ཡེར་མི་ཡཱ 25 - Tibetan Old Testament 2011

བྱང་ཕྱོགས་ནས་དགྲ་བོ་ཡོང་བ།

¹ ཡོ་ཤི་ཡཱའི་སྲས་ཡེ་ཧོ་ཡ་ཀིམ་ཡ་ཧུ་དཱ་པའི་རྒྱལ་པོ་གནང་བའི་ལོ་བཞི་པར་གཙོ་བོ་དཀོན་མཆོག་ནས་ང་ལ་ཡ་ཧུ་དཱ་པའི་མི་མང་ཚང་མའི་སྐོར་གསུང་འཕྲིན་ཞིག་འབྱོར་བྱུང། (དེ་ནི་ནེ་བུ་ཀད་ནེ་ཛར་བྷེ་བྷི་ལོ་ནི་ཡའི་རྒྱལ་པོར་འགྱུར་བའི་ལོ་དང་པོ་དེ་ཡིན་ནོ།)

² ངས་ཡ་ཧུ་དཱ་དང་ཡེ་རུ་ཤ་ལེམ་གྱི་མི་མང་ཚང་མར་སྨྲས་པ་ཡིན།

³ ལོ་ཉི་ཤུ་རྩ་གསུམ་རིང་ཨ་མོན་གྱི་སྲས་ཡོ་ཤི་ཡཱ་ཡ་ཧུ་དཱ་པའི་རྒྱལ་པོར་འགྱུར་ནས་ལོ་བཅུ་གསུམ་འཁོར་བ་ནས་དུས་དེ་རིང་གི་བར་གཙོ་བོ་དཀོན་མཆོག་གིས་ང་ལ་གསུང་གླེང་གང་གནང་བ་དང་། ཁོང་གི་ཇི་ལྟར་བཀའ་གནང་བ་ངས་ཁྱོད་ཚོར་ཡང་ཡང་བཤད་ན་ཡང། ཁྱོད་ཚོས་དོ་སྣང་ཙམ་ཡང་བྱས་མེད་དོ།

⁴ གཙོ་བོ་དཀོན་མཆོག་གིས་རྒྱུན་ཆད་མེད་པར་ཁོང་གི་ཞབས་ཕྱི་ལུང་སྟོན་པ་ཚོ་གཏོང་གནང་ཡོད་ན་ཡང་། ཁྱོད་ཚོས་མི་ཉན་པ་ཡང་ན་དོ་སྣང་ཙམ་ཡང་བྱེད་མེད་དོ།

⁵ གཙོ་བོ་དཀོན་མཆོག་གིས་ཁྱོད་ཚོ་དང་ཁྱོད་ཚོའི་ཕ་མེས་ཚོར་གནང་བའི་ཡུལ་དེ་གཏན་གྱི་ཕྱིར་གནང་ནས། མུ་མཐུད་གནས་པའི་ཆེད་ཁོང་གིས་ཁྱོད་ཚོའི་སྡུག་རྩུབ་ཅན་གྱི་མི་ཚེ་དང་ཁྱོད་ཚོས་བྱེད་པའི་ལས་ངན་པ་ལས་བསྒྱུར་བ་གཏོང་དགོས་གསུངས་ཡོད།

⁶ ཁོང་གིས་ཁྱོད་ཚོས་ལྷ་གཞན་ལ་མཆོད་ནས་ཞབས་ཕྱི་ཞུ་བ་དང་། ཁྱོད་ཚོས་བཟོས་པའི་སྐུ་འདྲ་མཆོད་ནས་གཙོ་བོ་དཀོན་མཆོག་ཐུས་ཁྲོ་རུ་མ་འཇུག་ཅེས་གསུངས་ཡོད། ཁྱོད་ཚོས་གཙོ་བོ་དཀོན་མཆོག་གི་བཀའ་ལ་ཉན་ན་ཁོང་གིས་ཁྱོད་ཚོར་ཉེས་ཆད་གཏོང་མི་གནང་ངོ་།

⁷ འོན་ཀྱང་ཁྱོད་ཚོས་ཁོང་གིས་བཀའ་ལ་ཉན་རྒྱུར་ཁས་ལེན་བྱས་མེད་ཅེས་གཙོ་བོ་དཀོན་མཆོག་ཁོང་རང་གིས་གསུངས་ཡོད། དེའི་ཚབ་ལ་ཁྱོད་ཚོའི་སྐུ་འདྲའི་སྒོ་ནས་ཁོང་གི་ཐུགས་ཁྲོ་རུ་བཅུག་པ་དང་ཁྱོད་ཚོའི་ཐོག་ཏུ་ཉེས་ཆད་འབེབས་ཡོད།

⁸ དེར་བརྟེན་ཁྱོད་ཚོས་ཀུན་དབང་ཅན་གྱི་གཙོ་བོ་དཀོན་མཆོག་གི་བཀའ་ལ་མ་ཉན་པའི་རྐྱེན་གྱིས་ཁོང་གིས་འདི་ལྟར་བཀའ་གནང་ངོ་།

⁹ ངས་བྱང་ཕྱོགས་ཀྱི་མི་མང་རྣམས་དང་ངའི་ཞབས་ཕྱི་བྷེ་བྷི་ལོ་ནི་ཡའི་རྒྱལ་པོ་ནེ་བུ་ཀད་ནེ་ཛར་ལ་འབོད་རྒྱུ་ཡིན། ངས་དེ་ཚོ་ཡ་ཧུ་དཱ་དང་དེར་གནས་པ་རྣམས་དང་དེའི་ཁྱིམ་མཚེས་ཀྱི་མི་མང་ཚང་མ་དང་འཐབ་པར་འཁྲིད་ཡོང་ངོ་། ངས་མི་རིགས་འདི་དང་འདིའི་ཁྱིམ་མཚེས་བཅས་པ་མེད་པར་བཟོ་བ་དང་། དེ་ཚོ་འཇིགས་སུ་རུང་བ་དང་ཧང་སང་དགོས་པའི་ས་གནས་གྱང་གོག་ཞིག་ཏུ་གཏོང་རྒྱུ་ཡིན་ནོ་ཞེས་ང་གཙོ་བོ་དཀོན་མཆོག་གིས་སྨྲས་པ་ཡིན་ནོ།

¹⁰ ངས་དེ་ཚོའི་དགའ་བའི་སྐད་སྒྲ་དང་ཆང་སའི་ཐུགས་སྤྲོའི་དགའ་སྐྱིད་ཀྱི་སྒྲ་རྣམས་མེད་པར་བཟོ་བར་བྱའོ། དེ་ཚོའི་ཞུ་མར་གྱི་ཆེད་དེ་ཚོ་ལ་སྣུམ་མེད་པར་འགྱུར་བ་དང་འབྲུ་ཡང་མེད་པར་འགྱུར་རོ།

¹¹ ཡུལ་འདི་ཡོངས་རྫོགས་གྱང་གོག་དང་ཧང་སང་དགོས་པའི་གནས་སུ་འགྱུར་བ་དང་། ཁྱིམ་མཚེས་ཀྱི་མི་མང་ཚོས་བྷེ་བྷི་ལོ་ནི་ཡའི་རྒྱལ་པོར་ལོ་བདུན་ཅུའི་རིང་གཡོག་བྱེད་པར་གྱུར་རོ།

¹² དེའི་རྗེས་ལ་ངས་བྷེ་བྷི་ལོ་ནི་ཡ་དང་དེའི་རྒྱལ་པོར་དེ་ཚོའི་སྡིག་པའི་ཆེད་ཉེས་ཆད་གཏོང་བར་བྱའོ། ངས་ཡུལ་དེ་མེད་པར་བཟོ་བ་དང་དེ་ནི་གཏན་གྱི་ཆེད་གྱང་གོག་ཏུ་འཇིག་རྒྱུ་ཡིན།

¹³ ངས་ཡེར་མི་ཡཱ་བརྒྱུད་སྨྲས་པའི་རྐྱེན་ངན་ཚང་མ་མི་རིགས་ཚོར་འཁྱེར་ཡོང་རྒྱུ་ཉེན་བརྡ་དེ། ཡང་ན་མདོ་འདིའི་ནང་བཀོད་ཡོད་པའི་རྐྱེན་ངན་རྣམས་བྷེ་བྷི་ལོ་ནི་ཡའི་ཐོག་འཁྱེར་ཡོང་ནས་དེ་ལ་ཉེས་ཆད་གཏོང་རྒྱུ་ཡིན།

¹⁴ ངས་བྷེ་བྷི་ལོ་ནི་ཡ་པ་ཚོར་དེ་ཚོས་ཇི་ལྟར་གྱིས་པར་ལན་འཇལ་བ་དང་། མི་རིགས་མང་པོ་དང་རྒྱལ་པོ་ཆེན་པོ་ཚོས་དེ་ཚོ་ལ་ཚེ་གཡོག་བཟོ་བར་བྱའོ༎

མི་རིགས་ཚོའིི་སྟེང་གཙོ་བོ་དཀོན་མཆོག་གི་ཁྲིམས་གཅོད།

¹⁵ གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་ང་ལ་བཀའ་གནང་བ། འདིར་ངས་ཁྲོ་བས་བཀའ་བའི་རྒུན་ཆང་གི་དཀའ་ཡོལ་ཞིག་ཡོད། དེ་ངས་ཁྱོད་གཏོང་སའི་རྒྱལ་ཁབ་ཚང་མའི་སར་འཁྱེར་ནས་དེ་ཚོ་ལ་དེ་ནས་འཏུང་འཇུག་ཅིག

¹⁶ དེ་ཚོས་དེ་ནས་འཐུང་སྐབས་འཁྱོར་བ་དང་དྲན་མེད་དུ་འགྱུར་རོ། གང་ལགས་ཟེར་ན་ངས་དེ་ཚོའི་ཐོག་དམག་འཐབ་གཏོང་བཞིན་ཡོད།

¹⁷ དེར་བརྟེན་ངས་གཙོ་བོ་དཀོན་མཆོག་གི་ཕྱག་ནས་སྐར་ཡོལ་དེ་བླངས་ནས། གཙོ་བོ་དཀོན་མཆོག་གིས་ང་གཏོང་གནང་ཡུལ་མི་མང་ཚང་མའི་སར་སོང་ནས་དེ་ཚོ་ལ་དེ་ནས་འཐུང་དུ་བཅུག་པ་ཡིན།

¹⁸ ཡེ་རུ་ཤ་ལེམ་དང་ཡ་ཧུ་དཱའི་གྲོང་ཁྱེར་རྣམས་དང་དེ་ཚོའི་རྒྱལ་པོ་དང་འགོ་པ་ཚོ་དང་བཅས་པ་བྱེ་ཐང་དང་འཇིགས་སུ་རུང་བའི་ཧང་སང་དགོས་པའི་གནས་སུ་འགྱུར་བ་དང་། དེང་སང་ཡང་དེ་ཚོའི་མིང་དམོད་ཚིག་ཏུ་བེད་དསྤྱོད་བྱས་བའི་ཆེད་དེ་ནས་འཐུང་དུ་འཇུག་པ་ཡིན་ནོ།

^19-26 དཀར་ཡོལ་དེ་ནས་འཐུང་འཇུག་པའི་མིང་ཐོ་གཞན་ཚང་མ་ནི། ཨི་ཇིབ་ཀྱི་རྒྱལ་པོ་དང་ཁོང་གི་ལས་བྱེད་པ་ཚོ་དང་འགོ་འཛིན་ཚོ་དང་། ཨི་ཇིབ་པ་ཚང་མ་དང་ཨི་ཇིབ་ཏུ་གནས་སྡོད་བྱས་མཁན་ཕྱི་རྒྱལ་བ་ཚང་མ་དང། ཨུཛ་ཡུལ་གྱིི་རྒྱལ་པོ་ཚང་མ་དང་། ཕེ་ལེ་ཤེད་པའི་གྲོང་ཁྱེར་རྣམས་ཨཤ་ཀེ་ལོན་དང་གྷ་ཛ་དང་ཨེག་རོན་དང་ཨཤ་དྷོད་ཀྱི་ལྷག་ཕྲོས་བཅས་པའི་རྒྱལ་པོ་ཚང་མ་དང། ཨེ་དྷོམ་དང་མོ་ཨབ་དང་ཨམ་མོན་ཡུལ་གྱི་མི་མང་ཚང་མ་དང་། ཊ་ཡར་དང་སི་དོན་གྱི་རྒྱལ་པོ་ཚང་མ། མེ་ཌི་ཊ་རེ་ནི་ཡན་ཡུལ་རྣམས་ཀྱི་རྒྱལ་པོ་ཚང་མ་དང། དྷེ་དན་དང་ཏེ་མ་དང་བྷཛ་ཀྱི་གྲོང་ཁྱེར་རྣམས་དང་། སྐྲ་ཐུང་ཐུང་གཏུབ་མཁན་མི་མང་ཚང་མ་དང། ཨ་ར་བི་ཡའི་རྒྱལ་པོ་ཚང་མ་དང་། བྱེ་ཐང་སྡེ་རིགས་ཁག་གི་རྒྱལ་པོ་ཚང་མ། ཛིམ་རི་དང་ཨེ་ལམ་དང་མ་དཱའི་རྒྱལ་པོ་ཚང་མ་དང་། བྱང་ཕྱོགས་ཀྱི་ཐག་རིང་ཐུང་དང་གཅིག་རྗེས་གཉིས་མཐུད་ཀྱི་རྒྱལ་པོ་ཚང་མ་དང་། ས་གཞིའི་སྟེང་དུ་ཡོད་པའི་མི་རིགས་ཡོངས་ནས་འཐུང་དགོས་པས་མཐའ་མར་བྷེ་བྷི་ལོ་ནི་ཡའི་རྒྱལ་པོས་ཀྱང་དེ་ནས་འཐུང་བར་འགྱུར།

²⁷ དེ་ནས་གཙོ་བོ་དཀོན་མཆོག་གིས་ང་ལ་བཀའ་གནང་བ། ངས་དེ་ཚོ་ལ་དམག་གཏོང་རྒྱུར་བརྟེན། མི་མང་ཡོངས་ལ་ང་མཐུ་སྟོབས་ཅན་གྱི་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་དེ་ཚོ་ར་མ་བཟི་བར་དང་སྐྱུག་པ་མ་ཤོར་བར་དང་མ་འགྱེལ་བར་དང་ཡར་ལངས་མ་ཏུབ་བར་དེ་ནས་འཐུང་དགོས་པའི་བཀའ་གནང་སོང་སྨྲོས་ཤིག

²⁸ དེ་ཚོས་ཁྱོད་ཀྱིས་ལག་ནས་དཀར་ཡོལ་མ་ལེན་ནས་མ་འཐུང་བ་ཡིན་ན། དེ་ཚོ་ལ་ང་ཀུན་དབང་ཅན་གྱི་གཙོ་བོ་དཀོན་མཆོག་གིས་དེ་ནས་ངས་པར་དུ་འཐུང་དགོས་པའི་བཀའ་གནང་ངོ་ཞེས་སྨྲོས་ཤིག

²⁹ ངས་ང་རང་ཉིད་ཀྱི་གྲོང་ཁྱེར་མེད་པར་བཟོ་རྒྱུའི་ལས་འགོ་བཙུགས་རྒྱུ་ཡིན། དེ་ཚོའི་བསམ་པར་ཉེས་ཆད་མེད་པར་ཐར་གྱི་རེད་བསམ་གྱི་ཡོད་དམ། དེ་ལྟར་མིན་ནོ། དེ་ཚོ་ལ་ཉེས་ཆད་གཏོང་རྒྱུ་ཡིན་ནོ། གང་ལ་ཟེར་ན། ངས་ས་གཞིའི་མི་མང་ཡོངས་ལ་དམག་གཏོང་རྒྱུ་ཡིན་ཞེས་ང་ཀུན་དབང་ཅན་གྱི་གཙོ་བོ་དཀོན་མཆོག་གིས་སྨྲས་པ་ཡིན་ནོ།

³⁰ ཡེར་མི་ཡཱ་ཁྱོད་ཀྱིས་ངས་བརྗོད་པ་རྣམས་གསལ་སྒྲགས་བྱེད་དགོས་སོ། ཁྱོད་ཀྱིས་མི་དེ་ཚོ་ལ་འདི་ལྟར་བརྗོད་དགོས་སོ། དཀོན་མཆོག་ཁོང་གི་མཐོ་རིས་ནས་ངར་སྐད་འདོན། མཐོ་རིས་ཀྱི་དགུང་ནས་འབྲུག་སྒྲ་སྒྲོགས། ཁོང་གིས་རང་གི་མི་ལ་ངར་སྐད་འདོན། རྒུན་འབྲུམ་བརྫི་མཁན་མི་ལྟར་གསུང་སྐད་སྐྱོན། ས་གཞིའི་ཡོངས་ཀྱིས་ཁོང་གི་གསུང་སྐད་ཐོས།

³¹ གསུང་གི་གྲགས་ཆར་ས་གཞིའི་མཐའ་བར་ཐོས། མི་རིགས་རྣམས་ཀྱི་ཐོག་ཏུ་གཙོ་བོ་དཀོན་མཆོག་ཁོང་ལ་ཁ་མཆུ་ཡོད། ཁོང་གིས་མི་མང་ཡོངས་ལ་ཞིབ་དཔྱོད་གནང་། སྤྱོད་ངན་རྣམས་ལ་ཉེས་པ་སྲོག་ཐོག་གནང་། གཙོ་བོ་དཀོན་མཆོག་ཁོང་གིས་བཀའ་གནང་ངོ་།

³² ཀུན་དབང་ཅན་གྱི་གཙོ་བོ་དཀོན་མཆོག་གིས། རྐྱེན་ངན་དེ་བཞིན་མི་རིགས་གཅིག་འཇུག་གཉིས་འཇུག་ལ་འབྱུང་བ་དང་། ས་གཞིའི་ས་ཐག་རིང་པོའི་མཐའ་དག་ལ་རླུང་འཚུབ་དྲག་པོ་གསོགས་བཞིན་ཡོད་གསུངས་སོ།

³³ ཉིན་དེ་གཙོ་བོ་དཀོན་མཆོག་གིས་བསད་གནང་བའི་རོ་རྣམས་ས་གཞིའི་མཐའ་གཅིག་ནས་གཞན་བར་འཐོར་བར་འགྱུར། དེ་ཚོའི་ཆེད་སུས་ཀྱང་མྱ་ངན་མི་བྱེད་པ་དང་དེ་ཚོ་ལེན་ནས་སྦས་པར་མི་བྱེད་དོ། དེ་ཚོ་སའི་སྟེང་དུ་ལུད་ཀྱི་ཕུང་པོ་ལྟར་ལུས་པར་འགྱུར་རོ།

³⁴ ཁྱོད་ཚོ་འགོ་འཁྲིད་ཚོ་དང་ངའི་མི་མང་གི་ལུག་རྫི་ཚོ་ངུ་ཞིག། སྐད་ཆེན་པོས་ངུ་ཞིག། མྱ་ངན་བྱེད་ཅིང་རྡུལ་སྟེང་སྒྲིལ་ཞིག། ཁྱོད་ཚོ་གསོད་པའི་དུས་ལ་སླེབས་ཡོད་པའི་ཁྱོད་ཚོ་ལུག་ཐུག་ལྟར་གསོད་པར་བྱའོ།

³⁵ ཁྱོད་ཚོ་ལ་ཐར་བའི་ལམ་མེད་དོ།

^36-37 ཁྱོད་ཚོ་མྱ་ངན་བྱ་བཞིན་སྡུག་བསྔལ་གྱིས་ངུ་ཞིག། གང་ལ་ཟེར་ན། གཙོ་བོ་དཀོན་མཆོག་ཐུགས་ཁྲོ་བའི་སྐབས་ཁྱོད་ཚོའི་མི་རིགས་སྟོར་གནང་བ་དང་ཁྱོད་ཚོའི་ཞི་བདེའི་ཡུལ་དེ་བཞིན་གྱང་གོག་ཏུ་གཏོང་གནང་ངོ་།

³⁸ སེང་གེས་རང་གི་བྲག་ཕུག་དོར་བ་ལྟར་གཙོ་བོ་དཀོན་མཆོག་གིས་ཁོང་གི་མི་མང་སྤོང་གནང་ངོ་། དམག་གི་འཇིགས་སྐྲག་དང་གཙོ་བོ་དཀོན་མཆོག་གི་ཐུགས་ཁྲོ་དྲག་པོས་ཡུལ་དེ་བཞིན་བྱེ་ཐང་དུ་འགྱུར་ཡོད་དོ༎