ཡེར་མི་ཡཱ 50 - Tibetan Old Testament 2011

བྷེ་བྷི་ལོན་ལ་དབང་བཟུང་བྱེད་པ།

¹ གཙོ་བོ་དཀོན་མཆོག་གིས་ང་ལ་བྷེ་བྷི་ལོན་གྱི་གྲོང་ཁྱེར་དང་དེའི་མི་མང་སྐོར་གསུང་འཕྲིན་གནང་བ་འདི་ལྟར་ཡིན་ནོ།

² མི་རིགས་ཚོ་ལ་གསར་འགྱུར་དེ་སྨྲོས་ཤིག། གསལ་སྒྲགས་བྱོས་ཤིག། བརྡ་ཞིག་བཏང་ནས་གསར་འགྱུར་གསལ་སྒྲགས་བྱོས། དེ་ཚོ་ཁྱོད་ཀྱིས་གསང་བར་མ་འཇོག་ཅིག། བྷེ་བྷི་ལོ་ནི་ཡ་འཕམ་པར་འགྱུར་ཞིང་དེ་ཡི་ལྷ། མར་དུག་དེ་བཞིན་བསིལ་བུར་འཐོར་ཡོད། བྷེ་བྷི་ལོ་ནི་ཡའི་ནི་སྐུ་འདྲ་ངོ་ཚར་འཇུག་ཡོད། དེའི་སྐྱུག་བྲོའི་འདྲ་སྐུ་རྫིས་ཡོད་དོ།

³ བྱང་ནས་མི་རིགས་ཞིག་བྷེ་བྷི་ལོ་ནི་ཡ་དུ་འཐབ་པར་ཡོང་ནས་དེས་ལུང་སྟོང་བཟོ་བར་འགྱུར། མི་དང་སེམས་ཅན་བྲོས་ནས་དེར་སུ་ཡང་མི་གནས་བར་འགྱུར༎

ཨིསི་རཱཨེལ་ཕྱིར་ལོག་པ།

⁴ གཙོ་བོ་དཀོན་མཆོག་གིས་བཀའ་གནང་བ། དུས་ཚོད་དེ་སླེབས་སྐབས། ཨིསི་རཱཨེལ་དང་ཡ་ཧུ་དཱ་གཉིས་ཀ་ངུ་ཞིང་ང་དེ་ཚོའི་དཀོན་མཆོག་འཚོལ་བཞིན་ཡོང་བར་འགྱུར།

⁵ དེ་ཚོས་ཛི་ཡོན་ལ་ལམ་འདྲི་ཞིང་དེ་ནས་དེའི་ཕྱོགས་སུ་འགྲོའོ། དེ་ཚོས་ང་མཉམ་དུ་གཏན་གྱི་དམ་བཅའ་ཞིག་བཞག་པ་དང་དེ་ནམ་ཡང་འགལ་མི་ཡོང་ངོ་།

⁶ ངའི་མི་མང་རྣམས་ལུག་རྫིས་རིའི་སྟེང་རླག་ཏུ་བཅུག་པའི་ལུག་ལྟར་ཡོད་པ་དང། དེ་ཚོ་རི་གཅིག་ནས་གཞན་དུ་འཁྱམ་འགྲོ་བ་དང་རང་གི་ཁྱིམ་གང་དུ་ཡོད་མེད་བརྗེད་ཡོད་དོ།

⁷ དེ་ཚོ་རྙེད་མཁན་ཚང་མས་དེ་ཚོ་ལ་འཐབ་པར་བྱེད་དོ། དེ་ཚོའི་དགྲ་བོ་ཚོས་ཁོ་ཚོས་གཙོ་བོ་དཀོན་མཆོག་གི་སྤྱན་སྔར་སྡིག་པ་གྱིས་ཡོད་སྟབས་ང་ཚོས་ཇི་ལྟར་གྱིས་པ་རྣམས་ནོར་འཁྲུལ་མིན། དེ་ཚོའི་ཕ་མེས་ཚོས་གཙོ་བོ་དཀོན་མཆོག་ལ་བློ་བཅོལ་ཞུས་ཡོད་པ་དང་དེ་ཚོ་རང་གི་ཁོང་ལ་དད་ལྡན་ངང་གནས་དགོས་ཅེས་བརྗོད་པར་བྱེད་དོ།

⁸ ཨིསི་རཱཨེལ་གྱི་མི་མང་ཚོ་བྷེ་བྷི་ལོ་ནི་ཡ་ནས་བྲོས་རྒྱུགས་ཤིག། ཡུལ་དེ་སྤོང་ཞིག། དེ་སྤངས་མཁན་དང་པོ་ཡིན་པ་བྱོས་ཤིག།

⁹ ངས་བྱང་གི་མི་རིགས་སྟོབས་ཤུགས་ཅན་ཚོ་ཁག་ཅིག་ལ་རྒྱུད་བསྐུལ་ནས་བྷེ་བྷི་ལོ་ནི་ཡ་ལ་འཐབ་ཏུ་འཇུག་རྒྱུ་ཡིན། དེ་ཚོས་ཡུལ་དེ་ཐོག་དམག་བརྒྱབ་པར་གྲལ་སྒྲིགས་ཀྱིས་དེ་དབང་བཟུང་བྱེད། དེ་ཚོ་རྩལ་དང་ལྡན་པའི་རྔོན་པ་འབའ་ཞིག་ཡིན་པ་དང་། དེ་ཚོའི་མདའ་རྣམས་འབེན་ནས་ནམ་ཡང་ཁྱོག་མི་ཡོང་།

¹⁰ བྷེ་བྷི་ལོ་ནི་ཡ་ནས་འཕྲོག་བཅོམ་བྱེད་པར་འགྱུར་བ་དང་། འཕྲོག་བཅོམ་བྱ་མཁན་ཚོས་རང་གི་འདོད་པ་གང་ཡོད་འཁྱེར་བར་འགྱུར་ཞེས། ང་གཙོ་བོ་དཀོན་མཆོག་གིས་སྨྲས་པ་ཡིན་ནོ༎

བྷེ་བྷི་ལོན་འཕམ་པ།

¹¹ གཙོ་བོ་དཀོན་མཆོག་གིས་བཀའ་གནང་བ། བྷེ་བྷི་ལོན་གྱི་མི་མང་ཁྱོད་ཚོས་ངའི་མི་རིགས་བཅོམ་ཡོད། ཁྱོད་ཚོ་བ་ཕྱུགས་ཀྱིས་འབྲུ་ཕྱུགས་ཆག་བསྐོར་བའམ་འཚེར་སྐད་འདོན་མཁན་གྱི་རྟ་ལྟར་དགའ་མགུ་ཞིང་རྒྱུགས་བཞིན་ཡོད།

¹² འོན་ཀྱང་ཁྱོད་ཚོ་རང་ཉིད་ཀྱི་གྲོང་ཁྱེར་རླབས་ཆེན་དེར་དམའ་འབེབས་དང་ངོ་ཚ་རུ་འཇུག་པར་བྱའོ། བྷེ་བྷི་ལོ་ནི་ཡ་དེ་བཞིན་མི་རིགས་སྣང་ཆུང་ཤོས་སུ་འགྱུར་བ་དང་། དེ་ཡུལ་སྐམ་པོ་ཆུ་མེད་ལུང་སྟོང་ཏུ་འགྱུར་བར་བྱེད་དོ།

¹³ གང་ལ་ཟེར་ན། ང་ཁྲོ་བའི་རྐྱེན་གྱིས་བྷེ་བྷི་ལོ་ནི་ཡ་དུ་སུ་ཡང་སྡོད་པར་མི་བྱེད། དེ་གྱང་གོག་ཞིག་ཏུ་ལྷག་པར་འགྱུར་བ་དང་། དེ་བརྒྱུད་ནས་འགྲོ་མཁན་རྣམས་ཧང་སང་བ་དང་ཧོན་ཐོར་བར་འགྱུར་རོ།

¹⁴ མདའ་པ་ཚོ་བྷེ་བྷི་ལོན་ལ་དམག་འཐབ་པའི་ཆེད་གྲལ་སྒྲིགས་ནས་དེའི་མཐའ་ལ་བསྐོར་ཞིག། ཁྱོད་ཚོའི་མདའ་རྣམས་བྷེ་བྷི་ལོན་ཐོག་འཕེན་ཞིག། གང་ལ་ཟེར་ན། དེ་ཚོས་ང་གཙོ་བོ་དཀོན་མཆོག་གི་སྤྱན་སྔར་སྡིག་པ་གྱིས་ཡོད།

¹⁵ གྲོང་ཁྱེར་དེའི་མཐའ་འཁོར་ཡོངས་སུ་དམག་སྒྲ་སྒྲོགས་ཤིག། ད་ཆ་བྷེ་བྷི་ལོན་གྱིས་མགོ་བཏག་ཞུས་ཡོད། དེའི་ལྕགས་རི་ཚོ་འཐོར་ནས་གཞིགས་ཡོད། ངས་བྷེ་བྷི་ལོ་ནི་ཡ་པ་ཚོར་དགྲ་ཤ་ལེན་རྒྱུ་ཡིན། དེར་བརྟེན་ཁྱོད་ཚོས་དེ་ཚོར་དགྲ་ཤ་ལེན་ནས་དེ་ཚོས་གཞན་ལ་ཇི་ལྟར་གྱིས་པ་ལྟར་ཁྱོད་ཚོས་ཀྱང་དེ་ཚོར་བྱོས་ཤིག

¹⁶ ཁྱོད་ཚོས་ཡུལ་དེར་ས་བོན་འདེབས་པ་དང་སྟོན་ཐོག་བསྡུ་བ་སོགས་མ་བྱེད་ཅིག དེར་སྡོད་པའི་ཕྱི་རྒྱལ་བ་རྣམས་དམག་འཐབ་པར་དམག་མིར་སྐྲགས་པ་དང་རང་གི་ཁྱིམ་དུ་ལོག་པར་བྱེད་དོ༎

ཨིསི་རཱཨེལ་པ་རྣམས་ཕྱིར་ལོག་པ།

¹⁷ གཙོ་བོ་དཀོན་མཆོག་གིས་བཀའ་གནང་བ། ཨིསི་རཱཨེལ་གྱི་མི་མང་ཚོ་ནི་ལུག་ལྟར་སེང་གེ་ཚོས་དེད་ནས་ཁ་གཏོར་བ་དང་འདྲའོ། ཐོག་མར་དེ་ཚོ་ལ་ཨ་སུར་གྱི་རྒྱལ་པོས་འཐབ་རྒོལ་བྱས་པ་དང་། དེ་ནས་བྷེ་བྷི་ལོ་ནི་ཡའི་རྒྱལ་པོ་ནེ་བུ་ཀད་ནེ་ཛར་གྱིས་དེ་ཚོའི་རུས་པ་མུར་རོ།

¹⁸ དེའི་རྐྱེན་གྱིས་ང་མཐུ་སྟོབས་ཅན་གྱི་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས། ཨ་སུར་གྱི་རྒྱལ་པོར་ཉེས་ཆད་བཏང་བ་ལྟར་རྒྱལ་པོ་ནེ་བུ་ཀད་ནེ་ཛར་དང་ཁོའི་ཡུལ་ལ་ཡང་ཉེས་ཆད་གཏོང་རྒྱུའི་ན་ནོ།

¹⁹ ངས་ཨིསི་རཱཨེལ་གྱི་མི་མང་ཚོ་དེ་ཚོའི་ཡུལ་དེ་སླར་གསོ་བྱ་རྒྱུ་ཡིན། དེ་ཚོས་རི་བོ་ཀར་མེལ་དང་བྷ་ཤཱན་གྱི་མངའ་ཁུལ་དུ་སྐྱེ་བའི་ཟས་ཟ་བར་འགྱུར་བ་དང་དེ་ཚོས་ཨེཕ་ར་ཡིམ་དང་གྷིལ་ཨད་ཀྱི་ལ་ཁུལ་དུ་སྐྱེ་བའི་སྟོན་ཐོག་དེ་ཚོས་འདོད་པ་རྣམས་ཟ་བར་བྱེད་དོ།

²⁰ དུས་ཚོད་དེ་སླེབས་སྐབས་ཨིསི་རཱཨེལ་ལ་སྡིག་པ་གང་ཡང་མི་རྙེད་པ་དང་ཡ་ཧུ་དཱར་སྤྱོད་ངན་རྙེད་པར་མི་འགྱུར་རོ། གང་ལ་ཟེར་ན། ངས་ཚེ་ཐར་བཏང་བའི་དེ་ཚོའི་སྡིག་པ་ལ་ངས་བཟོད་གསོལ་བྱ་རྒྱུ་ཡིན་ནོ་ཞེས་ང་གཙོ་བོ་དཀོན་མཆོག་གི་སྨྲས་པ་ཡིན་ནོ༎

བྷེ་བྷི་ལོ་ནི་ཡ་ཚོར་དཀོན་མཆོག་གི་ཁྲིམས་གཅོད།

²¹ གཙོ་བོ་དཀོན་མཆོག་གིས་བཀའ་གནང་བ། མེ་ར་ཐེམ་དང་པེ་ཀོད་ཀྱི་མི་མང་ཚོར་ཕར་རྒོལ་བྱོས་ཤིག། དེ་ཚོ་བསད་ནས་མེད་པར་བཟོས་ཤིག། ངས་ཁྱོད་ཚོར་བཀའ་བཏང་བ་རྣམས་བྱོས་ཤིག། ང་གཙོ་བོ་དཀོན་མཆོག་གིས་སྨྲས་པ་ཡིན་ནོ།

²² ཡུལ་དུ་དམག་སྒྲ་ཐོས་པ་དང་སྟོར་བཤིགས་ཆེན་པོ་བྱུང་ཡོད།

²³ བྷེ་བྷི་ལོ་ནི་ཡས་འཛམ་གླིང་ཡོངས་རྫོགས་ཐོ་བས་བརྡུང་ནས་དུམ་བུར་བཟོ་བ་དང་ད་ཆ་ཐོ་བ་དེ་བཞིན་བསིལ་བུར་འཐོར་ཡོད། མི་རིགས་ཚང་མ་ཡུལ་དེར་ཇི་འདྲ་བྱུང་བར་མཐོང་ནས་ཧང་སང་ཡོད།

²⁴ བྷེ་བྷི་ལོ་ནི་ཡ་ཁྱོད་ཀྱིས་ང་ལ་འཐབ་ཡོད་པ་དང་། ངས་ཁྱོད་ལ་རྒྱབ་པའི་རྙིའི་ནང་ཁྱོད་འཚུད་ཡོད། དེ་ཁྱོད་ཀྱིས་མི་ཤེས་སོ།

²⁵ ངས་ངའི་མཚོན་ཆ་གསོགས་འཇོག་བྱ་ཡུལ་དེ་མཛོད་སྒོ་འབྱེད་པ་དང་ང་ཁྲོ་བའི་སྐབས་སུ་ངས་དེ་ཚོ་མར་བཏོན་པ་ཡིན། གང་ལ་ཟེར་ན། ང་ཀུན་དབང་ཅན་གྱི་བླ་ན་མེད་པའི་གཙོ་བོ་དཀོན་མཆོག་བྷེ་བྷི་ལོ་ནི་ཡ་དུ་བྱ་རྒྱིུའ་བྱ་བ་ཞིག་ཡོད།

²⁶ དེར་ཕྱོགས་ཐམས་ཅད་ནས་ཕར་རྒོལ་བྱས་ནས། འབྲུ་རིགས་གསོགས་འཇོག་བྱ་ཡུལ་དེ་སྒོ་འབྱེད་ཅིག འབྲུའི་ཕུང་པོ་ལྟར་བཅོམ་ནོར་གྱི་ཕུང་པོ་སྤུང་ཞིག། ཡུལ་དེ་མེད་པར་བཟོས་ཤིག། གང་ཡང་མ་བཞག་ཅིག།

²⁷ དམག་མི་རྣམས་གསོད་ཅིག། དེ་ཚོ་དམར་གསོད་གཏོང་ཞིག། བྷེ་བྷི་ལོ་ནི་ཡའི་མི་མང་རྣམས་འཇིག་ཡོད། དེ་ཚོ་ལ་ཉེས་ཆད་གཏོང་བའི་དུས་ལ་སླེབས་ཡོད་དོ།

²⁸ (བྷེ་བྷི་ལོ་ནི་ཡ་ནས་བྲོས་པའི་སྐྱབས་བཅོས་པ་ཚོ་ཡེ་རུ་ཤ་ལེམ་དུ་ཡོང་བ་དང་། དེ་ཚོས་ང་ཚོའི་དཀོན་མཆོག་གཙོ་བོ་དཀོན་མཆོག་གིས་བྷེ་བྷི་ལོ་ནི་ཡ་པ་ཚོས་ཁོང་གི་མཆོད་ཁང་ལ་གང་བྱེད་པ་ལ་དགྲ་ཤ་ཇི་ལྟར་ལེན་པར་མཛད་པའི་སྐོར་སྨྲ་བར་བྱེད་དོ།)

²⁹ མདའ་པ་ཚོར་བྷེ་བྷི་ལོན་ལ་ཕར་རྒོལ་བྱོས་སྨྲོས་ཤིག། མདའ་གཞུ་བེད་སྤྱོད་བྱེད་ཤེས་མཁན་མི་རྣམས་གཏོང་ཞིག། གྲོང་ཁྱེར་ལ་མཐའ་བསྐོར་ནས་སུ་ཡང་བྲོས་སུ་མ་འཇུག་ཅིག དེ་ཚོས་གང་བྱས་པ་ཚང་མའི་ལན་འཇལ་ཞིང་དེ་ཚོས་གཞན་ལ་ཇི་ལྟར་སྐྱོངས་བ་ལྟར་དེ་ཚོར་སྐྱོངས་ཤིག གང་ལ་ཟེར་ན། དེ་ཚོས་ང་ཨིསི་རཱཨེལ་གྱི་དམ་པ་མཆོག་ལ་ང་རྒྱལ་བྱས་ཡོད་དོ།

³⁰ དེར་བརྟེན་དེའི་མི་ན་གཞོན་ཚོ་གྲོང་ཁྱེར་གྱི་རྒྱ་ལམ་སྟེང་གསོད་པ་དང་དེའི་དམག་དཔུང་རྣམས་ཉིན་དེར་མེད་པར་བཟོའོ་ཞེས་ང་གཙོ་བོ་དཀོན་མཆོག་གིས་སྨྲས་པ་ཡིན་ནོ།

³¹ བྷེ་བྷི་ལོ་ནི་ཡ་ཁྱོད་ང་རྒྱལ་གྱིས་ཁེངས་ཡོད་སྟབས་ང་ཀུན་དབང་ཅན་གྱི་བླ་ན་མེད་པའི་གཙོ་བོ་དཀོན་མཆོག་ཁྱོད་ཀྱི་རྒྱབ་འགལ་བྱ་བཞིན་ཡོད། ངས་ཁྱོད་ལ་ཆད་པ་གཏོང་རྒྱུའི་དུས་ཚོད་སླེབས་ཡོད།

³² ཁྱོད་ཀྱི་སྤོབས་པ་ཅན་གྱི་མི་རིགས་དེ་བཞིན་འགྱེལ་ཞིང་འཕམ་པར་འགྱུར་བ་དང་ཁྱོད་ལ་རོགས་བྱ་མཁན་སུ་ཡང་ཡོང་བར་མི་འགྱུར། ངས་ཁྱོད་ཀྱི་གྲོང་ཁྱེར་ཚོར་མེ་སྤར་བ་དང་ཁྱོད་ཀྱི་མཐའ་འཁོར་དུ་ཡོད་པ་ཚང་མ་མེད་པར་བཟོ་རྒྱུ་ཡིན་ནོ།

³³ མཐུ་སྟོབས་ཅན་གྱི་གཙོ་བོ་དཀོན་མཆོག་གིས་བཀའ་གནང་བ་ཨིསི་རཱཨེལ་དང་ཡ་ཧུ་དཱའི་མི་མང་རྣམས་ལ་མནར་གཅོད་བཏང་ཡོད། དེ་ཚོ་དབང་བཟུང་བྱ་མཁན་ཚོས་བཙན་པོར་བསྲུང་ནས་དེ་ཚོ་འགྲོ་རུ་མི་འཇུག་གོ

³⁴ འོན་ཀྱང་དེ་ཚོ་སྐྱོབས་མཁན་དེ་སྟོབས་ཤུགས་ཆེན་པོ་ཡིན་ནོ། ཁོང་གི་མཚན་ལ་མཐུ་སྟོབས་ཅན་གྱི་གཙོ་བོ་དཀོན་མཆོག་ཞུ་བ་ཡིན། ཁོང་སྐུ་ཉིད་ཀྱིས་དེ་ཚོའི་གནས་དོན་ལ་གཟིགས་སྐྱོངས་གནང་བ་དང་། ས་གཞིར་ཞི་བདེ་ཡོང་བར་མཛད་ན་ཡང་བྷེ་བྷི་ལོ་ནི་ཡ་ཚོར་སྡུག་བསྔལ་ཡོང་བར་མཛད་དོ།

³⁵ གཙོ་བོ་དཀོན་མཆོག་ཁོང་གིས་བཀའ་ནང་བ། བྷེ་བྷི་ལོ་ནི་ཡ་ལ་འཆི་བ་ཡོང་བར་འགྱུར། དེའི་མི་མང་ཚོར་འཆི་བ་ཡོང་བར་འགྱུར། དེ་ཚོའི་རྒྱལ་པོ་ཚོ་དང་ཤེས་རབ་ཅན། བཅས་པ་དེ་ཚོར་འཆི་བ་ཡོང་བར་འགྱུར།

³⁶ རྫུན་གྱི་ལུང་སྟོན་ཚོར་ཡང་འཆི་བར་འགྱུར། དེ་ཚོ་རྣམས་ནི་གླེན་པ་ཇི་ལྟར་ཡིན། དེ་ཡི་དམག་མི་ཚོ་ཡང་འཆི་བར་འགྱུར། དེ་ཚོ་ཇི་ལྟར་འཇིགས་བཞིན་ཡོད་པ་ཡིན།

³⁷ དེའི་རྟ་དང་ཤིང་རྟ་འཁོར་ལོ་མེད་པར་བཟོས། དེ་ཚོའི་གླས་པའི་དམག་མི་འཆི་བར་འགྱུར། དེ་ཚོ་སྟོབས་ཆུང་ཇི་འདྲ་ཡོད་པ་ཡིན། དེ་ཚོའི་བང་མཛོད་རྣམས་ནི་མེད་པར་བཟོས། འཕྲོག་བཅོམ་དང་ནི་ཇག་བཅོམ་བཅས་བྱོས་ཤིག།

³⁸ དེ་ཚོའི་ཡུལ་དུ་ཐན་པ་གཏོང་བས་ན། དེ་ཚོའི་རྒྱུགས་ཆུ་སྐམ་པར་བྱོས་ཤིག་དང་། བྷེ་བྷི་ལོ་ནི་ཡ་སྐུ་འདྲ་འཇིགས་རུང་ཡུལ་ཡིན་ནོ། དེ་ཡིས་མི་མང་གླེན་པ་ཚོ་བཟོས་ཡོད།

³⁹ དེར་བརྟེན་བྷེ་བྷི་ལོན་དེ་བཞིན་གདོང་འདྲེ་རྣམས་དང་རྣམ་ཤེས་ངན་པ་རྣམས་དང་མི་གཙང་བའི་བྱིའུ་རྣམས་ཀྱི་བཞུགས་པར་བྱེད། དེར་ཡང་སྐྱར་མི་གནས་སྡོད་བྱེད་པར་མི་འགྱུར། དུས་གཏན་གྱི་ཆེད་དུ་དེར་གནས་མི་ཡོང་།

⁴⁰ ཇི་ལྟར་ངས་སོ་དྷོམ་དང་གྷོ་མོ་རཱ་དང་ཉེ་འཁྲིས་ཀྱི་གྲོང་ཁྱེར་ཚོ་མེད་པར་བཟོས་པ་ལྟར་བྷེ་བྷི་ལོན་ལ་ཡང་དེ་ལྟར་ཡོང་བར་འགྱུར། དེར་སླར་ཡང་སྡོད་པར་མི་བྱེད་ཅེས། ང་གཙོ་བོ་དཀོན་མཆོག་གིས་སྨྲས་པ་ཡིན་ནོ།

⁴¹ བྱང་ཡུལ་སྟོབས་ཆེན་ཐག་རིང་རྒྱལ་ཁབ་ནས། དེ་ནས་མི་རིགས་ཚོ་ཡང་ཡོང་བཞིན་འདུག། རྒྱལ་པོ་མང་པོས་དམག་གྲ་སྒྲིགས་བཞིན་ཡོད།

⁴² དེ་ཚོས་རང་གི་མདའ་དང་རལ་གྲི་བླངས། སྡུག་རྩུབ་ཅན་དང་སྙིང་རྗེ་མེད་མཁན་ཡིན། དེ་ཚོས་རང་གི་རྟ་ཚོ་བཞོན་པའི་སྐབས། རྒྱ་མཚོ་བཞིན་དུ་དེ་ཚོས་ངར་རོ་སྒྲོགས། དེ་ཚོ་བྷེ་བྷི་ལོ་ནི་ཡ་དམག་འཐབ་གྲ་སྒྲིགས་ཡོད།

⁴³ བྷེ་བྷི་ལོ་ནི་ཡ་རྒྱལ་པོས་གཏམ་དེ་ཐོས་བས་ན། ཁོང་གི་ཕྱག་གཉིས་འཁྱོག་ནས་ལུས་པར་འགྱུར། སྐྱེ་གཟེར་རྒྱབ་མཁན་བུད་མེད་ལྟ་བུ་ནི། ཁོང་ལ་སྡུག་བསྔལ་དྲག་པོ་བྱུང་ངོ།

⁴⁴ ཤིང་ནགས་སྟུག་པོའི་ཡོར་དན་ཁུལ་ནས་རྩ་ཁ་ལྗང་ཁུའི་ཡུལ་དུ་སེང་གེ་ཞིག་ཡོང་བ་ལྟར་ང་གཙོ་བོ་དཀོན་མཆོག་ཡོང་ནས་གློ་བུར་དུ་བྷེ་བྷི་ལོ་ནི་ཡ་པ་ཚོ་རང་གི་ཡུལ་ནས་བྲོས་དགོས་པ་བཟོ་རྒྱུ་ཡིན། དེ་ནས་ངས་འདམས་པའི་འགོ་འཁྲིད་ཀྱི་རྒྱལ་ཁབ་དེ་དབང་བསྒྱུར་བྱེད་དོ། སུས་ང་དང་བསྡུར་བར་བྱེད་ནུས་སམ། ང་ལ་སུ་ཞིག་གིས་འདྲན་བསྡུར་བྱེད་ནུས་སམ། རྒྱལ་པོ་སུ་ཞིག་གིས་ང་ལ་ངོ་རྒོལ་བྱེད་ཐུབ་བམ།

⁴⁵ དེར་བརྟེན་ངས་བྷེ་བྷི་ལོན་གྱི་གྲོང་ཁྱེར་ཆེད་འཆར་གཞི་ཇི་བཟོས་པ་དང་། ངས་དེའི་མི་མང་ལ་ཇི་ལྟར་བྱེད་པའི་འཆར་གཞི་ཡོད་པར་ཉོན་ཞིག དེ་ཚོའི་བུ་ཕྲུག་ཚོ་ཡང་འདྲུད་ནས་འཁྱེར་བ་དང་ཚང་མ་འཇིགས་སྐྲག་སྐྱེས་པར་འགྱུར་རོ།

⁴⁶ བྷེ་བྷི་ལོན་འཕམ་སྐབས་དེར་སྒྲ་ཞིག་བྱུང་བས་ས་གཞི་ཡོངས་རྫོགས་འགུལ་བར་འགྱུར་བ་དང་། གཞན་མི་རིགས་ཚོས་སྐྲག་པའི་སྐད་ངན་ཐོས་པར་འགྱུར་རོ༎