ཡེར་མི་ཡཱ 37 - Tibetan Old Testament 2011

ཡེར་མི་ཡཱ་ལ་ཛེ་དེ་ཀི་ཡཱའི་ཞུས་འབུལ།

¹ བྷེ་བྷི་ལོ་ནི་ཡའི་རྒྱལ་པོ་ནེ་བུ་ཀད་ནེ་ཛར་གྱིས་ཡོ་ཤི་ཡཱའི་སྲས་ཛེ་དེག་ཀི་ཡ་ཞུ་བ་ཡེ་ཧོ་ཡ་ཀིམ་གྱི་སྲས་ཡེ་ཧོ་ཡ་ཀིན་གྱི་ཚབ་ཏུ་ཡ་ཧུ་དཱའི་རྒྱལ་པོར་བསྐོས་སོ།

² འོན་ཀྱང་ཡང་ན་ཛེ་དེ་ཀི་ཡཱ་འམ་ཁོང་གི་ལས་བྱེད་པ་ཚོ་ཡང་ན་མི་མང་བཅས་པས་གཙོ་བོ་དཀོན་མཆོག་གིས་ང་ལ་གནང་བའི་གསུང་འཕྲིན་ཁག་ལ་སྲུང་བརྩི་བྱས་མེད་དོ།

³ རྒྱལ་པོ་ཛེ་དེ་ཀི་ཡཱས་ངའི་སར་ཤེ་ལེམ་ཡཱའི་བུ་ཡེ་ཧུ་ཀལ་དང་མ་སི་ཨའི་བུ་བླ་མ་ཛེ་ཕན་ཡཱ་གཉིས་ཀྱི་ང་ཚོའི་མི་རིགས་གི་ཆེད་དུ་ང་ཚོའི་དཀོན་མཆོག་གཙོ་བོ་དཀོན་མཆོག་ལ་གསོལ་འདེབས་ཞུ་བར་བཏང་ངོ་།

⁴ དེ་དུས་ང་བཙོན་ཁང་ནང་བཅུག་མེད་པ་དང་། མི་མང་གི་ཁྲོད་དུ་རང་དབང་གིས་འགྲོ་བཞིན་ཡོད་དོ།

⁵ བྷེ་བྷི་ལོན་པའི་དམག་དཔུང་གིས་ཡེ་རུ་ཤ་ལེམ་ལ་མཐའ་བསྐོར་བཞིན་ཡོད་ན་ཡང་། དེ་ཚོས་ཨི་ཇིབ་པའི་དམག་དཔུང་ཨི་ཇིབ་པའི་ས་མཚམས་ནས་ཐོན་ཚར་བ་ཐོས་པ་དང་ཁོ་ཚོ་ཕྱིར་འཐེན་བྱས་སོ།

⁶ དེ་ནས་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་ང་ལ།

⁷ ཛེ་དེ་ཀི་ཡཱ་ལ་འདི་ལྟར་བརྗོད་དགོས་གསུངས་བྱུང་། ཨི་ཇིབ་པའི་དམག་དཔུང་གི་ཁྱོད་ལ་རོགས་བྱེད་པར་ཡོང་ན་ཡང་། དེ་ཚོ་རང་ཡུལ་དུ་ཕྱིར་ལོག་པར་བྱེད་དོ།

⁸ དེ་ནས་བྷེ་བྷི་ལོ་ནི་ཡ་པ་ཚོ་ཡང་སྐྱར་ཡོང་ནས་གྲོང་ཁྱེར་འདིར་འཐབ་ནས་དབང་བཟུང་བྱས་ཏེ་དེ་མེར་བསྲེགས་ཡོང་།

⁹ ང་གཙོ་བོ་དཀོན་མཆོག་གིས། ཁྱོད་ཀྱིས་བྷེ་བྷི་ལོ་ནི་ཡ་པ་ཆོ་ཡང་སྐྱར་ཡོང་གི་མ་རེད་བསམ་པའི་རང་གི་རང་ལ་མགོ་བསྐོར་བའི་ཉེན་བརྡ་གཏོང་རྒྱུ་ཡིན། གང་ལ་ཟེར་ན། དེ་ཚོ་ཡོང་གི་རེད།

¹⁰ ཁྱོད་ཀྱིས་བྷེ་བྷི་ལོན་པའི་དམག་དཔུང་ཆ་ཚང་ཕམ་པར་བྱས་ནས་མི་རྨས་པ་འབའ་ཞིག་ལས་ལྷག་མེད་ན་ཡང། དེ་ཚོ་རང་གི་གུར་ནང་ནས་ཡར་ལངས་ཏེ་གྲོང་ཁྱེར་ཡོངས་རྫོགས་མེས་བསྲེགས་པར་བྱེད་དོ༎

ཡེར་མི་ཡཱ་བཟུང་ནས་བཙོན་དུ་འཇུག་པ།

¹¹ བྷེ་བྷི་ལོན་པའི་དམག་དཔུང་ཡེ་རུ་ཤ་ལེམ་ནས་ཕྱིར་འཐེན་བྱས་སོ། གང་ལ་ཟེར་ན། ཨི་ཇིབ་པའི་དམག་དཔུང་སླེབས་ཡོད་དོ།

¹² དེར་བརྟེན་ངས་ཡེ་རུ་ཤ་ལེམ་ནས་བྷེན་ཡ་མིན་གྱི་མངའ་ཁུལ་དུ་ང་རང་གི་ཁྱིམ་ཚང་གི་རྒྱུད་དངོས་ཀྱི་ཐོབ་སྐལ་ལེན་པར་ཐོན་འགོ་ཚུགས་པ་ཡིན།

¹³ འོན་ཀྱང་ང་བྷེན་ཡ་མིན་གྱི་རྒྱལ་སྒོར་སླེབས་སྐབས། དེར་དམག་མི་ལས་འགན་དུ་ཡོད་པ་ཚོའི་དཔོན་པོ་ཧ་ནན་ཡའི་ཚ་བོ་ཤེ་ལེམ་ཡཱའི་བུ་ཨི་རི་ཡཱ་ཟེར་བས་ང་བཀག་ནས་ཁྱོད་བྷེ་བྷི་ལོ་ནི་ཡ་དུ་བྲོས་དུ་འགྲོ་བཞིན་འདུག་ཅེས་སྨྲས་སོ།

¹⁴ ལན་དུ་ངས་དེ་ལྟར་མིན་། ང་བྲོས་འགྲོ་བ་མ་ཡིན་ཞེས་སྨྲས་པས། འོན་ཀྱང་ཨི་རི་ཡཱས་མ་ཉན་པར་ང་བཟུང་ནས་ལས་བྱེད་པ་ཚོའི་སར་འཁྲིད་དོ།

¹⁵ དེ་ཚོ་ཧ་ཅང་དྲག་རྩུབ་ཆེན་པོ་ཡོད་པས་ངར་ནེས་བརྡུང་བཏང་ནས་ཁྲིམས་ཁང་གི་དྲུང་ཡིག་ཡོ་ན་ཐན་གྱི་ཁང་པ་བཙོན་ཁང་བཟོས་ཡོད་པ་དེའི་ནང་འཇུག་དགོས་པའི་བཀའ་བཏང་ངོ་།

¹⁶ ང་ལ་ས་དོང་གི་བཙོན་ཁང་ནང་བཅུག་ནས་དེའི་ནང་ཡུན་རིང་པོའི་བར་བཞག་གོ

¹⁷ དེའི་རྗེས་སུ་རྒྱལ་པོ་ཛེ་དེ་ཀི་ཡཱས་ང་འབོད་དུ་བཏང་ནས་ཕོ་བྲང་ནང་ལྐོག་དུ་སྨྲས་པ། ཁྱོད་ལ་གཙོ་བོ་དཀོན་མཆོག་གིས་གསུང་འཕྲིན་ཡོད་དམ་ཞེས་བཀའ་འདྲི་གནང་བས། ལན་དུ་ངས་ཡོད་ཅེས་སྨྲས་པ་ཡིན། ཁྱེད་བྷེ་བྷི་ལོ་ནི་ཡའི་རྒྱལ་པོའི་ལག་ཏུ་རྩིས་སྤྲོད་བྱའོ།

¹⁸ དེ་ནས་ངས་བཀའ་འདྲི་ཞུ་པར། ཁྱེད་ཀྱིས་ང་ལ་བཙོན་ཁང་དུ་འཇུག་དགོས་པའི་ངས་ཁྱེད་ཡང་ཁྱེད་ཀྱི་ལས་བྱེད་པ་ཚོ་ཡང་ན་མི་མང་བཅས་པར་ངས་ཉེས་སྐྱོན་ག་རེ་བྱས་ཡོད་དམ།

¹⁹ བྷེ་བྷི་ལོ་ནི་ཡའི་རྒྱལ་པོས་ཁྱེད་དང་ཡུལ་འདིར་བཙན་རྒོལ་བྱ་གི་མ་རེད་ཅེས་ཁྱེད་ལ་ཞུ་མཁན་ཁྱེད་ཀྱི་ལུང་སྟོན་པ་ཚོར་ག་རེ་བྱུང་སོང་ང་དམ།

²⁰ མི་དབང་ཁྱེད་ལ་ངས་ཞུ་བར་གསན་རོགས་གནང་ཞུ་རྒྱུ་ཡིན། ང་ཡོ་ན་ཐན་གྱི་ཁྱིམ་དུ་བཙོན་ཁང་དུ་མ་གཏོང་རོགས་གནང་། ཁྱེད་ཀྱིས་དེ་ལྟར་མཛད་པ་ཡིན་ན་ཏན་ཏན་ང་དེར་འཆི་རྒྱུ་རེད་ཅེས་སོ།

²¹ དེར་བརྟེན་རྒྱལ་པོ་ཛེ་དེ་ཀི་ཡཱས་ང་ཕོ་བྲང་གི་ཁྱམས་རའི་ནང་འཇུག་དགོས་པའི་བཀའ་གནང་ངོ་། ང་དེར་བསྡད་པ་དང་གྲོང་ཁྱེར་གྱི་བག་ལེབ་ཚང་མ་མ་རྫོགས་བར་དུ་ང་ལ་ཉིན་རེར་བག་ལེབ་རེར་བཟོས་ས་ནས་སྤྲད་བྱུང་ངོ་༎