ཡེར་མི་ཡཱ 39 - Tibetan Old Testament 2011

ཡེ་རུ་ཤ་ལེམ་སྟངས་པ།

¹ ཛེ་དེ་ཀི་ཡཱ་ཡ་ཧུ་དཱ་པའི་རྒྱལ་པོ་གནང་བའི་ལོ་དགུ་པའི་ཟླ་བ་བཅུ་པར་བྷེ་བྷི་ལོ་ནི་ཡའི་རྒྱལ་པོ་ནེ་བུ་ཀད་ནེ་ཛར་གྱིས་ཁོང་གི་དམག་དཔུང་ཆ་ཚང་དང་བཅས་པས་ཡེ་རུ་ཤ་ལེམ་ལ་བཙན་རྒོལ་བྱས་སོ།

² ཛེ་དེ་ཀི་ཡཱ་རྒྱལ་པོ་གནང་བའི་ལོ་བཅུ་གཅིག་པའི་ཟླ་བ་བཞི་པའི་ཚེས་དགུ་པར་གྲོང་ཁྱེར་གྱི་ལྕགས་རི་རྣམས་བཤིགས་སོ།

³ (ཡེ་རུ་ཤ་ལེམ་བཙན་བཟུང་བྱ་སྐབས་བྷེ་བྷི་ལོ་ནི་ཡའི་རྒྱལ་པོའི་ལས་བྱེད་པ་མཐོ་བ་རྣམས་དང་། ནེར་གལ་ས་རེ་ཟེར་དང་སམ་གར་ནེ་བྷོ་དང་སར་སེ་ཀིམ་དང་གཞན་ནེར་གལ་ས་རེ་ཟེར་བཅས་ཡོང་ནས་རྒྱལ་སྒོའི་དཀྱིལ་དུ་བསྡད་དོ།)

⁴ རྒྱལ་པོ་ཛེ་དེ་ཀི་ཡཱ་དང་ཁོང་གི་དམག་མི་ཚང་མས་དེ་ཚོ་ཇི་ལྟར་ཡོང་བཞིན་པ་མཐོང་བ་དང་། མཚན་མོའི་སྐབས་གྲོང་ཁྱེར་ནས་བྲོས་ཐབས་གནང་ངོ་། ཁོང་ཚོ་རྒྱལ་པོའི་ལྡུམ་རར་བརྒྱུད་ནས་ལྕགས་རི་གཉིས་འབྲེལ་བའི་རྒྱལ་སྒོའི་ལམ་ནས་ཐོན་སྟེ་ཡོར་དན་གྱི་ལུང་གཤོང་གི་ཕྱོགས་སུ་བྲོས་སོ།

⁵ འོན་ཀྱང་བྷེ་བྷི་ལོན་པའི་དམག་དཔུང་གིས་ཁོ་ཚོར་རྗེད་དེད་ཀྱིས། ཡེ་རི་ཀོའི་འགྲམ་གྱི་ཐང་དུ་ཛེ་དེ་ཀི་ཡཱ་ལ་བཟུངས་སོ། དེ་ནས་དེ་ཚོས་ཁོང་ལ་རྒྱལ་པོ་ནེ་བུ་ཀད་ནེ་ཛར་ཧ་མད་ཀྱི་མངའ་ཁུལ་རིབ་ལཱའི་གྲོང་ཁྱེར་ནང་བཞུགས་ཡོད་སར་འཁྲིད་པ་དང་། ནེ་བུ་ཀད་ནེ་ཛར་གྱིས་ཁོང་ལ་ཁྲིམས་གཏོང་གནང་ངོ་།

⁶ རིབ་ལཱ་རུ་ཛེ་དེ་ཀི་ཡཱས་ཁོང་གི་མཐོང་སར་ཁོང་གི་སྲས་ཚོར་ཉེས་པ་སྲོག་ཐོག་ཏུ་བཏང་བ་དང་། ཡ་ཧུ་དཱ་པའི་ལས་བྱེད་པ་རྣམས་ཀྱང་བསད་དོ།

⁷ དེ་རྗེས་ཁོང་གིས་ཛེ་དེ་ཀི་ཡཱའི་མིག་གཉིས་བཏོན་ནས་བྷེ་བྷི་ལོ་ནི་ཡ་དུ་ལྕགས་ཐག་རྒྱབ་ནས་འཁྲིད་དོ།

⁸ སྐབས་དེར་བྷེ་བྷི་ལོ་ནི་ཡ་པ་ཚོས་རྒྱལ་པོའི་ཕོ་བྲང་དང་མི་མང་ཚོའི་ཁང་ཁྱིམ་རྣམས་བསྲེགས་པ་དང་ཡེ་རུ་ཤ་ལེམ་གྱི་ལྕགས་རི་རྣམས་བཤིགས་སོ།

⁹ མཐའ་མར་དམག་སྤྱི་ནེ་བུ་ཛ་ར་དྷན་གྱིས་གྲོང་ཁྱེར་དུ་ལྷག་པའི་མི་མང་དང་ངོ་རྒོལ་བྱ་མཁན་ཚོ་དང་བཅས་པ་བཙོན་པ་ལྟར་བྷེ་བྷི་ལོ་ནི་ཡ་དུ་འཁྲིད་དོ།

¹⁰ ཁོང་གིས་ཡ་ཧུ་དཱའི་ཡུལ་དུ་མི་སྐྱོ་ཤོས་རྒྱུ་དངོས་གང་ཡང་མེད་མཁན་ཚོ་བཞག་པ་དང་ཁོང་ཚོར་རྒུན་ཚལ་གྱི་ཞིང་ཁ་སྤྲད་དོ༎

ཡེར་མི་ཡཱ་གློད་བཀྲོལ་བཏང་བ།

¹¹ རྒྱལ་པོ་ནེ་བུ་ཀད་ནེ་ཛར་གྱིས་དམག་སྤྱི་ནེ་བུ་ཛ་ར་དྷན་ལ་གཤམ་གསལ་བཀའ་རྣམས་གཏོང་དགོས་པའི་བཀོད་ཁྱབ་གནང་ངོ་།

¹² སོང་ལ་ཡེར་མི་ཡཱ་འཚོལ་ནས་ཁོ་ལ་བལྟ་རྟོགས་ཡག་པོ་བྱེད་དགོས། ཁོ་ལ་གནོད་པ་མ་བྱས་པར་ཁོའི་འདོད་པ་ལྟར་བྱ་དགོས་ཤེས་སོ།

¹³ དེར་བརྟེན་ནེ་བུ་ཛ་ར་དྷན་དང་མཉམ་དུ་ལས་བྱེད་པ་གཙོ་བོ་ནེ་བུ་ཤཛ་བྷན་དང་ནེར་གལ་ཤརེ་ཟེར་དང་གཞན་བྷེ་བྷི་ལོ་ནི་ཡའི་དཔོན་པོ་ཚང་མས།

¹⁴ ང་ཕོ་བྲང་གི་ཁྱམས་ར་ནས་འཁྲིད་དེ། དེ་ཚོས་ཤ་ཕན་གྱི་ཚ་བོ་དང་ཨ་ཧི་ཀམ་གྱི་བུ་གྷེ་དལ་ཡཱའི་བལྟ་རྟོགས་འོག་བཞག་པ་དང་། ང་ལ་སྐྱོན་མེད་བདེ་བར་ཁྱིམ་དུ་བསྐྱེལ་རྒྱུ་ཁོའི་ལས་འགན་ཡིན། དེར་བརྟེན་ང་མི་མང་གི་ཁྲོད་དུ་དེར་བསྡད་དོ༎

ཨེ་བྷེད་མེ་ལེག་གི་རེ་བ།

¹⁵ ང་ཕོ་བྲང་གི་ཁྱམས་རའི་བཙོན་ནང་དུ་ཡོད་སྐབས་གཙོ་བོ་དཀོན་མཆོག་གིས་ང་ལ་བཀའ་གནང་བ།

¹⁶ ཀུན་དབང་ཅན་གྱི་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་བཀའ་གནང་བ་འདི་ཨི་ཐི་ཨོ་པི་ཡ་པ་ཨེ་བྷེད་མེ་ལེག་ལ་ཤོད་ཅིག་གསུངས་པ་དང་། ཇི་ལྟར་ངས་བྱ་རྒྱུ་ཡིན་བརྗོད་པ་ལྟར་ངས་གྲོང་ཁྱེར་འདིར་སྟོར་བཤིགས་གཏོང་རྒྱུ་ཡིན་པ་ལས་འཕེལ་རྒྱས་གཏོང་རྒྱུ་མ་ཡིན་ནོ། དེ་ལྟར་བྱུང་སྐབས་དེ་ཚོ་མཐོང་བར་ཁྱོད་དེར་གནས་པར་འགྱུར་རོ།

¹⁷ འོན་ཀྱང་གཙོ་བོ་དཀོན་མཆོག་གིས། ཁྱོད་སྐྱོབས་པ་དང་ཁྱོད་ཀྱིས་འཇིགས་པའི་མི་ཚོའི་ལག་ཏུ་ཁྱོད་རྩིས་སྤྲོད་མི་བྱེད་དོ།

¹⁸ ངས་དེ་ལྟར་ཁྱོད་སྲོག་ཐོག་གཏོང་བར་མི་འགྱུར་བ་དང་། ཁྱོད་བདེ་བར་འཇོག་པར་འགྱུར། ངས་ཁྱོད་ཀྱི་སྲོག་ཐར་བར་བྱ་རྒྱུ་ཡིན། གང་ལ་ཟེར་ན། ཁྱོད་ཀྱིས་ང་ལ་ཡིད་ཆེས་བྱས་ཡོད་ཅེས་ང་གཙོ་བོ་དཀོན་མཆོག་གིས་སྨྲས་པ་ཡིན་ནོ༎