ཡེར་མི་ཡཱ 24 - Tibetan Old Testament 2011

སེ་ཡབ་ཀྱི་སླེ་པོ་གཉིས།

¹ གཙོ་བོ་དཀོན་མཆོག་གིས། མཆོད་ཁང་གི་མདུན་དུ་བཞག་ཡོད་པའི་སེ་ཡབ་ཀྱི་སླེ་པོ་གཉིས་ང་ལ་སྟོན་གནང་བྱུང་། (དེ་ནི་བྷེ་བྷི་ལོ་ནི་ཡའི་རྒྱལ་པོ་ནེ་བུ་ཀད་ནེ་ཛར་གྱིས་ཡེ་ཧོ་ཡ་ཀིམ་གྱི་སྲས་ཡ་ཧུ་དཱ་པའི་རྒྱལ་པོ་ཡེ་ཧོ་ཡ་ཀིན་དང་། ཡ་ཧུ་དཱ་པའི་འགོ་འཛིན་ཚོ་དང་ལག་ཤེས་པ་ཚོ་དང་ལག་རྩལ་ཅན་གྱི་ལས་མི་བཅས་པ་ཡེ་རུ་ཤ་ལེམ་ནས་བྷེ་བྷི་ལོ་ནི་ཡ་དུ་བཙོན་དུ་འཁྲིད་པའི་རྗེས་ལ་ཡིན།)

² སླེ་པོ་དང་པོ་དེའི་ནང་སྨིན་ཚར་བའི་སེ་ཡབ་ཡག་པོ་ཁག་ཡོད། གཞན་པ་དེའི་ནང་ཟ་མི་ལོ་བའི་སེ་ཡབ་ཧ་ཅང་སྡུག་པོ་ཁག་ཡོད།

³ དེ་ནས་གཙོ་བོ་དཀོན་མཆོག་གིས་ང་ལ། ཡེར་མི་ཡཱ་ཁྱོད་ཀྱིས་ག་རེ་མཐོང་ངམ་ཞེས་གསུངས་པས། ངལ་ལན་དུ་སེ་ཡབ་འདུག། སེ་ཡབ་ཡག་པོ་རྣམས་ནི་ཧ་ཅང་ཡག་པོ་ཡོད་པ་དང་། སྡུག་པ་ཁག་ནི་ཧ་ཅང་གི་སྡུག་པོ་ཟ་བར་མི་ལོ་བ་འདུག་ཅེས་ཞུས་པ་ཡིན།

⁴ དེ་འདྲ་སོང་ཙང་གཙོ་བོ་དཀོན་མཆོག་གིས་ང་ལ་བཀའ་གནང་བ།

⁵ ང་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་བྷེ་བྷི་ལོ་ནི་ཡ་དུ་འཁྲིད་པའི་མི་མང་ཚོ་སེ་ཡབ་བཟང་པོ་ལྟར་ཆ་འཛིན་བྱ་རྒྱུ་དང་དེ་ཚོར་དྲིན་སྐྱོང་བྱ་རྒྱུ་ཡིན་ནོ།

⁶ ངས་དེ་ཚོ་ལ་ལྟ་རྟོག་ཀྱིས་ཡུལ་འདིར་ཚུར་འཁྲིད་ཡོང་རྒྱུ་ཡིན། ངས་དེ་ཚོ་བཟོ་རྒྱུ་ལས་བཤིགས་པར་མི་བྱའོ། ངས་དེ་ཚོ་འདེབས་རྒྱུ་ལས་བཀོག་པར་མི་བྱའོ།

⁷ ངས་དེ་ཚོ་ལ་ང་གཙོ་བོ་དཀོན་མཆོག་ཡིན་པ་ངོ་ཤེས་པའི་འདོད་པ་སྐྱེད་པ་བཟོ་རྒྱུ་ཡིན། དེ་ནས་དེ་དག་ངའི་མི་མང་ལ་འགྱུར་བ་དང་། ང་དེ་དག་གི་དཀོན་མཆོག་ཏུ་འགྱུར་རོ། གང་ལ་ཟེར་ན། དེ་དག་སེམས་ཀྱི་གཏིང་ནས་ངའི་སར་ལོག་པར་འགྱུར།

⁸ ཡ་ཧུ་དཱ་པའི་རྒྱལ་པོ་ཛེ་དེ་ཀི་ཡཱ་དང་ཁོང་གི་སྲིད་དོན་པ་ཚོ་དང་གཞན་ཡེ་རུ་ཤ་ལེམ་གྱི་མི་མང་ལྷག་འཕྲོས་ཡུལ་འདིར་གནས་སྡོད་མཁན་ནམ། ཨི་ཇིབ་དུ་འགྲོ་མཁན་ཚོར་ང་གཙོ་བོ་དཀོན་མཆོག་གིས་ཟ་བར་མི་ལོ་བའི་སེ་ཡབ་ཧ་ཅང་སྡུག་པོ་ལྟར་འཛིན་ནོ།

⁹ ངས་དེ་ཚོའི་སྟེང་རྐྱེན་ངན་དེ་འདྲ་འབེབས་པར་བྱ་རྒྱུ་ཡིན་དེ་མཐོང་ནས་འཛམ་གླིང་གི་མི་རིགས་རྣམས་འཇིག་པར་འགྱུར། མི་ཚོས་དེ་ཚོ་ལ་འཕྱ་བ་དང་དེ་ཚོའི་སྐོར་ལ་བསྟན་བཤིག་ལངས་བ་དང་ཁྱད་གསོད་བྱེད་པ་དང་། དེ་ཚོའི་མིང་ངས་དེ་ཚོ་སྟོར་བ་ཁག་ལ་དམོད་པ་ལྟར་བེད་སྤྱོད་བྱེད་དོ།

¹⁰ ངས་དེ་ཚོ་དང་དེ་ཚོའི་ཕ་མེས་ཚོར་སྤྲད་པའི་ཡུལ་དུ་དེ་ཚོ་གཅིག་ཀྱང་མ་ལུས་པར་དམག་དང་མུ་གེ་དང་ནད་ཡམས་གཏོང་བར་བྱའོ༎