ཡེར་མི་ཡཱ 28 - Tibetan Old Testament 2011

ཡེར་མི་ཡཱ་དང་ལུང་སྟོན་པ་ཧ་ནན་ཡཱ།

^1-2 ལོ་དེར་ཛེ་དེ་ཀི་ཡཱ་རྒྱལ་པོ་གནང་བའི་ལོ་བཞི་པའི་ཟླ་བ་ལྔ་པར་གྷི་བི་ཨོན་གྲོང་ཁྱེར་གྱི་ཨ་ཛུར་གྱི་བུ་ཧ་ནན་ཡཱས་མཆོད་ཁང་ནང་ང་ལ་སྐད་ཆ་བཤད་བྱུང་། བླ་མ་ཚོ་དང་མི་མང་ཚོ་ཡོད་སར་ཁོང་གིས་ང་ལ། ཀུན་དབང་ཅན་གྱི་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་འདི་ལྟར་བཀའ་གནང་བྱུང་། ངས་བྷེ་བྷི་ལོ་ནི་ཡའི་རྒྱལ་པོའི་སྟོབས་ཤུགས་བཅག་པ་ཡིན།

³ ལོ་གཉིས་ཀྱི་ནང་ངས་ས་གནས་འདིར་རྒྱལ་པོ་ནེ་བུ་ཀད་ནེ་ཛར་གྱིས་མཆོད་ཁང་གི་གཏེར་མཛོད་བྷེ་བྷི་ལོ་ནི་ཡ་དུ་འཁྱེར་བ་རྣམས་ཕྱིར་ལོག་འཁྱེར་ཡོང་རྒྱུ་ཡིན།

⁴ དེ་མིན་ངས་ཡེ་ཧོ་ཡ་ཀིམ་གྱི་སྲས་ཡ་ཧུ་དཱའི་རྒྱལ་པོ་ཡེ་ཧོ་ཡ་ཀིན་དང་མཉམ་དུ་བྷེ་བྷི་ལོ་ནི་ཡ་དུ་བཙན་བྱོལ་དུ་ཕྱིན་པའི་ཡ་ཧུ་དཱའི་མི་མང་རྣམས་ཕྱིར་འཁྲིད་ཡོང་རྒྱུ་ཡིན། ངས་བྷེ་བྷི་ལོ་ནི་ཡའི་རྒྱལ་པོའི་སྟོབས་ཤུགས་བཅོག་རྒྱུ་ཡིན་ནོ་ཞེས་ང་གཙོ་བོ་དཀོན་མཆོག་གིས་སྨྲས་པ་ཡིན་ནོ།

⁵ དེ་ནས་ངས་བླ་མ་ཚོ་དང་མི་མང་ཚོ་མཆོད་ཁང་ནང་བཞེངས་ཡོད་སར་ཧ་ནན་ཡཱ་ལ་འདི་ལྟར་ཞུས་པ་ཡིན།

⁶ དེ་ནི་ངོ་མཚར་ཆེན་པོ་ཡིན། གཙོ་བོ་དཀོན་མཆོག་གིས་དེ་ལྟརགནང་བའི་རེ་བ་ང་ལ་ཡོད། ཁོང་གིས་ཁྱོད་ཀྱི་ལུང་བསྟན་དེ་བཞིན་དངོས་སུ་སྒྲུབ་པར་མཛད་ནས་བྷེ་བྷི་ལོ་ནི་ཡ་ནས་མཆོད་ཁང་གི་གཏེར་མཛོད་རྣམས་དང་མི་མང་བཙོན་པར་འཁྲིད་པ་རྣམས་ཕྱིར་འཁྲིད་འཕེབས་པའི་ང་ལ་རེ་བ་བརྟན་པོ་ཡོད།

⁷ འོན་ཀྱང་ངས་ཁྱོད་ཚོ་དང་མི་མང་ཚོར་སྨྲས་པར་ཉོན་ཞིག།

⁸ ང་དང་ཁྱོད་ཀྱི་ཡུན་རིང་སྔོན་གྱི་དུས་ཚོད་ཀྱི་ལུང་སྟོན་པ་ཚོས་མི་རིགས་མང་པོ་དང་རྒྱལ་ཁབ་སྟོབས་ཆེན་ཚོར་དམག་དང་མུ་གེ་དང་ནད་ཡམས་བཅས་ཡོང་རྒྱུའི་ལུང་བསྟན་གནང་ཡོད་དོ།

⁹ འོན་ཀྱང་ཞི་བདེའི་ལུང་བསྟན་དངོས་སུ་སྒྲུབ་པ་ཡིན་ན། ལུང་སྟོན་པ་དེ་གཙོ་བོ་དཀོན་མཆོག་གི་དངོས་སུ་བཏང་བའི་ལུང་སྟོན་པར་ཡིན་པར་ངོས་འཛིན་བྱ་དགོས་ཤེས་གསུངས་སོ།

¹⁰ ཧ་ནན་ཡཱས་ངའི་མཇིང་པ་ནས་གཉའ་ཤིང་དེ་བླངས་ནས་དེ་དུམ་བུར་བཅག་ནས།

¹¹ དེར་ཡོད་པའི་མི་མང་རྣམས་ལ་འདི་ལྟར་སྨྲས་སོ། གཙོ་བོ་དཀོན་མཆོག་གིས། ཁོང་གིས་རྒྱལ་པོ་ནེ་བུ་ཀད་ནེ་ཛར་གྱི་མི་རིགས་ཚང་མའི་མཇིང་པའི་སྟེང་གཡོག་པའི་གཉའ་ཤིང་དེ་དེ་ལྟར་བཅག་གནང་བ་དང་། ཁོང་གིས་དེ་ལྟར་ལོ་གཉིས་ཀྱི་ནང་གནང་རྒྱུ་ཡིན་ཞེས་གསུངས་སོ། དེ་ནས་ང་ཕྱིན་པ་ཡིན།

¹² དུས་ཚོད་ཕྲན་བུའི་རྗེས་ལ་གཙོ་བོ་དཀོན་མཆོག་གིས་ང་ལ།

¹³ ཧ་ནན་ཡཱའི་སར་སོང་ནས་འདི་ལྟར་སྨྲོས་ཤིག་གསུངས་བྱུང་། གཙོ་བོ་དཀོན་མཆོག་གིས། ཁྱོད་ཀྱིས་ཤིང་གི་གཉའ་ཤིང་བཅག་ཐུབ་ན་ཡང་། ཁོང་གི་དེའི་ཚབ་ཏུ་ལྕགས་ཀྱི་གཉའ་ཤིང་འཇོག་རྒྱུ་ཡིན་གསུངས་སོ།

¹⁴ ཀུན་དབང་ཅན་གྱི་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས། མི་རིགས་ཚང་མའི་མཇིང་པར་ལྕགས་ཀྱི་གཉའ་ཤིང་གཡོག་གནང་རྒྱུ་དང་། དེ་ཚོས་བྷེ་བྷི་ལོ་ནི་ཡའི་རྒྱལ་པོ་ནེ་བུ་ཀད་ནེ་ཛར་གྱི་ཞབས་ཕྱི་ཞུ་བར་བྱེད་དོ་ཅེས་བཀའ་གནང་ངོ་། གཙོ་བོ་དཀོན་མཆོག་གིས། ཁོང་གི་ནགས་ཀྱི་སེམས་ཅན་རྣམས་ལ་ཡང་ནེ་བུ་ཀད་ནེ་ཛར་གྱི་ཞབས་ཕྱི་ཞུ་བཅུག་གོ་ཞེས་གསུངས་སོ།

¹⁵ དེ་ནས་མུ་མཐུད་ཀྱིས་ཧ་ནན་ཡཱ་ཉོན་ཞིག་སྨྲས་སོ། གཙོ་བོ་དཀོན་མཆོག་གིས་ཁྱོད་ལ་བཏང་བ་མིན་པ་དང་། ཁྱོད་ཀྱིས་མི་མང་འདི་ཚོར་རྫུན་ལ་ཡིད་ཆེས་བྱེད་དུ་འཇུག་ཡོད་དོ།

¹⁶ དེར་བརྟེན་གཙོ་བོ་དཀོན་མཆོག་ཁོང་རང་གི་ཁྱོད་མེད་པར་མཛད་རྒྱུ་ཡིན་གསུངས་པ་དང་། ལོ་འདི་རྫོགས་པའི་སྔོན་ལ་ཁྱོད་འཆི་བར་འགྱུར། གང་ལ་ཟེར་ན། ཁྱོད་ཀྱིས་མི་མང་ལ་གཙོ་བོ་དཀོན་མཆོག་ལ་ངོ་ལོག་བྱེད་དགོས་ལབ་ཡོད་པ་ཡིན་ནོ།

¹⁷ ལོ་དེ་རང་གི་ཟླ་བ་བདུན་པར་ཧ་ནན་ཡཱ་གྲོངས་སོ༎