ཡེར་མི་ཡཱ 48 - Tibetan Old Testament 2011

མོ་ཨབ་སྟོར་བཤིགས་བཏང་བ།

¹ མཐུ་སྟོབས་ཅན་གྱི་གཙོ་བོ་དཀོན་མཆོག་གིས། མོ་ཨབ་ཀྱི་སྐོར་ལ་བཀའ་འདི་གནང་། ནེ་བྷོའི་མི་མང་ལ་ནི་སྙིང་རེ་རྗེ། དེ་ཚོའི་གྲོང་ཁྱེར་དེ་བཞིན་མེད་པར་བཟོས། ཀི་རི་ཡཱ་ཐེམ་ལ་ནི་བཙན་བཟུང་བྱ། དེ་ཡི་སྟོབས་ཆེན་འཛིང་རག་བཤིགས་པར་མཛད། དེའི་མི་མང་རྣམས་ནི་ངོ་ཚར་འཇུག།

² མོ་ཨབ་ཀྱི་གཟི་བརྗིད་རླག་ཡོད་དོ། དགྲ་བོས་ཧེཤ་བྷོན་དབང་བཟུང་བྱས་ཡོད་ཅིང་། མོ་ཨབ་ཀྱི་མི་རིགས་ཡང་གཏོར་བའི་བྱུས་ངན་བརྩོམ། མད་མེན་གྱི་གྲོང་ཁྱེར་ཁུ་ཟིམ་གནས། དེ་ཡི་ཐོག་ཏུ་དམག་དཔུང་འགྲོ་བར་བྱེད།

³ ཧོ་རོ་ནེམ་མི་ཚོས་སྐད་འབོད་ཀྱིས། དྲག་ཟིངས་དང་ནི་སྟོར་བཤིགས་ཅེས་འབོད་འགྱུར།

⁴ མོ་ཨབ་དེ་བཞིན་མེད་པར་བཟོས་ཡོད་པས། བྱིས་པ་རྣམས་ནི་ངུ་བཞིན་ཡོད་པར་ཉོན།

⁵ ལུ་ཧིད་ལམ་བར་དུ་ངུ་བའི་སྐད་འབོད་དང་། ཧོ་རོ་ནེམ་ཐུར་དུ་སྡུག་སྐད་ཐོས།

⁶ དེ་ཚོས་རང་གི་སྲོག་གི་ཕྱིར་བྲོས་ཤིག། བྱང་གི་ཐང་ཏུ་རྐྱང་རྒོད་ལྟར་རྒྱུགས་སྨྲས།

⁷ མོ་ཨབ་ཁྱོད་ཀྱིས་རང་གི་སྟོབས་ཤུགས་དང་། ནོར་ལ་ཡིད་ཆེས་བློས་འགེལ་བྱས་ཡོད་དོ། འོན་ཀྱང་ད་ཆ་ཁྱོད་ཀྱང་དབང་འོག་ཚུད། རྒྱལ་སྲས་ཚོ་དང་བླ་མ་ཚོ་མཉམ་དུ། ཁྱོད་ཀྱི་ལྷ་ནི་ཀེ་མོཤ་བཙན་བྱོལ་འགྲོ་བར་འགྱུར།

⁸ གྲོང་ཁྱེར་གཅིག་ཀྱང་སྟོར་བཤིགས་ལས་མི་ཐར། ལུང་གཤོང་དང་ནི་ཐང་གཉིས་མེད་པར་འགྱུར། གཙོ་བོ་དཀོན་མཆོག་ང་ཡིས་སྨྲས་པ་ཡིན།

⁹ མོ་ཨབ་ཀྱི་ཆེད་དུ་སྤུར་ཁང་ཞིག་བཟོས་ཤིག། དེ་ནི་མགྱོགས་པར་མེད་པར་བཟོ་རྒྱུ་ཡིན་ནོ། དེ་ཡི་གྲོང་ཁྱེར་རྣམས་ནི་གྱང་གོག་འགྱུར། ཡང་སྐྱར་དེ་གར་གཅིག་ཀྱང་གནས་མི་ཐུབ།

¹⁰ (གཙོ་བོ་དཀོན་མཆོག་གིས་ཕྱག་ལས་སེམས་ཀྱི་གཏིང་ནས་མི་བྱེད་མཁན་མི་དེ་ལ་དམོད་པར་འགྱུར། གཏུབ་པ་དང་གསོད་པར་མི་བྱེད་མཁན་མི་དེ་ལ་དམོད་པར་འགྱུར་རོ།)

མོ་ཨབ་ཀྱི་གྲོང་ཁྱེར་ཚོ་མེད་པར་བཟོ་བ།

¹¹ གཙོ་བོ་དཀོན་མཆོག་གིས་བཀའ་གནང་བ། མོ་ཨབ་རྟག་ཏུ་བརྟན་པོར་གནས་ཡོད་པ་དང་བཙན་བྱོལ་དུ་འཁྲིད་མེད། མོ་ཨབ་དེ་བཞིན་མ་དཀྲུགས་པར་བཞག་པའི་རྒུན་ཆང་བུམ་པ་གཅིག་ནས་གཅིག་ཏུ་རྩ་བ་ནས་བླུག་མེད་པ་ལྟར་ཡིན། དེའི་བྲོ་བ་རྩ་བ་ནས་འཕྲོག་རླ་མ་ཕྱིན་པ་སྔར་ལྟར་བྲོ་བ་གང་ལེགས་ཡོད་པ་ཡིན་ནོ།

¹² ད་ངས་མོ་ཨབ་དེ་བཞིན་རྒུན་ཆང་ལྟར་བླུག་མཁན་གྱི་མི་རྣམས་གཏོང་རྒྱུ་ཡིན། དེ་ཚོས་རྒུན་ཆང་གི་བུམ་པ་སྟོང་པ་བཟོས་ནས་དེ་ཚོ་དུམ་བུར་གཅོག་པར་བྱེད།

¹³ དེ་ནས་ཨིསི་རཱཨེལ་པ་ཚོ་དེ་ཚོས་ཡིད་ཆེས་བློས་འགེལ་བྱེད་པའི་ལྷ་བྷེ་ཐེལ་ལ་བློ་འཁྲུལ་བ་དེ་སང་བ་ལྟར་མོ་ཨབ་པ་ཚོ་རང་གི་ལྷ་ཨེ་མོས་ལ་བློ་འཁྲུལ་བ་སང་བ་འགྱུར་རོ།

¹⁴ མོ་ཨབ་པ་ཡི་མི་ཚོ་དཔའ་བོ་དང་། དམག་སར་ཞིབ་དཔྱོད་མྱོང་བའི་དམག་མི་དང་། བློ་སྟོབས་ཅན་གྱི་ཇི་ལྟར་བརྗོད་ནུས་བསམ།

¹⁵ མོ་ཨབ་ཀྱི་གྲོང་ཚོ་མེད་པར་བཟོས། དེ་ཡི་ན་གཞོན་ལེགས་ཤོས་བསད་ཡོད་དོ། མཐུ་སྟོབས་ཅན་གྱི་གཙོ་བོ་དཀོན་མཆོག་ང་། རྒྱལ་པོ་ཡིན་པ་དང་ངས་དེ་ལྟར་སྨྲས་པ་ཡིན།

¹⁶ མོ་ཨབ་ཀྱི་འཇིག་པ་ཉེ་འགྲམ་ཡོད། དེ་ནི་མགྱོགས་པོར་མེད་པར་བཟོ་རྒྱུ་ཡིན།

¹⁷ ཁྱོད་ཚོ་ཉེ་འགྲམ་སྡོད་མཁན་རྣམས། མི་རིགས་དེའི་ཆེད་དུ་མྱ་ངན་བྱོས། དེ་ཚོའི་སྙན་སྒྲགས་ཁྱོད་ཚོས་ཤེས་ཀྱི་ཡོད། དེ་ཡི་སྟོབས་ཅན་འཛིན་སྐྱོངས་བཤིག་ཡོད་ཅེས། གཟི་བརྗིད་དང་ནི་མངའ་ཐང་རྫོགས་ཡོད་སྨྲོས།

¹⁸ དྷི་བྷོན་ཡུལ་དུ་གནས་སྡོད་བྱ་མཁན་ཚོ། ཁྱོད་ཚོའི་གུས་ཞབས་གནས་ནས་མར་ཡོང་ནས། རྡུལ་གྱི་ཐང་གི་སྟེང་དུ་སྡོད་ཅིག་དང་། མོ་ཨབ་མེད་པར་བཟོ་མཁན་འདིར་ཡོད་ཅིང་། དེ་ཡིས་མཁར་རྫོང་རྣམས་ནི་གྱང་གོག་བཏང་།

¹⁹ ཨ་རོ་ཨེར་དུ་གནས་སྡོད་བྱ་མཁན་ཚོ། རྒྱལ་ལམ་ཁར་དུ་ལངས་ནས་སྒུག་སྡོད་ཅིག། བྲོས་ནས་འགྲོ་མཁན་ཚོ་ལ་སྐད་ཆ་དྲིས། ཇི་འདྲ་བྱུང་བའི་སྐོར་ལ་འཚོལ་ཞིབ་བྱོས།

²⁰ དེ་ཚོས་ལན་དུ་མོ་ཨབ་འཕམ་སོང་སྨྲས། དམའ་འབེབས་བྱུང་བས་དེའི་ཕྱིར་ངུ་ཞེས་སྨྲས། མོ་ཨབ་དེ་བཞིན་མེད་པར་བཟོས་སོང་ཞེས། ཆུ་བོ་ཨར་ནོན་བརྒྱུད་ནས་གསལ་སྒྲགས་བྱོས།

²¹ ཁྲིམས་ཀྱི་དཔྱད་མཚམས་ས་མཐོའི་ཐང་ཆེན་གྱི་གྲོང་ཁྱེར་རྣམས་ཧོ་ལོན་དང་། ཡ་ཛཱ་དང་མེ་ཕད་དང་།

²² དྷི་བྷོན་དང་ནེ་བྷོ་དང་། བྷེད་དིབ་ལ་ཐེམ་དང་།

²³ ཀི་རི་ཡཱ་ཐེམ་དང་བྷེད་ག་མུལ་དང་བྷེད་མི་ཨོན་དང་།

²⁴ ཀེ་རི་ཨོད་དང་བྷོཛ་རཱ་བཅས་ལ་སླེབས་ཡོད། མོ་ཨབ་ཀྱི་གྲོང་ཁྱེར་ཐག་རིང་དང་ཐག་ཉེ་ཚང་མར་ཁྲིམས་ཀྱི་དཔྱད་མཚམས་སླེབས་ཡོད་དོ།

²⁵ མོ་ཨབ་ཀྱི་མངའ་ཐང་རྡུལ་དུ་མེད་པར་བཟོད་ཡོད་པ་དང་། དེའི་སྟོབས་ཤུགས་དང་མེད་པར་བཟོས་ཡོད་ཅེས། ང་གཙོ་བོ་དཀོན་མཆོག་གིས་སྨྲས་པ་ཡིན་ནོ༎

མོ་ཨབ་ཉམས་ཆུང་ཡོང་བ།

²⁶ གཙོ་བོ་དཀོན་མཆོག་གིས་བཀའ་གནང་བ། མོ་ཨབ་ལ་ར་བཟི་རུ་བཅུག་ཅིག། གང་ལ་ཟེར་ན། དེས་ང་ལ་ངོ་ལོག་རྒྱབ་བྱུང་། མོ་ཨབ་རང་གི་སྐྱུག་པའི་སྟེང་རིལ་བ་དང་མི་མང་གིས་གད་མོ་གད་པར་འགྱུར།

²⁷ མོ་ཨབ་ཁྱོད་ཚོས་ཨིསི་རཱཨེལ་གྱི་མི་མང་ཚོར་ཇི་ལྟར་གད་མོ་གད་པ་དྲན་གྱི་འདུག་གམ། ཁྱོད་ཀྱིས་དེ་ཚོར་ཇག་པའི་ཚོ་འཁྲོད་འཛིན་བཟུང་བྱས་པ་ལྟར་གྱིས་ཡོད་དོ།

²⁸ མོ་ཨབ་ཏུ་སྡོད་མཁན་མི་མང་ཚོ་ཁྱོད་ཚོ་རང་གི་གྲོང་ཁྱེར་སྤངས་ནས་བྲག་ངོས་གཟར་པོར་སྡོད་ཅིག ཕུག་རོན་གྲོག་རོང་གི་ཟུར་དུ་ཚང་བཟོ་མཁན་ལྟར་འགྱུར་ཞིག

²⁹ མོ་ཨབ་ཧ་ཅང་ང་རྒྱལ་ཅན་ཞིག་ཡིན། མི་མང་དེ་རྣམས་ང་རྒྱལ་ཅན་དང་གཏམ་འདོད་ཅན་དང་རང་མཐོང་ཅན་ཇི་ལྟར་ཡིན་པ་དང་དེ་ཚོ་རང་གི་རང་ལ་བསམ་བློ་ཇི་ལྟར་བཏང་གི་ཡོད་པ་ངས་ཐོས་བྱུང་།

³⁰ ང་གཙོ་བོ་དཀོན་མཆོག་གིས་དེ་ཚོའི་ང་རྒྱལ་ཤེས། དེ་ཚོའི་རང་བསྟོད་བྱེད་པ་དོན་མེད་དང་དེ་ཚོའི་ཇི་ལྟར་བྱེད་པ་དེ་ཡུན་རིང་མི་གནས་སོ།

³¹ དེར་བརྟེན་ངས་མོ་ཨབ་ཀྱི་མི་མང་དང་ཀིར་ཧེ་རེསེ་ཀྱི་མི་མང་གི་ཆེད་དུ་ངུའོ།

³² ཡ་ཛེར་གྱི་མི་མང་ལས་ལྷག་པ་ངས་སིབ་མཱའི་མི་མང་གི་ཆེད་དུ་ངུའོ། ཀྱེ་སིབ་མཱའི་གྲོང་ཁྱེར་ཁྱོད་ནི་འཆི་བའི་རྒྱ་མཚོའི་ཕ་རོལ་དང་ཐག་རིང་ཡ་ཛེར་བར་དུ་སླེབས་པ་རྒུན་ཤིང་གི་ཡལ་ག་དང་འདྲའོ། འོན་ཀྱང་ད་ལྟ་ཁྱོད་ཀྱི་དབྱར་གྱི་ཤིང་འབྲས་དང་རྒུན་འབྲུམ་རྣམས་མེད་པར་བཟོས་ཡོད་དོ།

³³ མོ་ཨབ་ཀྱི་ལུད་འཛོམས་པོའི་ཡུལ་ནས་བདེ་སྐྱིད་དང་དགའ་སྤྲོ་རྣམས་ཕྱིར་འཁྱེར་ཡོད། ངས་ཆང་གཞོང་པ་ནས་རྒུན་ཆང་འཐོན་རྒྱུ་མཚམས་འཇོག་བྱས་ཡོད། རྒུན་ཆང་བཟོ་མཁན་དང་དགའ་སྤྲའི་སྐད་སྒྲོགས་མཁན་སུ་ཡང་མེད་དོ།

³⁴ ཧེཤ་བྷོན་དང་ཨེ་ལེ་ལཱེའི་མི་མང་ངུ་བ་དང་དེ་ཚོའི་ངུ་སྐད་ཐག་རིང་ཡ་ཧཛ་བར་ཐོས་པ་དང་། དེ་ཚོར་ཛོ་ཨར་གྱི་མི་མང་གིས་ཐོས་པ་དང་དེ་ཐག་རིང་ཧོ་རོ་ནེམ་དང་ཨེག་ལད་ཤེ་ལི་ཤི་ཡཱའི་བར་ཐོས་སོ། ནིམ་རིམ་གྱི་རྒྱུགས་ཆུ་ཡང་སྐམ་ཡོད་དོ།

³⁵ ངས་མོ་ཨབ་ཀྱི་མི་མང་རྣམས་དེ་ཚོའི་མཆོད་ཡུལ་དུ་སྦྱིན་སྲེག་གི་མཆོད་པ་འབུལ་རྒྱུ་དང་། དེ་ཚོའི་ལྷ་ཚོར་དམར་མཆོད་འབུལ་རྒྱུ་བཅས་པ་འགོག་རྒྱུ་ཡིན། ང་གཙོ་བོ་དཀོན་མཆོག་གིས་སྨྲས་པ་ཡིན་ནོ།

³⁶ སུ་ཞིག་གིས་གླིང་བུའི་ནང་རོའི་མྱ་ངན་འདོན། མི་ཤི་བའི་མྱ་ངན་གྱི་མགུར་མ་ལྟར་ངའི་སེམས་ནང་མོ་ཨབ་དང་ཀིར་ཧེ་རེསེ་ཀྱི་མི་མང་གི་ཆེད་དུ་མྱ་ངན་བྱེད་དོ། གང་ལ་ཟེར་ན། དེ་ཚོའི་རྒྱུ་དངོས་ཡོངས་རྫོགས་མེད་པར་ཕྱིན་ཡོད།

³⁷ དེ་ཚོ་ཚང་མས་རང་གི་མགོའི་སྐྲ་དང་སྨ་ར་བྲེགས་ཡོད། དེ་ཚོ་ཚང་མས་རང་གི་ལག་པ་བཤགས་ནས་རྩ་ཕད་ཀྱི་གོས་གྱོན་ཡོད།

³⁸ མོ་ཨབ་པའི་ཁང་པའི་ཐོག་ཚང་མ་དང་དེའི་ལམ་སྲང་ཐམས་ཅད་ཀྱི་ནང་ན་མྱ་ངན་མ་གཏོགས་གང་ཡང་མེད་དོ། གང་ལ་ཟེར་ན། ངས་མོ་ཨབ་དེ་བཞིན་སུས་ཀྱང་མི་འདོད་པའི་བུམ་པ་ལྟར་བཅག་ཡོད།

³⁹ མོ་ཨབ་བསིལ་བུར་སྟོར་ཡོད། ཅེས་སྐད་རྒྱོབ་ཅིག། མོ་ཨབ་ལ་དམའ་འབེབས་བྱས་ཡོད། དེ་གྱང་གོག་ཏུ་གྱུར་ཡོད་པ་དང་། དེའི་མཐའ་འཁོར་གྱི་མི་རིགས་རྣམས་ཀྱིས་དེ་ལ་གད་མོ་གད་པ་བྱེད་ཅེས་ང་གཙོ་བོ་དཀོན་མཆོག་གིས་སྨྲས་པ་ཡིན་ནོ༎

མོ་ཨབ་བྲོས་མི་ཐར་རྒྱུ།

⁴⁰ གཙོ་བོ་དཀོན་མཆོག་གིས་བྱ་གླག་ཞིག་གི་ཤོག་པ་བརྐྱངས་ནས་ཐོ་ཤོག་བརྒྱབ་པ་ལྟར་མོ་ཨབ་སྟེང་མི་རིགས་ཞིག་གི་ཐོ་ཤོག་བརྒྱབ་པར་འགྱུར་བ་དང་།

⁴¹ གྲོང་ཁྱེར་དང་རྫོང་ཚོ་དབང་བཟུང་བྱ་རྒྱུའི་ཞལ་བཞེས་གནང་ངོ་། ཉིན་དེར་མོ་ཨབ་ཀྱི་དམག་མི་རྣམས་བུད་མེད་སྐྱེ་གཟེར་རྒྱབ་མཁན་ལྟར་འཇིགས་པར་འགྱུར།

⁴² མོ་ཨབ་དེ་བཞིན་མེད་པར་བཟོ་རྒྱུ་དང་། དེ་མི་རིགས་ཞིག་ཏུ་གནས་པར་མི་འགྱུར་རོ། གང་ལ་ཟེར་ན། དེས་ང་ལ་ངོ་ལོག་རྒྱབ་ཡོད་དོ།

⁴³ མོ་ཨབ་ཀྱི་མི་མང་ཆེད་དུ་འཇིགས་སྐྲག་དང་ས་དོང་དང་རྙི་སྒུག་ནས་ཡོད། གཙོ་བོ་དཀོན་མཆོག་གིས་བཀའ་གནང་བ་ཡིན་ནོ།

⁴⁴ འཇིགས་སྐྲག་ནས་བྲོས་ཐབས་བྱ་མཁན་རྣམས་ས་དོང་ནང་ལྷུང་བ་དང་ས་དོང་ནས་འཛེགས་ཐབས་བྱ་མཁན་རྣམས་རྙིར་འཚུད་པར་འགྱུར། གང་ལ་ཟེར་ན། གཙོ་བོ་དཀོན་མཆོག་གིས་མོ་ཨབ་ལ་སྟོར་བཤིགས་གནང་རྒྱུའི་དུས་ཚོད་གཏན་འབེབས་གནང་ཡོད།

⁴⁵ སྐྱབས་མེད་སྐྱབས་བཅོལ་བ་ཚོས་སྔར་རྒྱལ་པོ་སི་ཧོན་གྱི་རྒྱལ་སྲིད་སྐྱོངས་ཡུལ་ཧེཤ་བྷོན་ནང་སྲུང་སྐྱོབས་ཐོབ་ཐབས་བྱེད་ན་ཡང་དེ་མེ་ལྕེའི་ནང་འབར་བཞིན་ཡོད། ས་མཚམས་ཁག་དང་དམག་འཐབ་ལ་དགའ་མཁན་མོ་ཨབ་པ་ཚོའི་རི་ཙེ་རྣམས་མེས་བསྲེག་པར་བྱེད་དོ།

⁴⁶ མོ་ཨབ་ཀྱི་མི་མང་ལ་སྙིང་རེ་རྗེ། ཀེ་མོཤ་ལ་མཆོད་མཁན་མི་མང་ཚོ་མེད་པར་བཟོས་ཡོད་པ་དང་དེ་ཚོའི་བུ་དང་བུ་མོ་ཚོ་བཙོན་དུ་འཁྲིད་ཡོད་དོ།

⁴⁷ འོན་ཀྱང་མ་འོངས་པའི་དུས་སུ་གཙོ་བོ་དཀོན་མཆོག་གིས་ཡང་སྐྱར་མོ་ཨབ་པ་དར་རྒྱས་ཕུན་སུམ་ཚོགས་པར་མཛད་རྒྱུ་ཡིན། གཙོ་བོ་དཀོན་མཆོག་གིས་བཀའ་གནང་བ་དེ་ཚོ་ཚང་མ་མོ་ཨབ་ལ་ཡོང་བར་འགྱུར་རོ༎