ཡེར་མི་ཡཱ 26 - Tibetan Old Testament 2011

ཡེར་མི་ཡཱ་ལ་ཁྲིམས་ཞིབ་བྱེད་པ།

¹ ཡོ་ཤི་ཡཱའི་སྲས་ཡེ་ཧོ་ཡ་ཀིམ་ཡ་ཧུ་དཱ་པའི་རྒྱལ་པོར་འགྱུར་མ་ཐག་ཏུ།

² གཙོ་བོ་དཀོན་མཆོག་གིས་ང་ལ་བཀའ་གནང་བ། མཆོད་ཁང་གི་འཁྱམས་རར་ལངས་ནས་དེར་མཆོད་པར་ཡོང་བའི་ཡ་ཧུ་དཱའི་གྲོང་ཁྱེར་གྱི་མི་མང་ཚོ་ལ་ངས་ཁྱོད་ལ་ཇི་ལྟར་ཤོད་དགོས་པའི་བཀའ་བཏབ་བ་རྣམས་གསལ་སྒྲགས་བྱོས་ཤིག ཁྱོད་ཀྱིས་གང་ཡང་མ་ལུས་པ་ཤོད་ཅིག།

³ མི་མང་གིས་ཉན་ནས་རང་གི་ལམ་ངན་པ་རྣམས་སྤོང་སྲིད་དོ། དེ་ལྟར་བྱས་པ་ཡིན་ན་ངས་དེ་ཚོའི་བྱ་སྤྱོད་ངན་པའི་ཆེད་འཇིག་སྐྲག་གཏོང་རྒྱུའི་འཆར་གཞི་སྐོར་ངའི་སེམས་བསྒྱུར་བ་གཏོང་རྒྱུ་ཡིན་ནོ།

⁴ གཙོ་བོ་དཀོན་མཆོག་གིས་ང་ལ། མི་མང་ཚོ་ལ་འདི་ལྟར་ཤོད་དགོས་བཀའ་གནང་བྱུང་། ང་གཙོ་བོ་དཀོན་མཆོག་གིས། ཁྱོད་ཚོས་ངའི་སློབ་སྟོན་གྱིས་པའི་རྗེས་སུ་འཇུག་པ་དང་།

⁵ ཁྱོད་ཚོའི་སར་ངས་བཏང་བའི་ངའི་ཞབས་ཕྱི་ལུང་སྟོན་པ་ཚོའི་བཀའ་ལ་ངེས་པར་དུ་ཉན་དགོས་སྨྲས་ཡོད། འོན་ཀྱང་ཁྱོད་ཚོས་དེ་ཚོར་ནམ་ཡང་ཉན་མེད་དོ།

⁶ ཁྱོད་ཚོས་མུ་མཐུད་མི་ཉན་པ་ཡིན་ན། ངས་ཤི་ལཱོ་ལ་བྱས་པ་ལྟར་མཆོད་ཁང་འདིར་བྱ་རྒྱུ་དང་། འཛམ་གླིང་གི་མི་རིགས་ཡོངས་ཀྱིས་གྲོང་ཁྱེར་འདིའི་མིང་དམོད་ལྟར་བེད་སྤྱོད་པར་བྱའོ།

⁷ བླ་མ་ཚོ་དང་ལུང་སྟོན་པ་ཚོ་དང་མི་མང་རྣམས་ནས་ངས་མཆོད་ཁང་ནང་དེ་ལྟར་བཤད་པ་ཐོས་པ་དང་།

⁸ གཙོ་བོ་དཀོན་མཆོག་གིས་ང་ལ་ཤོད་དགོས་གསུངས་པའི་བཀའ་གནང་བ་རྣམས་བཤད་ཟིན་མ་ཐག་ཏུ་དེ་ཚོས་ང་བཟུང་ནས་སྐད་ཅོར་རྒྱབས་སོ། བྱ་བ་འདིའི་རྐྱེན་གྱིས་ཁྱོད་གསོད་དགོས་པ་ཡིན་ནོ།

⁹ ཁྱོད་ཀྱིས་གཙོ་བོ་དཀོན་མཆོག་གི་མཚན་ཐོག་མཆོད་ཁང་འདི་བཞིན་ཤི་ལཱོ་ལྟར་འགྱུར་བ་དང་། གྲོང་ཁྱེར་འདི་བཞིན་འཇིག་སྟོར་གྱིས་འདིའི་ནང་སུ་ཡང་མི་སྡོད་ཅེས་ཅི་ལ་བརྗོད་པ་ཡིན་ནམ་ཞེས་ཟེར་ནས་མི་མང་ངའི་མཐའ་འཁོར་དུ་འདུས་སོ།

¹⁰ ཡ་ཧུ་དཱ་པའི་འགོ་འཁྲིད་ཚོས་ཇི་ལྟར་བྱུང་བ་ཐོས་པ་དང་། དེ་ཚོ་མགྱོགས་པོར་རྒྱལ་པོའི་ཕོ་བྲང་ནས་མཆོད་ཁང་དུ་སོང་བ་དང་། དེ་ཚོའི་རྒྱལ་སྒོ་གསར་པར་རང་རང་གི་ས་གནས་བཟུང་ངོ།

¹¹ དེ་ནས་བླ་མ་ཚོ་དང་ལུང་སྟོན་པ་ཚོས་འགོ་འཁྲིད་ཚོ་དང་མི་མང་ཚོར་མི་འདི་ལ་ཉེས་པ་སྲོག་ཐོག་གཏོང་འོས་པ་ཡིན་ནོ། གང་ལ་ཟེར་ན། ཁོས་ང་ཚོའི་གྲོང་ཁྱེར་ལ་ངོ་རྒོལ་བྱས་ཡོད། ཁྱོད་ཚོས་རང་གི་རྣ་བས་ཐོས་ཡོད་ཅེས་སྨྲས་སོ།

¹² དེ་ནས་ངས་སྨྲས་པ། གཙོ་བོ་དཀོན་མཆོག་གིས། ང་ཁྱོད་ཚོའི་མཆོད་ཁང་འདི་དང་གྲོང་ཁྱེར་འདི་ལ་ངོ་རྒོལ་གྱི་གསལ་སྒྲགས་བྱེད་པར་གཏོང་གནང་ཡོད།

¹³ ད་ལྟ་ཁྱོད་ཚོའི་སྡོད་སྟངས་དང་ཁྱོད་ཚོས་བྱེད་བཞིན་པར་བསྒྱུར་བ་བཏང་ནས། ཁྱོད་ཚོའི་དཀོན་མཆོག་གཙོ་བོ་དཀོན་མཆོག་གི་བཀའ་ལ་ཉན་ཞིག ཁྱོད་ཚོས་དེ་ལྟར་བྱས་པ་ཡིན་ན། ཁོང་གིས་ཁྱོད་ཚོའི་ཐོག་འཁྱེར་ཡོང་གི་ཡིན་གསུངས་བའི་འཇིག་སྟོར་གྱི་སྐོར་དགོངས་པ་བསྒྱུར་བ་གཏོང་གནང་ཡོང་།

¹⁴ ང་ནི་ཁྱོད་ཚོའི་དབང་འོག་ཏུ་ཡོད། ཁྱོད་ཚོས་དྲང་བདེན་ཇི་ཡིན་བསམ་པ་ང་ལ་བྱས་ན་སྒྲིགས་སོ།

¹⁵ འོན་ཀྱང་ཁྱོད་ཚོས་དེར་ངེས་ཏན་གྱིས་ཤིག། ཁྱོད་ཚོས་ང་བསད་པ་ཡིན་ན་ཁྱོད་ཚོ་དང་གྲོང་ཁྱེར་འདིའི་མི་མང་ཚོར་མི་སྐྱོན་མེད་གཅིག་བསད་པའི་ཉེས་པ་ཡོད་དོ། གང་ལ་ཟེར་ན། གཙོ་བོ་དཀོན་མཆོག་གིས་ང་ལ་ཁྱོད་ཚོར་ཉེན་བརྡ་འདི་གཏོང་བར་བཏང་ཡོད་ཅེས་སྨྲས་སོ།

¹⁶ དེ་ནས་འགོ་འཁྲིས་ཚོ་དང་མི་མང་ཚོས་བླ་མ་ཚོ་དང་ལུང་སྟོན་པ་ཚོ་ལ་མི་འདིས་ང་ཚོའི་དཀོན་མཆོག་གཙོ་བོ་དཀོན་མཆོག་གི་མཚན་ནས་གཏམ་གླེང་བྱས་ཡོད་སྟབས་ང་ཚོས་ཁོ་ཉེས་པ་སྲོག་ཐོག་གཏོང་མི་རུང་ཞེས་ཞུས་སོ།

¹⁷ དེའི་རྗེས་ལ་མི་རྒན་པ་འགའ་ཤས་ཡར་ལངས་ནས་དེར་འདུས་པའི་མི་མང་ཚོར་སྨྲས་པ།

¹⁸ ཧི་ཛི་ཀི་ཡ་ཡ་ཧུ་དཱ་པའི་རྒྱལ་པོ་གནང་སྐབས་མོ་རེ་ཤེད་པའི་ལུང་སྟོན་པ་མི་ཀཱས་མི་མང་ལ་ཀུན་དབང་ཅན་གྱི་གཙོ་བོ་དཀོན་མཆོག་གི་བཀའ་འདི་ལྟར་གནང་ཡོད་གསུངས་སོ། ཛི་ཡོན་ཞིང་ཁ་ལྟར་དུ་རྨོན་པ་རྒྱབ། ཡེ་རུ་ཤ་ལེམ་གྱང་གོག་ཕུང་པོར་འགྱུར། མཆོད་ཁང་རི་བོ་ནགས་ཚལ་དུ་འགྱུར་རོ།

¹⁹ རྒྱལ་པོ་ཧེ་ཛེ་ཀི་ཡཱ་དང་ཡ་ཧུ་དཱ་པའི་མི་མང་གིས་མི་ཀཱ་ལ་ཉེས་པ་སྲོག་ཐོག་ཏུ་བཏང་མེད་དོ། དེ་ལས་ཟློག་སྟེ་ཧེ་ཛེ་ཀི་ཡཱ་གཙོ་བོ་དཀོན་མཆོག་ལ་འཇིག་ནས་ཁོང་གི་ཐུགས་རྗེ་ཐོབ་ཐབས་གནང་ངོ་། གཙོ་བོ་དཀོན་མཆོག་གིས་དེ་ཚོའི་སྟེང་རྐྱེན་ངན་གཏོང་གནང་རྒྱུའི་དགོངས་པར་བསྒྱུར་བར་མཛད་དོ། ད་ཆ་ང་ཚོས་རང་གི་ཐོག་ཏུ་རྐྱེན་ངན་འཇིགས་སུ་རུང་བ་ཞིག་འཁྱེར་ཡོང་གྲབ་ཡོད་ཅེས་སོ།

²⁰ (ཀིར་ཡད་ཡ་རིམ་གྱི་ཤེ་མ་ཡཱའི་བུ་ཨུ་རི་ཡཱ་བྱ་བ་ཡེར་མི་ཡཱས་སྨྲས་པ་ལྟར། གཙོ་བོ་དཀོན་མཆོག་གི་མཚན་ནས་གྲོང་ཁྱེར་འདི་དང་མི་མང་འདིའི་ཐོག་ངོ་རྒོལ་སྨྲ་མཁན་སྐྱེ་བོ་གཞན་ཞིག་ཡོད་དོ།)

²¹ རྒྱལ་པོ་ཡེ་ཧོ་ཡ་ཀིམ་དང་ཁོང་གི་དམག་མི་དང་ལས་བྱེད་པ་ཚོས་ཨུ་རི་ཡཱས་ཇི་ལྟར་སྨྲ་བ་གསན་པ་དང་རྒྱལ་པོས་ཁོང་གསོད་ཐབས་གནང་ངོ་། འོན་ཀྱང་ཨུ་རི་ཡཱས་དེའི་སྐོར་ཐོས་ནས་འཇིག་སྐྲག་ངང་ཨི་ཇིབ་དུ་བྲོས་སོ།

²² འོན་ཀྱང་རྒྱལ་པོ་ཡེ་ཧོ་ཡ་ཀིམ་གྱིས་ཨག་བྷོར་གྱི་བུ་ཨེལ་ན་ཐན་དང་གཞན་མི་འགའ་ཤས་བཅས་པ་ཨི་ཇིབ་དུ་ཨུ་རི་ཡཱ་ལེན་པར་བཏང་ངོ་།

²³ དེ་ཚོས་ཁོང་ལ་རྒྱལ་པོ་ཡེ་ཧོ་ཡ་ཀིམ་གྱི་སར་ཕྱིར་འཁྲིད་ཡོང་བ་དང་། ཁོང་གིས་ཁོ་བསད་ནས། ཁོའི་རོ་དེ་བཞིན་མི་མང་གི་ཕུང་པོ་སྦས་ཡུལ་དུ་དབྱུགས་སོ།)

²⁴ འོན་ཀྱང་ང་ལ་ཤ་ཕན་གྱི་བུ་ཨ་ཧི་ཀམ་གྱི་རྒྱབ་སྐྱོར་ཡོད་སྟབས་མི་མང་ལ་གསོད་པར་རྩིས་སྤྲོད་བྱས་མེད་དོ༎