ཡེར་མི་ཡཱ 36 - Tibetan Old Testament 2011

བྷ་རུག་གིས་མཆོད་ཁང་ནང་ཤོག་སྒྲིལ་ཀློག་པ།

¹ ཡོ་ཤི་ཡཱའི་སྲས་ཡེ་ཧོ་ཡ་ཀིམ་ཡ་ཧུ་དཱའི་རྒྱལ་པོ་གནང་བའི་ལོ་བཞི་པར་གཙོ་བོ་དཀོན་མཆོག་གིས་ང་ལ་བཀའ་གནང་བ།

² ཤོག་སྒྲིལ་ཞིག་བླངས་ནས་དེའི་སྟེང་ངས་ཨིསི་རཱཨེལ་དང་ཡ་ཧུ་དཱ་དང་མི་རིགས་ཚང་མའི་སྐོར་ངས་སྨྲས་པ་རྣམས་བྲིས་ཤིག ཡོ་ཤི་ཡཱ་རྒྱལ་པོ་ཡིན་སྐབས་ངས་ཁྱོད་ལ་ཐོག་མར་སྨྲས་པ་ནས་བཟུང་ད་ལྟའི་བར་དུ་སྨྲས་པ་རྣམས་ཚང་མ་བྲིས་ཤིག

³ ཕལ་ཆེར་ཡ་ཧུ་དཱ་པའི་མི་མང་གིས་ངས་དེ་ཚོ་ལ་སྟོར་བཤིགས་གཏོང་རྒྱུའི་འཆར་གཞི་ཡོད་པ་ཐོས་སྐབས་དེ་ཚོས་ལམ་ངན་པ་ལས་བསྒྱུར་བ་གཏོང་བར་བྱེད་ཡོང་། དེ་ནས་ངས་དེ་ཚོའི་སྤྱོད་ཚུལ་ངན་པ་དང་སྡིག་པར་བཟོད་གསོལ་བྱེད་རྒྱུ་ཡིན་ནོ།

⁴ དེ་འདྲ་སོང་ཙང་ངས་ནེ་རི་ཡཱའི་བུ་བྷ་རུག་སྐད་བཏང་ནས། གཙོ་བོ་དཀོན་མཆོག་གིས་ང་ལ་བཀའ་གནང་བ་རྣམས་ངག་ཐོག་ནས་བཤད་པ་ཡིན། བྷ་རུག་གིས་དེ་ཚོ་ཚང་མ་ཤོག་སྒྲིལ་སྟེང་བྲིས་སོ།

⁵ དེ་ནས་ངས་བྷ་རུག་ལ་གཤམ་གསལ་སློབ་སྟོན་ཁག་སྤྲད་པ་ཡིན། ད་ང་མཆོད་ཁང་ནང་འགྲོ་ཆོག་གི་མེད་དོ།

⁶ མི་མང་ཚོ་སྨྱུང་གནས་ལ་བསྡད་པའི་ཉིན་མོར་ཁྱོད་དེར་འགྲོ་དགོས་སོ། དེར་ཁྱོད་ཀྱིས་གཙོ་བོ་དཀོན་མཆོག་གིས་ང་ལ་བཀའ་གནང་བ་དང་། ངས་ཁྱོད་ལ་ངག་ཐོག་ནས་བཤད་པ་རྣམས་ཆ་ཚང་ཚང་མས་ཐོས་པའི་ཆེད་ཤོག་སྒྲིལ་དེ་སྐད་ཆེན་པོས་ཀློག་དགོས་སོ། དེ་ལྟར་ཁྱོད་ལས་ཐོས་པ་ཚང་མ་དང་རང་རང་གི་གྲོང་ཁྱེར་ནས་དེར་ཡོང་བ་ཡ་ཧུ་དཱའི་མི་མང་རྣམས་བཅས་ཀྱིས་ཐོས་པའི་ཆེད་ཀློག་ཤིག

⁷ ཕལ་ཆེར་དེ་ཚོས་གཙོ་བོ་དཀོན་མཆོག་ལ་གསོལ་བ་འདེབས་ཤིང་རང་གི་ལམ་ངན་པ་ལས་བསྒྱུར་གཏོང་སྲིད་དོ། གང་ལ་ཟེར་ན། གཙོ་བོ་དཀོན་མཆོག་གིས་མི་མང་དེ་ཚོ་ལ་ཐུགས་ཁྲོ་དང་ཁྲོ་བ་དྲག་པོས་ཉེན་བརྡ་གཏོང་གནང་ཡོད་དོ།

⁸ དེར་བརྟེན་བྷ་རུག་གིས་ངས་ཇི་ལྟར་སྨྲས་པ་ལྟར་མཆོད་ཁང་ནང་གཙོ་བོ་དཀོན་མཆོག་གི་བཀའ་སྒྲགས་སོ།

⁹ ཡེ་ཧོ་ཡ་ཀིམ་ཡ་ཧུ་དཱའི་རྒྱལ་པོ་གནང་བའི་ལོ་ལྔ་པའི་ཟླ་བ་དགུ་པར་མི་མང་གིས་གཙོ་བོ་དཀོན་མཆོག་གི་གཟིགས་པ་ཐོབ་པའི་ཆེད་སྨྱུང་གནས་སུ་བསྡད་དོ། སྨྱུང་གནས་དེ་བཞིན་ཡེ་རུ་ཤ་ལེམ་དུ་སྡོད་མཁན་ཡོངས་དང་། དེར་ཡ་ཧུ་དཱའི་གྲོང་ཁྱེར་ཁག་ནས་ཡོང་མཁན་ཚང་མས་སྲུང་ངོ་།

¹⁰ དེ་ནས་མི་མང་རྣམས་ནས་ཉན་པའི་སྐབས་སུ། བྷ་རུག་གིས་ཤོག་སྒྲིལ་ནས་ངས་སྨྲས་པ་རྣམས་ཚང་མ་སྒྲོག་བྱང་བྱས་སོ། ཁོང་གིས་མཆོད་ཁང་ནང་ཤ་ཕན་གྱི་བུ་ཁྲིམས་ཁང་གི་དྲུང་ཡིག་གྷེ་མར་ཡཱའི་ཁང་པའི་ནང་སྒྲོག་བྱང་གནང་ངོ་། ཁོའི་ཁང་པ་དེ་ཁྲིམས་ཁང་གོང་མའི་མཆོད་ཁང་གི་རྒྱལ་སྒོ་གསར་པའི་འཛུལ་སྒོའི་ཉེ་འགྲམ་དུ་ཡོད་དོ༎

ལས་བྱེད་པ་ཚོ་ལ་ཤོག་སྒྲིལ་ཀློག་པ།

¹¹ ཤ་ཕན་གྱི་ཚ་བོ་གྷེ་མར་ཡཱའི་བུ་མི་ཀ་ཡས། བྷ་རུག་གིས་ཤོག་སྒྲིལ་ནས་གཙོ་བོ་དཀོན་མཆོག་གི་བཀའ་གནང་བ་ཁག་ཀློག་པ་ཐོས་སོ།

¹² དེ་ནས་ཁོས་རྒྱལ་པོའི་ཕོ་བྲང་གི་ཁྲིམས་ཁང་གི་དྲུང་ཡིག་གི་ཁང་མིག་དུ་སོང་བས། དེར་ལས་བྱེད་པ་ཚང་མ་ཚོགས་ཡོད་པ་ཡིན་ནོ། དེར་ཁྲིམས་ཁང་གི་དྲུང་ཡིག་ཨེ་ལི་ཤ་མ་དང་ཤེ་མ་ཡཱའི་བུ་དྷེ་ལའི་ཡཱ་དང་ཨག་བྷོར་གྱི་བུ་ཨེལ་ན་ཐན་དང་ཤ་ཕན་གྱི་བུ་གྷེ་མར་ཡཱ་དང་ཧ་ནན་ཡཱའི་བུ་ཛེ་དེ་ཀི་ཡཱ་དང་གཞན་ལས་བྱེད་པ་ཚང་མ་དེར་ཡོད་དོ།

¹³ མི་ཀ་ཡས་བྷ་རུག་གིས་མི་མང་ལ་ཀློག་པ་ཁོས་ཐོས་པ་ཚང་མ་དེ་ཚོ་ལ་བཤད་དོ།

¹⁴ དེ་ནས་ལས་བྱེད་པ་ཚོས་ཡེ་ཧུ་དྷི་ (ནེ་ཐན་ཡཱའི་བུ་དང་ཤེ་ལེམ་ཡཱའི་ཚ་བོའམ་ཀུ་ཤི་ཀྱི་ཚ་བོའི་བུ) བྷ་རུག་སར་བཏང་ནས། ཁོས་མི་མང་ལ་ཀློག་པའི་ཤོག་སྒྲིལ་དེ་ཕྱིར་ལོག་འཁྱེར་ཡོང་དགོས་ཅེས་བརྗོད་པར་བཏང་ངོ་། བྷ་རུག་གིས་ཤོག་སྒྲིལ་དེ་ཁོ་ཚོའི་སར་འཁྱེར་ཡོང་ངོ་།

¹⁵ དེ་ཚོས་མར་སྡོད་ལ་ང་ཚོར་ཤོག་སྒྲིལ་དེ་ཀློག་ཅིག་ཅེས་སྨྲས་སོ། དེ་ལྟར་བྷ་རུག་གིས་བྱས་སོ།

¹⁶ ཁོས་དེ་ཀློག་པའི་རྗེས་ལ་དེ་ཚོ་འཇིགས་སྣང་གིས་གཅིག་གིས་གཅིག་ལ་བལྟས་ནས་བྷ་རུག་ལ་ང་ཚོས་དེ་རྒྱལ་པོར་སྙན་གསེང་ཞུ་དགོས་ཤེས་སྨྲས་སོ།

¹⁷ དེ་ནས་དེ་ཚོས་ཁྱོད་ཀྱིས་དེ་ཚོ་ཚང་མ་ཇི་ལྟར་བྲིས་པ་ཡིན་ནམ། ཡེར་མི་ཡཱས་ངག་ཐོག་ནས་བཤད་བྱུང་ངམ། ང་ཚོར་ཤོད་རོགས་ཤེས་སྨྲས་སོ།

¹⁸ ལན་དུ་བྷ་རུག་གིས། དེའི་ཚིག་ཚང་མ་ཡེར་མི་ཡཱས་ང་ལ་ངག་ཐོག་ནས་བཤད་གནང་བ་དང་ངས་ཤོག་སྒྲིལ་སྟེང་སྣག་ཚས་བྲིས་པ་ཡིན་ཞེས་སྨྲས་སོ།

¹⁹ དེ་ནས་དེ་ཚོས་ཁོང་ལ་ཁྱོད་དང་ཡེར་མི་ཡཱ་སོང་ནས་ཡིབ་དགོས་པ་དང་། ཁྱོད་ཚོ་གང་དུ་ཡོད་པ་སུས་ཀྱང་མ་ཤེས་པ་བྱེད་དགོས་སོ་ཤེས་སྨྲས་སོ༎

རྒྱལ་པོས་ཤོག་སྒྲིལ་བསྲེགས་པ།

²⁰ ལས་བྱེད་པ་ཚོས་ཤོག་སྒྲིལ་དེ་ཁྲིམས་ཁང་གི་དྲུང་ཡིག་ཨེ་ལི་ཤ་མའི་ཁང་མིག་ནང་བཞག་ནས། རྒྱལ་པོའི་ཕོ་བྲང་དུ་ཕྱིན་ནས་རྒྱལ་པོར་སྙན་གསེང་ཆ་ཚང་ཞུས་སོ།

²¹ དེ་ནས་རྒྱལ་པོས་ཤོག་སྒྲིལ་དེ་ལན་དུ་ཡེ་ཧུ་དྷི་ལ་བཏང་ངོ་། ཁོས་དེ་ཨེ་ལི་ཤ་མའི་ཁང་པ་ནས་བླངས་ཏེ་རྒྱལ་པོ་དང་ཁོང་གི་དྲུང་དུ་ལངས་ཡོད་པའི་ལས་བྱེད་པ་ཚོ་ཡོད་སར་ཀློག་གོ

²² དུས་སྐབས་དེ་དགུན་ཁའི་སྐབས་ཡིན་པ་དང་། རྒྱལ་པོ་དགུན་ཁའི་ཕོ་བྲང་ནང་མེའི་མདུན་དུ་བཞུགས་ཡོད་པ་དང་།

²³ ཡེ་ཧུ་དྷིས་གླིང་གསུམ་བཞི་ཙམ་ཀློག་ཟིན་པ་དང་རྒྱལ་པོས་དེ་གྲི་ཆུང་ཞིག་གིས་བཏུབ་ནས་མེར་དབྱུགས་སོ། ཁོང་གིས་ཤོག་སྒྲིལ་དེ་ཆ་ཚང་མ་འཚིག་བར་དུ་དེ་ལྟར་གནང་ངོ་།

²⁴ འོན་ཀྱང་དེ་ཚོ་ཚང་མ་ཐོས་མཁན་རྒྱལ་པོ་དང་གཞན་ལས་བྱེད་པ་སུ་ཡང་འཇིགས་པ་མེད་པ་དང་སེམས་ཁྲལ་གྱི་རྣམ་པ་ཙམ་སྟོན་མེད་དོ།

²⁵ ཨེལ་ན་ཐན་དང་དྷེ་ལའི་ཡཱ་དང་གྷེ་མར་ཡཱ་བཅས་ཀྱིས་རྒྱལ་པོར་ཤོག་སྒྲིལ་དེ་མ་བསྲེག་རོགས་གནང་ཞེས་ཞུ་བ་ཕུལ་ན་ཡང་ཁོང་གིས་གསན་ཞེས་གནང་མེད་དོ།

²⁶ དེ་ནས་རྒྱལ་པོས་རྒྱལ་སྲས་ཡེ་ར་མིལ་དང་ཨཛ་རི་ཨེལ་གྱི་བུ་སེ་ར་ཡཱ་དང་ཨབ་དིལ་གྱི་བུ་ཤེ་ལེམ་ཡཱ་བཅས་ང་དང་ངའི་དྲུང་ཡིག་བྷ་རུག་བཟུང་དུ་བཏང་ངོ་། འོན་ཀྱང་གཙོ་བོ་དཀོན་མཆོག་གིས་ང་ཚོར་སྦས་གནང་ངོ་༎

ཡེར་མི་ཡཱས་ཤོག་སྒྲིལ་གཞན་ཞིག་བྲིས་པ།

²⁷ ངས་བྷ་རུག་ལ་ངག་ཐོག་ནས་བྲིས་པའི་ཤོག་སྒྲིལ་དེ་རྒྱལ་པོ་ཡེ་ཧོ་ཡ་ཀིམ་གྱིས་མེར་བསྲེགས་བཏང་བའི་རྗེས་ལ། གཙོ་བོ་དཀོན་མཆོག་གིས་ང་ལ།

²⁸ ཤོག་སྒྲིལ་གཞན་པ་ཞིག་བླངས་ནས། དེ་ལ་ཤོག་སྒྲིལ་དང་པོ་དེའི་ནང་གང་ཡོད་པ་ཚང་མ་བྲིས་ཤིག་ཅེས་བཀའ་གནང་ངོ་།

²⁹ གཙོ་བོ་དཀོན་མཆོག་གིས། ང་ལ་རྒྱལ་པོར་འདི་ལྟར་ཞུ་དགོས་གསུངས་སོ། ཁྱོད་ཀྱིས་ཤོག་སྒྲིལ་མེར་བསྲེག་བཏང་བ་དང་ཡེར་མི་ཡཱ་ལ་ཁོས་བྷེ་བྷི་ལོ་ནི་ཡའི་རྒྱལ་པོ་ཕེབས་ནས་ཡུལ་འདི་མེད་པར་བཟོ་རྒྱུ་དང་། དེའི་མི་མང་དང་སེམས་ཅན་རྣམས་གསོད་ཀྱི་རེད་ཅེས་གང་གི་དོན་དུ་བྲིས་པ་ཡིན་ནམ་ཞེས་འདྲི་བ་བྱས་ཡོད།

³⁰ དེར་བརྟེན་ད་ང་གཙོ་བོ་དཀོན་མཆོག་གིས། ཁྱོད་རྒྱལ་པོ་ཡེ་ཧོ་ཡ་ཀིམ་ལ་ཁྱོད་ཀྱི་རིགས་བརྒྱུད་སུས་ཀྱང་དཱ་བིད་ཀྱི་རྒྱལ་ཁབ་ཀྱི་ནང་རྒྱལ་སྲིད་སྐྱོངས་བར་མི་འགྱུར་ཞེས་བརྗོད་རྒྱུ་ཡིན། ཁྱོད་ཀྱི་རོ་དེ་ཕྱིར་རུ་དབྱུགས་པ་དང་། ཉིན་མོར་ཉི་མ་དང་མཚན་མོར་འཁྱགས་པའི་ནང་ལུས་པར་འགྱུར།

³¹ ངས་ཁྱོད་ཚོ་ཚང་མས་སྡིག་པ་གྱིས་པའི་རྐྱེན་གྱིས་ཁྱོད་དང་ཁྱོད་ཀྱི་རིགས་བརྒྱུད་དང་ལས་བྱེད་པ་ཚོ་དང་བཅས་པར་ཉེས་ཆད་གཏོང་རྒྱུ་ཡིན། ཁྱོད་དང་ཡེ་རུ་ཤ་ལེམ་དང་ཡ་ཧུ་དཱའི་མི་མང་བཅས་པས་ངའི་ཉེན་བརྡར་དོ་སྣང་བྱེད་མེད་སྟབས། ངས་ཉེན་བརྡ་གཏོང་བའི་རྐྱེན་ངན་དེ་ཚོ་ཁྱོད་ཚོ་ཚང་མའི་སྟེང་འབེབས་རྒྱུ་ཡིན་ནོ།

³² དེ་ནས་ངས་ཤོག་སྒྲིལ་གཞན་པ་ཞིག་ངས་དྲུང་ཡིག་བྷ་རུག་ལ་སྤྲད་དེ། ངས་ངག་ཐོག་ནས་བཤད་པ་ཆ་ཚང་ཁོས་བྲིས་སོ། ཁོས་ཤོག་སྒྲིལ་དང་པོའི་ནང་ཡོད་པ་ཆ་ཚང་དང་དེའི་འདྲ་མཚུངས་འཕྲིན་ཞིག་ཁོ་ལ་ངག་ཐོག་ནས་བཤད་པ་རྣམས་བྲིས་པ་ཡིན་ནོ༎