ཡེར་མི་ཡཱ 38 - Tibetan Old Testament 2011

ཡེར་མི་ཡཱ་ཁྲོན་པ་སྐམ་པོའི་ནང་དུ་བསྡད་པ།

¹ མཏ་ཏན་གྱི་བུ་ཤེ་ཕཏ་ཡཱ་དང་པ་ཤུར་གྱི་བུ་གྷེ་དལ་ཡཱ་དང་ཤེ་ལེམ་ཡཱའི་བུ་ཡེ་ཧུ་ཀལ་དང་མལ་ཀི་ཨའི་བུ་པ་ཤུར་བཅས་ཀྱིས་ངས་མི་མང་ལ་བཤད་པ་རྣམས་ཐོས་སོ།

² གཙོ་བོ་དཀོན་མཆོག་གིས། གྲོང་ཁྱེར་ནང་སྡོད་མཁན་རྣམས་དམག་དང་མུ་གེ་ནད་ཡམས་བཅས་ཀྱིས་འཆི་བར་འགྱུར། འོན་ཀྱང་དེ་ནས་ཐོན་ནས་བྷེ་བྷི་ལོ་ནི་ཡ་པ་ཚོར་མགོ་བཏགས་ཞུ་མཁན་རྣམས་བསད་པར་མི་འགྱུར་། དེ་ཚོ་རང་གི་སྲོག་སྐྱབས་ནས་ཐར་བར་འགྱུར་གསུངས་ཡོད།

³ གཙོ་བོ་དཀོན་མཆོག་གིས། ངས་གྲོང་ཁྱེར་འདི་བཞིན་བྷེ་བྷི་ལོན་པའི་དམག་དཔུང་ལ་སྤྲོད་རྒྱུ་དང་། དེ་ཚོས་དེ་དབང་བཟུང་བྱ་གི་རེད་གསུངས་པ་དེ་ངས་དེ་ཚོ་ལ་ཤོད་བཞིན་ཡོད་དོ།

⁴ དེ་ནས་ལས་བྱེད་པ་ཚོ་རྒྱལ་པོའི་དྲུང་དུ་ཕྱིན་ནས། རྒྱལ་པོ་ལ་མི་འདི་ངེས་པར་དུ་གསོད་དགོས་སོ། ཁོས་དེ་ལྟར་བརྗོད་ནས་གྲོང་ཁྱེར་གྱི་དམག་མི་ཚོའི་སེམས་ཤུགས་ཆགས་སུ་བཅུག་པ་དང་། ཁོས་གྲོང་ཁྱེར་ནང་ལྷག་ལུས་ཡོད་པ་ཚང་མ་ལ་དེ་ལྟར་བྱེད་བཞིན་འདུག་གོ ཁོས་མི་མང་ལ་རོགས་བྱ་ཐབས་མ་བྱས་པར་གནོད་བསྐྱེལ་འདོད་ཁོ་ན་བྱེད་ཀྱི་འདུག་ཅེས་ཞུས་སོ།

⁵ ལན་དུ་རྒྱལ་པོ་ཛེ་དེ་ཀི་ཡཱས། དེ་ལྟར་ཡིན་ན་ཁྱོད་ཚོས་ཁོ་ལ་ག་རེ་བྱ་འདོད་ཡོད་ན་བྱོས་ཤིག ངས་ཁྱོད་ཚོར་བཀག་མི་ཐུབ་ཞེས་གསུངས་སོ།

⁶ དེར་བརྟེན་དེ་ཚོས་ང་ལ་འཁྲིད་ནས་རྒྱལ་སྲས་མལ་ཀི་ཨའི་ཁྲོན་པའི་ནང་ཐག་པས་མར་སློད་དོ། ཁྲོན་པ་དེ་ཕོ་བྲང་གི་ཁྱམས་རའི་ནང་ཡོད་དོ། དེ་ནང་འདམ་མ་གཏོགས་ཆུ་མེད་པ་དང་ང་དེའི་ནང་དིམས་སོ།

⁷ ཡིན་ནའི་རྒྱལ་པོའི་ཕོ་བྲང་ནང་ལས་བྱེད་པ་ཉུག་རུམ་པ་ཨི་ཐི་ཨོ་པི་ཡ་པ་ཨེ་བྷེད་མེ་ལེག་གིས་ང་ཁྲོན་པའི་ནང་བླུགས་པ་ཐོས་སོ། སྐབས་དེར་རྒྱལ་པོ་བྷེན་ཡ་མིན་གྱི་རྒྱལ་སྒོར་ཚོགས་འདུ་ཚོགས་ཡོད་པ་ཡིན་ནོ།

⁸ དེ་འདྲ་སོང་ཙང་ཨེ་བྷེད་མེ་ལེག་དེར་ཕྱིན་ནས་རྒྱལ་པོ་ལ་ཞུས་སོ།

⁹ མི་དབང་ཆེན་པོ་དེ་ཚོས་གང་བྱས་པ་དེ་ནོར་ཁྲུལ་ཡིན། དེ་ཚོས་ཡེར་མི་ཡཱ་ལ་ཁྲོན་པའི་ནང་བླུག་སོང་། གྲོང་ཁྱེར་ནང་ཁ་ཟས་མེད་སྟབས་དེར་ཁོ་མུ་གེས་འཆི་རྒྱུ་རེད།

¹⁰ དེ་ནས་རྒྱལ་པོས་ཨེ་བྷེད་མེ་ལེག་ལ་མི་གསུམ་འཁྲིད་ནས་ང་འཆི་བའི་སྔོན་ལ་ཁྲོན་པ་ནས་འདོན་དགོས་པའི་བཀའ་གནང་ངོ་།

¹¹ དེར་བརྟེན་ཨེ་བྷེད་མེ་ལེག་མི་དེ་ཚོ་མཉམ་དུ་ཕོ་བྲང་གི་མཛོད་ཁང་ནང་ཕྱིན་ནས་གོས་ཧྲུལ་ཁ་ཤས་བླངས་ནས། ཁོས་ཐག་པས་བསྡམས་ནས་ངའི་སར་མར་བཏང་ངོ་།

¹² ཁོས་ཐག་པས་ང་ལ་རྨ་མ་བཟོས་པའི་ཆེད་གོས་ཧྲུག་དེ་ཚོ་ངའི་མཆན་ཁུང་འོག་བཅུག་ཅེས་སྨྲས་པས། ངས་དེ་ལྟར་བྱས་པ་ཡིན།

¹³ དེ་ཚོས་ང་ཁྲོན་པའི་ནང་ནས་བཏོན་པའི་རྗེས་སུ་ང་ལ་ཁྱམས་རའི་ནང་བཞག་གོ།

ཛེ་དེ་ཀི་ཡཱས་ཡེར་མི་ཡཱ་ནས་བསླབ་བྱ་ཞུས་པ།

¹⁴ དུས་སྐབས་གཞན་ཞིག་ལ་རྒྱལ་པོ་ཛེ་དེ་ཀི་ཡཱས། ང་ལ་མཆོད་ཁང་གི་འཛུལ་སྒོ་གསུམ་པར་འཁྲིད་ཡོང་ནས། ངས་ཁྱོད་ལ་དྲི་བ་ཞིག་འདྲི་རྒྱུ་ཡིན་པས་ཁྱོད་ཀྱིས་ང་ལ་དྲང་ཤོད་དགོས་ཤེས་བསུངས་པས།

¹⁵ ལན་དུ་ངས། ཁྱེད་ལ་དྲང་པོ་ཞུས་པ་ཡིན་ན། ཁྱེད་ཀྱིས་ང་ལ་སྲོག་ཐོག་གཏོང་རྒྱུ་ཡིན་པ་དང་། ངས་ཁྱེད་ལ་བསླབ་བྱ་ཕུལ་བ་ཡིན་ན་ཁྱེད་ཀྱིས་དེ་ལ་ཐུགས་སྣང་གང་ཡང་གནང་མི་ཡོང་ཞེས་ཞུས་སོ།

¹⁶ དེར་བརྟེན་རྒྱལ་པོ་ཛེ་དེ་ཀི་ཡཱས་གསང་བའི་ཐོག་གསོན་པོའི་གཙོ་བོ་དཀོན་མཆོག་ང་ཚོར་སྲོག་གནང་མཁན་དཀོན་མཆོག་དཔང་བཙུག་ནས། ངས་ཁྱོད་སྲོག་ཐོག་མི་གཏོང་བ་དང་ཁྱོད་གསོད་པར་འདོད་མཁན་ཚོའི་ལག་ཏུ་མི་སྤྲོད་པའི་མནའ་འཇོག་རྒྱུ་ཡིན།

¹⁷ དེ་ནས་ངས་ཛེ་དེ་ཀི་ཡཱ་ལ། ཀུན་དབང་ཅན་གྱི་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་བཀའ་གནང་བ་འདི་ཚོ་ཞུས་པ་ཡིན། ཁྱེད་ཀྱིས་བྷེ་བྷི་ལོ་ནི་ཡའི་རྒྱལ་པོའི་དཔོན་པོ་ཚོར་མགོ་བཏགས་ཞུས་པ་ཡིན་ན། ཁྱེད་ཀྱི་སྐུ་སྲོག་ཐར་བ་དང་གྲོང་ཁྱེར་འདི་ཚོ་བསྲེགས་པར་མི་འགྱུར། ཁྱེད་དང་ཁྱེད་ཀྱི་ཁྱིམ་ཚང་གཉིས་ཀ་ཐར་བར་འགྱུར་རོ།

¹⁸ ཁྱེད་ཀྱིས་མགོ་བཏགས་མ་ཞུས་པ་ཡིན་ན། གྲོང་ཁྱེར་འདི་བཞིན་བྷེ་བྷི་ལོ་ནི་ཡ་པ་ཚོའི་ལག་ཏུ་རྩིས་སྤྲོད་བྱེད་པ་དང་། ཁོ་ཚོས་དེ་བསྲེགས་པར་འགྱུར་བ་དང་ཁྱེད་དེ་ལས་མི་ཐར་རོ་ཞེས་ཞུས་སོ།

¹⁹ འོན་ཀྱང་ལན་དུ། རྒྱལ་པོས་ང་ཚོའི་ཡུལ་མི་བྷེ་བྷི་ལོ་ནི་ཡ་དུ་བྲོས་བྱོལ་དུ་འགྲོ་མཁན་ཚོར་འཇིགས་ཀྱི་འདུག ང་དེ་ཚོ་ལ་རྩིས་སྤྲོད་བྱས་པ་ཡིན་ན། དེ་ཚོས་ང་ལ་མནར་གཅོད་གཏོང་སྲིད་ཅེས་གསུངས་པས།

²⁰ ལན་དུ་ངས་འདི་ལྟར་ཞུས་པ་ཡིན། ཁྱེད་ཁོ་ཚོར་རྩིས་སྤྲོད་བྱེད་པར་མི་འགྱུར། ཁྱེད་ཀྱིས་གཙོ་བོ་དཀོན་མཆོག་གི་བཀའ་ལ་གསན་རོགས་ཤེས་ངས་ཞུ་འབུལ་བྱ་རྒྱུ་ཡིན། དེ་ནས་ཁྱེད་ཀྱི་དོན་གནད་ཚང་མ་ལེགས་ཤིང་ཁྱེད་ཀྱི་སྐུ་སྲོག་ཐར་བར་འགྱུར་རོ།

²¹ གལ་སྲིད་ཁྱེད་ཀྱིས་མགོ་བཏགས་མ་ཞུས་པ་ཡིན་ན། གཙོ་བོ་དཀོན་མཆོག་གིས་ཇི་འདྲ་ཡོང་རྒྱུའི་སྐོར་ཞལ་གཟིགས་ཤིག་ང་ལ་སྟོན་གནང་བྱུང་།

²² དེའི་ནང་ངས་ཡ་ཧུ་དཱའི་རྒྱལ་པོའི་ཕོ་བྲང་ནང་ལྷག་པའི་བུད་མེད་རྣམས་བྷེ་བྷི་ལོ་ནི་ཡའི་རྒྱལ་པོའི་དཔོན་པོ་ཚོའི་སར་འཁྲིད་དོ། དེ་ཆོ་འགྲོ་སྐབས་ཇི་འདྲ་བརྗོད་བཞིན་པར་གསན་ཞིག། རྒྱལ་པོའི་གྲོགས་པོ་ལེགས་ཤོས་ཚོས་ཁོ་ལ། ལམ་ལོག་འཁྲིད་ནས་ཁོང་ཐོག་དབང་བསྒྱུར་བྱས། ད་ལྟ་ཁོང་ཞབས་འདམ་རྫབ་ནང་དིམ་མོ། ཁོང་གི་གྲོགས་ཚོས་ཁོང་སྤངས་སོ།

²³ དེ་ནས་ངས་མུ་མཐུད་ནས། ཁྱེད་ཀྱི་བུད་མེད་རྣམས་དང་ཕྲུ་གུ་རྣམས་བྷེ་བྷི་ལོ་ནི་ཡ་པ་ཚོའི་སར་འཁྲིད་པ་དང་ཁྱེད་ཀྱང་དེ་ཚོ་ལས་ཐར་བར་མི་འགྱུར། ཁྱེད་ལ་བྷེ་བྷི་ལོ་ནི་ཡའི་རྒྱལ་པོས་བཙོན་དུ་འཁྲིད་པ་དང་གྲོང་ཁྱེར་འདི་རྡུལ་བཞིན་བསྲེགས་པར་བྱའོ།

²⁴ ལན་དུ་ཛེ་དེ་ཀི་ཡཱས་གསུངས་པ། ང་ཚོའི་དབར་གྱི་སྐད་ཆ་དེ་བཞིན་སུས་ཀྱང་མ་ཤེས་པ་བྱོས་ཤིག་དང་། ཁྱོད་ཀྱི་སྲོག་ལ་ཉེན་ཁ་མི་ཡོང་།

²⁵ ལས་བྱེད་པ་ཚོས་ཁྱོད་དང་ང་གཉིས་སྐད་ཆ་བཤད་པ་དེ་ཚོས་ཐོས་པ་ཡིན་ན། དེ་ཚོ་ཁྱོད་སར་ཡོང་ནས། ང་ཚོའི་སྐད་ཆ་ཇི་བྱུང་བ་རྣམས་དེ་ཚོས་འདྲི་བར་བྱེད་དོ། དེ་ཚོར་ཁྱོད་ཀྱིས་ཆ་ཚང་བཤད་པ་ཡིན་ན། ཁྱོད་སྲོག་ཐོག་མི་གཏོང་བའི་ཁས་ལེན་བྱས་པ་དང་།

²⁶ དེ་ཚོར་ཁྱོད་ཀྱིས་ང་ལ་ཁྱོད་རང་བཙོན་དུ་འཆི་རུ་མ་གཏོང་རོགས་གནང་ཞེས་ཞུ་བ་ཕུལ་བ་དེ་བརྗོད་ཅིག

²⁷ དེ་ནས་ལས་བྱེད་པ་ཚོ་ཡོང་ནས་ང་ལ་སྐད་ཆ་དྲིས་པ་དང་། ངས་རྒྱལ་པོས་ང་ལ་ཇི་ལྟར་བཀའ་གནང་བ་ལྟར་ཁོ་ཚོར་སྨྲས་པ་ཡིན། དེ་ཚོས་གཞན་གང་ཡང་བྱེད་མ་ཐུབ་བོ། གང་ལ་ཟེར་ན། སུས་ཀྱང་ང་ཚོའི་དབར་སྐད་ཆ་བྱུང་བ་ཐོས་མེད་དོ།

²⁸ ཡེ་རུ་ཤ་ལེམ་དབང་བཟུང་མ་བྱས་བར་དུ་ང་ལ་ཕོ་བྲང་གི་ཁྱམས་རར་གཞག་གོ༎