ཡེར་མི་ཡཱ 18 - Tibetan Old Testament 2011

ཡེར་མི་ཡཱ་རྫ་མཁན་གྱི་ཁྱིམ་ནང།

¹ གཙོ་བོ་དཀོན་མཆོག་གིས་ང་ལ་བཀའ་གནང་བ།

² ཛ་མཁན་གྱི་ཁྱིམ་ནང་སོང་ཞིག། དེར་ངས་ཁྱོད་ལ་ངའི་འཕྲིན་སྤྲོད་པར་བྱ་ཅེས་སོ།

³ དེར་བརྟེན་ང་ཛ་མཁན་དེའི་ནང་སོང་བ་དང་། ཛ་མཁན་དེས་དེར་འཁོར་ལོར་ལས་ཀ་བྱེད་བཞིན་པ་མཐོང་བྱུང་།

⁴ རྫ་སྣོད་ཞིག་ཡག་པོ་མ་བྱུང་སྐབས། ཁོས་འདམ་དེ་ལེན་ནས་དེས་དངོས་པོ་གཞན་ཞིག་བཟོ་བར་བྱེད་དོ།

⁵ དེ་ནས་གཙོ་བོ་དཀོནམཆོག་གིས་ང་ལ་བཀའ་གནང་བ།

⁶ ངས་ཨིསི་རཱཨེལ་གྱི་མི་མང་རྣམས་རྫ་མཁན་གྱིས་འདམ་ལ་ཇི་ལྟར་བྱེད་པ་ལྟར་བྱེད་པའི་དབང་ཆ་ང་ལ་མེད་དམ། ཁྱོད་ནི་ངའི་ལག་ཏུ་རྫ་མཁན་གྱི་ལག་ཏུ་ཡོད་པའི་འདམ་ལྟར་ཡིན་ནོ།

⁷ གལ་སྲིད་དུས་སྐབས་ཞིག་ལ་ངས་མི་རིགས་དང་རྒྱལ་ཁབ་རྩ་བཀོག་བཏང་བ་དང་སྟོར་བ་ཡང་ན་མེད་པར་བཟོ་རྒྱུ་ཡིན་ཞེས་སྨྲས་པ་ཡིན་ན།

⁸ ཡང་མི་རིགས་དེས་ངན་ལས་བྱ་རྒྱུ་དེ་ལས་བསྒྱུར་བ་ཡིན་ན་ངས་བརྗོད་པར་ལྟར་དེ་ལྟར་བྱ་རྒྱུ་མིན་ནོ།

⁹ དུས་སྐབས་གཞན་ཞིག་ལ་ངས་མི་རིགས་སམ་རྒྱལ་ཁབ་གང་ཞིག་འདེབས་རྒྱུ་ཡང་ན་བཟོ་རྒྱུ་ཡིན་ཞེས་སྨྲས་ན་ཡང་།

¹⁰ མི་རིགས་དེས་ངའི་བཀའ་ལ་མ་ཉན་པར་ངན་རིགས་བྱས་པ་ཡིན་ན། ངས་ཇི་ལྟར་བྱ་རྒྱུ་ཡིན་བརྗོད་པ་ལྟར་བྱེད་རྒྱུ་མིན་ནོ།

¹¹ དེ་འདྲ་སོང་ཙང་ཡ་ཧུ་དཱ་དང་ཡེ་རུ་ཤ་ལེམ་གྱི་མི་མང་ལ་ངས་དེ་ཚོ་ལ་ཆད་པ་གཏོང་རྒྱུའི་འཆར་གཞི་བརྩོམ་ཞིང་གྲ་སྒྲིགས་བྱ་བཞིན་ཡོད་སྨྲོས་ཤིག དེ་ཚོ་ལ་དེ་ཚོའི་སྡིག་ཅན་གྱི་མི་ཚེ་མཚམས་འཇོག་བྱེད་ནས་དེ་ཚོའི་ལམ་དང་དེ་ཚོས་བྱེད་པའི་ལས་ལ་བསྒྱུར་བ་གཏོང་དགོས་ཤེས་སྨྲོས་ཤིག

¹² དེ་ཚོས་དེ་ལྟར་བྱ་རྒྱུ་མིན། དེ་ལྟར་ཅི་ལ་བྱས། ང་ཚོས་འདོད་པ་ལྟར་ང་ཚོ་གྱོང་པོ་དང་ངན་ལས་བྱེད་ཅེས་ལན་འདེབས་བྱས་པར་འགྱུར༎

མི་མང་གིས་གཙོ་བོ་དཀོན་མཆོག་ལ་ཁས་ལེན་མ་བྱས་པ།

¹³ གཙོ་བོ་དཀོན་མཆོག་ཁོང་གིས་བཀའ་གནང་བ། མི་རིགས་ཡོངས་ལ་དེ་ལྟར་སྔོན་བྱུང་དང་། བྱུང་མེད་ཚང་མར་སྐད་ཆ་འདྲིས་ཤིག་དང་། ཨིསི་རཱཨེལ་པ་ཡི་མི་མང་དེ་ཚོ་ཡིས། འཇིགས་སུ་རུང་བའི་བྱ་བ་ཞིག་བྱས་ཡོད།

¹⁴ ལེབ་ནོན་བྲག་མཐོར་གངས་མེད་གནས་ཡོད་དམ། རི་བོའི་ཆུ་ཀླུང་གྲང་མོ་སྐམ་ཡོད་དམ།

¹⁵ འོན་ཀྱང་ང་ཡི་མི་མང་ང་ལ་བརྗེད། དེ་ཚོས་སྐུ་འདྲར་བདུག་སྤོས་ཕུལ་བར་བྱེད། དེ་ཚོ་འགྲོ་སའི་ལམ་དུ་འགྱེལ་ཡོད་དོ། དེ་ཚོ་ལམ་ནི་རྙིང་པར་འཇུག་མི་བྱེད། དེ་ཚོས་མ་བཟོས་པའི་ཟུར་ལམ་སྟེང་འགྲོ་ཡོད་དོ།

¹⁶ དེ་ཚོའི་ཡུལ་འདི་འཇིགས་སུ་རུང་བའི་གནས། གཏན་དུ་སྨད་པར་འགྱུར་བ་ཞིག་བཟོས་ཡོད། དེ་བརྒྱུད་འགྲོ་མཁན་མཐོང་བས་ཧང་སང་འགྱུར། དེ་ཚོ་ཡ་མཚན་བྱུང་ནས་མགོ་དབྱུག་བྱེད།

¹⁷ ཤར་གྱི་རླུང་གིས་རྡུལ་རྣམས་འཁྱེར་བ་བཞིན། ང་ཡི་མི་མང་དགྲའི་མདུན་ངས་གཏོར་རོ། ང་ཡི་དེ་ཚོར་རང་གི་རྒྱབ་སྟོན་ནས། རྐྱེན་ངན་བྱུང་སྐབས་ང་ཡིས་རོགས་མ་བྱེད༎

ཡེར་མི་ཡཱ་ལ་གཡོ་བྱུས་བརྩོམ་པ།

¹⁸ དེ་ནས་མི་མང་གིས། ང་ཚོ་ཡེར་མི་ཡཱའི་སྐོར་ལ་ལས་འགུལ་ཞིག་བྱ་དགོས། ང་ཚོར་རྟག་ཏུ་སློབ་སྟོན་གནང་མཁན་བླ་མ་ཚོ་དང་། གྲོས་སྟོན་མཁན་མི་ཤེས་རབ་ཅན་ཚོ་དང་། དཀོན་མཆོག་གི་བཀའ་གསལ་སྒྲགས་གནང་མཁན་ལུང་སྟོན་པ་ཚོ་ཡོད། ང་ཚོ་ཁོ་ལ་སྐྱོན་བརྫོད་བཙུགས་ནས་ཁོས་བཤད་པར་ཉན་རྒྱུ་མཚམས་འཇོག་བྱ་དགོས་ཤེས་སྨྲས་སོ།

¹⁹ དེར་བརྟེན་ངས་གསོལ་བ་འདེབས་པ་ནི། གཙོ་བོ་དཀོན་མཆོག་ངས་ཇི་ལྟར་གསོལ་བར་དགོངས་བཞེས་གནང་ནས། ངའི་དགྲ་བོ་ཚོས་ངའི་སྐོར་ཇི་ལྟར་སྨྲ་བཞིན་པར་དགོངས་བཞེས་གནང་བར་མཛོད།

²⁰ ལས་བཟང་པོའི་བྱ་དགའ་དེ་ངན་པ་ཡིན་ནམ། དེ་ཚོས་ང་ལྷུང་བའི་ཆེད་ས་དོང་ཞིག་བྲུས་ཡོད། ཁྱེད་ཀྱིས་ཐུགས་ཁྲོའི་ངང་ནས་དེ་ཚོ་ལ་གཟིགས་ཞིབ་མི་གནང་བའི་ཆེད་ང་ཇི་ལྟར་ཁྱེད་ཀྱི་དྲུང་དུ་བཅར་ནས་དེ་ཚོའི་ཆེད་དུ་ཞུ་འབོད་བྱས་པར་ཐུགས་ལ་དྲན་གསོས་པར་མཛོད།

²¹ འོན་ཀྱང་ད་ཆ་གཙོ་བོ་དཀོན་མཆོག་དེཚོའི་བུ་ཕྲུག་ཚོར་མུ་གེས་འཆི་རུ་འཇུག་རོགས་གནང་། དེ་ཚོ་དམག་གི་ནང་དུ་གསོད་དུ་འཇུག་རོགས་གནང་། དེ་ཚོའི་བུད་མེད་ཚོ་རང་གི་ཁྱོད་ཚོ་དང་བུ་ཕྲུག་ཚོ་དང་ཁ་འཕྲལ་དུ་འཇུག་རོགས་གནང་། སྐྱེས་པ་ཚོ་ནད་ཀྱི་འཆི་བ་དང་མི་ན་གཞོན་ཚོ་གཡུལ་དུ་གསོད་དུ་འཇུག་རོགས་གནང་།

²² ཉེན་བརྡ་མེད་པར་མི་ཚོགས་ཤིག་དེ་ཚོའི་ཁྱིམ་དུ་འཕྲོག་བཅོམ་བྱེད་པར་གཏོང་གནང་ནས། དེ་ཚོ་འཇིག་སྐྲག་ངང་ངུ་རུ་འཇུག་རོགས་གནང་། དེ་ཚོས་ང་ལྷུང་བའི་ཆེད་ས་དོང་བྲུས་པ་དང་ང་བཟུང་བའི་ཆེད་རྙི་རྒྱབ་ཡོད་དོ།

²³ འོན་ཀྱང་གཙོ་བོ་དཀོན་མཆོག་ཁྱེད་ཀྱིས་དེ་ཚོས་ང་གསོད་རྒྱུའི་གཡོ་བྱུས་བརྩོམ་པ་དེ་ཁྱེད་ཀྱི་མཁྱེན་གསལ་རེད། ཁྱེད་ཀྱི་དེ་ཚོའི་ངན་ལས་ལ་བཟོད་གསོལ་མ་གནང་རོགས། ཡང་ན་དེ་ཚོའི་སྡིག་པ་མ་སུབ་རོགས་གནང། དེ་ཚོ་ཕམ་དུ་འཇུག་ནས་འགྱལ་བཅུག་བ་དང་ཁྱེད་ཐུགས་ཁྲོ་བའི་སྐབས་སུ་དེ་ཚོ་ལ་ཉེས་ཆེད་བཏང་བར་མཛོད༎