་བྱ།

²⁰ ངས་སྨྲས་པ་ཡིན། བུད་མེད་ཚོ་གཙོ་བོ་དཀོན་མཆོག་ལ་ཉན་ཞིག། ཁོང་གི་བཀའ་ལ་དོ་སྣང་ལེགས་པར་གྱིས། ཁྱོད་ཀྱི་བུ་མོར་མྱ་ངན་བྱེད་སྟངས་སློབ། གྲོགས་ཚོར་རོ་འདོན་མགུར་མ་ལེན་སྟངས་སློབ།

²¹ འཆི་བ་ང་ཚོའི་སྒེ་ཁུང་ནས་ཡོང་ངོ་། ང་ཚོའི་ཕོ་བྲང་ནང་དུ་འཛུལ་སོང་ངོ་། དེ་ཡིས་རྒྱ་ལམ་དུ་ཕྲུ་གུ་ཚོར་དང་། ཁྲོམ་རར་ན་གཞོན་ཚོ་ཡི་སྲོག་གཅོད་དོ།

²² གཤིང་པོའི་རོ་ནི་ཞིང་སྟེང་ལུད་ཕུང་ལྟར། རྔ་མཁན་རྔས་ནས་དོར་བའི་འབྲུ་ལྟར་དུ། བསྡུ་མི་མེད་པའི་འབྲུ་ལྟར་གང་སར་འཐོར། གཙོ་བོ་དཀོན་མཆོག་ཁོང་གི་ང་ལ་འདི་ལྟར་སྨྲོས་ཞིག་གསུངས།

²³ གཙོ་བོ་དཀོན་མཆོག་ཁོང་གིས་བཀའ་གནང་བ། ཤེས་རབ་ཅན་གྱིས་རང་གི་ཤེས་རབ་དང་། ཤུགས་ཆེན་མི་ཡིས་རང་གི་སྟོབས་ཤུགས་དང་། ཕྱུག་པོ་རྣམས་ནས་རང་གི་རྒྱུ་ནོར་དང་། བཅས་ལ་སྤོབ་པ་ངོམ་པར་བྱེད་མི་རུང་།

²⁴ སུ་ཞིག་དེ་ལ་ངོམ་པར་འགྱུར་འདོད་ན། དེ་ཚོས་ང་ངོ་ཤེས་པ་དང་རྟོགས་པར་ངོམ་དགོས་སོ། གང་ལ་ཟེར་ན་ང་ཡི་བྱམས་བརྩེ་རྒྱུན་ལྡན་ཡིན་པ་དང། ང་ཡིས་ཁྲིམས་དྲང་དང་དྲང་བདེན་འབའ་ཞིག་བྱེད། བྱ་བ་དེ་ཚོར་ང་ནི་དགའ་བ་ཡིན། གཙོ་བོ་དཀོན་མཆོག་ངཡིས་སྨྲས་པ་ཡིན།

^25-26 གཙོ་བོ་དཀོན་མཆོག་གིས། ངས་ཨི་ཇིབ་དང་ཡ་ཧུ་དཱ་དང་ཨེ་དྷོམ་དང་ཨམ་མོན་དང་མོ་ཨབ་དང་སྐྲ་ཐུང་ཐུང་བཅད་མཁན་བྲོང་སྟོང་གི་མི་མང་བཅས་པར་ཆད་པ་གཏོང་བའི་དུས་སྐབས་སླེབས་བཞིན་ཡོད། མི་མང་དེ་ཚོ་ཚང་མས་མདུན་ལྤགས་བྲེག་ཡོད་ན་ཡང་དེས་མཚོན་པའི་དམ་བཅའ་སྲུང་མེད། མི་མང་དེ་ཚོའི་དང་ཨིསི་རཱཨེལ་གྱི་མི་མང་བཅས་པ་སུས་ཀྱང་གི་སེམས་ཀྱི་མདུན་ལྤགས་བྲེག་མེད་ཅེས་བཀའ་གནང་ངོ་༎