ཡེར་མི་ཡཱ 17 - Tibetan Old Testament 2011

ཡ་ཧུ་དཱ་པའི་སྡིག་པ་དང་ཉེས་ཆད།

¹ གཙོ་བོ་དཀོན་མཆོག་གིས་བཀའ་གནང་བ། ཡ་ཧུ་དཱ་པའི་མི་མང་རྣམས་ཁྱོད་ཚོའི་སྡིག་པ་རྣམས་ལྕགས་ཀྱི་སྨྱུ་གུས་བྲིས་ཡོད་དོ། དེས་ཁྱོད་ཀྱི་སེམས་ནང་རྡོ་རྗེ་ཕ་ལམ་གྱི་རྩེས་རྐོས་ཡོད་པ་དང་། ཁྱོད་ཀྱི་མཆོད་ཁྲིའི་ཟུར་ཚོར་སྤྲོད་རྒྱབ་ཡོད།

² ཁྱོད་ཀྱི་མི་མང་ཚོས་མཆོད་ཁྲིད་ཚོ་དང་ལྷ་མོ་ཨ་ཤེ་རཱའི་མཚན་མ་ཤིང་སྡོང་ལྗང་ཁུ་ཚོ་དང་རི་མཐོ་པོའི་སྟེང་དང་།

³ རི་སྟེང་ལ་ཡོད་པའི་ཡུལ་སྟོང་པ་བཅས་ལ་མཆོད་དོ། ཁྱོད་ཚོས་ཡུལ་ཁམས་ཡོངས་སུ་སྡིག་པ་གྱིས་པའི་རྐྱེན་གྱིས་ངས་ཁྱོད་ཚོའི་རྒྱུ་ནོར་དང་ནོར་མཛོད་རྣམས་ཁྱོད་ཚོའི་དགྲ་བོར་འཕྲོག་ཏུ་འཇུག་རྒྱུ་ཡིན་ནོ།

⁴ ངས་ཁྱོད་ཚོར་སྨྲས་པའི་ཡུལ་དེ་ཁྱོད་ཚོས་སྤོང་དགོས་པ་དང་། ཁྱོད་ཚོས་མ་ཐོས་པའི་ཡུལ་དུ་དགྲ་བོའི་གཡོག་རྒྱུག་ཏུ་འཇུག་རྒྱུ་ཡིན་ནོ། གང་ལ་ཟེར་ན། ངའི་ཁྲོ་བ་མེ་ལྟར་ཡོད་པ་དང་དེ་གཏན་དུ་འབར་བར་འགྱུར་རོ༎

བཤད་སྲོལ་འདྲ་མིན།

⁵ གཙོ་བོ་དཀོན་མཆོག་ཁོང་གིས་བཀའ་གནང་བ། ང་ལས་ཁ་ཕྱོགས་བསྒྱུར་མཁན་ཚོར་དང། མི་ཏག་པའི་འགྲོ་བ་མིའི་ནུས་ཤུགས་ལ་བློ་བཅོལ་མཁན། དེ་ཚོ་ལ་ནི་ང་ཡིས་དམོད་རྒྱུ་ཡིན།

⁶ དེ་ཚོ་ནི་བྱེ་ཐང་ནང་དུ་སྐྱེས་པའི་ཤིང་ལྡུམ་ལྟར། གང་ཡང་མི་སྐྱེས་ཚྭ་ཡི་བྲོ་བ་ཡོད་པའི་ས། ལུང་སྟོང་སྐམ་པོར་སྐྱེས་མཁན་དེ་དང་འདྲ། ཁོ་ཚོ་ལ་ལེགས་པར་ཅི་ཡང་ཡོང་མི་འགྱུར།

⁷ འོན་ཀྱང་ང་ལ་བློ་བཅོལ་བྱ་མཁན་གྱི། སྐྱེ་བོ་དེ་ཚོར་ང་ཡིས་བྱིན་རླབས་སྤྲོད།

⁸ ཁོ་ཚོ་ནི་ཆུ་ཡི་འགྲམ་དུ་སྐྱེས་པའི་ཤིང་། ཆུ་ཡི་ནང་དུ་རྩ་བ་གཏོང་མཁན་འདྲ། དེ་ལ་ཚད་པ་སླེབས་སྐབས་མི་འཇིག་གོ། གང་ལ་ཟེར་ན་ལོ་མ་ལྗང་ཁུར་གནས། ཆར་པ་མེད་ཀྱང་དེ་ལ་སེམས་ཁྲལ་མེད། དེ་ལ་འབྲས་བུ་ཐོག་བཞིན་གནས་པར་འགྱུར།

⁹ འགྲོ་བ་མི་ཡི་སེམས་ནི་སུས་རྟོགས་ནུས། དེ་ནི་བསླུ་འཁྲིད་མ་གཏོགས་གང་ཡང་མེད། དེ་ལ་གྲག་གསོ་ཧ་ཅང་ཁག་པོ་ཡིན།

¹⁰ གཙོ་བོ་དཀོན་མཆོག་ང་ཡི་མི་ཡི་སེམས་འཚོལ་ཞིང་། མི་ཚོའི་སེམས་ལ་རྟགས་དཔྱད་བྱེད་པ་ཡིན། ང་ཡིས་ཚང་མ་སོ་སོའི་མི་ཚེའི་མདུན་ལམ་དུ། ཁོ་ཡིས་ཇི་ལྟར་གྱིས་པ་ནང་ལྟར་ཆ་འཛིན་བྱེད།

¹¹ དྲང་མིན་དངུལ་དེ་གསོག་འཛོག་བྱེད་མཁན་མི་དེ་ནི། རང་གི་མ་བཏང་བ་ཡི་སྒོ་ང་བསྙལ་བའི་བྱ་དང་འདྲ། ན་གསོ་དར་མར་ཁོ་ཡི་རྒྱུ་ནོར་རླག། མཐའ་མར་ཁོ་ནི་གླེན་པ་ཞིག་ཏུ་འགྱུར།

¹² ང་ཚོའི་མཆོད་ཁང་ཐོག་མར་རི་མཐོའི་རྩེར། གནས་པའི་གཟི་བརྗིད་ཅན་གྱི་རྒྱལ་ཁྲི་འདྲ།

¹³ ཨིསི་རཱཨེལ་པ་ཡི་གཙོ་བོ་དཀོན་མཆོག་ཁྱེད། རེ་ས་ཡིན་ཞིང་ཁྱོད་ལ་སྤོང་མཁན་རྣམས། དེ་ཚོ་ཚང་མ་ངོ་ཚར་འཇུག་པར་བྱེད། དེ་ཚོ་རྡུལ་སྟེང་བྲིས་པའི་མིང་ལྟར་ཡལ། གང་ལ་ཟེར་ན་དེ་ཚོས་ཁྱེད་གཙོ་བོ་དཀོན་ཆོག། ཆུ་མིག་ཆུ་གཙང་དེ་ནི་སྤངས་ཡོད༎

ཡེར་མི་ཡཱས་གཙོ་བོ་དཀོན་མཆོག་ལ་རོགས་རམ་འབོད་བསྐུལ་ཞུས་པ།

¹⁴ གཙོ་བོ་དཀོན་མཆོག་ང་ལ་དྲག་པར་མཛོད་དང་ང་མངོན་སུམ་བདེ་ཐང་དུ་འགྱུར། ང་ལ་སྐྱོབས་པར་མཛོད་དང་ང་ཧ་ཅང་སྐྱོན་མེད་བརྟན་པོར་འགྱུར། ངས་བསྟོད་པ་འབུལ་ས་གཅིག་པུ་དེ་ནི་ཁྱེད་ཡིན་ནོ།

¹⁵ མི་མང་གིས་ང་ལ། གཙོ་བོ་དཀོན་མཆོག་གིས། ང་ཚོར་འཛིགས་སྣང་བཀུལ་གནང་བ་དེ་ཚོ་གང་དུ་ཡོད་དམ། ཁོང་ལ་དེ་ཚོ་ད་ལྟ་རང་བཏོན་དུ་བཅུག་ཅེས་ཟེར་རོ།

¹⁶ འོན་ཀྱང་གཙོ་བོ་དཀོན་མཆོག། ངས་ཁྱེད་ལ་དེ་ཚོའི་སྟེང་དུ་རྐྱེན་ངན་གཏོང་བར་རྩ་བ་ནས་ཞུས་མེད་དོ། ང་ལ་དེ་ཚོའི་ཐོག་ཏུ་དཀའ་ངལ་ཀྱི་དུས་སྐབས་ཡོང་བའི་འདོད་པ་མེད་དོ། གཙོ་བོ་དཀོན་མཆོག་ཁྱེད་ཀྱིས་དེ་ལྟར་མཁྱེན་ནོ། ངས་ཇི་འདྲ་སྨྲས་པ་ཁྱེད་ཀྱིས་མཁྱེན་ནོ།

¹⁷ ཁྱེད་ནི་ངའི་འཇིགས་པའི་རྐྱེན་ཞིག་ཏུ་མ་འགྱུར་རོགས་གནང་། ཁྱེད་ནི་ང་ལ་དཀའ་ངལ་ཡོང་སྐབས་ཀྱི་སྐྱབས་གནས་ཤིག་ཡིན་ནོ།

¹⁸ གཙོ་བོ་དཀོན་མཆོག་ང་ལ་མནར་གཅོད་བྱ་མཁན་ཚོར་དམའ་འབེབས་བྱུང་དུ་འཇུག་ནས་ང་ལ་ཐར་བར་མཛད་རོགས། དེ་ཚོ་ལ་འཇིགས་སྐྲག་བསྐུལ་རོགས་གནང་། འོན་ཀྱང་ང་ལ་འཇིགས་སྐྲག་བསྐུལ་མ་གནང་རོགས། དེ་ཚོའི་སྟེང་དུ་རྐྱེན་ངན་འབེབས་ནས་དེ་ཚོ་དུམ་བུར་གཏོང་རོགས་གནང་༎

ངལ་གསོ་བའི་ཞག་སྲུང་བ།

¹⁹ གཙོ་བོ་དཀོན་མཆོག་གིས་ང་ལ་བཀའ་གནང་བ། ཡེར་མི་ཡཱ་མི་མང་གི་རྒྱལ་སྒོ་ཡ་ཧུ་དཱ་པའི་རྒྱལ་པོ་ཚོ་གྲོང་ཁྱེར་ནང་འཛུལ་ཐོན་གནང་ཡུལ་དེར་སོང་ནས་ངའི་བཀའ་འཕྲིན་རྣམས་གསལ་སྒྲགས་བྱོས་ཤིག དེ་ནས་ཡེ་རུ་ཤ་ལེམ་གྱི་རྒྱལ་སྒོ་གཞན་ཚང་མའི་ནང་སོང་ཞིག

²⁰ རྒྱལ་པོ་ཚོ་དང་ཡ་ཧུ་དཱ་པའི་མི་མང་ཚོ་དང་ཡེ་རུ་ཤ་ལེམ་དུ་སྡོད་མཁན་ཚང་མ་དང་རྒྱལ་སྒོ་དེ་ཚོ་ནང་འཛུལ་མཁན་ཚོར་ངས་བརྗོད་པར་ཉོན་ཞིག་ཅེས་སྨྲོས་ཤིག

²¹ དེ་ཚོས་རང་གི་སྲོག་ལ་བརྩེ་བཞིན་ཡོད་ན་ངལ་གསོ་བའི་ཞག་ལ་དེ་ཚོས་ཁལ་འཁུར་མི་ཆོག དེ་ཚོས་ཡེ་རུ་ཤ་ལེམ་གྱི་རྒྱལ་སྒོ་བརྒྱུད་གང་ཡང་འཁྱེར་མི་ཆོག་གོ

²² ངལ་གསོ་བའི་ཞག་དེར་རང་གི་ཁྱིམ་ནས་གང་ཡང་འཁྱེར་མི་ཆོག་ཅེས་སྨྲོས་ཤིག ངལ་གསོ་བའི་ཞག་དེར་དེ་ཚོས་ལས་གང་ཡང་བྱེད་མི་ཆོག་ཅིང་། ངས་དེ་ཚོའི་ཕ་མེས་ཚོར་བཀའ་བཏང་བ་ལྟར་དེ་ཚོས་ཉིན་དེ་དམ་པར་སྲུང་བརྩི་བྱ་དགོས་སོ།

²³ དེ་ཚོའི་ཕ་མེས་ཚོས་ང་ལ་ཉན་པ་དང་དོ་སྣང་གང་ཡང་བྱས་མེད་དོ། དེའི་ཚབ་ལ་དེ་ཚོ་གྱོང་པོ་འགྱུར་བ་དང་དེ་ཚོས་ངའི་བཀའ་ལ་མ་ཉན་པ་དང་ང་ལས་གང་ཡང་སྦྱངས་མེད་དོ།

²⁴ མི་མང་དེ་ཚོར་ངའི་བཀའ་ཚང་མ་ཉན་དགོས་སྨྲོས་ཤིག། དེ་ཚོས་ངལ་གསོ་བའི་ཞག་གྲོང་ཁྱེར་འདིའི་རྒྱལ་སྒོའི་ནང་ཁལ་གང་ཡང་འཁྱེར་མི་ཆོག དེ་ཚོས་ངལ་གསོ་བའི་ཞག་དེ་དམ་པར་སྲུང་བརྩི་བྱ་དགོས་ཤིང་ལས་ཀ་གང་ཡང་བྱེད་མི་ཆོག་གོ

²⁵ དེ་ནས་དེ་ཚོས་རྒྱལ་པོ་ཚོ་དང་རྒྱལ་སྲས་ཚོར་ཡེ་རུ་ཤ་ལེམ་གྱི་རྒྱལ་སྒོའི་ནང་འཛུལ་བ་དང་དཱ་བིད་ལྟར་རྒྱལ་སྲིད་ཀྱི་དབང་ཆ་ཡོང་བར་འགྱུར་རོ། ཡ་ཧུ་དཱ་དང་ཡེ་རུ་ཤ་ལེམ་གྱི་མི་མང་མཉམ་དུ་དེ་ཚོས་ཤིང་རྟ་འཁོར་ལོ་དང་རྟ་ཞོན་པ་དང་ཡེ་རུ་ཤ་ལེམ་གྱི་གྲོང་ཁྱེར་འདི་བཞིན་རྟག་ཏུ་མི་མང་གིས་ཁེངས་པ་འགྱུར།

²⁶ མི་མང་རྣམས་ཡ་ཧུ་དཱ་པའི་གྲོང་ཁྱེར་ཚོ་དང་ཡེ་རུ་ཤ་ལེམ་གྱི་ཉེ་འཁོར་གྱི་གྲོང་གསེབ་ཚོ་ནས་ཡོང་བར་འགྱུར་རོ། དེ་ཚོ་བྷེན་ཡ་མིན་གྱི་མངའ་ཁུལ་གྱི་རི་གཤམ་དང་གང་རི་དང་ཡ་ཧུ་དཱའི་ལྷོ་ཕྱོགས་ཁུལ་བཅས་ནས་ཀྱང་ཡོང་བར་འགྱུར། དེ་ཚོས་ངའི་མཆོད་ཁང་ནང་སྦྱིན་སྲེག་གི་མཆོད་པ་དང་དམར་མཆོད་དང་འབྲུའི་མཆོད་པ་དང་བདུག་སྤོས་དང་གཏང་རག་གི་མཆོད་པ་བཅས་འཁྱེར་ཡོང་བར་འགྱུར་རོ།

²⁷ འོན་ཀྱང་དེ་ཚོས་ངའི་བཀའ་ལ་ཉན་ནས། ངལ་གསོ་བའི་ཞག་དམ་པ་ལྟར་སྲུང་བརྩི་ཞུས་དགོས་སོ། དེ་ཚོས་ཉིན་དེར་ཡེ་རུ་ཤ་ལེམ་གྱི་རྒྱལ་སྒོ་བརྒྱུད་དངོས་པོ་གང་ཡང་འཁྱེར་མི་ཆོག དེ་ཚོས་དེ་ལྟར་བྱས་པ་མ་ཡིན་ན། ངས་ཡེ་རུ་ཤ་ལེམ་གྱི་རྒྱལ་སྒོ་འསྲེགས་པར་བྱའོ། མེ་དེས་ཡེ་རུ་ཤ་ལེམ་གྱི་ཕོ་བྲང་ཚོ་སྲེག་པར་འགྱུར་བ་དང་སུས་ཀྱང་དེ་གསོད་མི་ཐུབ་བོ༎