ཡེར་མི་ཡཱ 51 - Tibetan Old Testament 2011

ད་རུང་ཡང་བྷེ་བྷི་ལོ་ནི་ཡ་ལ་ཁྲིམས་གཅོད་གནང་བ།

¹ གཙོ་བོ་དཀོན་མཆོག་གིས་བཀའ་གནང་བ། ངས་བྷེ་བྷི་ལོ་ནི་ཡ་དང་དེའི་མི་མང་ལ་སྟོར་བཤིགས་ཀྱི་རླུང་འཚུབ་དྲག་པོ་ཞིག་འཁྱེར་ཡོང་བཞིན་ཡོད།

² སོག་མ་འཁྱེར་བའི་རླུང་འཚུབ་ལྟར་ངས་བྷེ་བྷི་ལོ་ནི་ཡ་མེད་པར་བཟོ་བར་ཕྱི་རྒྱལ་བ་རྣམས་གཏོང་རྒྱུ་ཡིན། སྟོར་བཤིགས་བྱ་རྒྱུའི་ཉིན་དེ་སླེབས་སྐབས་དེ་ཚོས་ཕྱོགས་ཐམས་ཅད་ནས་འཐབ་རྒོལ་བྱེད་ནས་ཡུལ་དེ་བཞིན་སྟོང་པར་འཇོག་པར་བྱེད་དོ།

³ དེ་ཚོའི་དམག་མི་ཚོ་ལ་མདའ་འཕེན་པ་དང་ཁྲབ་གྱོན་པའི་དུས་སྐབས་མ་སྤྲོད་ཅིག ན་གཞོན་ཚོ་ལ་ཚེ་ཐར་མ་གཏོང་ཞིག། དམག་དཔུང་ཡོངས་རྫོགས་མེད་པར་བཟོས་ཤིག།

⁴ དེ་ཚོ་རྨས་ནས་རང་གི་གྲོང་ཁྱེར་གྱི་རྒྱ་ལམ་གྱི་སྟེང་དུ་འཆི་བར་འགྱུར་རོ།

⁵ ང་གཙོ་བོ་དཀོན་མཆོག་མཐུ་སྟོབས་ཅན་གྱི་དཀོན་མཆོག་གིས་ཨིསི་རཱཨེལ་དང་ཡ་ཧུ་དཱ་པས་ང་ཨིསི་རཱཨེལ་གྱི་དམ་པ་མཆོག་གི་སྤྱན་སྔར་སྡིག་པ་གྱིས་ཡོད་ན་ཡང་ངས་དེ་ཚོ་ལ་སྤངས་མེད་དོ།

⁶ བྷེ་བྷི་ལོ་ནི་ཡ་ནས་བྲོས་ཤིག། ཁྱོད་ཚོའི་སྲོག་གི་ཆེད་དུ་བྲོས་ཤིག། བྷེ་བྷི་ལོ་ནི་ཡའི་སྡིག་པའི་རྐྱེན་གྱིས་ཁྱོད་ཚོ་འཆི་བར་མ་འགྱུར་ཞིག ངས་ད་ལྟ་དགྲ་ཤ་ལེན་རྒྱུ་དང་དེ་ཚོ་ལ་འོས་པའི་ཆད་པ་གཏོང་རྒྱུ་ཡིན་ནོ།

⁷ བྷེ་བྷི་ལོ་ནི་ཡ་ནི་ངའི་ལག་གི་གསེར་གྱི་ཕོར་པ་ལྟར་འཛམ་གླིང་ཡོངས་ལ་ར་བཟི་བཅུག་ཡོད། མི་རིགས་ཚོས་དེས་ལས་རྒུན་ཆང་འཐུང་ནས་སྨྱོན་པ་ཆགས་སོ།

⁸ བྷེ་བྷི་ལོ་ནི་ཡ་གློ་བུར་དུ་ལྷུང་ནས་མེད་པར་ཆགས་ཡོད། དེའི་ཆེད་དུ་མྱ་ངན་བྱོས་ཤིག། དེའི་རྨའི་ཆེད་དུ་སྨན་ལེན་ཞིག་དང་ཕལ་ཆེར་དེ་གསོད་པར་འགྱུར་སྲིད་དོ།

⁹ དེར་གནས་སྡོད་བྱེད་པའི་ཕྱི་རྒྱལ་བ་ཚོས་ང་ཚོས་བྷེ་བྷི་ལོ་ནི་ཡ་ལ་རོགས་བྱ་རྒྱུའི་ཐབས་ཤེས་བྱས་ཡོད་ན་ཡང་དེ་ཧ་ཅང་ཕྱིས་དྲག་འདུག ད་མོ་བཞག་ནས་ང་ཚོ་རང་གི་ཁྱིམ་དུ་ལོག་འགྲོ། དཀོན་མཆོག་གིས་བྷེ་བྷི་ལོ་ནི་ཡ་ལ་ཁོང་གི་ནུས་ཤུགས་ཡོངས་ཀྱིས་ཉེས་ཆད་བཏང་ནས་དེ་ཆ་ཚང་མེད་པར་བཟོས་གནང་ཡོད་ཅེས་བརྗོད་དོ།

¹⁰ གཙོ་བོ་དཀོན་མཆོག་གིས་ངའི་མི་མང་ཚོས་སྐད་རྒྱབ་ནས་ང་ཚོ་དྲང་བདེན་ཡིན་པ་སྟོན་གནང་སོང་། ང་ཚོས་ཡེ་རུ་ཤ་ལེམ་གྱི་མི་མང་ཚོར་གཙོ་བོ་དཀོན་མཆོག་ང་ཚོའི་དཀོན་མཆོག་གིས་ཇི་ལྟར་མཛད་པ་ཤོད་དུ་འགྲོ་ཅེས་སྐད་རྒྱོབ་ཀྱི་འདུག་ཅེས་བཀའ་གནང་ངོ་།

¹¹ གཙོ་བོ་དཀོན་མཆོག་གིས་མ་དཱའི་རྒྱལ་པོ་ཚོར་རྒྱུད་བསྐུལ་མཛད་ཡོད། གང་ལ་ཟེར་ན། ཁོང་གིས་བྷེ་བྷི་ལོ་ནི་ཡ་ལ་མེད་པར་མཛད་རྒྱུའི་དགོངས་འཆར་ཡོད། དེ་ལྟར་ཁོང་གིས་མཆོད་ཁང་བཤིགས་པའི་དགྲ་ཤ་ལེན་པར་མཛད་རྒྱུ་ཡིན་ནོ། བཙོན་རྒོལ་མཁན་གྱི་འགོ་འཛིན་ཚོས་འདི་ལྟར་བཀའ་གཏོང་བར་བྱེད། ཁྱོད་ཚོའི་མདའ་ཚོར་རྣོ་བཏོན་ཞིག། ཁྱོད་ཚོའི་ཕུབ་གྲ་སྒྲིགས་བྱོས་ཤིག།

¹² བྷེ་བྷི་ལོན་གྱི་ལྕགས་རི་ཚོར་འཐབ་པའི་བརྡ་བཏོང་ཞིག། སྲུང་ཆ་ཤུགས་ཆེ་རུ་གཏོང་ཞིག། སྒོ་སྲུང་བ་འཇོག་ཅིག། འཇབ་དམག་རྣམས་འཇོག་ཅིག་ཅེས་སོ། གཙོ་བོ་དཀོན་མཆོག་གིས་བྷེ་བྷི་ལོ་ནི་ཡ་པའི་མི་མང་ཚོར་ཇི་ལྟར་མཛད་རྒྱུ་བཀའ་གནང་བ་ལྟར་མཛད་ཡོད།

¹³ ཡུལ་དེར་རྒྱུགས་ཆུ་མང་པོ་དང་གཏེར་གྱི་ནོར་མང་པོ་ཡོད་ན་ཡང་དུས་ཚོད་དེ་རྫོགས་ཡོད་པ་དང་མི་ཚེའི་ཐག་པ་དེ་བཅད་ཡོད་དོ།

¹⁴ མཐུ་སྟོབས་ཅན་གྱི་གཙོ་བོ་དཀོན་མཆོག་སྐུ་ཉིད་ཀྱིས་ཆ་ག་འབུའི་ཁྱུ་ཚོགས་ལྟར་བྷེ་བྷི་ལོ་ནི་ཡ་ལ་འཐབ་མཁན་མི་རྣམས་གཏོང་བ་གནང་རྒྱུའི་དབུ་མནའ་བཞེས་པ་དང་། དེ་ཚོའི་རྒྱལ་ཁའི་སྐད་འབོད་བྱེད་པར་འགྱུར་རོ༎

དཀོན་མཆོག་ལ་བསྟོད་པའི་མགུར་མ།

¹⁵ གཙོ་བོ་དཀོན་མཆོག་གི་མཐུ་སྟོབས་ཀྱིས་ས་གཞི་བཀོད། ཁོང་གི་ཤེས་རབ་ཀྱིས་འཛམ་གླིང་བསྐྲུན་བ་དང། ཁོང་གིས་ནམ་མཁའ་བཀྲམ་པར་མཛད།

¹⁶ ཁོང་གི་བཀའ་ཡིས་ནམ་མཁར་ཆུ་སྒྲ་སྒྲོགས། ས་གཞིའི་མཐའ་ནས་སྤྲིན་པ་འདྲེན་པར་མཛད། ཁོང་གིས་ཆར་པར་གནམ་གློག་འཁྱུག་པར་མཛད། ཁོང་གི་མཛོད་ཁང་ནང་ནས་རླུང་འཚུབ་གཏོང་བར་མཛད།

¹⁷ མཐོང་སྣང་འདི་བྱུང་བས་མི་ཚོ་གླེན་པ་དང་ནི་བསམ་མེད་འཚོར་རོ། སྐུ་འདྲ་བཟོ་མཁན་ཚོ་སེམས་འཁྲུལ་ཡོང་། གང་ལ་ཟེར་ན། དེ་ཚོས་བཟོས་པས་ལྷ་ཚོ་རྫུན་མ་དང་སྲོག་མེད་ཡིན།

¹⁸ དེ་རྣམས་ཕན་མེད་ཡིན་པས་འཕྱས་དགོས་སོ། གཙོ་བོ་དཀོན་མཆོག་དེ་ཚོར་འབྲེལ་བའི་ཆེད། ཕེབས་སྐབས་ཁོང་གིས་དེ་ཚོ་མེད་པར་བཟོ་མཛད།

¹⁹ ཡ་ཀོབ་དཀོན་མཆོག་དེ་ཚོ་ནང་བཞིན་མེད། ཁོང་ནི་ཐམས་ཅད་བཟོ་བ་གནང་མཁན་ཡིན་ནོ། དཀོན་མཆོག་ཁོང་གིས་ཨིསི་རཱཨེལ་པ་རྣམས་ལ། རང་གི་མི་མང་ཆེད་དུ་འདམས་པར་མཛད། ཁོང་མཚན་མཐུ་སྟོབས་གཙོ་བོ་དཀོན་མཆོག་ཡིན༎

གཙོ་བོ་དཀོན་མཆོག་གི་ཐོ་བ།

²⁰ གཙོ་བོ་དཀོན་མཆོག་ཁོང་གིས་བཀའ་གནང་བ། བྷེ་བྷི་ལོ་ནི་ཡ་ཁྱོད་ངའི་ཐོ་བ་ཡིན། ངའི་དམག་གི་མཚོན་ཆ་ཡིན། ང་ཡིས་མི་རིགས་དང་ནི་རྒྱལ་ཁབ་ཚོར། མར་ལ་བསྣན་རྒྱུར་ཁྱོད་ལ་བེད་སྤྱོད་བྱེད།

²¹ རྟ་དང་ཞོན་མཁན་བསིལ་བུར་གཏོང་རྒྱུ་དང་། ཤིང་རྟ་འཁོར་ལོ་དང་ནི་དེའི་ཁ་ལོ་ཕར། བསིལ་བུ་སྟོར་བར་བྱ་བའི་ཆེད་དུ་དང་།

²² སྐྱེས་པ་དང་ནི་བུད་མེད་གསོད་པའི་ཆེད། རྒས་ཁོག་དང་ནི་ན་གཞོན་གསོད་པའི་ཆེད། བུ་དང་བུ་མོ་རྣམས་ཚོ་གསོད་པའི་ཆེད།

²³ ལུག་རྫི་དང་ནི་ལུག་ཁྱུ་གསོད་ཆེད་དང་། ས་ཞིང་རྨོ་མཁན་དང་ནི་དེ་ཚོའི་རྟ་རྣམས་གསོད་ཆེད། རྒྱལ་པོ་ཚོ་དང་ལས་བྱེད་པ་ཐོ་པོ་ཚོ། བཅས་ལ་བསྣན་ཆེད་བེད་སྤྱོད་བྱེད་ཀྱི་ཡོད༎

བྷེ་བྷི་ལོ་ནི་ཡའི་ཉེས་ཆད།

²⁴ གཙོ་བོ་དཀོནམཆོག་གིས་བཀའ་གནང་བ། ངས་བྷེ་བྷི་ལོ་ནི་ཡ་དང་དེའི་མི་མང་ཚོས་ཡེ་རུ་ཤ་ལེམ་ལ་ངན་པ་གྱིས་པ་ཚང་མའི་ངན་ལན་འཇལ་བ་ཁྱོད་ཚོས་མཐོང་བར་འགྱུར་རོ།

²⁵ བྷེ་བྷི་ལོ་ནི་ཡ་ཁྱོད་འཛམ་གླིང་ཡོངས་མེད་པར་བཟོ་མཁན་རི་དང་འདྲའོ། འོན་ཀྱང་ང་གཙོ་བོ་དཀོན་མཆོག་ཁྱོད་ཀྱི་དགྲ་བོ་ཡིན། ངས་ཁྱོད་བཟུང་ནས་ཐང་ལྟར་སྙོམས་ནས་ཁྱོད་གོ་ཐལ་དུ་འཇོག་རྒྱུ་ཡིན་ནོ།

²⁶ ཁྱོད་ཀྱི་གྱང་ཤུལ་གྱི་རྡོ་གཅིག་ཀྱང་སླར་ཁང་པ་བཟོ་རྒྱུར་བེད་སྤྱོད་མི་བྱེད་དོ། ཁྱོད་གཏན་གྱི་ཆེད་བྱེ་ཐང་དང་འདྲ་བར་འགྱུར་རོ་ཞེས་ང་གཙོ་བོ་དཀོན་མཆོག་གིས་སྨྲས་པ་ཡིན་ནོ།

²⁷ ཕར་རྒོལ་བྱེད་པའི་བརྡ་གཏོང་ཞིག། མི་རིགས་ཚོས་ཐོས་པའི་ཆེད་དུང་ཆེན་འབུད་ཅིག། བྷེ་བྷི་ལོ་ནི་ཡ་ལ་དམག་འཐབ་ཆེད་དུ་མི་རིགས་ཚོ་གྲ་སྒྲིགས་བྱོས་ཤིག ཨ་ར་རད་དང་མིན་ནི་དང་ཨཤ་ཀེ་ནཛ་ཀྱི་རྒྱལ་ཁབ་ཚོར་ཕར་རྒོལ་བྱོས་ཤིག་སྨྲོས་ཤིག དེ་ལ་འཐབ་རྒོལ་བྱེད་ཆེད་དམག་དཔོན་ཞིག་བསྐོས་ཤིག། ཆ་ག་འབུའི་ཁྱུ་ཚོགས་ལྟར་རྟ་རྣམས་འཁྲིད་ཤོག

²⁸ བྷེ་བྷི་ལོ་ནི་ཡ་ལ་དམག་འཐབ་ཆེད་མི་རིགས་ཚོ་གྲ་སྒྲིགས་བྱོས་ཤིག མ་དཱའི་རྒྱལ་པོ་ཚོ་དང་དེ་ཚོའི་འགོ་འཁྲིད་ཚོ་དང་ལས་བྱེད་པ་ཚོ་དང་དེ་ཚོས་དབང་བསྒྱུར་བྱས་པའི་ཡུལ་ཚང་མའི་དམག་མི་བོས་པར་གཏོང་ཞིག

²⁹ གཙོ་བོ་དཀོན་མཆོག་གིས་བྷེ་བྷི་ལོ་ནི་ཡ་དེ་བཞིན་སུ་ཡང་མི་སྡོད་པའི་མི་མེད་ལུང་སྟོང་གི་ས་གནས་བཟོ་བའི་ཁོང་གི་འཆར་གཞི་དེ་ཕྱག་ལེན་འགེལ་གྱི་ཡོད་སྟབས་ས་གཞི་འདར་ཞིང་འགུལ་བར་འགྱུར་རོ།

³⁰ བྷེ་བྷི་ལོན་པའི་དམག་མི་ཚོ་དམག་མཚམས་འཇོག་པ་དང་དེ་ཚོ་མཁར་རྫོང་དུ་གནས་སོ། དེ་ཚོ་རང་གི་བློ་སྟོབས་རླག་ནས་བུད་མེད་ལྟར་འགྱུར་རོ། གྲོང་ཁྱེར་གྱི་རྒྱལ་སྒོ་ཁག་མར་གཞིགས་པ་དང་ཁང་པ་ཚོ་མེས་འཚིགས་སོ།

³¹ བྷེ་བྷི་ལོ་ནི་ཡའི་རྒྱལ་པོར་གྲོང་ཁྱེར་དེ་བཞིན་ཕྱོགས་ཚང་མ་ནས་གཞིགས་འདུག་ཞུ་བར་བང་ཆེན་གཅིག་འཇུག་གཉིས་འཇུག་རྒྱུགས་སོ།

³² དགྲ་བོ་ཚོས་ཆུ་བོ་རྒལ་ཡུལ་བཙན་བཟུང་བྱས་ནས་འཛིངས་རག་ཚོ་མེར་སྲེག་གོ བྷེ་བྷི་ལོན་པའི་དམག་མི་ཚོར་འཇིགས་སྣང་སྐྱེས་སོ།

³³ མགྱོགས་པོར་དགྲ་བོ་ཚོས་དེ་ཚོར་མར་གཅོད་པ་དང་། འབྲུ་བརྡུང་སར་འབྲུ་ལྟར་དེ་ཚོར་རྡོག་རྫི་གཏོང་བར་འགྱུར། ང་ཀུན་དབང་ལྡན་པའི་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་སྨྲས་པ་ཡིན་ནོ།

³⁴ བྷེ་བྷི་ལོ་ནི་ཡ་རྒྱལ་པོས་ཡེ་རུ་ཤ་ལེམ་ལ། གཏུབ་ནས་བཟའ་བ་ཡིན། བུམ་པ་ལྟ་བུ་གྲོང་ཁྱེར་སྟོང་པ་བཟོས། སྦྲུལ་གྱི་མིག་པ་ལྟ་བུ་ཁོ་ཡིས་མིག། ཁོ་ཡིས་རང་འདོད་པ་ཚུར་བླངས་ནས། དེ་འཕྲོས་རྣམས་ཁོས་ཕྱིར་དུ་དབྱུགས་པ་ཡིན།

³⁵ ཛི་ཡོན་མི་ཚོས་འདི་ལྟར་བརྗོད་དུ་འཇུག། ང་ཚོའི་ཐོག་ཏུ་དྲག་ལས་ཇི་བྱས་པར། དེ་ཡི་འགན་འཁྲིད་བྷེ་བྷི་ལོ་ནི་ཡ་ལ་ཡོང་། ཡེ་རུ་ཤ་ལེམ་མི་ཚོས་འདི་བརྗོད་འཇུག། ང་ཚོས་སྡུག་བསྔལ་ཇི་ཞིག་མྱོང་དགོས་བྱུང་། དེ་ཡི་འགན་འཁྲིད་བྷེ་བྷི་ལོ་ནི་ཡ་ལ་ཡོང་བར་ཤོག།

གཙོ་བོ་དཀོན་མཆོག་གིས་ཨིསི་རཱཨེལ་རོགས་གནང་རྒྱུ།

³⁶ དེར་བརྟེན་གཙོ་བོ་དཀོན་མཆོག་གིས་ཡེ་རུ་ཤ་ལེམ་གྱི་མི་མང་ཚོར་འདི་ལྟར་བཀའ་གནང་ང་། ངས་ཁྱོད་ཀྱི་དོན་དུ་ཁྱོད་ཀྱི་དགྲ་བོ་ཚོས་ཁྱོད་ལ་ཇི་ལྟར་བྱས་པར་ལན་འཇལ་དུ་འཇུག་རྒྱུ་ཡིན། ངས་བྷེ་བྷི་ལོ་ནི་ཡའི་ཆུའི་འབྱུང་ཁུངས་སྐམ་པར་བྱས་ནས་དེའི་རྒྱུགས་ཆུ་ཚོ་སྐམ་འཇུག་རྒྱུ་ཡིན།

³⁷ གྲོང་ཁྱེར་དེ་བཞིན་གྱང་གོག་གི་ཕུང་པོ་གཅན་གཟན་གནས་སྡོད་བྱེད་ཡུལ་དུ་འགྱུར། དེ་ནི་འཇིགས་སུ་རུང་བའི་མཐོང་ཡུལ་དུ་འགྱུར་བ་དང་དེར་སུ་ཡང་གནས་སྡོད་མི་བྱེད་པ་མ་ཟད། དེ་མཐོང་མཁན་རྣམས་འཇིགས་སྐྲག་སྐྱེས་པར་འགྱུར་རོ།

³⁸ བྷེ་བྷི་ལོ་ནི་ཡ་པ་ཚང་མ་སེང་གེ་དང་སེང་ཕྲུག་ལྟར་ངར་སྐད་འདོན་པར་བྱེད་དོ།

³⁹ དེ་ཚོ་འདོད་རྔམ་ཅན་ཡིན་ནམ། ངས་དེ་ཚོ་ལ་ཐུགས་སྤྲོ་ཞིག་བཤམས་ནས་དེ་ཚོ་ར་བཟི་བ་དང་དགའ་སྐྱིད་བཟོ་རྒྱུ་ཡིན། དེ་ཚོ་ཉལ་དུ་ཕྱིན་ནས་ནམ་ཡང་གཉིད་སད་པར་མི་འགྱུར།

⁴⁰ ངས་དེ་ཚོ་ལུག་དང་ར་དང་ར་ཕོ་ལྟར་གསོད་དུ་འཁྲིད་རྒྱུ་ཡིན་ཞེས་ང་གཙོ་བོ་དཀོན་མཆོག་གིས་སྨྲས་པ་ཡིན་ནོ༎

བྷེ་བྷི་ལོན་གྱི་ལས།

⁴¹ གཙོ་བོ་དཀོན་མཆོག་གིས་བྷེ་བྷི་ལོན་གྱི་སྐོར་ལ་འདི་ལྟར་བཀའ་གནང་ངོ་། འཛམ་གླིང་ཡོངས་ཀྱི་བསྟོད་པའི་གྲོང་ཁྱེར་དེ་དབང་བཟུང་བྱས་ཡོད། བྷེ་བྷི་ལོན་དེ་བཞིན་མི་རིགས་ཚོ་ལ་འཇིགས་སྐྲག་སྐྱེས་པའི་མཐོང་ཡུལ་ཇི་འདྲ་འགྱུར་རོ།

⁴² བྷེ་བྷི་ལོན་ཐོག་ཏུ་རྒྱ་མཚོ་རྒྱུགས་པ་དང་། ངར་སྒྲ་སྒྲོགས་པའི་རྦ་རླབས་ཀྱིས་དེ་ལ་བཀབ་བོ།

⁴³ གྲོང་ཁྱེར་ཚོ་འཇིགས་སུ་རུང་བའི་མཐོང་ཡུལ་དུ་འགྱུར་བ་དང་། དེར་སུ་ཡང་གནས་སྡོད་མི་བྱེད་པ་དང་ཕར་ཚུར་འགྲུལ་པ་ཙམ་མི་བྱེད་པའི་ཆུ་མེད་བྱེ་ཐང་ལྟ་བུར་འགྱུར་རོ།

⁴⁴ ངས་བྷེ་བྷི་ལོ་ནི་ཡའི་ལྷ་བྷེལ་ལ་ཆད་པ་གཏོང་རྒྱུ་ཡིན། ཁོས་རྐུས་ནས་འཁྱེར་བའི་དངོས་པོ་རྣམས་སྤོངས་སུ་འཇུག་རྒྱུ་དང་སླར་མི་རིགས་སུ་ཞིག་གིས་ཀྱང་ཁོ་ལ་མཆོད་པར་མི་བྱེད་དོ། བྷེ་བྷི་ལོན་གྱི་ལྕགས་རི་ཚོ་བཞིགས་པར་འགྱུར་ཡོད།

⁴⁵ ཨིསི་རཱཨེལ་གྱི་མི་མང་ཚོ་དེ་ནས་བྲོས་རྒྱུགས་ཤིག། ཁྱོད་ཚོའི་སྲོག་སྐྱོབས་པར་ངའི་ཁྲོ་བ་དྲག་པོ་ལས་བྲོས་ཤིག

⁴⁶ ཁྱོད་ཚོས་དཀྲོག་གཏམ་ཐོས་པའི་རྐྱེན་གྱིས་སེམས་ཤུགས་ཆགས་པ་དང་འཇིགས་སྣང་མ་བྱེད་ཅིག ཡུལ་དུ་དྲག་ལས་དང་རྒྱལ་པོ་གཅིག་གིས་གཞན་ལ་དམག་འཐབ་བྱེད་པའི་དཀྲོག་གཏམ་ལོ་རེ་བཞིན་མི་འདྲ་བ་ཞིག་ཁྱབ་པར་བྱེད་དོ།

⁴⁷ ངས་བྷེ་བྷི་ལོ་ནི་ཡའི་སྐུ་འདྲ་ཚོར་འབྲེལ་བྱེད་པའི་དུས་ཚོད་སླེབས་བཞིན་ཡོད། ཡུལ་ཡོངས་རྫོགས་ངོ་ཚ་རུ་འཇུག་པ་དང་དེའི་མི་མང་རྣམས་གསོད་པར་བྱེད་དོ།

⁴⁸ བྱང་ནས་མེད་པར་བཟོ་བར་ཡོང་མཁན་ཚོའི་ལག་ཏུ་བྷེ་བྷི་ལོ་ནི་ཡ་ཤོར་བའི་དུས་སྐབས་ལ་ས་གཞི་དང་ནམ་མཁར་ཡོད་པ་ཚང་མས་དགའ་བའི་སྐད་འབོད་བྱེད་དོ།

⁴⁹ འཛམ་གླིང་ཡོངས་སུ་བྷེ་བྷི་ལོ་ནི་ཡའི་མི་མང་པོ་འཆི་རུ་འཇུག་ཡོད་པ་དང་། ད་ཆ་བྷེ་བྷི་ལོ་ནི་ཡ་དེ་བཞིན་འཕམ་རྒྱུ་ཡིན། གང་ལ་ཟེར་ན། དེས་ཨིསི་རཱཨེལ་པ་ཧ་ཅང་མང་པོ་འཆི་རུ་འཇུག་ཡོད་ཅེས་ང་གཙོ་བོ་དཀོན་མཆོག་གིས་སྨྲས་པ་ཡིན་ནོ༎

བྷེ་བྷི་ལོ་ནི་ཡ་དུ་ཨིསི་རཱཨེལ་པ་ཚོ་ལ་དཀོན་མཆོག་གི་གསུང་འཕྲིན།

⁵⁰ གཙོ་བོ་དཀོན་མཆོག་གིས་བྷེ་བྷི་ལོ་ནི་ཡ་དུ་ཁོང་གི་མི་མང་ལ་བཀའ་གནང་བ། ཁྱོད་ཚོ་འཆི་བ་ལས་ཐར་ཡོད། ད་མ་སྒུག་པར་སོང་ཞིག། ཁྱོད་ཚོ་རང་ཁྱིམ་ནས་ཐག་རིང་ཡོད་ན་ཡང་ཁྱོད་ཚོའི་གཙོ་བོ་དཀོན་མཆོག་བསམ་པ་དང་ཡེ་རུ་ཤ་ལེམ་ལ་དྲན་ཞིག

⁵¹ ཁྱོད་ཚོས་ང་ཚོར་དམའ་འབེབས་བྱུང་ཞིང་ངོ་ཚ་རུ་འཇུག་ཡོད། ང་ཚོར་རྩ་བ་ནས་མགོན་སྐྱབས་མེད་པ་ལྟ་བུ་འཚོར་བཞིན་འདུག། གང་ལ་ཟེར་ན། ཕྱི་རྒྱལ་བ་ཚོས་མཆོད་ཁང་ནང་གི་གནས་དམ་པ་རྣམས་དབང་བཟུང་བྱས་ཡོད་ཅེས་སྨྲའོ།

⁵² དེར་བརྟེན་ངས་བྷེ་བྷི་ལོན་གྱི་སྐུ་འདྲ་ཚོར་འབྲེལ་བ་བྱེད་པའི་དུས་སྐབས་སླེབས་བཞིན་ཡོད་པ་དང་། རྨས་པ་ཚོས་ཡུལ་ཡོངས་སུ་ཟུག་སྐད་དྲག་པོ་འདོན་པར་བྱེད་ཅེས་ངས་སྨྲས་ཡོད།

⁵³ བྷེ་བྷི་ལོན་གྱིས་ནམ་མཁར་འཛེགས་ནས་དེར་མཁར་རྫོང་བརྟན་པོ་ཞིག་བཞེངས་ཐུབ་ན་ཡང་། ངས་དེ་ཚོ་མེད་པར་བཟོ་རྒྱུར་མི་རྣམས་གཏོང་རྒྱུ་ཡིན་ཞེས་ང་གཙོ་བོ་དཀོནམཆོག་གིས་སྨྲས་པ་ཡིན་ནོ༎

ད་དུང་བྷེ་བྷི་ལོན་ལ་སྟོར་བཤིགས་བཏང་བ།

⁵⁴ གཙོ་བོ་དཀོན་མཆོག་ཁོང་གིས་བཀའ་གནང་བ། བྷེ་བྷི་ལོན་ངུ་སྐད་དང་ནི་སྟོར་བཤིགས་གྱིས། ཡུལ་གྱི་ཆེད་དུ་མྱ་ངན་བྱེད་པར་ཉོན།

⁵⁵ ང་ཡིས་བྷེ་བྷི་ལོན་མེད་པར་བཟོ་རྒྱུ་ཡིན། དེ་ནི་ཁ་ཁུ་སིམ་པོར་འཇོག་རྒྱུ་ཡིན། རྦ་རླབས་འུར་སྒྲ་ལྟ་བུར་དམག་དཔུང་རྒྱུགས་ནས་ཡོང་། དེ་ཚོས་ཀུ་ཅོའི་སྐད་འབོད་མཉམ་འཐབ་བོ།

⁵⁶ དེ་རྣམས་བྷེ་བྷི་ལོན་མེད་པར་བཟོ་བར་ཡོང་། དེ་ཡི་དམག་མི་རྣམས་ནི་འཛིན་བཟུང་བྱས། དེ་ཚོའི་གཞུ་རྣམས་བཅག་ནས་ཡོད་པ་ཡིན། ངན་པར་ཆད་པ་གཏོང་མཁན་དཀོན་མཆོག་ང་། བྷེ་བྷི་ལོན་རང་གི་གྱིས་པའི་ལས་ངན་ལ། ང་ཡིས་དགོས་ངེས་ཉེས་ཆད་གཏོང་བར་བྱ།

⁵⁷ རྒྱལ་པོ་ཚོ་དང་ཤེས་རབ་ཅན་གྱི་མི། འགོ་འཛིན་དང་ནི་དམག་མི་ར་བཟི་རུ་འཇུག། དེ་རྣམས་གཉིད་ཁུག་གཉིད་ལས་སད་མི་འགྱུར། རྒྱལ་པོ་ང་ཡིས་དེ་ལྟར་བརྗོད་པ་ཡིན། མཐུ་སྟོབས་ལྡན་པའི་གཙོ་བོ་དཀོན་མཆོག་ཡིན།

⁵⁸ སྟོབས་ཅན་བྷེ་བྷི་ལོན་ལྕགས་རི་སར་རུ་རློག། དེ་ཡི་རྒྱལ་སྒོ་མཐོ་པོ་མེར་སྲེག་འགྱུར། མི་རིགས་ལས་དོན་འབྲས་བུ་གང་ཡང་མེད། དེ་ཚོའི་འབད་བརྩོན་རྣམས་ནི་མེ་ལྕེ་འབར། ཀུན་དབང་ལྡན་པའི་གཙོ་བོ་དཀོན་མཆོག་ང་ཡིས་སྨྲས༎

ཡེར་མི་ཡཱའི་འཕྲིན་བྷེ་བྷི་ལོ་ནི་ཡ་ལ་བཏང་བ།

⁵⁹ རྒྱལ་པོ་ཛེ་དེ་ཀི་ཡཱའི་སྐུ་སྒེར་གྱི་སྐུ་བཅར་བ་སེ་ར་ཡཱ་ཞུ་བ་ནེ་རི་ཡཱའི་སྲས་དང་མ་ཡ་སེ་ཡའི་ཚ་བོ་དེ་ཡིན་ནོ། ཛེ་དེ་ཀི་ཡཱ་ཡ་ཧུ་དཱའི་རྒྱལ་པོ་གནང་བའི་ལོ་བཞི་པར་སེ་ར་ཡཱ་ཁོང་མཉམ་བྷེ་བྷི་ལོ་ནི་ཡ་དུ་འགྲོ་བཞིན་པ་དང་། ངས་ཁོ་ལ་སློབ་སྟོན་ཕྲན་བུ་སྤྲད་པ་ཡིན།

⁶⁰ ངས་དེབ་ཞིག་ནང་བྷེ་བྷི་ལོ་ནི་ཡ་སྟོར་བཤིགས་ཡོང་རྒྱུ་ཚང་མ་དང་། བྷེ་བྷི་ལོ་ནི་ཡའི་སྐོར་གཞན་འདི་ཚོ་ཚང་མའི་ལོ་རྒྱུས་རྣམས་བྲིས་ཡོད་དོ།

⁶¹ ངས་སེ་ར་ཡཱ་ལ་འདི་ལྟར་སྨྲས་པ། ཁྱོད་རང་བྷེ་བྷི་ལོན་དུ་འབྱོར་སྐབས་འདིར་བྲིས་པ་རྣམས་ཆ་ཚང་མི་མང་ལ་སྐད་ཆེན་པོས་ངས་པར་དུ་ཀློག་པར་བྱོས་ཤིག

⁶² དེ་ནས་དེ་ལྟར་སྨོན་འདེབས་བྱེད་དགོས། གཙོ་བོ་དཀོན་མཆོག་ཁྱེད་ཀྱིས་ཡུལ་འདིར་འཚོ་བཞིན་པའི་སྲོག་ཆགས་མི་དང་སེམས་ཅན་བཅས་པ་གང་ཡང་མི་ཡོང་བའི་ཕྱིར་མེད་པར་བཟོ་གནང་རྒྱུ་དང་། དེ་ནི་གཏན་གྱི་ཆེད་བྱེ་ཐང་ལྟ་བུ་ཞིག་ཏུ་འགྱུར་རྒྱུ་ཡིན།

⁶³ སེ་ར་ཡཱ་ཁྱོད་ཀྱིས་དེབ་འདི་མི་མང་ལ་ཀློག་ཟིན་པ་དང་དེ་རྡོ་ཞིག་ལ་བཏགས་ནས་གཙང་པོ་ཡུབ་རད་དུ་དབྱུགས་ནས།

⁶⁴ དེ་ལྟར་སྨྲོས་ཤིག། བྷེ་བྷི་ལོ་ནི་ཡ་ལ་དེ་ལྟར་ཡོང་རྒྱུ་ཡིན། གཙོ་བོ་དཀོན་མཆོག་གིས་དེའི་སྟེང་དུ་སྟོར་བཤིགས་གནང་རྒྱུ་ཡིན་པའི་རྐྱེན་གྱིས་དེ་ནུབ་པར་འགྱུར་བ་དང་དེ་ནམ་ཡང་ལངས་མི་ཐུབ། ཡེར་མི་ཡཱའི་གསུང་འདིར་རྫོགས་པ་ཡིན་ནོ༎