ཡེར་མི་ཡཱ 49 - Tibetan Old Testament 2011

གཙོ་བོ་དཀོན་མཆོག་གིས་ཨམ་མོན་ཐོག་ཁྲིམས་ཀྱི་དཔྱད་མཚམས་གནང་བ།

¹ གཙོ་བོ་དཀོན་མཆོག་གིས་ཨམ་མོན་གྱི་སྐོར་ལ་བཀའ་གནང་བ་འདི་ལྟར་ཡིན་ནོ། ཨིསི་རཱཨེལ་གྱི་མི་རྣམས་གང་དུ་ཡོད་དམ། དེ་ཚོའི་ཡུལ་སྲུང་སྐྱོབས་བྱེད་མཁན་སུ་ཡང་མེད་པ་རེད་དམ། མོ་ལེག་ལ་མཆོད་མཁན་མི་མང་ཚོས་གྷཌ་ཀྱི་སྡེ་རིགས་ཀྱི་མངའ་ཁུལ་དབང་བཟུང་བྱས་ནས་དེར་གཞིས་ཅི་ལ་ཆགས་པ་ཡིན་ནམ།

² འོན་ཀྱང་ངས་གྲོང་ཁྱེར་རབ་བཱའི་རྒྱལ་ས་མི་མང་རྣམས་ནས་དམག་གི་སྒྲ་ཐོས་པར་བྱ་རྒྱུའི་དུས་ཚོད་སླེབས་བཞིན་ཡོད་པ་དང་། དེ་གྱང་གོག་ཏུ་ལྷག་པར་འགྱུར་བ་དང་དེའི་གྲོང་གསེབ་ཚོ་རྡུལ་དུ་མེ་བསྲེགས་པར་འགྱུར། དེ་ནས་ཨིསི་རཱཨེལ་པ་ཚོས་རང་གི་ཡུལ་དེ་འཕྲོག་མཁན་ཚོའི་ལག་ནས་ཕྱིར་ལེན་པར་བྱའོ།

³ ཧེཤ་བྷོན་གྱི་མི་མང་ནས་སྡུག་སྐད་འདོན་ཞིག་ཨེ་མེད་པར་བཟོས་སོ། རབ་བཱའི་བུད་མེད་རྣམས་མྱ་ངན་བྱེད་ཅིག། རྩ་ཕད་ཀྱི་གོས་གྱོན་ནས་མྱ་ངན་བྱོས་ཤིག། མགོ་བོ་རྨོངས་ནས་ཕར་རྒྱུགས་ཚུར་རྒྱུགས་བྱེད་ཅིག ཁྱོད་ཚོའི་ལྷ་མོ་ལེག་དེ་ཉིད་ནི་ཁོའི་བླ་མ་ཚོ་དང་རྒྱལ་སྲས་ཚོ་མཉམ་དུ་བཙན་བྱོལ་དུ་འཁྲིད་པར་བྱེད་དོ།

⁴ དམ་ཚིག་མི་གཙང་བའི་མི་མང་ཁྱོད་ཚོ་ཅིའི་ཕྱིར་ང་རྒྱལ་བྱེད་དམ། ཁྱོད་ཚོའི་སྟོབས་ཤུགས་ཉམས་བཞིན་ཡོད། ཁྱོད་ཚོས་ཁྱོད་ཚོའི་སྟོབས་ཤུགས་ལ་བློ་བཅོལ་ནས་ཁྱོད་ཚོར་སུས་ཀྱང་འཐབ་པར་མི་ནུས་ཅེས་ཅིའི་ཕྱིར་བརྗོད་པ་ཡིན་ནམ།

⁵ ངས་ཁྱོད་ཚོའི་ཐོག་ཏུ་ཕྱོགས་ཐམས་ཅད་འཇིགས་སྐྲག་དྲངས་བར་བྱ། ཁྱོད་ཚོ་ཚང་མ་བྲོས་པར་བྱེད་དོ། ཁྱོད་ཚོ་རེ་རེ་བཞིན་རང་སྲོག་ཆེད་དུ་བྲོས་པ་དང་ཁྱོད་ཚོའི་དམག་དཔུང་སླར་ཡང་བསྡུ་མཁན་སུ་ཡང་མེད་པར་འགྱུར་རོ།

⁶ འོན་ཀྱང་རྗེས་སུ་ངས་ཨམ་མོན་སླར་ཡང་ཡར་རྒྱས་བཟོ་བར་བྱའོ་ཞེས། ང་གཙོ་བོ་དཀོན་མཆོག་གིས་སྨྲས་པ་ཡིན་ནོ༎

ཨེ་དྷོམ་པའི་ཐོག་ཏུ་གཙོ་བོ་དཀོན་མཆོག་གི་ཁྲིམས་གཅོད་གནང་བ།

⁷ གཙོ་བོ་དཀོན་མཆོག་ཀུན་དབང་ལྡན་པའི་དཀོན་མཆོག་གིས་ཨེ་དྷོམ་གྱི་སྐོར་ལ་བཀའ་གནང་བ་འདི་ལྟར་ཡིན་ནོ། ཨེ་དྷོམ་གྱི་མི་མང་ཚོས་རང་གི་ཤེས་རབ་རླག་པ་ཡིན་ནམ། དེ་ཚོའི་སློབ་སྟོན་པ་ཚོས་ཇི་ལྟར་བྱེད་དགོས་པ་དེ་སློབ་སྟོན་མི་བྱེད་དམ། དེ་ཚོའི་ཤེས་རབ་རྣམས་ཡལ་བ་ཡིན་ནམ།

⁸ དྷེ་དན་གྱི་མི་མང་ཚོ་ཕྱིར་ལོག་ནས་བྲོས་ནས་ཡིབ་ཅིག། ངས་ཨེ་སའོ་ཀྱི་རིགས་བརྒྱུད་རྣམས་མེད་པར་བཟོ་རྒྱུ་ཡིན་ནོ། གང་ལ་ཟེར་ན། ངས་དེ་ཚོར་ཉེས་ཆད་གཏོང་བའི་དུས་ལ་སླེབས་ཡོད།

⁹ མི་ཚོས་རྒུན་འབྲུམ་བསྡུ་སྐབས་རྒུན་ཤིང་སྟེང་རྒུན་འབྲུམ་ཕྲན་བུ་འཇོག་པ་དང་མཚན་མོར་ཇག་པ་ཡོང་སྐབས་དེ་ཚོས་གང་འདོད་པ་གཅིག་པུ་འཁྱེར་བར་བྱའོ།

¹⁰ འོན་ཀྱང་ངས་ཨེ་སོའི་ཀྱི་རིགས་བརྒྱུད་ཆ་ཚང་དམར་ཧྲང་བཟོ་ཡོད་པ་དང་དེ་ཚོ་ཡིབ་ཀྱང་མི་ཐུབ་པའི་ཆེད་ཡིབ་ས་ཚང་མ་མངོན་བསལ་བྱེད་ཡོད། ཨེ་དྷོམ་གྱི་མི་མང་ཚང་མ་མེད་པར་འགྱུར་ཡོད་པ་དང། དེ་ཚོ་གཅིག་ཀྱང་ལྷག་མེད་དོ།

¹¹ ཁྱོད་ཚོའི་དྭ་ཕྲུག་རྣམས་ང་མཉམ་འཇོག་ཅིག་དང་ངས་དེ་ཚོ་ལ་བལྟ་རྟོགས་བྱ་རྒྱུ་ཡིན། ཁྱོད་ཚོའི་ཡུག་མོ་རྣམས་ང་ལ་བློས་འགེལ་བྱེད་ཐུབ་བོ།

¹² ཉེས་ཆད་གཏོང་བར་མི་འོས་པ་ཚོས་ཀྱང་ཉེས་ཆད་ཀྱི་ཕོར་པ་ལས་འཐུང་དགོས་སྟབས་ཁྱོད་ཚོར་ཉེས་ཆད་མེད་པར་ཐར་གྱི་རེད་བསམ་གྱི་འདུག་གམ། དེ་ལྟར་མིན། ཁྱོད་ཚོས་ཀྱང་ཕོར་པ་དེ་ལས་འཐུང་དགོས་སོ།

¹³ ང་ཉིད་ཀྱིས་བྷོཛ་རཱས་གྲོང་ཁྱེར་དེ་བཞིན་འཇིགས་སྐྲག་སྐྱེས་པའི་ས་གནས་བྱེ་ཐང་ཞིག་དང་མི་མང་གི་འཕྱ་བ་དང་དེའི་མིང་དམོད་པར་འབོད་རྒྱུའི་དམ་བཅའ་བྱེད་ཡོད། དེའི་ཉེ་འཁྲིས་ཀྱི་གྲོང་གསེབ་རྣམས་རྟག་ཏུ་གྱང་གོག་ཏུ་འགྱུར་རོ་ཞེས་ང་གཙོ་བོ་དཀོན་མཆོག་གིས་སྨྲས་པ་ཡིན་ནོ།

¹⁴ ངས་ཨེ་དྷོམ་ལ་སྨྲས་པ། ང་ལ་གཙོ་བོ་དཀོན་མཆོག་གི་བཀའ་ཞིག་འབྱོར་བྱུང་། ཁོང་གིས་མི་རིགས་ཚོར་དེ་ཚོའི་དམག་དཔུང་བསྡུ་ནས་ཁྱོད་ལ་འཐབ་རྒྱུར་གྲ་སྒྲིགས་དགོས་པའི་འཕྲིན་བཤད་པར་བང་ཆེན་བཏང་གནང་ཡོད་དོ།

¹⁵ གཙོ་བོ་དཀོན་མཆོག་གིས་ཁྱོད་ཚོ་སྟོབས་ཆུང་བཟོས་ནས་སུ་ཞིག་གིས་ཀྱང་གུས་ཞབས་མི་བྱེད་མཁན་ཞིག་བཟོ་གནང་ཡོང་།

¹⁶ ཁྱོད་ཚོའི་ང་རྒྱལ་གྱིས་ཁྱོད་ཚོར་བསླུ་འཁྲིད་བྱས་ཡོད། ཁྱོད་ཚོས་བསམ་པ་ལྟར་ཁྱོད་ཚོར་སུས་ཀྱང་འཇིགས་པར་མི་བྱེད་དོ། ཁྱོད་ཚོ་བྱ་རྒོད་ལྟར་ཧ་ཅང་བྲག་ངོས་གཟར་པོ་རྩེ་ཐོག་ཏུ་གནས་སྡོད་བྱེད་ཀྱི་ཡོད་ཀྱང་། གཙོ་བོ་དཀོན་མཆོག་གིས་མར་འབེབས་པར་མཛད་དོ་ཅེས། གཙོ་བོ་དཀོན་མཆོག་གིས་དེ་ལྟར་བཀའ་གནང་ཡོད།

¹⁷ གཙོ་བོ་དཀོན་མཆོག་གིས་བཀའ་གནང་བ། ཨེ་དྷོམ་ལ་སྟོར་བཤིགས་ཡོང་རྒྱུ་དེ་ཧ་ཅང་ཚབ་ཆེ་ཡོད་སྟབས་དེ་བརྒྱུད་ནས་འགྲོ་མཁན་ཚོ་ཧང་སང་བ་དང་འཇིགས་སྐྲག་སྐྱེས་པར་འགྱུར།

¹⁸ སོ་དྷོམ་དང་གྷོ་མོ་རཱ་དང་དེ་ཚོའི་ཉེ་འགྲམ་ཀྱི་གྲོང་ཁྱེར་རྣམས་མེད་པར་བཟོ་བ་ལྟར་ཨེ་དྷོམ་ལ་ཡང་དེ་ལྟར་བྱུང་བར་འགྱུར། སླར་དེར་སུ་ཡང་འཚོ་བར་མི་འགྱུར་ཞེས་ང་གཙོ་བོ་དཀོན་མཆོག་གིས་སྨྲས་པ་ཡིན་ནོ།

¹⁹ སེང་གེ་ཞིག་ཡོར་དན་ཁུལ་གྱི་ཤིང་ནགས་མཐུག་པོ་བརྒྱུད་རྩ་ཁའི་སར་ཡོང་བ་ལྟར། ང་ཡོང་ནས་ཨེ་དོམ་པ་ཚོ་རང་གི་ཡུལ་ནས་བློ་བུར་དུ་བྲོས་དགོས་པ་བཟོ་རྒྱུ་ཡིན་ནོ། དེ་ནས་ངས་འདམ་པའི་འགོ་འཁྲིད་ཀྱིས་རྒྱལ་ཁབ་སྐྱོངས་བར་བྱེད་དོ། ང་དང་སུ་བསྡུར་བར་ནུས་སམ། སུ་ཞིག་གིས་ང་ལ་འགྲན་པར་ནུས་སམ། རྒྱལ་པོ་སུ་ཞིག་གིས་ང་ལ་ངོ་རྒོལ་བྱེད་དམ།

²⁰ དེར་བརྟེན་ངས་ཨེ་དྷོམ་པའི་མི་མང་ལ་བརྩམས་པའི་འཆར་གཞི་དང་། ངས་ཏེ་མན་གྲོང་ཁྱེར་གྱི་མི་མང་ཚོར་ཇི་ལྟར་བྱེད་རྒྱུ་ཡིན་པར་ཉོན་ཞིག དེ་ཚོའི་ཕྲུ་གུ་ཚོ་ཡང་དྲུད་ནས་འཁྱེར་ཕྱིན་པ་དང་། ཚང་མར་འཇིགས་སྐྲག་སྐྱེས་པར་འགྱུར་རོ།

²¹ ཨེ་དྷོམ་གཞིགས་པའི་སྒྲ་དེས་ས་གཞི་ཡོངས་རྫོགས་འགུལ་བར་འགྱུར་བ་དང་། འཇིགས་སྐྲག་གི་སྐད་ངན་ཐག་རིང་རྒྱ་མཚོ་དམར་པོ་བར་ཐོས་པར་འགྱུར་རོ།

²² དགྲ་བོས་བྷོཛ་རཱ་ལ་བྱ་རྒོད་ཤོག་པ་བརྐྱངས་ནས་ཐོ་ཤོག་བརྒྱབ་པ་ལྟར་འཐབ་པར་ཡོང། ཉིན་དེར་ཨེ་དྷོམ་གྱི་དམག་མི་རྣམས་བུད་མེད་སྐྱེ་ཟེར་རྒྱབ་པ་ལྟར་སྐྲག་པར་འགྱུར་རོ༎

དྷ་མསེ་ཀསེ་ལ་གཙོ་བོ་དཀོན་མཆོག་གི་ཁྲིམས་གཅོད་གནང་བ།

²³ དྷ་མསེ་ཀསེ་གི་སྐོར་ལ་གཙོ་བོ་དཀོན་མཆོག་གིས་བཀའ་གནང་བ་འདི་ལྟར་ཡིན། ཧ་མད་དང་ཨར་པད་ཀྱི་གྲོང་ཁྱེར་གྱི་མི་མང་ཚོ་སེམས་འཁྲལ་དང་སྡུག་བསྔལ་བྱེད་བཞིན་ཡོད། གང་ལ་ཟེར་ན། དེ་ཚོས་གཏམ་ངན་ཐོས་ཡོད། དེ་ཆོའི་སྟེང་སེམས་འཁྲལ་རྒྱ་མཚོ་ལྟར་འབབས་པས་དེ་ཚོ་ལ་ངལ་གསོ་མི་ཐུབ་བོ།

²⁴ དྷ་མསེ་ཀསེ་གི་མི་མང་རྣམས་སྟོབས་མེད་ཡིན་སྟབས་འཇིགས་ནས་བྲོས་སོ། དེ་ཚོ་བུད་མེད་སྐྱེ་གཟེར་ཅན་ལྟར་ན་གཟུགས་དང་སྡུག་བསྔལ་ངང་ཡོད་དོ།

²⁵ སྔར་སྙན་གྲགས་ཅན་གྱི་གྲོང་ཁྱེར་དགའ་བདེའི་ངང་ཡོད་པ་དེ་བཞིན་མི་མེད་ལུང་སྟོང་དུ་འགྱུར་ཡོད་དོ།

²⁶ ཉིན་དེར་དེ་ཚོའི་ཁྱོ་ན་གཞོན་ཚོ་གྲོང་ཁྱེར་གྱི་རྒྱ་ལམ་སྟེང་གསོད་པར་འགྱུར་བ་དང་། དེ་ཚོའི་དམག་མི་རྣམས་མེད་པར་བཟོ་བར་འགྱུར་རོ།

²⁷ ངས་དྷ་མསེ་ཀསེ་གི་ལྕགས་རི་རྣམས་མེར་བསྲེག་པ་དང་རྒྱལ་པོ་བྷེན་ཧ་དྷད་ཀྱི་ཕོ་བྲང་ཚོར་མེ་སྤར་བར་བྱེད་དོ་ཅེས་ང་མཐུ་སྟོབས་ཅན་གྱི་གཙོ་བོ་དཀོན་མཆོག་གིས་སྨྲས་པ་ཡིན་ནོ༎

ཀེ་དར་གྱི་སྡེ་རིགས་དང་ཧ་ཛོར་གྲོང་ཁྱེར་ལ་ཁྲིམས་གཅོད།

²⁸ གཙོ་བོ་དཀོན་མཆོག་གིས་ཀེ་དར་གྱི་སྡེ་རིགས་དང་། བྷེ་བྷི་ལོ་ནི་ཡའི་རྒྱལ་པོ་ནེ་བུ་ཀད་ནེ་ཛར་གྱིས་དབང་བཟུང་བྱས་པའི་ཧ་ཛོར་གྱི་དབང་འོག་དུ་ཡོད་པ་རྫོང་ཁག་ཚོའི་སྐོར་བཀའ་གནང་བ་འདི་ལྟར་ཡིན། ཀེ་དར་གྱི་མི་མང་ལ་དམག་འཐབ་ནས་ཤར་ཕྱོགས་ཀྱི་མི་མང་གི་སྡེ་རིགས་བརྒྱུད་མེད་པར་བཟོས་ཤིག

²⁹ དེ་ཚོའི་གུར་ཚོ་དང་ཕྱུགས་དང་གུར་གྱི་ཡོལ་བ་དང་། དེ་ཚོའི་གུར་ཚོའི་ནང་ཡོད་པ་ཚང་མ་དབང་བཟུང་བྱོས་ཤིག དེ་ཚོའི་རྔ་མོང་ཚོ་འཁྱེར་ནས་མི་མང་ཚོར་ཁྱོད་ཚོའི་མཐའ་འཁོར་ཡོངས་སུ་འཇིགས་སྐྲག་ཡོད་ཅེས་སྨྲོས་ཤིག

³⁰ ཧ་ཛོར་གྱི་མི་མང་ཚོ་ང་གཙོ་བོ་དཀོན་མཆོག་གིས་ཁྱོད་ཚོ་ཐག་རིང་བྲོས་ནས་ཡིབ་དགོས་པའི་ཉེན་བརྡ་གཏོང་རྒྱུ་ཡིན། བྷེ་བྷི་ལོ་ནི་ཡའི་རྒྱལ་པོ་ནེ་བུ་ཀད་ནེ་ཛར་གྱིས་ཁྱོད་ཚོར་བྱུས་ངན་བརྩོམས་ནས་འདི་ལྟར་སྨྲས་ཡོད་དོ།

³¹ ཤོག་ལ། ང་ཚོས་མི་མང་སྐྱོན་མེད་དང་བརྟན་པོ་ཡོད་བསམ་མཁན་ཚོར་འཐབ་པར་བྱའོ། དེ་ཚོའི་གྲོང་ཁྱེར་ལ་རྒྱལ་སྒོ་དང་སྒོ་ལྕགས་མེད་པ་དང་སྲུང་བྱ་ཡང་རྩ་བ་ནས་མེད་དོ།

³² དེ་ཚོའི་རྔ་མོང་ཚོ་དང་ཕྱུགས་ཚོ་འཁྱེར་ཞིག། ངས་སྐྲ་ཐུང་ཐུང་བྲེག་མཁན་གྱི་མི་རྣམས་ཕྱོགས་ཚང་མར་ཁ་སྟོར་བ་དང་དེ་ཚོ་ལ་ཕྱོགས་ཐམས་ཅད་ནས་རྐྱེན་ངན་འབེབས་རྒྱུ་ཡིན་ནོ།

³³ ཧ་ཛོར་དེ་བཞིན་ཁྱི་སྤྱང་གནས་སྡོད་བྱེད་པའི་ཡུལ་དེ་གཏན་གྱི་ཆེད་དུ་ལུང་སྟོང་ཞིག་བཟོ་བར་བྱའོ། དེར་སླར་རང་མི་སུ་ཞིག་ཡང་སྡོད་པར་མི་བྱེད་དོ། ང་གཙོ་བོ་དཀོན་མཆོག་གིས་སྨྲས་པ་ཡིན་ནོ༎

ཨེ་ལམ་ལ་གཙོ་བོ་དཀོན་མཆོག་གི་ཁྲིམས་གཅོད།

³⁴ ཛེ་དེ་ཀི་ཡཱ་ཡ་ཧུ་དཱ་པའི་རྒྱལ་པོར་འགྱུར་མ་ཐག་ཏུ་མཐུ་སྟོབས་ཅན་གྱི་གཙོ་བོ་དཀོན་མཆོག་གིས་ཨེ་ལམ་གྱི་གྲོང་ཁྱེར་གྱི་སྐོར་ང་ལ་འདི་ལྟར་བཀའ་གནང་ངོ་།

³⁵ ཁོང་གིས་བཀའ་གནང་བ་ནི། ངས་ཨེ་ལམ་དེ་ཧ་ཅང་སྟོབས་ཤུགས་ཅན་བཟོ་མཁན་མདའ་པ་ཚང་མ་གསོད་རྒྱུ་ཡིན།

³⁶ ངས་ཨེ་ལམ་གྱི་ཕྱོགས་སུ་ཕྱོགས་ཚང་མ་ནས་རླུང་གཏོང་རྒྱུ་ཡིན་པ་དང་དེའི་མི་མང་རྣམས་ཁ་སྟོར་བཏང་ནས་ཕྱོགས་གང་སར་བཙན་བྱོལ་དུ་མ་སོང་བའི་ས་ཁུལ་གཅིག་ཀྱང་མ་ལུས་སོ།

³⁷ ངས་དེའི་མི་མང་རྣམས་དེ་ཚོ་གསོད་མཁན་གྱི་དགྲ་བོ་ཚོ་ལས་འཇིགས་བཅུག་རྒྱུ་ཡིན། ང་དྲག་པོར་ཁྲོ་བའི་སྐབས་ངས་ཨེ་ལམ་གྱི་མི་མང་རྣམས་མེད་པར་བཟོ་རྒྱུ་དང་། དེ་ཚོ་ཤུལ་མེད་མ་བཟོས་བར་ངས་དེ་ཚོར་དམག་མི་གཏོང་རྒྱུ་ཡིན་ནོ།

³⁸ ངས་དེ་ཚོའི་རྒྱལ་པོ་ཚོ་དང་འགོ་འཁྲིད་ཚོ་མེད་པར་བཟོས་ནས་དེར་ངས་ཁྲི་རྒྱབ་རྒྱུ་ཡིན་ནོ།

³⁹ འོན་ཀྱང་ངས་རྗེས་སུ་ཡང་སྐྱར་ཨེ་ལམ་གྱི་མི་མང་ཚོ་དར་རྒྱས་བཟོ་རྒྱུ་ཡིན། ང་གཙོ་བོ་དཀོན་མཆོག་གིས་སྨྲས་པ་ཡིན་ནོ༎