ཡེར་མི་ཡཱ 20 - Tibetan Old Testament 2011

བླ་མ་པ་ཤུར་དང་མཉམ་དུ་ཡེར་མི་ཡཱའི་གཉིས་ཀྱི་བར་འཁོན་འཁྲུགས།

¹ ཨིམ་མེར་གྱི་བུ་པ་ཤུར་མཆོད་ཁང་གི་དཔོན་པོ་གཙོ་བོས་ངས་གསལ་སྒྲགས་གྱིས་པ་དེ་ཚོ་ཐོས་སྐབས་སུ།

² ཁོས་ང་ལ་ཉེས་བརྡུང་བཏང་ནས་མཆོད་ཁང་ནང་དུ་བྷེན་ཡ་མིན་གྱི་རྒྱལ་སྒོ་གོང་མར་ལྕགས་ཐག་རྒྱབ་སྟེ་འཇོག་དགོས་པའི་བཀའ་གནང་ངོ་།

³ སང་ཞོག་དེར་པ་ཤུར་གྱིས་ང་ལྕགས་ཐག་ནས་གློད་པའི་རྗེས་ལ་ངས་ཁོ་ལ་གཙོ་བོ་དཀོན་མཆོག་གིས་ཁྱོད་ལ་པ་ཤུར་ཞེས་མིང་གནང་བ་མ་ཡིན་ནོ། ཁོང་གིས་ཁྱོད་ལ་གནང་བའི་མིང་དེ་ས་གནས་གང་སར་འཇིགས་སྐྲག་ཡིན་ཞེས་སྨྲས་པ་ཡིན་ནོ།

⁴ གཙོ་བོ་དཀོན་མཆོག་ཁོང་རང་གིས་འདི་ལྟར་བཀའ་གནང་ཡོད། ངས་ཁྱོད་རང་དང་ཁྱོད་རང་གི་གྲོགས་པོ་ཚོར་འཇིགས་སྐྲག་ཅན་བཟོ་རྒྱུ་དང་། ཁྱོད་ཀྱིས་དེ་ཚོ་ཚང་མ་དགྲ་བོའི་རལ་གྲིས་གསོད་པར་མཐོང་བར་འགྱུར། ངས་ཡ་ཧུ་དཱ་པའི་མི་མང་ཚང་མ་བྷེ་བྷི་ལོ་ནི་ཡའི་རྒྱལ་པོའི་དབང་འོག་ཏུ་འཇོག་རྒྱུ་དང་ཁོང་གིས་ཁོ་ཚོ་འགའ་ཤས་རང་གི་ཡུལ་དུ་བཙོན་པར་འཁྲིད་པ་དང་གཞན་རྣམས་གསོད་པར་བྱེད་དོ།

⁵ ངས་དེ་ཚོའི་དགྲ་བོ་ཚོར་གྲོང་ཁྱེར་འདིའི་རྒྱུ་ནོར་ཐམས་ཅད་འཕྲོག་བཅོམ་བྱེད་དུ་འཇུག་རྒྱུ་དང་། དེའི་ཁར་དབང་དང་རྒྱུ་དངོས་རྣམས་དང་ཡ་ཧུ་དཱ་པའི་རྒྱལ་པོ་ཚོའི་གཏེར་མཛོད་དང་བཅས་པ་དབང་བཟུང་བྱས་ནས་བྷེ་བྷི་ལོ་ནི་ཡ་དུ་འཁྱེར་ཏུ་འཇུག་རྒྱུ་ཡིན་ནོ།

⁶ པ་ཤུར་ཁྱོད་རང་དང་ནང་མི་ཚང་མ་འཛིན་བཟུང་གིས་བྷེ་བྷི་ལོ་ནི་ཡ་དུ་འཁྲིད་པར་འགྱུར། དེར་ཁྱོད་འཆི་བ་དང་ཁྱོད་རང་གི་རྫུན་ཐེངས་མང་པོ་བཤད་པའི་གྲོགས་པོ་ཚོ་མཉམ་དུ་སྦས་པར་འགྱུར་རོ་ཞེས་སོ༎

ཡེར་མི་ཡཱས་གཙོ་བོ་དཀོན་མཆོག་ལ་སྐྱོན་བརྗོད་བྱས་པ།

⁷ གཙོ་བོ་དཀོན་མཆོག་ཁྱེད་ཀྱིས་ང་ལ་བསླུ་འཁྲིད་གནང་། ང་ནི་བསླུ་འཁྲིད་འོག་ཏུ་ཚུད་སོང་ངོ་། ཁྱེད་ནི་ང་ལས་སྟོབས་ཤུགས་ཆེ་བ་ཡོད། ཁྱེད་ཀྱིས་ང་ལ་ཤུགས་སྣོན་མཛད་སོང་ངོ་། ཚང་མས་ང་ལ་འཕྱར་བཞིན་འདུག། དེ་ཚོས་ཉིན་གང་ང་ལ་ཁྱད་གསོད་བྱེད།

⁸ ང་ཡི་སྐད་ཆ་ཤོད་པའི་སྐབས། དྲག་ཤུགས་དང་ནི་སྟོར་རྒྱུ་ཅེས་སྐད་ཆེན་པོས་སྨྲས་དགོས། གཙོ་བོ་དཀོན་མཆོག་ང་ལ་དུས་རྟག་ཏུ། ཁྱད་གསོད་དང་ནི་བརྙས་བཅོས་འབའ་ཞིག་བྱུང་། ང་ཡི་ཁྱེད་ཀྱི་གསུང་འཕྲིན་གསལ་སྒྲགས་རྐྱེན།

⁹ འོན་ཀྱང་ངས་གཙོ་བོ་དཀོན་མཆོག་ཁྱེད་བརྗེད་ནས། ཁྱེད་ཀྱི་མཚན་ནས་མི་སྨྲ་ཅེས་བརྗོད་སྐབས། ཁྱེད་ཀྱི་བཀའ་དེ་མེ་ལྟར་ངའི་ཁོག་འབར། ང་ཡི་འགོག་ཐབས་གང་བྱས་ཀྱང་། ང་ཡི་དེ་ལ་མུ་མཐུད་འགོག་མི་ཐུབ།

¹⁰ ང་ཡིས་ཚང་མས་ཤབ་ཤོབ་སྨྲས་པ་ཐོས། ཕྱོགས་བཞིར་འཇིགས་པས་ཁྱབ་ནས་འདུག། ང་ཚོས་ཁོའི་སྐོར་འགོ་འཛིན་ལ་ཞུས་དགོས། གྲོགས་པོ་ཉེ་ཤོས་ཚོས་ཀྱང་ང་ཕམ་སྒུག། དེ་ཚོས་ཁོ་ལ་ང་ཚོས་བསླུ་འཁྲིད་ཐུབ། དེ་རྗེས་ཁོ་ལ་བཟུང་ནས་དགྲ་ཤ་ལེན།

¹¹ འོན་ཀྱང་གཙོ་བོ་དཀོན་མཆོག་ངའི་ཕྱོགས་ཡོད། སྟོབས་ཤུགས་ནི་དང་མཐུ་ལྡན་ཡོད་འགྱུར་བས། ང་ལ་མནར་གཅོད་བྱ་མཁན་དོན་མི་སྒྲུབ། དེ་ཚོ་རྣམ་ནི་རྒྱལ་བར་འགྱུར་མི་ཐུབ། གཏན་གྱི་ཆེད་དུ་དམའ་འབེབས་ཡོང་བར་འགྱུར། དེ་ཚོའི་དམའ་འབེབས་ནམ་ཡང་བརྗེད་མི་ཡོང་།

¹² འོན་ཀྱང་ཀུན་དབང་གཙོ་བོ་དཀོན་མཆོག་ཁྱེད་ཀྱིས་ནི། ཁྲིམས་དྲང་སྒོ་ནས་མི་ཚོར་ཞིབ་དཔྱོད་གནང་། དེ་ཚོའི་སེམས་ནང་ཇི་ཡོད་ཁྱེད་ཀྱིས་མཁྱེན། ཁྱེད་ཀྱིས་དགྲ་ཤ་བཞེས་པ་ང་ལ་མཐོང་དུ་བཅུག། གང་ལགས་ཟེར་ན་ཁྱེད་ལ་ང་ཡི་རྒྱུ་རྐྱེན་རྣམས་ཞུས་ཡོད།

¹³ གཙོ་བོ་དཀོན་མཆོག་ཁོང་ལ་མགུར་མ་ཕུལ། གཙོ་བོ་དཀོན་མཆོག་ཁོང་ལ་བསྟོད་པ་ཕུལ། ཁོང་གིས་མནར་གཅོད་མྱོང་མཁན་མི་རྣམས་ལ། མི་ངན་ལག་ནས་ཁོང་གིས་སྐྱོབས་པར་མཛོད།

¹⁴ ང་ནི་སྐྱེས་པའི་ཉིན་དེར་དམོད་འགྱུར་ཅིག། ང་ནི་མ་ནས་སྐྱེས་པའི་ཉིན་བརྗེད་འགྱུར།

¹⁵ ང་ཡི་ཡབ་ལ་དེ་ནི་བུ་ཞིག་རེད། ཁྱེད་ལ་བུ་ཞིག་བྱུང་སོང་ཞེས་ཞུས་ནས། ཁོང་ནི་མཉེས་པར་བཟོ་མི་དམོད་པར་ཤོག།

¹⁶ གཙོ་བོ་དཀོན་མཆོག་ཁོང་གིས་མི་དེ་ལ། བྱམས་མེད་འཇིགས་མཛད་གྲོང་ལྟར་འགྱུར་བར་ཤོག། ཞོག་པར་ཁོ་པར་ནད་ཟུག་བྱུང་བའི་སྐད་ངན་དང་། ཉིན་གུང་དམག་གི་འཇིགས་བརྡ་ཐོས་པར་ཤོག།

¹⁷ གང་ལ་ཟེར་ན་ཁོ་ཡི་ང་ལ་ནི། མ་སྐྱེས་སྔོན་དུ་ང་ལ་བསད་མེད་དོ། དེ་མིན་མ་ཡི་མངལ་ནི་ངའི་དུར་འགྱུར།

¹⁸ ང་ནི་གང་གི་དོན་དུ་སྐྱེས་ཡིན་ནམ། དཀའ་ངལ་དང་སྡུག་ངལ་ཐོབ་རྒྱུ་དང་། ང་ཡི་མི་ཚེ་དམའ་འབེབས་ངང་རྫོགས་རྒྱུར་སྐྱེས་པ་ཡིན་ནམ༎