ཡེར་མི་ཡཱ 6 - Tibetan Old Testament 2011

ཡེ་རུ་ཤ་ལེམ་དགྲ་བོས་མཐའ་བསྐོར་བ།

¹ བྷེན་ཡ་མིན་གྱི་མི་མང་ཚོ་སྲུང་སྐྱོབ་ཀྱི་ཆེད་དུ་ཡེ་རུ་ཤ་ལེམ་ནས་བྲོས་ཤིག ཊེ་ཀོ་ཨ་རུ་དམག་དུང་འབུད་ལ། བྷེད་ཧག་ཀེ་རེམ་དུ་མེའི་བརྡ་གཏོང་ཞིག། བྱང་ཕྱོགས་ནས་རྐྱེན་ངན་དང་འཇིགས་པ་ཡོང་གྲབ་ཡོད། ལྕགས་རིགས

² ཛི་ཡོན་གྱི་གྲོང་ཁྱེར་མཛེས་པོ་ཡོད་ན་ཡང་དེ་འཛིགས་པར་འགྱུར།

³ རྒྱལ་པོ་ཚོ་དམག་མི་མཉམ་དུ་དེར་སྒར་བཏབ་ཡོང། དེ་ཚོའི་རང་གི་གུར་གྲོང་ཁྱེར་གྱི་མཐའ་འཁོར་དུ་ཕུབ་པ་དང་། རང་གི་འདོད་པ་གང་ཡོད་སར་སྒར་བཏབ་ཡོང།

⁴ དེ་ཚོས་སྨྲས་ཡོང། ཡེ་རུ་ཤ་ལེམ་དུ་འཐབ་ཕྱིར་གྲ་སྒྲིགས་བྱོས་ཤིག། གྲ་སྒྲིགས་གྱིས་ཤིག། ང་ཚོས་ཉིན་གུང་ལ་འཐབ་རྒྱུ་ཡིན་ཞེས་སྨྲས་སོ། འོན་ཀྱང་ཡང་སྐྱར་དེ་ཚོས་བརྗོད་རྒྱུར། ད་ཧ་ཅང་ཕྱིས་སོང་། གང་ལ་ཟེར་ན། ཉི་མ་ཡོལ་གྲབ་ཡོད་པ་དང་ཕྱི་གྲོའི་གྲིབ་ནག་ཉེ་བར་ཡོང་བཞིན་འདུག

⁵ ང་ཚོས་མཚན་མོའི་དུས་སུ་འཐབ་རྒྱུ་ཡིན་པས། ང་ཚོས་གྲོང་ཁྱེར་གྱི་རྫོང་རྣམས་མེད་པར་བཟོ་རྒྱུ་ཡིན་ཞེས་སོ།

⁶ ཀུན་དབང་ཅན་གྱི་གཙོ་བོ་དཀོན་མཆོག་གིས། རྒྱལ་པོ་དེ་ཚོ་ལ་ཡེ་རུ་ཤ་ལེམ་མཐའ་སྐོར་བའི་ཆེད་ཤིང་གཅོད་པ་དང་ས་རྡོའི་ཕུང་པོ་རྩིག་པར་ཁོང་གིས་བཀའ་གནང་བ། ངས་གྲོང་ཁྱེར་དེ་ཆེད་པ་གཏོང་རྒྱུ་ཡིན། གང་ལ་ཟེར་ན། དེ་ནི་མནར་གཅོད་ཀྱིས་ཁེངས་ཡོད།

⁷ ཁྲོན་པ་ཞིག་གིས་རང་གི་ཆུ་གཙང་མ་ཉར་བ་ལྟར་ཡེ་རུ་ཤ་ལེམ་གྱིས་དེའི་ངན་པ་རྣམས་གསོས་པ་ཉར་བར་བྱེད། ངས་གྲོང་ཁྱེར་ནང་ཟང་ཟིང་དང་འཇིག་པའི་སྐད་ཐོས་བཞིན་འདུག ནད་པ་དང་རྨ་ཡོད་པ་འབའ་ཞིག་མཐོང་བཞིན་འདུག།

⁸ ཡེ་རུ་ཤ་ལེམ་གྱི་མི་མང་ཚོ་སྡུག་བསྔལ་འདི་ཚོ་ཁྱོད་ཀྱི་ཉེན་བརྡར་མངོན་ཞིག དེ་མིན་ངས་ཁྱོད་ཚོར་སྤོང་བར་བྱ། ངས་ཁྱོད་ཚོའི་གྲོང་ཁྱེར་དེ་སུ་ཡང་མི་སྡོད་པའི་གནས་འབྲོག་སྟོང་ལྟར་འགྱུར་བར་བྱའོ༎

ངོ་ལོག་ཅན་ཨིསི་རཱཨེལ།

⁹ ཀུན་དབང་ཅན་གྱི་གཙོ་བོ་དཀོན་མཆོག་གིས། ང་ལ་ཨིསི་རཱཨེལ་གྱི་རྒུན་ཤིང་ནས་རྒུན་འབྲུམ་ཆ་ཚང་སྒྲུག་པ་ལྟར་གཙང་མར་འདོན་པར་བྱའོ། དེར་བརྟེན་ཁྱོད་ཀྱི་དུས་ཚོད་ཡོད་རིང་གང་ཐུབ་ཐུབ་ཚང་མར་སྐྱོབས་ཅིག་གསུངས་སོ།

¹⁰ ལན་དུ། ངས་དེ་ཚོ་ལ་སྐད་ཆ་བཤད་ནས་ཉེན་བརྡ་བཏང་བ་ཡིན་ན་སུས་ང་ལ་ཉན་གྱི་རེད་དམ། དེ་ཚོ་གྱོང་པོ་ཡིན་སྟབས་ཁྱེད་ཀྱི་གསུང་འཕྲིན་ལ་མི་ཉན། ཁྱེད་ཀྱིས་ང་ལ་བརྗོད་དགོས་གསུངས་པ་དེ་ལ་དེ་ཚོས་གད་མོ་བགད་པར་འགྱུར་རོ།

¹¹ གཙོ་བོ་དཀོན་མཆོག་ཁྱེད་ཀྱི་དེ་ཚོའི་སྟེང་དུ་ཐུགས་ཁྲོ་བས་ང་ཡང་འཚིག་བཞིན་འདུག་པས་ངས་དེ་ཡུན་རིང་བར་འགོག་མི་ཐུབ་བོ། དེ་ནས་གཙོ་བོ་དཀོན་མཆོག་གིས་ང་ལ་བཀའ་གནང་བ། ངའི་ཁྲོ་བ་རྣམས་རྒྱ་ལམ་སྟེང་གི་ཕྲུ་གུ་ཚོ་དང་མི་ན་གཞོན་འདུ་འཛོམས་ཡོད་སར་འབེབས་ཤིག ཁྱོད་དང་སྐྱེ་དམན་ཚོ་ཡང་བཟུང་བར་འགྱུར་བ་དང་ལོ་ན་མཐོ་པོ་ཚོ་ཡང་ཐར་བར་མི་འགྱུར།

¹² དེ་ཚོའི་ཁྱིམ་དང་ཞིང་དང་ཆུང་མ་བཅས་པ་གཞན་ལ་སྤྲད་པར་བྱེད་དོ། ངས་ཡུལ་འདིའི་མི་མང་ལ་ཉེས་ཆད་གཏོང་རྒྱུ་ཡིན།

¹³ ཆེ་ཆུང་ཚང་མས་ཚུལ་མིན་གྱིས་དངུལ་བཟོ་ཐབས་བྱེད་པ་དང་། ལུང་སྟོན་པ་དང་བླ་མ་ཚོས་ཀྱང་མི་མང་ལ་མགོ་བསྐོར་གཏོང་ངོ་།

¹⁴ དེ་ཚོས་ངའི་མི་མང་གི་རྨ་རྣམས་སྦར་ཤས་རྒྱབ་ཤུལ་གཅིག་པོ་ཡིན་པ་ལྟར་བྱེད་དོ། དེ་ཚོས་ཚང་མ་ལེགས་པར་མེད་བཞིན་དུ་ལེགས་པར་ཡོད་ཅེས་ཟེར་རོ།

¹⁵ དེ་ཚོས་ཞེན་ལོག་ཅན་གྱི་བྱ་བ་དེ་ལྟར་བྱས་པ་ངོ་མི་ཚའམ། དེ་ཚོ་རྩ་བ་ནས་ངོ་ཚ་མེད་པ་དང་། དེ་ཚོས་ངོ་ཇི་ལྟར་ཚ་དགོས་པའམ་མི་ཤེས་སོ། གཞན་རྣམས་མར་ལྷུང་བ་ལྟར་དེ་ཚོ་ཡང་མར་ལྷུང་བར་འགྱུར། ངས་དེ་ཚོ་ལ་ཉེས་ཆད་གཏོང་སྐབས་དེ་ནི་དེ་ཚོའི་མཐའ་མ་ཡིན་ཞེས། ང་གཙོ་བོ་དཀོན་མཆོག་གིས་སྨྲས་པ་ཡིན་ནོ༎

ཨིསི་རཱཨེལ་གྱིས་དཀོན་མཆོག་གི་ལམ་ལ་ཁས་ལེན་མ་བྱས་པ།

¹⁶ གཙོ་བོ་དཀོན་མཆོག་གིས་ཁོང་གི་མི་མང་ལ་ཁྱོད་ཚོ་ལམ་བཞི་འཛོམས་སར་ལོངས་ལ་ལྟོས་ཤིག སྔོན་གྱི་ལམ་དང་ལམ་ལེགས་ཤོས་འཚོལ་ཤིག། དེའི་ཁར་སོང་ལ་ཁྱོད་ཚོ་བདེ་བར་གནས་ཐུབ་ཅེས་བཀའ་གནང་ངོ་། འོན་ཀྱང་དེ་ཚོས་ང་ཚོ་དེ་ལྟར་བྱེད་ཀྱི་མིན་ཞེས་སྨྲས་སོ།

¹⁷ དེ་ནས་གཙོ་བོ་དཀོན་མཆོག་གིས། དམག་དུང་གི་ཉེན་བརྡ་ཉན་མཁན་སྲུང་བྱ་བ་ཞིག་བསྐོ་བཞག་གནང་ངོ་། འོནཀྱང་དེ་ཚོས་ང་ཚོ་ཉན་གྱི་མིན་ཞེས་ཞུས་སོ།

¹⁸ དེར་བརྟེན་གཙོ་བོ་དཀོན་མཆོག་གིས་བཀའ་གནང་བ། མི་རིགས་ཁྱོད་ཚོ་ཉོན་ཞིག་དང་ངའི་མི་མང་ལ་ཇི་བྱུང་རྟོགས་པར་གྱིས་ཤིག

¹⁹ ས་གཞི་ཉོན་ཞིག། དེ་ཚོའི་གཡོ་འཕྲུལ་རྣམས་ཀྱི་རྐྱེན་གྱིས་ངས་མི་མང་འདི་ཚོའི་ཐོག་ཆད་པ་འཇིག་པ་འཁྱེར་ཡོང་རྒྱུ་ཡིན། གང་ལ་ཟེར་ན། དེ་ཚོས་ངའི་སློབ་སྟོན་ཁས་ལེན་མ་བྱས་པ་དང་ངའི་བཀའ་ལའང་ཉན་མེད་དོ།

²⁰ དེ་ཚོས་ཤེ་བྷ་ནས་འཁྱེར་ཡོང་བའི་བདུག་སྤོས་དང་ཡང་ན་ཐག་རིང་ཡུལ་ནས་འཁྱེར་ཡོང་བའི་སྨན་སྣར་ང་མི་དགའོ། ངས་དེ་ཚོའི་འབུལ་བ་མི་ལེན་པ་དང་དེ་ཚོའི་དམར་མཆོད་མཉེས་པར་མི་བྱེད་དོ།

²¹ དེ་བརྟེན་ངས་མི་མང་འདི་ཚོ་རྡབ་པ་དང་འགྱེལ་བཅུག་རྒྱུ་ཡིན། ཕ་མ་ཚོ་དང་ཕྲུ་གུ་ཚོ་དང་གྲོགས་པོ་ཚོ་དང་ཁྱིམ་མཚེས་རྣམས་ཀྱང་ཤི་བར་འགྱུར་རོ༎

བྱང་ནས་བཙན་འཛུལ།

²² གཙོ་བོ་དཀོན་མཆོག་གིས་བཀའ་གནང་བ། བྱང་གི་ཡུལ་ནས་མི་མང་ཡོང་བཞིན་འདུག། ཐག་རིང་ཡུལ་གྱི་སྟོབས་ཆེན་མི་རིགས་ཞིག་གིས་དམག་གི་གྲ་སྒྲིགས་བྱེད་བཞིན་འདུག་གོ

²³ དེ་ཚོས་གཞུ་དང་རལ་གྲི་ཐོག་ཡོད་དོ། དེ་རྣམས་སྡུག་རྩུབ་ཅན་དང་སྙིང་རྗེ་མེད་མཁན་ཡིན་ནོ། དེ་ཚོའི་རྟ་བཞོན་སྐབས་རྒྱ་མཚོའི་ངར་སྐད་བཞིན་སྒྲ་སྒོགས་པར་བྱེད། དེ་ཚོ་ཡེ་རུ་ཤ་ལེམ་ཐོག་དམག་རྒྱབ་རྒྱུར་གྲ་སྒྲིགས་ཡོད་དོ།

²⁴ ཡེ་རུ་ཤ་ལེམ་གྱི་མི་མང་ཚོས་སྨྲས་པ། ང་ཚོས་གནས་ཚུལ་ཐོས་བྱུང་། ང་ཚོའི་ཡན་ལག་འཕྱར་ཞིང་ང་ཚོ་བུད་མེད་སྐྱེ་ཟུག་ཅན་ལྟར་སེམས་ནད་ཆེན་པོ་དང་ན་ཟུག་གིས་མནར་སོང།

²⁵ ང་ཚོ་གྲོང་གསེབ་གྱི་ཁུལ་དུ་འགྲོ་མི་ནུས་པ་མ་ཟད་རྒྱ་ལམ་སྟོང་དུ་བགྲོད་པར་མི་ནུས་སོ། གང་ལ་ཟེར་ན། ང་ཚོའི་དགྲ་བོ་རྣམས་གོ་མཚོན་ཐོག་ཡོད་པ་དང་ང་ཚོའི་མཐའ་འཁོར་ཡོངས་སུ་འཇིགས་སྐྲག་གིས་བསྐོར་ཡོད་དོ།

²⁶ གཙོ་བོ་དཀོན་མཆོག་གིས་ཁོང་གི་མི་མང་ལ་བཀའ་གནང་བ། རྩ་ཕད་ཀྱི་གོས་གྱོན་ལ་གོག་ཐལ་ནང་སྒྲིལ་ཞིག་དང་། ཁྱོད་ཀྱི་བུ་གཅིག་པུའི་ཆེད་མྱ་ངན་བྱེད་པ་ལྟར་མིག་ཆུ་དྲག་པོས་མྱ་ངན་བྱོས་ཤིག གང་ལ་ཟེར་ན། ཁྱོད་ཚོ་མེད་པར་བཟོ་བར་ཡོང་མཁན་དེས་གློ་བུར་དུ་ཁྱོད་ཚོར་འཐབ་པར་བྱེད་དོ།

²⁷ ཡེར་མི་ཡཱ་ཁྱོད་ཀྱིས་ལྕགས་རིགས་ཁག་རྟགས་དཔྱད་བྱེད་པ་ལྟར་ངའི་མི་མང་ལ་ཇི་ལྟར་ཡོད་ལུགས་རྟགས་དཔྱད་བྱོས་ཤིག

²⁸ དེ་ཚོ་ལི་དང་ལྕགས་མཁྲེགས་པོ་ལྟར་ཚང་མ་གྱོང་པོ་ངོ་ལོག་ཅན་ཡིན། དེ་ཚོ་ཚང་མ་ལྷད་ཅན་དཀྲོག་གཏམ་ཁྱབ་སྤེལ་བྱ་ཞིང་འགྲོ་མཁན་འབའ་ཞིག་ཡིན་ནོ།

²⁹ ཐབ་ཀྱི་མེ་དཔུང་རབ་ཏུ་འབར་ན་ཡང་ཕན་མེད་ལྕགས་རིགས་རྣམས་མི་བཞུ་བར་ཕྱིར་ལུད་པ་ལྟར། ངའི་མི་མང་རྣམས་དག་སྦྱངས་བྱ་རྒྱུ་དེ་ཕན་མེད་ཡིན། གང་ལ་ཟེར་ན། ངན་པ་རྣམ་ཕྱིར་འབུད་བྱས་མེད་དོ།

³⁰ དེ་ཚོ་ལ་ཕན་མེད་དངུལ་ཅེས་སྨྲ་བར་འགྱུར། གང་ལ་ཟེར་ན། ང་གཙོ་བོ་དཀོན་མཆོག་གིས་དེ་ཚོ་སྤངས་བ་ཡིན་ནོ༎