ཡེར་མི་ཡཱ 19 - Tibetan Old Testament 2011

བུམ་པ་ཆག་ཀྱོག་དེ།

¹ གཙོ་བོ་དཀོན་མཆོག་གིས་ང་ལ་སོང་ནས་རྫ་བུམ་ཞིག་ཉོས་ཤིག་གསུངས་བྱུང་། ཁོང་གིས་ང་ལ་མི་མང་ནས་མི་རྒན་པ་འགའ་ཞིག་དང་བླ་མ་ལོ་ན་རྒས་པོ་འགའ་ཞིག་འཁྲིད་ནས།

² ཧིན་ནོམ་གྱི་ལུང་གཤོང་གི་ཕྱི་རོལ་དུ་རྫ་ཆག་གི་རྒྱལ་སྒོ་བརྒྱུད་སོང་ཞིག་ཅེས་བཀའ་གནང་ངོ་། དེར་ངས་ཁོང་གི་གནང་བའི་གསུང་འཕྲིན་དེ་གསལ་སྒྲགས་བྱ་དགོས་སོ།

³ གཙོ་བོ་དཀོན་མཆོག་གིས་ང་ལ་འདི་ལྟར་བརྗོད་དགོས་ཤེས་བཀའ་གནང་བྱུང་། ཡ་ཧུ་དཱ་པའི་རྒྱལ་པོ་ཚོ་དང་ཡེ་རུ་ཤ་ལེམ་གྱི་མི་མང་ཚོ་ང་མཐུ་སྟོབས་ཅན་གྱི་གཙོ་བོ་དཀོན་མཆོག་ཨིསི་རཱ་ཨེལ་གྱི་དཀོན་མཆོག་གི་བཀའ་ཇི་ལྟར་ཤོད་རྒྱུ་ཡོད་པར་ཉོན་ཞིག ངས་ཡུལ་འདིར་རྐྱེན་ངན་གཏོང་རྒྱུ་ཡིན་པས་དེ་ལྟར་ཐོས་མཁན་ཚོ་ཡང་ཧོན་ཐོར་བར་འགྱུར་རོ།

⁴ མི་མང་ཚོས་ང་སྤངས་ནས་དེ་ཚོ་དང་ཕ་མེས་ཚོ་དང་ཡ་ཧུ་དཱའི་རྒྱལ་པོ་ཚོས་ཀྱང་ངོ་མི་ཤེས་པའི་ལྷ་གཞན་ཚོར་མཆོད་པ་ཕུལ་ནས་མི་གཙང་བ་བཟོས་ཡོད་སྟབས་ངས་དེ་ལྟར་བྱ་རྒྱུ་ཡིན་ནོ། དེ་ཚོས་གནས་འདི་མི་ནོངས་མེད་ཚོའི་ཁྲག་གིས་བཀང་ཡོད་དོ།

⁵ དེ་ཚོས་རང་གི་བུ་ཕྲུག་དམར་མཆོད་དུ་མེར་སྲེག་པའི་ཆེད་བྷལ་ལ་མཆོད་ཁྲི་རྣམས་བཞེངས་ཡོད་དོ། ངས་དེ་ལྟར་བྱེད་དགོས་པའི་བཀའ་བཏང་མེད་པ་མ་ཟད། དེ་ལྟར་ངའི་སེམས་ལ་ནམ་ཡང་མ་འཁོར་རོ།

⁶ དེ་འདྲ་སོང་གཙང་གནས་འདིར་ཏོ་ཕེད་དམ་ཧིན་ནོམ་གྱི་ལུང་གཤོང་ཞེས་མི་གྲགས་པའི་དུས་ཤིག་ཡོང་བར་འགྱུར། དེའི་ཚབ་ལ་ས་གནས་འདིར་སྲོག་གཅོད་ཀྱི་ལུང་གཤོང་ཞེས་གྲགས་པར་འགྱུར།

⁷ འདིར་ངས་ཡ་ཧུ་དཱ་དང་ཡེ་རུ་ཤ་ལེམ་གྱི་མི་མང་རྣམས་ཀྱི་འཆར་གཞི་རྣམས་ལམ་ལྷོང་མེད་པ་བཟོའོ། ངས་དེ་ཚོའི་དགྲ་བོ་རྣམས་དེ་ཚོའི་ཐོག་རྒྱལ་དུ་འཇུག་པ་དང་། དེ་ཚོ་དམག་གི་ནང་དུ་གསོད་འཇུག་ནས་དེ་ཚོའི་རོ་རྣམས་བྱ་དང་གཅན་གཟན་གྱི་ཟས་སུ་སྤྲོད་རྒྱུ་ཡིན་ནོ།

⁸ ངས་གྲོང་ཁྱེར་འདིར་ཧ་ཅང་ཚབ་ཆེའི་འཇིག་པ་གཏོང་རྒྱུ་ཡིན་པས་གྲོང་ཁྱེར་འདི་བརྒྱུད་ནས་འགྲོ་མི་རྣམས་ཧ་ལས་པ་དང་ཧོན་འཐོར་བར་འགྱུར་རོ།

⁹ དགྲ་བོས་གྲོང་ཁྱེར་གྱི་མཐའ་བསྐོར་བ་དང་དེའི་མི་མང་གསོད་ཐབས་བྱེད་པ་དང་། དམག་དཔུང་གིས་བསྐོར་ནས་དེ་བཞིན་ཧ་ཅང་འཇིགས་རུང་ཡོད་སྟབས་གྲོང་ཁྱེར་གྱི་ནང་དུ་ཡོད་པའི་མི་མང་ཚོས་གཅིག་གིས་གཅིག་ལ་ཟ་བ་དང་རང་གི་བུ་ཕྲུག་ཀྱང་ཟ་བར་བྱེད་དོ།

¹⁰ དེ་ནས་གཙོ་བོ་དཀོན་མཆོག་གིས་ང་ལ། ང་མཉམ་དུ་ཡོད་པའི་མི་ཚོའི་མདུན་དུ་བུམ་པ་དེ་གཅོག་ཅིག་ཅེས་གསུངས་པ་དང་།

¹¹ ཀུན་དབང་ཅན་གྱི་གཙོ་བོ་དཀོན་མཆོག་གིས་བཀའ་གནང་བ་འདི་ལྟར་ཤོད་གསུངས་པ་དང། ངས་མི་མང་འདི་ཚོ་དང་གྲོང་ཁྱེར་འདི་བཞིན་རྫའི་བུམ་པ་ཆག་པ་དེ་སླར་ཡང་ལྷུ་སྒྲིགས་མི་ཐུབ་མཁན་ལྟར་བཅོག་རྒྱུ་ཡིན། རོ་སྦས་ཡུལ་གང་དུ་ཡང་མེད་སྟབས་དེ་ཚོའི་རང་གི་གཤིན་པོའི་རོ་ཚོ་ཏོ་ཕེད་དུ་སྦས་པར་བྱེད་དོ།

¹² ངས་གྲོང་ཁྱེར་འདི་དང་འདིའི་ནང་གནས་སྡོད་བྱེད་པ་རྣམས་ཏོ་ཕེད་ལྟར་བཟོ་རྒྱུའི་མནའ་བསྐྱལ་རྒྱུ་ཡིན།

¹³ ཡེ་རུ་ཤ་ལེམ་གྱི་ཁང་པ་ཚོ་དང་ཡ་ཧུ་དཱ་པའི་རྒྱལ་པོ་ཚོའི་ཕོ་བྲང་རྣམས་དང་ཁང་པ་ཚང་མའི་ཐོག་ཁའི་སྟེང་དུ་སྐར་ཚོགས་ལ་བདུག་སྤོས་ཕུལ་ནས། ལྷ་གཞན་ཚོར་མཆོད་པར་རྒུན་ཆང་ཕུལ་བའི་ཁང་པ་ཚང་མ་ཏོ་ཕེད་ལྟར་མི་གཙང་བར་འགྱུར་ཞེས་སོ།

¹⁴ དེ་ནས་གཙོ་བོ་དཀོན་མཆོག་གིས་གསུང་འཕྲིན་གསལ་སྒྲགས་བྱེད་པར་ཏོ་ཕེད་དུ་གཏོང་གནང་བས་དེ་ནས་ང་ཐོན་པ་ཡིན། ང་སོང་ནས་མཆོད་ཁང་གི་ཁྱམས་རར་ལངས་ནས་མི་མང་ཚང་མར།

¹⁵ ཀུན་དབང་ཅན་གྱི་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་བཀའ་གནང་བ་འདི་ལྟར་ཡིན། ཁྱོད་ཚོ་གྱོང་པོ་ཡིན་པ་དང་ཇི་ལྟར་སྨྲས་པར་མི་ཉན་པས་ངས་གྲོང་ཁྱེར་འདི་དང་དེའི་ཉེ་འགྲམ་གྱི་གྲོང་རྣམས་ལ་ངས་བརྗོད་པ་ལྟར་ཉེས་ཆད་གཏོང་རྒྱུ་ཡིན་ནོ༎