ཡེར་མི་ཡཱ 44 - Tibetan Old Testament 2011

གཙོ་བོ་དཀོན་མཆོག་གིས་ཨི་ཇིབ་དུ་ཡོད་པའི་ཨིསི་རཱཨེལ་པ་ཚོར་གསུང་འཕྲིན་གནང་བ།

¹ གཙོ་བོ་དཀོན་མཆོག་གིས་ཨི་ཇིབ་ཀྱི་མིག་དྷོལ་དང་ཐ་ཕན་ཧེས་དང་མེམ་ཕིསི་གྲོང་ཁྱེར་རྣམས་དང་ལྷོ་ཕྱོགས་ཁུལ་གྱི་ལུང་པར་གནས་སྡོད་བྱེད་མཁན་ཨིསི་རཱཨེལ་པ་རྣམས་ཀྱི་སྐོར་ལ་ང་ལ་བཀའ་མོལ་གནང་བྱུང་།

² ཀུན་དབང་ཅན་གྱི་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་བཀའ་གནང་བ། ཁྱོད་ཚོ་རང་ཉིད་ཀྱིས་ངས་ཡེ་རུ་ཤ་ལེམ་དང་གཞན་ཡ་ཧུ་དཱ་གྲོང་ཁྱེར་ཚང་མའི་ནང་སྟོར་བཤིགས་བཏང་ཡོད། ད་ལྟ་ཡང་དེ་ཚོ་གྱང་གོག་ཏུ་གནས་ཡོད་པ་དང་། དེར་སྡོད་མཁན་སུ་ཡང་མེད་དོ།

³ གང་ལ་ཟེར་ན། དེ་ཚོའི་མི་མང་གིས་ལས་ངན་པ་གྱིས་པ་དང་ང་ལ་ཁྲོ་རུ་འཇུག་ཡོད་དོ། དེ་ཚོས་ལྷ་གཞན་ཚོར་མཆོད་པ་ཕུལ་བ་དང་ཁྱོད་དང་དེ་ཚོའི་ཕ་མེས་ཚོས་རྩ་བ་ནས་མ་མཆོད་པའི་ལྷ་གཞན་ཚོའི་ཞབས་ཕྱི་ཞུ་ཡོད་དོ།

⁴ ངས་ངའི་ཞབས་ཕྱི་ལུང་སྟོན་པ་ཚོ་མུ་མཐུ་བཏང་ནས་ཁྱོད་ཚོར་ང་མི་དགའ་བའི་བྱ་བ་ཐབས་སྡུག་དེ་ཚོ་མ་བྱེད་ཅིག་སྨྲས་ཡོད་དོ།

⁵ འོན་ཀྱང་ཁྱོད་ཚོས་མི་ཉན་པ་མ་ཟད་དོ་སྣང་ཙམ་ཡང་མ་བྱས་པར། ཁྱོད་ཚོས་ལྷ་གཞན་ཚོར་དམར་མཆོད་འབུལ་རྒྱུ་སྲོལ་ངན་པ་དེ་ཚོ་དོར་མེད་དོ།

⁶ དེ་འདྲ་སོང་ཙང་ངའི་ཁྲོ་བ་དང་ཚིག་དྲག་པོ་ཡ་ཧུ་དཱའི་གྲོང་ཁྱེར་ཁག་དང་ཡེ་རུ་ཤ་ལེམ་གྱི་རྒྱ་ལམ་སྟེང་ཕབ་ནས་དེ་ཚོ་མེར་བསྲེགས་བཏང་བ་ཡིན་ནོ། དེ་ཚོ་གྱང་གོག་ཏུ་ལྷག་ཡོད་པ་དང་། དེང་སང་ཡང་འཇིགས་སུ་རུང་བའི་མཐོང་ཡུལ་དུ་འགྱུར་ཡོད་དོ།

⁷ དེ་འདྲ་སོང་ཙང་ང་ཀུན་དབང་ཅན་གྱི་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་ཁྱོད་ཚོས་བྱ་བ་ངན་པ་དེ་ལྟར་ཅིའི་ཕྱིར་བྱེད་བཞིན་ཡོད་འདྲི་རྒྱུ་ཡིན། ཁྱོད་ཚོས་ཁྱོ་དང་བུད་མེད་དང་བུ་ཕྲུག་དང་བྱིས་པ་བཅས་ཀྱི་སྟེང་རྐྱེ་ངན་ཕབ་ནས་ཁྱོད་ཚོའི་མི་མང་སུ་ཡང་མི་ལྷག་པ་བཟོས་འདོད་ཡོད་དམ།

⁸ ཁྱོད་ཚོ་གནས་སྡོད་བྱེད་ཡོད་པའི་ཨི་ཇིབ་ཡུལ་འདིར་ཁྱོད་ཚོས་སྐུ་འདྲར་མཆོད་ཅིང་ལྷ་གཞན་ཚོར་དམར་མཆོད་ཕུལ་ནས་ང་ཅི་ལ་ཁྲོ་རུ་འཇུག་གིས་ཡོད་དམ། ཁྱོད་ཚོས་ས་གཞིའི་མི་རིགས་ཡོངས་ཀྱིས་ཁྱོད་ཚོར་དམའ་འབེབས་བྱེད་པ་དང་། ཁྱོད་ཚོའི་མིང་དམོད་པར་འབོད་ཕྱིར་ཁྱོད་ཚོ་རང་ཉིད་མེད་པར་བཟོ་རྒྱུར་བྱེད་པ་ཡིན་ནམ།

⁹ ཁྱོད་ཚོའི་ཕ་མེས་ཚོ་དང་ཡ་ཧུ་དཱའི་རྒྱལ་པོ་ཚོ་དང་དེ་ཚོའི་བུད་མེད་དང་བཅས་ཁྱོད་ཚོ་དང་ཁྱོད་ཚོའི་ཆུང་མ་ཚོས་ཡ་ཧུ་དཱའི་གྲོང་ཁྱེར་ཚོ་དང་ཡེ་རུ་ཤ་ལེམ་གྱི་རྒྱ་ལམ་སྟེང་སྤྱོད་ཚུལ་ངན་པ་བྱས་པ་རྣམས་བརྗེད་སོང་ངམ།

¹⁰ འོན་ཀྱང་དུས་ད་རིང་བར་ཁྱོད་ཚོ་ཉམ་ཆུང་གྱིས་མེད་དོ། ཁྱོད་ཚོས་ང་ལ་གུས་ཞབས་བྱས་མེད་པ་དང་། ངས་ཁྱོད་ཚོ་དང་ཁྱོད་ཚོའི་ཕ་མེས་ཚོར་སྤྲད་པའི་བཀའ་ཁྲིམས་ལྟར་བསྡད་མེད་དོ།

¹¹ དེ་འདྲ་སོང་ཙང་ང་མཐུ་སྟོབས་ཅན་གྱི་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག། ཁྱོད་ཚོའི་རྒྱབ་འགལ་དུ་འགྱུར་ནས་ཡ་ཧུ་དཱ་ཚང་མ་མེད་པར་བཟོའོ།

¹² ཡ་ཧུ་དཱའི་མི་མང་ལྷག་མ་རྣམས་ཨི་ཇིབ་དུ་གནས་སྡོད་བྱེད་པར་འགྲོ་མཁན་རྣམས་ངས་གཅིག་ཀྱང་མ་ལུས་པར་མེད་པར་བཟོ་རྒྱུ་ཡིན། དེ་ཚོ་ཆེ་ཆུང་ཚང་མ་ཨི་ཇིབ་དུ་དམག་འམ་མུ་གེས་འཆི་བར་འགྱུར། དེ་ཚོ་འཇིགས་སུ་རུང་བའི་མཐོང་ཚུལ་དུ་འགྱུར་བ་དང་མི་མང་གིས་དེ་ཚོ་ལ་དམའ་འབེབས་བྱེད་པ་དང་དེ་ཚོའི་མིང་དམོད་ནས་འབོད་པར་བྱེད་དོ།

¹³ ངས་ཡེ་རུ་ཤ་ལེམ་ལ་དམག་དང་མུ་གེ་དང་ནད་ཡམས་བཅས་ཀྱི་ཆད་པ་བཏང་བ་ལྟར། ངས་ཨི་ཇིབ་དུ་སྡོད་མཁན་རྣམས་ལའང་ཆད་པ་གཏོང་རྒྱུ་ཡིན་ནོ།

¹⁴ ཡ་ཧུ་དཱའི་ལྷག་ལུས་མི་མང་ཨི་ཇིབ་དུ་གནས་སྡོད་བྱེད་པར་ཡོང་མཁན་གཅིག་ཀྱང་ཐར་བ་ཡང་ན་གསོན་པར་མི་འགྱུར། དེ་ཚོ་སླར་ཡང་གནས་སྡོད་བྱ་བར་སྡོད་མཁན་སུ་ཡང་ཡ་ཧུ་དཱར་ཕྱིར་ལོག་པར་མི་འགྱུར། འོན་ཀྱང་བཙན་བྱོལ་བ་འགའ་ཤས་ཕྱིར་ལོག་པར་འགྱུར་རོ།

¹⁵ དེ་ནས་ཁྱོ་ཚང་མའི་ཆུང་མ་ཚོས་ལྷ་གཞན་ལ་མཆོད་ཀྱི་ཡོད་པ་ཤེས་མཁན་རྣམས་དང་། དེར་ལངས་ནས་ཡོད་པ་བུད་མེད་ཡོངས་དང་ཨི་ཇིབ་ཀྱི་ལྷོ་ཕྱོགས་སུ་གནས་སྡོད་བྱེད་པའི་ཨིསི་རཱཨེལ་པ་ཚོ་དང་། མི་ཚོགས་ཆེན་པོ་བཅས་ནས་ང་ལ་འདི་ལྟར་སྨྲས་སོ།

¹⁶ གཙོ་བོ་དཀོན་མཆོག་གི་མཚན་ནས་ཁྱོད་ཀྱིས་ཇི་ལྟར་བཤད་པར་ང་ཚོ་ཉན་རྒྱུ་མ་ཡིན།

¹⁷ ང་ཚོས་བྱ་གི་ཡིན་བརྗོད་པ་ཚང་མ་ང་ཚོས་བྱ་རྒྱུ་ཡིན། ང་ཚོའི་ལྷ་མོ་མཐོ་རིས་ཀྱི་རྒྱལ་མོར་དམར་མཆོད་དང་། ང་ཚོའི་ཕ་མེས་ཚོ་དང་ང་ཚའི་རྒྱལ་པོ་དང་འགོ་འཁྲིད་ཚོས་ཡ་ཧུ་དཱའི་གྲོང་ཁྱེར་ཚོ་དང་ཡེ་རུ་ཤ་ལེམ་གྱི་རྒྱ་ལམ་ལ་བྱས་པ་ལྟར་ང་ཚོས་ཁོང་ལ་རྒུན་ཆང་གི་མཆོད་པ་འབུལ་རྒྱུ་ཡིན། དེ་དུས་ང་ཚོར་ཁ་ཟས་འབོལ་པོ་དང་ཡར་རྒྱས་ཕུན་སུམ་ཚོགས་པ་དང་དཀའ་ངལ་གང་ཡང་མ་བྱུང་ངོ་།

¹⁸ འོན་ཀྱང་ང་ཚོས་མཐོ་རིས་ཀྱི་རྒྱལ་མོར་དམར་མཆོད་འབུལ་རྒྱུ་དང་རྒུན་ཆང་གི་མཆོད་པ་འབུལ་རྒྱུ་མཚམས་འཇོག་བྱས་པ་ནས་བཟུང་ང་ཚོར་གང་ཡང་མེད་པ་བྱུང་བ་དང་ང་ཚོའི་མི་མང་དམག་དང་མུ་གེས་འཆི་བ་རེད་ཅེས་སྨྲས་སོ།

¹⁹ བུད་མེད་ཚོས་ང་ཚོའི་ནམ་མཁའི་རྒྱལ་མོའི་དབྱིབས་ལྟར་བག་ལེབ་སྲབ་པོ་བཟོས་ནས་མོ་ལ་དམར་མཆོད་ཕུལ་བ་དང་རྒུན་ཆང་གི་མཆོད་པ་འབུལ་སྐབས་ང་ཚོའི་ཁྱོ་ཚོས་ང་ཚོའི་གང་བྱས་པར་ངོས་ལེན་བྱས་ཡོད་ཅེས་སྨྲས་སོ།

²⁰ དེ་ནས་ངས་ཁྱོ་དང་སྐྱེད་དམན་རྣམས་ནས་ང་ལ་དེ་ལྟར་ལན་འདེབས་བྱ་མཁན་རྣམས་ལ་ངས་འདི་ལྟར་སྨྲས་པ་ཡིན།

²¹ ཁྱོད་དང་ཁྱོད་ཚོའི་ཕ་མེས་ཚོ་དང་ཁྱོད་ཚོའི་རྒྱལ་པོ་ཚོ་དང་འགོ་འཁྲིད་ཚོ་དང་ཡུལ་གྱི་མི་མང་བཅས་པས། ཡ་ཧུ་དཱའི་གྲོང་ཁྱེར་དང་ཡེ་རུ་ཤ་ལེམ་གྱི་རྒྱ་ལམ་དུ་དམར་མཆོད་ཕུལ་བ་དེ་ཁྱོད་ཚོའི་བསམ་བློར་གཙོ་བོ་དཀོན་མཆོག་གིས་མི་མཁྱེན་པ་དང་། ཁོང་གིས་བརྗེད་པ་རེད་བསམ་གྱི་འདུག་གམ།

²² ཉི་མ་དེ་རིང་ཁྱོད་ཚོའི་ཡུལ་གྱང་གོག་ཏུ་ལུས་ཡོད་པ་དང་། དེའི་ནང་སྡོད་མཁན་སུ་ཡང་མེད། དེ་ནི་འཇིགས་སུ་རུང་བའི་མཐོང་ཡུལ་དུ་འགྱུར་བ་དང་མི་མང་གི་དེའི་མིང་ནས་དམོད་པར་འབོད་ཡུལ་ཞིག་ཏུ་འགྱུར་ཡོད་དོ། གང་ལ་ཟེར་ན། གཙོ་བོ་དཀོན་མཆོག་གིས་ཁྱོད་ཚོའི་སྤྱོད་ངན་དང་ལག་ལེན་ངན་པ་ཁག་ལ་ཐུགས་བཟོད་གནང་མི་ཐུབ་བོ།

²³ ཁྱོད་ཚོས་ལྷ་གཞན་ལ་དམར་མཆོད་ཕུལ་བ་དང་གཙོ་བོ་དཀོན་མཆོག་གི་བཀའ་རྣམས་ལ་མ་ཉན་པར་ཁོང་གི་སྤྱན་སྔ་སྡིག་པ་གྱིས་པའི་རྐྱེན་གྱིས་ཁྱོད་ཚོར་ད་ལྟའི་རྐྱེན་ངན་དེ་བྱུང་བ་ཡིན་ནོ།

^24-25 ངས་མི་མང་རྣམས་དང་དམིགས་བསལ་དུ་བུད་མེད་ཚོ་ལ་མཐུ་སྟོབས་ཅན་གྱི་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་ཨི་ཇིབ་དུ་སྡོད་མཁན་ཡ་ཧུ་དཱའི་མི་མང་རྣམས་ལ་ཇི་ལྟར་བཀའ་གནང་བ་འདི་བཤད་པ་ཡིན། ཁྱོད་དང་ཁྱོད་ཚོའི་ཆུང་མ་ཚོས་མཐོ་རིས་ཀྱི་རྒྱལ་མོ་ལ་དམ་བཅའ་ནན་པོ་གྱིས་ཡོད། ཁྱོད་ཚོས་མོ་ལ་དམར་མཆོད་འབུལ་རྒྱུ་དང་རྒུན་ཆང་གི་མཆོད་པ་འབུལ་རྒྱུའི་དམ་བཅའ་བྱས་ཡོད་པ་དང་ཁྱོད་ཚོས་དམ་བཅའ་དེ་ཚོ་སྲུང་ཡོད་དོ། དེ་བས་ན་ཁྱོད་ཚོས་དམ་བཅའ་རྣམས་དང་ཁས་ལན་གྱིས་པ་རྣམས་སྲུངས་ཤིག

²⁶ འོན་ཀྱང་ད་ཆ་ང་གཙོ་བོ་དཀོན་མཆོག་གིས་ངའི་མཐུ་སྟོབས་ཅན་གྱི་མིང་ཐོག་ཨི་ཇིབ་དུ་ཡོད་པའི་ཨིསི་རཱཨེལ་པ་རྣམས་ལ་དམ་བཅའ་བྱས་པར་ཉོན་ཞིག ད་ཕྱིན་ཆད་ངས་ཁྱོད་ཚོ་སུས་ཀྱང་ལ་ང་གསོན་པའི་བླ་ན་མེད་པའི་གཙོ་བོ་དཀོན་མཆོག་གི་མཚན་ནས་མནའ་བསྐྱེལ་རྒྱུ་ཡིན་ཟེར་ནས་ངའི་མིང་ནམ་ཡང་བེད་སྤྱོད་བྱེད་དུ་འཇུག་རྒྱུ་མིན།

²⁷ ངས་ཁྱོད་ཚོ་འཕེལ་རྒྱས་མི་འགྲོ་བར་འོན་ཀྱང་མེད་པར་སོང་བར་བལྟ་རྒྱུ་ཡིན། ཁྱོད་ཚོ་གཅིག་ཀྱང་མ་ལྷག་བར་ཁྱོད་ཚོ་ཚང་མ་དམག་ཡང་ན་ནད་ཡམས་ཀྱིས་འཆི་བར་འགྱུར་རོ།

²⁸ འོན་ཀྱང་ཁྱོད་ཚོ་འགའ་ཤས་འཆི་བ་ལས་ཐར་བ་དང་ཨི་ཇིབ་ནས་ཡ་ཧུ་དཱར་ཕྱིར་ལོག་ཐུབ་པར་འགྱུར། དེ་ནས་གསོན་པོར་གནས་པ་ཚོས་ངའི་གཏམ་དང་དེ་ཚོའི་གཏམ་རྣམས་ལ་སུའི་བདེན་པར་ཡིན་པ་རྟོགས་པར་འགྱུར་རོ།

²⁹ ང་གཙོ་བོ་དཀོན་མཆོག་གིས་ཁྱོད་ཚོར་ཡུལ་འདིར་ཉེས་ཆད་གཏོང་རྒྱུ་དང་། ངས་ཁྱོད་ཚོར་སྟོར་བཤིགས་གཏོང་རྒྱུའི་ཁས་ལེན་གྱིས་པ་དངོས་སུ་སྒྲུབ་པའི་རྟགས་མཚན་སྤྲོད་རྒྱུ་ཡིན།

³⁰ ངས་ཡ་ཧུ་དཱའི་རྒྱལ་པོ་ཛེ་དེ་ཀི་ཡཱ་ཁོང་གི་དགྲ་བོས་ཁོང་གསོད་པར་འདོད་མཁན་བྷེ་བྷི་ལོན་གྱི་རྒྱལ་པོ་ནེ་བུ་ཀད་ནེ་ཛར་གྱི་ལག་ཏུ་རྩིས་སྤྲོད་གྱིས་པ་ལྟར། ངས་ཨི་ཇིབ་ཀྱི་རྒྱལ་པོ་ཧོཕ་ར་ཡང་ཁོང་གི་དགྲ་བོ་ཁོང་གསོད་པར་འདོད་མཁན་གྱི་ལག་ཏུ་རྩིས་སྤྲོད་བྱ་རྒྱུ་ཡིན་ནོ༎