ཡེར་མི་ཡཱ 4 - Tibetan Old Testament 2011

འགྱོད་བཤགས་བྱེད་པར་འབོད་པ།

¹ གཙོ་བོ་དཀོན་མཆོག་གིས་བཀའ་གནང་བ། ཨིསི་རཱཨེལ་མི་མང་ཁྱོད་ཚོ་ཁ་ལོག་འདོད་ཡོད་ན། ངའི་ཕྱོགས་སུ་ལོག་ཅིག། གལ་ཏེ་ཁྱོད་ཀྱིས་ངས་སྡང་བར་བྱེད་པའི་སྐུ་འདྲ་རྣམས་ཕྱིར་དབྱུགས་ནས། ང་ལ་དམ་ལྡན་དུ་འགྱུར་ན།

² ཁྱོད་ཀྱིས་ངའི་མིང་ནས་མནའ་བསྐྱེལ་བ་དེ་འོས་པ་ཡིན་ནོ། དེ་ནས་མི་རིགས་ཡོངས་ནས་ང་ལ་བྱིན་རླབས་སྟེར་བར་འབོད་པ་དང་། ཚང་མས་ང་ལ་བསྟོད་པར་བྱེད་དོ།

³ གཙོ་བོ་དཀོན་མཆོག་གིས། ཡ་ཧུ་དཱ་དང་ཡེ་རུ་ཤ་ལེམ་གྱི་མི་མང་ལ་བཀའ་གནང་བ། ཁྱོད་ཀྱིས་ཞིང་མ་རྨོས་པ་རྣམས་རྨོས་ཤིག། ཚེར་མའི་ཁྲོད་དུ་རང་གི་ས་བོན་མ་འདེབས་ཤིག།

⁴ ཡ་ཧུ་དཱ་དང་ཡེ་རུ་ཤ་ལེམ་གྱི་མི་མང་ཚོ་ཁྱོད་ཀྱི་དམ་བཅའ་ཁྱོད་ཀྱི་གཙོ་བོ་དཀོན་མཆོག་ང་ལ་འཇོག་ཅིང་ཁྱོད་རང་ཉིད་ང་ལ་བསྔོས་ཤིག དེ་ལྟར་ཁྱོད་ཀྱིས་མ་གྱིས་པ་ཡིན་ན་ངའི་ཁྲོ་བ་མེ་ལྟར་འབར་རོ། གང་ལ་ཟེར་ན། ཁྱོད་ཀྱིས་ལས་ངན་གྱིས་པའི་རྐྱེན་གྱིས་ཡིན་ནོ། དེ་འབར་བ་དང་དེ་གསོད་པར་བྱ་མཁན་སུ་ཡང་མེད་པར་འགྱུར་རོ༎

ཡ་ཧུ་དཱར་བཙན་འཛུལ་གྱི་ཉེན་བརྡ་གཏོང་བ།

⁵ ཡུལ་དེ་ཡོངས་སུ་དམག་དུང་འབུད་པར་བྱོས། གསལ་པོ་དང་ནི་སྐད་ཤུགས་ཆེན་པོ་རྒྱོབ། ཡ་ཧུ་དཱ་དང་ཡེ་རུ་ཤ་ལེམ་གྱི་མི་མང་ལ། གྲོང་ཁྱེར་བཙན་པོ་བཟོས་པའི་ནང་རྒྱུགས་ཤིགས་ཅེས་སྨྲོས་ཤིག

⁶ ཛི་ཡོན་ཕྱོགས་ལ་ལམ་བསྟན་ཤིག། བཙན་སར་རྒྱུགས་ལ་འགོར་པོ་མ་བྱེད་ཅིག། གཙོ་བོ་དཀོན་མཆོག་ཁོང་གི་བྱང་ཕྱོགས་ནས། རྐེན་ངན་དང་ནི་འཇིགས་ཆེན་འབེབས་པར་མཛད།

⁷ སེང་གེ་ཡིབ་པའི་ཁུལ་ནས་ཐོན་པ་ལྟར། མི་རིགས་མེད་པར་བཟོ་མཁན་དེ་ཐོན་ཡོད། ཡ་ཧུ་དཱ་ནི་མེད་པར་མཛད་ཁོང་ཕེབས། ཡ་ཧུ་དཱ་ཡི་གྲོང་ཁྱེར་རྣམས་ནི་གྱང་གོག་འགྱུར། དེའི་ནང་སུ་ཡང་སྡོད་པར་མི་བྱེད་དོ།

⁸ དེར་བརྟེན་རྩ་ཕད་གྱོན་ནས་ངུ་ཞིང་མྱ་ངན་བྱོས། གང་ལ་ཟེར་ན་གཙོ་བོ་དཀོན་མཆོག་གིས། ཐུགས་ཁྲོ་དྲག་པོ་ཡ་ཧུ་དཱ་ནས་ཡོལ་མེད་དོ།

⁹ གཙོ་བོ་དཀོན་མཆོག་གིས་གསུངས་པར། ཉིན་དེར་རྒྱལ་པོ་ཚོ་དང་ལས་བྱེད་པ་ཚོའི་སེམས་ཤུགས་ཆགས་པ་དང་། བླ་མ་ཚོ་ཧོན་ཐོར་ཞིང་ལུང་སྟོན་པ་རྣམས་ཧ་ལས་པར་འགྱུར།

¹⁰ དེ་ནས་ངས་ཞུས་པ་ཡིན། བླ་ན་མེད་པའི་གཙོ་བོ་དཀོན་མཆོག་ཁྱོད་ཀྱིས་ཡེ་རུ་ཤ་ལེམ་གྱི་མི་མང་ཚོར་བསླུ་འཁྲིད་ཆ་ཚང་གནང་ཡོད། གང་ལ་ཟེར་ན། ཁྱོད་ཀྱིས་ཞི་བདེ་ཡོང་གསུངས་ན་ཡང་དེ་ཚོའི་མཛིང་པར་རལ་གྲི་འདུག

¹¹ ཡེ་རུ་ཤ་ལེམ་གྱི་མི་མང་ལ་ཤིན་ཏུ་འབར་བའི་རླུང་འཆུབ་བྱེ་ཐང་ནས་དེ་ཚོའི་ཕྱོགས་སུ་ཡོང་ཟིན་ཡོད་པ་བཤད་པའི་དུས་ཚོད་སླེབས་བཞིན་ཡོད། དེ་སོག་མ་འཁྱེར་མཁན་རླུང་དལ་པོ་ལྟར་མ་ཡིན་ནོ།

¹² གཙོ་བོ་དཀོན་མཆོག་གི་བཀའ་ལྟར་ཡོང་བའི་རླུང་དེ་དེ་ལས་ཧ་ཅང་ཤུགས་ཆེ་བ་ཡོད། དེ་ནི་གཙོ་བོ་དཀོན་མཆོག་སྐུ་ཉིད་ནས་ཁོང་གི་མི་མང་ལ་ཁྲིམས་ཀྱིས་དཔྱད་མཚམས་གསལ་སྒྲགས་གནང་བ་དེ་ཡིན་ནོ༎

ཡ་ཧུ་དཱ་ལ་དགྲ་བོ་ཚོས་མཐའ་བསྐོར་བ།

¹³ ལྟོས་དང་དགྲ་བོ་སྤྲིན་ལྟར་ཡོང་ཟིན་འདུག། ཁོའི་དམག་གི་ཤིང་རྟ་འཁོར་ལོ་དེ་རླུང་འཚུབ་འཁྱིལ་བ་ལྟར་དང་། ཁོའི་རྟ་རྣམས་བྱ་གླག་ལས་མགྱོགས་པ་ཡོད་དོ། ང་ཚོ་ཕམ་སོང་། ང་ཚོ་འཇིགས་སོང་ངོ་།

¹⁴ ཡེ་རུ་ཤ་ལེམ་ཁྱོད་སྐྱོབས་པའི་ཆེད་ཁྱོད་ཀྱི་སེམས་ནས་ངན་པ་རྣམས་འཁྲུས་ཤིག ཁྱོད་ཀྱིས་སྡིག་པའི་ལས་ཀྱི་བསམ་བློ་དེ་བཞིན་དུས་ཡུན་ཇི་ཙམ་བར་བསམ་བཞིན་སྡོད་དོ།

¹⁵ དཱན་གྱི་གྲོང་ཁྱེར་ནས་བང་ཆེན་ཚོས་ཨེཕ་ར་ཡིམ་གྱི་རི་བོའི་རྩེ་ནས་གཏམ་ངན་རྣམས་གསལ་སྒྲགས་བྱས་སོ།

¹⁶ ཐག་རིང་ཡུལ་ནས་དགྲ་བོ་ཡོང་བཞིན་ཡོད་པ་དེ་ཚོས་མི་རིགས་ཚོར་ཉེན་བརྡ་གཏོང་བ་དང་། ཡེ་རུ་ཤ་ལེམ་ལ་ཤོད་དུ་ཡོང། དགྲ་བོ་དེ་ཚོས་ཡ་ཧུ་དཱའི་གྲོང་ཁྱེར་ཚོ་ལ་སྐད་ཆེན་པོས་ངོ་རྒོལ་བྱེད་པ་དང་།

¹⁷ མི་དེ་ཚོས་ཞིང་ཁ་སྲུང་བ་ལྟར་ཡེ་རུ་ཤ་ལེམ་གྱི་མཐའ་བསྐོར་རོ། གང་ལ་ཟེར་ན། མོའི་མི་མང་ཚོས་གཙོ་བོ་དཀོན་མཆོག་ལ་ངོ་ལོག་བྱས་ཡོད་ཅེས་གཙོ་བོ་དཀོན་མཆོག་གིས་བཀའ་གནང་ངོ་།

¹⁸ ཡ་ཧུ་དཱ་ཁྱོད་ཀྱིས་བྱེད་སྟངས་དང་སྤྱོད་ལམ་ཇི་ལྟར་གྱིས་པའི་དབང་གིས་དེ་ཚོ་ཚང་མ་རང་གི་སྟེང་དུ་འཁྱེར་ཡོང་བ་ཡིན། ཁྱོད་ཀྱི་སྡིག་པའི་རྐྱེན་གྱིས་སྡུག་བསྔལ་དེ་མྱོང་དགོས་བྱུང་། དེས་ཁྱོད་ཀྱི་སྙིང་ལ་གྲི་ཟུག་ཡོད་དོ༎

ཡེར་མི་ཡཱས་ཁོང་གི་མི་མང་གི་དོན་ལ་མྱ་ངན་གནང་བ།

¹⁹ ན་ཚ་དེ་ལ་ང་ཡི་བཟོད་མི་ཐུབ། ཚབ་ཚུབ་ངང་ནས་ངའི་སྙིང་བརྡུང་བཞིན་འདུག། ང་ཡི་དམག་དུང་དམག་སྒྲ་ཐོས་པས་ན། ང་ནི་ཁ་ཁུ་སིམ་པོར་སྡོད་མི་ཐུབ།

²⁰ རྐྱེན་ངན་གཅིག་གིས་རྗེས་ལ་གཅིག་བྱུང་བས། ལུང་པ་ཡོངས་རྫོགས་གྱང་གོག་ལྟ་བུར་འགྱུར། གློ་བུར་ང་ཚོའི་གུར་རྣམས་མེད་པར་བཟོས། དེ་ཚོའི་ཡོལ་བ་རྣམས་ནི་དུམ་བུར་ཧྲལ།

²¹ ང་ཡི་དུས་ཡུན་ཇི་ཙམ་དམག་འཐབ་བལྟ། དམག་དུང་འབུད་པ་ཉན་བཞིན་སྡོད་དགོས་སམ།

²² གཙོ་བོ་དཀོན་མཆོག་ཁོང་གིས་བཀའ་གནང་བ། ང་ཡི་མི་མང་གླེན་པ་འབའ་ཞིག་ཡིན། དེ་ཚོས་ང་ལ་ངོ་མི་ཤེས་པར་བྱེད། དེ་ཚོ་རྣམས་ནི་ཕྲུ་གུ་གླེན་པ་ཡིན། དེ་ཚོ་ལ་ནི་གོ་ཤེས་མེད་པ་ཡིན། དེ་ཚོ་ལས་ངན་བྱ་རྒྱུར་མཁས་པ་ཡིན། འོན་ཀྱང་བཟང་ལས་བྱ་རྒྱུར་མི་ཤེས་སོ༎

ཡེར་མི་ཡཱ་ལ་ཡོང་གི་ཡོད་པའི་འཇིགས་པའི་ཞལ་གཟིགས།

²³ ང་ཡི་ས་གཞི་ལ་ནི་བལྟ་སྐབས་སུ། དེ་ནི་སྟོངས་པ་ཕན་མེད་ཞིག་རེད་འདུག། ནམ་མཁར་བལྟ་སྐབས་དེ་ལ་འོད་མི་འདུག།

²⁴ ང་ཡི་རི་བོར་ཚོར་བལྟས་པས་དེ་འགུལ་འདུག། རི་ཕྲན་རྣམས་ནི་ཕར་ཚུར་གཡོ་འགུལ་བྱེད།

²⁵ དེ་རུ་མི་མང་ཡོད་པ་ངས་མ་མཐོང་། བྱེའུ་ཚོ་ཡང་དེ་ནས་འཕུར་ཟིན་འདུག།

²⁶ ས་ལུད་འཛོམས་པོའི་ས་དེ་བྱེ་ཐང་འགྱུར། དེ་ཚོའི་གྲོང་ཁྱེར་རྣམས་ནི་གྱང་གོག་འགྱུར། དེ་ནི་དཀོན་མཆོག་དྲག་པོ་ཁྲོས་རྐྱེན་ཡིན།

²⁷ (གཙོ་བོ་དཀོན་མཆོག་གིས། ས་གཞི་ཡོངས་སུ་འབྲོག་སྟོང་དུ་འགྱུར་རོ། འོན་ཀྱང་ཁོང་གིས་དེ་ཆ་ཚང་མེད་པར་བཟོ་གནང་གི་མིན་གསུངས་ཡོད་པ་ཡིན།)

²⁸ ས་གཞིས་མྱ་ངན་བྱེད་པར་འགྱུར་བ་དང་། ནམ་མཁའ་དེ་ནི་མུན་པར་བསྒྱུར་བར་བྱེད། གཙོ་བོ་དཀོན་མཆོག་ཁོང་གི་བཀའ་གནང་བ། ཁོང་གི་ཐུགས་ལ་འགྱུར་བ་འགྲོ་མི་སྲིད། ཁོང་གིས་ཐུགས་ཐག་བཅད་པས་ཕྱིར་མི་གཟིགས།

²⁹ རྟ་དང་མདའ་པའི་སྒྲ་ཐོས་ཚང་མ་བྲོས། འགའ་ཤས་ཤིང་ནགས་ནང་དུ་བྲོས་པ་དང་། འགའ་ཤས་བྲག་གི་ཁྲོད་དུ་འཛེགས་པར་བྱེད། གྲོང་ཁྱེར་ཚང་མ་སྟོང་པར་ལུས་པར་འགྱུར། དེ་ཚོའི་ནང་དུ་སུ་ཡང་སླར་སྡོད་མི་འགྱུར།

³⁰ ཡེ་རུ་ཤ་ལེམ་ཁྱོད་ནི་འཇིགས་པར་འགྱུར། ཁྱོད་ཀྱི་གྱོན་གོས་དམར་པོ་ཅི་ལ་གྱོན། རྒྱན་ཆ་གྱོན་ཞིང་མིག་མཚོན་ཅི་ལ་བྱུག། ཁྱོད་ནི་རང་ཉིད་དོན་མེད་མཛེས་ཅན་བཟོས། ཁྱོད་ཀྱི་སྙིང་སྡུག་རྣམས་ཀྱིས་ཁྱོད་ལ་སྤངས་ཡོད་དོ། དེ་ཚོས་ཁྱོད་ལ་གསོད་པར་འདོད་པ་ཡིན།

³¹ སྐྱེ་གཟེར་ཅན་གྱི་བུད་མེད་ཀྱི་སྐད་ལྟར། བུད་མེད་སྔོན་སྐྱེས་བྱེད་པའི་སྐད་ལྟར་ངས་ཐོས། དེ་ནི་ཡེ་རུ་ཤ་ལེམ་དབུགས་རྡུབ་གཏོང་ཡིན། མོ་ཡི་ལག་བརྐྱངས་ང་ནི་འཇིག་སོང་ཞེས། དེ་ཚོས་ང་ལ་གསོད་པའི་ཆེད་དུ་ཡོང་ཟེར་སྨྲས༎