ཡེར་མི་ཡཱ 47 - Tibetan Old Testament 2011

གཙོ་བོ་དཀོན་མཆོག་གིས་ཕེ་ལེ་ཤེད་ཀྱི་སྐོར་ལ་གསུང་འཕྲིན་གནང་བ།

¹ ཨི་ཇིབ་ཀྱི་རྒྱལ་པོས་གྷ་ཛ་ལ་མ་འཐབ་སྔོན་ལ་གཙོ་བོ་དཀོན་མཆོག་གིས་ང་ལ་ཕེ་ལེ་ཤེད་ཀྱི་སྐོར་ལ་གསུང་འཕྲིན་གནང་ངོ་།

² གཙོ་བོ་དཀོན་མཆོག་ཁོང་གིས་བཀའ་གནང་བར། ལྟོས་དང་བྱང་ནས་ཆུ་ནི་འཕེལ་ཞིང་ཡོད། རྒྱུགས་ཆུ་ཆུ་ལོག་བཞིན་དུ་རྒྱུགས་པར་བྱེད། དེ་ཡིས་ཡུལ་དང་དེའི་སྟེང་ཡོད་ཚད་དང་། གྲོང་ཚོ་དང་ནི་གནས་སྡོད་མང་པོ་འགེབ། མི་མང་རོགས་རམ་ཆེད་དུ་འབོད་བསྐུལ་བྱེད། ས་གཞིའི་སྟེང་ཡོད་ཚང་མས་དྲག་པོས་ངུ་།

³ དེ་ཚོས་རྟ་ཚོའི་རྨིག་པའི་སྒྲ་སྒྲོགས་དང་། ཤིང་རྟ་འཁོར་ལོ་ཚོ་ཡི་སྒྲ་སྒྲོགས་དང་། འཁོར་ལོ་འཁོར་བའི་ལྡིར་སྒྲ་བཅས་ཐོས་འགྱུར། ཕ་མ་ཚོས་བུ་ཕྲུག་ཚོར་རོགས་བྱེད་ཕྱིར་ཕྱི་མིག་མི་བལྟ་ཞིང་། དེ་ཚོའི་ཡན་ལག་དེ་ཚོས་ཕྱོགས་སུ་འཕྱར།

⁴ ཕེ་ལེ་ཤེད་མེད་པར་བཟོ་བའི་དུས་སླེབས་ཡོད། ཊ་ཡར་དང་སི་དོན་ནས་ཡོང་བའི་རོགས་རྣམས་མེད་པར་འགྱུར། གཙོ་བོ་དཀོན་མཆོག་ང་ཡིས་ཀི་རི་ཏི་གླིང་ཕྲན་ནས་ཡོང་མཁན་ཕེ་ལེ་ཤེད་པ་ཚང་མ་མེད་པར་བཟོས།

⁵ གྷ་ཛའི་མི་ཚོར་སྡུག་བསྔལ་ཆེན་པོ་བྱུང་། ཨཤ་ཀེ་ལོན་གྱི་མི་རྣམས་ཁུ་སིམ་གནས། ཕེ་ལེ་ཤེད་ཀྱི་ལྷག་འཕྲོས་གཞན་ཚང་མ། དུས་ཡུན་ཇི་ཙམ་རིང་ལ་མྱ་ངན་བྱེད།

⁶ ཁྱོད་ཀྱིས་གཙོ་བོ་དཀོན་མཆོག་གི་རལ་གྲི་དེ། དུས་ཡུན་ཇི་རིང་ཁྱེད་ཀྱིས་ང་ཚོར་གཅོད་གནང་ངམ། ཁྱེད་ཀྱི་རལ་གྲིའི་ཤུབ་ནང་ཕྱིར་འཛུལ་ནས། དེ་གར་བསྡད་ནས་ངལ་གསོས་རྒྱབ་ཅེས་ཁྱོད་ཚོས་འབོད།

⁷ འོན་ཀྱང་ངས་དེར་ལས་འགན་བྱེད་དགོས་སྤྲད་ཡོད་སྐབས། དེ་ཡིས་ངལ་གསོ་ཇི་ལྟར་བྱེད་ནུས་སམ། ཨཤ་ཀེ་ལོན་དང་མཚོ་འགྲམ་གནས་པའི་མིར། ང་ཡི་དེ་ཚོར་འཐབ་དགོས་བཀའ་བཏང་ཡོད༎