ཡེར་མི་ཡཱ 41 - Tibetan Old Testament 2011

¹ ལོ་དེའི་ཟླ་བ་བདུན་པར་ཨེ་ལི་ཤ་མའི་ཚ་བོ་དང་ནེ་ཐན་ཡཱའི་བུ་ཨིཤ་མ་ཨེལ་རྒྱལ་པོའི་ཁྱིམ་ཚང་གི་ནང་མི་དཔོན་པོའི་གཙོ་བོའི་གྲས་ཡིན་པ་དེ། མི་བཅུ་དང་བཅས་མིཛ་པཱ་རུ་གྷེ་དལ་ཡཱ་མཇལ་བར་ཕྱིན་ནོ། སྐབས་དེར་དེ་ཚོ་ཚང་མ་མཉམ་དུ་ཁ་ཟས་བཟས་བཞིན་ཡོད་པ་དང་།

² ཨིཤ་མ་ཨེལ་དང་ཁོང་གི་མི་བཅུ་པོས་རང་གི་རལ་གྲི་བཏོན་ནས་གྷེ་དལ་ཡཱ་བསད་དོ།

³ ཨིཤ་མ་ཨེལ་གྱིས་མིཛ་པཱ་རུ་གྷེ་དལ་ཡཱ་མཉམ་དུ་ཡོད་པའི་ཨིསི་རཱཨེལ་པ་རྣམས་དང་བྷེ་བྷི་ལོན་པའི་དམག་མི་དེར་ཡོད་པ་བཅས་ཚང་མ་བསད་དོ།

⁴ སང་ཉིན་དེར་སུས་ཀྱང་གྷེ་དལ་ཡཱ་བཀྲོང་པ་མ་ཐོས་པའི་སྔོན་ལ།

⁵ ཤེ་ཀེམ་དང་ཤི་ལཱོ་དང་ས་མར་ཡ་ནས་མི་བརྒྱད་ཅུ་ཐམ་པ་འབྱོར་རོ། དེ་ཚོས་རང་གི་སྨ་ར་བཞར་ཡོད་པ་དང་རང་གི་གོས་ཧྲལ་ནས་རང་གི་གྲིས་རྨས་པ་དང་། དེ་ཚོས་འབྲུ་དང་བདུག་སྤོས་མཆོད་ཁང་དུ་འབུལ་བར་འཁྱེར་བཞིན་ཡོད།

⁶ དེར་བརྟེན་ཨིཤ་མ་ཨེལ་མིཛི་པཱ་ནས་དེ་ཚོ་དང་འཕྲད་པར་ངུ་བཞིན་ཕྱིན་ནོ། ཁོ་དེ་ཚོ་སར་འབྱོར་བ་དང་ཁོས་གྷེ་དལ་ཡཱ་ལ་མཇལ་བར་ཕེབས་རོགས་གནང་ཞེས་སྨྲས་སོ།

⁷ དེ་ཚོ་གྲོང་ཁྱེར་ནང་འབྱོར་མ་ཐག་ཨིཤ་མ་ཨེལ་དང་ཁོའི་མི་ཚོས་དེ་ཚོ་བསད་ནས་དེ་ཚོའི་རོ་ཁྲོན་པའི་ནང་དུ་དབྱུགས་སོ།

⁸ འོན་ཀྱང་དེའི་ནང་ཡོད་མི་བཅུ་པོས་ཨིཤ་མ་ཨེལ་ལ་ང་ཚོ་མ་གསོད་རོགས་གནང་ཞེས་སྨྲས་སོ། ང་ཚོའི་ཞིང་ཁའི་ནང་འབྲུ་དང་གྲོ་དང་སྐྱུ་རུའི་སྣུམ་དང་སྦྲང་རྩི་བཅས་སྦས་ཡོད་ཅེས་སྨྲས་པས། དེར་བརྟེན་ཁོས་དེ་ཚོ་མ་བསད་དོ།

⁹ ཨིཤ་མ་ཨེལ་གྱི་ཁོས་བསད་པའི་རོ་དབྱུགས་སའི་ཁྲོན་པ་དེ་བཞིན་རྒྱལ་པོ་ཨ་སས་ཨིསི་རཱཨེལ་གྱི་རྒྱལ་པོ་བྷ་ཤས་ཁོང་ལ་འཐབ་རྒོལ་བྱ་སྐབས་བྲུས་པས་ཁྲོན་པ་ཆེན་པོ་ཞིག་ཡོད། ཨིཤ་མ་ཨེལ་གྱིས་ཁྲོན་པ་དེའི་ནང་རོས་བཀང་ངོ་།

¹⁰ དེ་ནས་ཁོས་དམག་སྤྱི་ནེ་བུ་ཛ་ར་དྷན་གྱིས་གྷེ་དལ་ཡཱའི་བལྟ་རྟོགས་འོག་བཞག་པའི་རྒྱལ་པོའི་སྲས་མོ་ཚོ་དང་མིཛ་པཱ་རུ་ལྷག་ལུས་མི་མང་ཚང་མ་བཙོན་པ་བཟོས་སོ། ཨིཤ་མ་ཨེལ་གྱིས་བཙོན་པ་རྣམས་འཁྲིད་ནས་ཨམ་མོན་གྱི་མངའ་ཁུལ་གྱི་ཕྱོགས་སུ་ཕྱིན་ནོ།

¹¹ ཡོ་ཧ་ནན་དང་ཁོ་མཉམ་ཡོད་པའི་འགོ་འཁྲིད་ཚོས་ཨིཤ་མ་ཨེལ་གྱིས་ཁྲིམས་འགལ་གྱི་ཉེས་པ་བྱས་པ་རྣམས་ཐོས་སོ།

¹² དེར་བརྟེན་དེ་ཚོས་རང་གི་མི་ཆོ་དང་མཉམ་དུ་ཁོ་རྗེས་སུ་སོང་བ་དང་གྷི་བི་ཨོན་གྱི་ཆུ་རྫིང་ཆེན་པོ་ཞིག་གི་ཉེ་འགྲམ་དུ་རྗེས་ཟིན་ནོ།

¹³ ཨིཤ་མ་ཨེལ་གྱི་བཙོན་པ་ཚོས་ཡོ་ཧ་ནན་དང་དམག་མི་འགོ་འཁྲིད་ཚོ་མཐོང་སྐབས་དེ་ཚོ་དགའ་བ་དང་།

¹⁴ ཁ་བསྒྱུར་ནས་དེ་ཚོའི་ཕྱོགས་སུ་རྒྱུགས་སོ།

¹⁵ འོན་ཀྱང་ཨིཤ་མ་ཨེལ་དང་ཁོའི་མི་བརྒྱད་ཡོ་ཧ་ནན་ནས་ཐར་བ་དང་ཨམ་མོན་གྱི་ཡུལ་དུ་བྲོས་སོ།

¹⁶ དེ་ནས་ཡོ་ཧ་ནན་དང་དམག་མི་འགོ་འཁྲིད་ཀྱིས་ཨིཤ་མ་ཨེལ་གྱིས་གྷེ་དལ་ཡཱ་དང་དམག་མི་ཚོ་དང་བུད་མེད་དང་ཕྲུ་གུ་དང་ཉུག་རུམ་པ་དང་བཅས་བསད་ནས་མིཛ་པཱ་ནས་བཙོན་དུ་འཁྲིད་པའི་མི་མང་གི་འགན་བླངས་སོ།

^17-18 དེ་ཚོ་བྷེ་བྷི་ལོ་ནི་ཡ་པ་ཚོར་འཇིགས་བཞིན་ཡོད། གང་ལ་ཟེར་ན། བྷེ་བྷི་ལོ་ནི་ཡའི་རྒྱལ་པོས་ཡུལ་གྱི་སྲིད་སྐྱོངས་པར་བསྐོས་པ་གྷེ་དལ་ཡཱ་ལ་ཨིཤ་མ་ཨེལ་གྱིས་བསད་ཡོད་དོ། དེར་བརྟེན་དེ་ཚོ་བྷེ་བྷི་ལོ་ནི་ཡ་པ་ཚོ་ལས་ཐར་བའི་ཆེད་ཨི་ཇིབ་ཕྱོགས་སུ་ཐོན་ནོ། ལམ་དུ་དེ་ཚོ་བྷེད་ལེ་ཧེམ་གྱི་ཉེ་འགྲམ་དུ་ཀིམ་ཧམ་དུ་བསྡད་དོ༎