ཡེར་མི་ཡཱ 46 - Tibetan Old Testament 2011

ཀར་ཀེ་མིཤ་རུ་ཨི་ཇིབ་འཕམ་པ།

¹ གཙོ་བོ་དཀོན་མཆོག་གིས་ང་ལ་མི་མང་ཚོའི་སྐོར་ལ།

² ཨི་ཇིབ་ནས་མགོ་འཛུག་ནས་བཀའ་གནང་བ། ཡེ་ཧོ་ཡ་ཀིམ་ཡ་ཧུ་དཱའི་རྒྱལ་པོ་གནང་བའི་ལོ་བཞི་པའི་སྐབས་བྷེ་བྷི་ལོན་གྱི་རྒྱལ་པོ་ནེ་བུ་ཀད་ནེ་ཛར་གྱིས་གཙང་པོ་ཡུབ་རད་ཀྱི་ཉེ་འགྲམ་ཀར་ཀེ་མིཤ་རུ་འཕམ་པར་མཛད་པའི་ཨི་ཇིབ་ཀྱི་རྒྱལ་པོ་ནི་ཀོའི་དམག་མིའི་སྐོར་བཀའ་གནང་བ་འདི་ལྟར་ཡིན།

³ ཨི་ཇིབ་པ་ཡི་འགོ་འཛིན་སྐད་རྒྱབ་པ། ཁྱོད་ཚོའི་ཕུབ་རྣམས་གྲ་སྒྲིགས་དམག་སར་རྒྱུགས།

⁴ ཁྱོད་ཚོའི་རྟ་ལ་སྒ་ཆས་གཡོག་ནས་ཞོན། ཁྱོད་ཚོ་བྲལ་སྒྲིགས་བྱས་ནས་རྨོག་གྱོན་ཞིག། ཁྱོད་ཚོའི་མདུང་རྣམས་རྣོ་བཟོས་ཁྲབ་གྱོན་ཞིག

⁵ ངས་ཇི་མཐོང་གཙོ་བོ་དཀོན་མཆོག་བཀའ་འདྲི་གནང་། དེ་ཚོ་འཇིགས་ནས་ཕྱིར་འཐེན་བསྒྱུར་བཞིན་འདུག། དེ་ཚོའི་དམག་མི་རྣམས་ནི་ཕམ་པར་བྱས། དེ་ཚོ་འཇིགས་ནས་ཕྱི་མིག་མི་བལྟ་བར། གང་མགྱོགས་ཅི་མགྱོགས་དེ་ཚོ་བྲོས་བཞིན་འདུག།

⁶ མགྱོགས་པར་རྒྱུགས་ཀྱང་དེ་ཚོ་བྲོས་མི་འགྱུར། དམག་མི་རྣམས་ནི་ཐར་བར་མི་འགྱུར་རོ། བྱང་དུ་ཡུབ་རད་འགྲམ་དུ་འཁྱོར་ནས་རིལ།

⁷ ན་ཨེལ་ལྟ་བུར་འཕེལ་ཞིང་གཙང་ཆུ་ལྟར། ཆུ་ལོག་རྒྱུགས་པ་དེ་ནི་ཅི་ཞིག་ཡིན།

⁸ ཨི་ཇིབ་ཡུལ་ནི་ན་ཨེལ་ལྟ་བུར་འཕེལ། རྒྱུགས་ཆུ་ལྟ་བུ་གཙང་འགྲམ་ཆུ་ལོག་རྒྱུགས། ཨི་ཇིབ་ང་ནི་འཕེལ་ཞིང་ས་གཞི་འགེབ། གྲོང་ཁྱེར་དང་ནི་དེར་གནས་མི་མང་རྣམས། ང་ཡིས་མེད་པར་བཟོ་རྒྱུ་ཡིན་ཞེས་སྨྲས།

⁹ རྟ་ཚོར་འགྲོ་དགོས་པ་ཡི་བཀའ་གཏོང་ཞིག། ཤིང་རྟ་འཁོར་ལོར་རྒྱུགས་དགོས་བཀའ་གཏོང་ཞིག། ཨི་ཐི་ཨོ་པི་ཡ་ལིབ་ཡའི་ཕུབ་ཐོག་མི་རྣམས་དང་། རྩལ་དང་ལྡན་པའི་ལི་ཌི་ཡའི་མདའ་པ་ཚོ། དམག་དཔུང་ཁག་ཚོ་ཕྱིར་རུ་གཏོང་བར་བྱོས།

¹⁰ ཉིན་མོ་འདི་ནི་བླ་མེད་ཀུན་དབང་ལྡན་པའི་གཙོ་བོ་དཀོན་མཆོག་ཁོང་གི་ཉིན་མོ་ཡིན། དེ་རིང་ཁོང་གིས་དགྲ་ཤ་ལེན་པར་མཛད། དེ་རིང་ཁོང་གིས་དགྲ་བོར་ཆད་པ་གཏོང་། ཁོང་གི་རལ་གྲིས་མ་ཁེངས་བར་དུ་ཟ། དེ་ཚོའི་ཁྲག་ནི་འདོད་པ་མ་ཁེངས་འཐུང་། དེ་རིང་བྱང་དུ་ཡུབ་རད་འགྲམ། ཀུན་དབང་ལྡན་པས་ཁོང་གི་དགྲ་བོ་རྣམས། དམར་མཆོད་ཆེད་དུ་འབུལ་བར་མཛད་རྒྱུ་ཡིན།

¹¹ ཨི་ཇིབ་ཀྱི་མི་མང་གྷིལ་ཨད་དུ། སོང་ནས་དེ་རུ་སྨན་དེ་འཚོལ་བར་བྱོས། ཁྱོད་ཚོའི་སྨན་རྣམས་ཕན་མེད་དུ་འགྱུར་ཡོད། ཁྱོད་ཚོ་གང་གིས་ཀྱང་ནས་དྲག་མི་ཐུབ།

¹² ཁྱོད་ཚོའི་ངོ་ཚའི་གཏམ་དེ་མི་མང་ཐོས། ཁྱོད་ཚོ་ཚང་མ་ཐམས་ཅད་ངུ་བ་ཐོས། དམག་མི་དམག་མི་སྟེང་དུ་ཐོག་པར་འགྱུར། དེ་ཚོ་གཉིས་ཀ་ས་ལ་འགྱེལ་བར་འགྱུར༎

ནེ་བུ་ཀད་ནེ་ཛར་ཡོང་རྒྱུ།

¹³ བྷེ་བྷི་ལོ་ནི་ཡའི་རྒྱལ་པོ་ནེ་བུ་ཀད་ནེ་ཛར་ཨི་ཇིབ་དུ་འཐབ་པར་སླེབས་སྐབས་སུ་གཙོ་བོ་དཀོན་མཆོག་གིས་ང་ལ་བཀའ་གནང་བར།

¹⁴ ཨི་ཇིབ་ཡུལ་གྱི་གྲོང་ཁྱེར་ཁག་ནང་དང་། མིག་དྷོལ་མེམ་ཕིསི་ནི་ཏ་ཕན་ནེ། བཅས་ཀྱི་ནང་དུ་བཀའ་རྒྱ་སྒྲོགས་པར་བྱོས། ཁྱོད་ཚོ་རང་ཉིད་སྲུང་རྒྱུར་གྲ་སྒྲིགས་བྱོས། ཁྱོད་ཚོར་ཡོད་པ་དམག་ཏུ་མེད་པར་བཟོ།

¹⁵ ཁྱོད་ཚོའི་སྟོབས་ཆེན་ལྷ་ནི་ཨ་པིསི། གང་གི་དོན་དུ་ལྷུང་བར་འགྱུར་བ་ཡིན། གཙོ་བོ་དཀོན་མཆོག་ཁོང་གིས་ཁོ་ལ་མར་བརྡབས་གནང་།

¹⁶ ཁྱོད་ཚོའི་དམག་མི་ཐོག་ནས་འགྱེལ་ཡོད་དོ། དེ་ཚོ་གཅིག་གིས་གཅིག་ལ་འདི་ལྟར་སྨྲ། མགྱོགས་པར་རང་ཁྱིམ་མི་མང་སར་ལོག་འགྲོ། ངེད་ཚོ་དགྲ་བོའི་གྲི་ནས་བྲོས་ཐར་དགོས།

¹⁷ ཁོ་པའི་གོ་སྐབས་རླག་པའི་ཀུ་ཅོ་ཅན་གྱི་འུར་ཤོབ་ཤོད་མཁན་ཞེས། ཨི་ཇིབ་ཀྱི་རྒྱལ་པོར་མིང་གསར་སྤྲོད།

¹⁸ ང་ཀུན་དབང་ལྡན་པའི་གཙོ་བོ་དཀོན་མཆོག་རྒྱལ་པོ་ཡིན་ནོ། ང་ནི་གསོན་པོའི་དཀོན་མཆོག་དེ་ཡིན་ནོ། རི་རྣམས་ལས་མཐོ་བར་ཏ་བྷོར་རི་དང། རི་བོ་ཀར་མེལ་རྒྱ་མཚོ་ལས་མཐོ་བར་ཡོད་ལྟར། ཁྱོད་ཚོར་འཐབ་མཁན་གྱི་སྟོབས་ཤུགས་ཡོད་པར་འགྱུར།

¹⁹ ཨི་ཇིབ་ཡུལ་གྱི་མི་མང་ཁྱོད་ཚོ་རྣམས། བཙོན་དུ་འགྲོ་བར་བྱ་རྒྱུར་གྲ་སྒྲིགས་བྱོས། མེམ་ཕིསི་དེ་བཞིན་བྱེད་ཐང་གྱང་གོག་འགྱུར། སུ་ཡང་གནས་སྡོད་མི་བྱེད་མཁན་ཞིག་བཟོས།

²⁰ ཨི་ཇིབ་ཡུལ་འདི་བ་ཕྱུགས་རྫིག་པོ་ཞིག། བྱང་ནས་མདུང་བཙུག་སྦྲང་མས་འཐབ་ལྟར་འདྲ།

²¹ རྒྱུགས་ནས་བེའུ་ལྟར་གླས་པའི་དམག་མི་ཡིན། དེ་ཚོས་གདོང་ལེན་གྱིས་འཐབ་མ་ཐུབ་པར། དེ་ཚོ་ཚང་མ་ཁ་བསྒྱུར་བྲོས་ནས་སོ། དེ་ཚོ་སྟོར་བཤིགས་བྱ་བའི་དུས་ཚོད་དང་། དེ་ཚོའི་འཇིག་པའི་ཉི་མ་སླེབས་ཡོད་དོ།

²² དགྲ་བོའི་དམག་དཔུང་ཉེ་འགྲམ་དུ་སླེབས་སྐབས། ཨི་ཇིབ་པ་ཡི་ཤུགས་སྒྲས་སྦྲུལ་ལྟར་བྲོས། མི་ཚོས་ཤིང་སྡོང་གཅོད་པ་ལྟ་བུར། དེ་ཚོས་མོ་ལ་སྟ་རིས་འཐབ་པར་བྱེད།

²³ ཤིང་ནགས་སྟུག་པོ་དེ་ཚོ་མེད་པར་བཟོས། དེ་ཚོའི་མི་རྣམས་གྲངས་ཀ་མང་པོ་ཡོད། དམག་མིའི་གྲངས་འབོར་ཆ་ག་འབུ་ལས་མང་།

²⁴ ཨི་ཇིབ་པ་ཡི་མི་མང་ངོ་ཚར་འཇུག། དེ་ཚོ་བྱང་གི་མི་ཚོས་དབང་བར་འགྱུར། གཙོ་བོ་དཀོན་མཆོག་ང་ཡིས་སྨྲས་པ་ཡིན།

²⁵ མཐུ་སྟོབས་ཅན་གྱི་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་བཀའ་གནང་བ། ངས་ཐེ་བེསི་ཀྱི་ལྷ་ཨ་མོན་དང་ཨི་ཇིབ་དང་དེའི་ལྷ་ཚོ་དང་རྒྱལ་པོ་དང་བཅས་པར་ཉེས་ཆད་གཏོང་རྒྱུ་ཡིན། ངས་ཨི་ཇིབ་ཀྱི་རྒྱལ་པོ་དང་ཁོང་ལ་བློ་གཏད་ཞུ་མཁན་རྣམས་འཁྲིད་ནས།

²⁶ དེ་ཚོ་གསོད་པར་འདོད་མཁན་བྷེ་བྷི་ལོ་ནི་ཡའི་རྒྱལ་པོ་ནེ་བུ་ཀད་ནེ་ཛར་དང་ཁོང་གི་དམག་མིའི་ལག་ཏུ་རྩིས་སྤྲོད་བྱ་རྒྱུ་ཡིན། འོན་ཀྱང་དེའི་རྗེས་སུ་འདས་པའི་དུས་སྐབས་ལྟར་སླར་ཡང་ཨི་ཇིབ་དུ་མི་མང་སྡོད་པར་བྱེད་དོ། ང་གཙོ་བོ་དཀོན་མཆོག་གིས་སྨྲས་པ་ཡིན་ནོ༎

གཙོ་བོ་དཀོན་མཆོག་གི་མི་མང་སྐྱོབས་པར་མཛད་རྒྱུ།

²⁷ ང་ཡི་མི་མང་ཁྱོད་ཚོ་མ་འཇིགས་ཤིག། ཨིསི་རཱཨེལ་པ་ཚོ་དངངས་སྐྲག་མ་བྱེད་ཅིག། ཁྱོད་ཚོ་བཅོན་དུ་གནས་པའི་ཡུལ་དེ་བཞིན། ཐག་རིང་ཡུལ་ནས་ང་ཡིས་སྐྱོབས་པར་བྱེད། ཁྱོད་ཚོ་ཁྱིམ་དུ་ལོག་ནས་ཞི་བདེར་གནས། ཁྱོད་རྣམས་བཙན་པོར་གནས་པར་འགྱུར་བ་དང་། སུས་ཀྱང་ཁྱོད་ཚོར་འཇིགས་བསྐུལ་མི་བྱེད་དོ།

²⁸ ང་རང་ཡོང་ནས་ཁྱོད་ཚོ་སྐྱོབས་རྒྱུ་ཡིན། ང་ཡིས་ཁྱོད་ཚོ་ཁ་འཐོར་བཏང་བའི་མི་རིགས་ཚོ། དེ་ཚོ་ཚང་མ་མེད་པར་བཟོ་རྒྱུ་ཡིན། འོན་ཀྱང་ཁྱོད་ཚོར་མེད་པར་མི་བཟོའོ། ང་ཡིས་ཁྱོད་ཚོར་ཉེས་མེད་ངས་མི་འཇོག། འོན་ཀྱང་ངས་ཁྱོད་ཚོ་ཉེས་ཆད་གཏོང་སྐབས་དྲང་པོ་བྱ་རྒྱུ་ཡིན། གཙོ་བོ་དཀོན་མཆོག་ང་ཡིས་སྨྲས་པ་ཡིན༎