ཡེར་མི་ཡཱ 16 - Tibetan Old Testament 2011

ཡེར་མི་ཡཱའི་མི་ཚེ་ཆེད་དུ་གཙོ་བོ་དཀོན་མཆོག་གིས་ཐུགས་འདོད།

¹ ཡང་སྐྱར་གཙོ་བོ་དཀོན་མཆོག་གིས་ང་ལ་བཀའ་མོལ་གནང་ནས་གསུངས་པ།

² ཆང་ས་མ་རྒྱོབ་ཅིག། ཡུལ་འདི་ལྟ་བུར་ཕྲུ་གུ་མ་བཟོས་ཤིག།

³ འདིར་སྐྱེས་པའི་ཕྲུ་གུ་དང་དེ་ཚོའི་ཕ་མ་ཚོར་ཇི་ལྟར་ཡོང་རྒྱུ་ཡིན་པ་ངས་ཁྱོད་ལ་ཤོད་རྒྱུ་ཡིན་ནོ།

⁴ དེ་ཚོ་ནད་ཚབ་ཆེ་བ་ཞིག་གིས་འཆི་བ་དང་། སུ་ཡང་དེ་ཚོའི་ཆེད་དུ་མྱང་ངན་མི་བྱེད་པ་དང་སྦས་པར་མི་བྱེད། དེ་ཚོའི་རོ་རྣམས་ས་སྟེང་གི་ལུད་ཕུང་དྲང་འདྲའོ། དེ་ཚོ་དམག་ཏུ་གསོད་པ་དང་། མུ་གེས་འཆི་བར་འགྱུར་བ་དང་། དེ་ཚོའི་རོ་རྣམས་བྱ་དང་གཅན་གཟན་གིས་ཟས་སུ་འགྱུར་རོ།

⁵ ཁྱོད་མྱ་ངན་བྱ་སའི་ཁྱིམ་དུ་འགྲོ་བར་མི་བྱའོ། སུའི་ཆེད་དུ་ཡང་མྱ་ངན་མ་བྱེད། ངའི་མི་མང་ལ་ཞི་བདེའི་ངང་བྱིན་རླབས་སྤྲོད་པ་དང་བརྩེ་བ་དང་སྙིང་རྗེ་འདོན་པ་བཅས་ངས་ད་ནས་ཟུང་ནམ་ཡང་མི་བྱེད།

⁶ ཡུལ་འདིར་ཕྱུག་པོ་དང་དབུལ་པོ་རྣམས་འཆི་བ་དང་སུས་ཀྱང་དེ་ཚོ་སྦས་པ་དང་དེ་ཚོའི་ཆེད་དུ་མྱ་ངན་མི་བྱེད་དོ། སུ་ཞིག་གིས་ཀྱང་མྱ་ངན་བྱེད་པའི་ཆེད་རང་ལ་རྨ་གཏིང་ཟབ་དང་སྐྲ་ཞར་བ་སོགས་མི་བྱེད་དོ།

⁷ རང་གི་ཉེ་བ་དང་བརྩེ་བ་ཞིག་གྲོངས་སྐབས་དེར་སེམས་གསོ་བྱེད་པར་སུས་ཀྱང་ཟ་འཐུང་མི་བྱེད་དོ། སུ་ཞིག་གི་ཕ་མ་ཤི་ན་ཡང་དེ་ལ་སུས་ཀྱང་སེམས་གསོ་གཏོང་བར་མི་བྱེད་དོ།

⁸ ཁྱོད་མི་མང་ཐུགས་སྤྲོ་གཏོང་བའི་ཁྱིམ་དུ་མ་སོང་ཞིག དེ་ཚོ་མཉམ་དུ་སྡོད་པ་དང་ཟ་བ་དང་འཐུང་བ་བཅས་མ་བྱེད་ཅིག

⁹ ང་ཀུན་དབང་ཅན་གྱི་གཙོ་བོ་དཀོན་མཆོག་ཨིསི་རཱཨེལ་གྱི་དཀོན་མཆོག་གིས་ཇི་ལྟར་སྨྲ་བར་ཉོན་ཞིག ངས་སྐྱིད་པོ་དང་དགའ་བའི་སྒྲ་དང་ཆང་སའི་ཐུགས་སྤྲོའི་དགའ་སྐྱིད་ཀྱི་སྒྲ་རྣམས་མཚམས་འཛོག་བྱ་རྒྱུ་ཡིན། འདིར་ཡོད་པའི་མི་རྣམས་ཀྱིས་རང་ཉིད་མ་འཆི་བའི་སྔོན་དུ་དེ་ལྟར་བྱུང་བ་མཐོང་ཡོང།

¹⁰ ཁྱོད་ཀྱིས་དེ་ཚོ་ལ་འདི་ཚོ་ཚང་མ་ཤོད་སྐབས་དེ་ཚོས་ཁྱོད་ལ་ངས་དེ་ཚོ་ལ་ཉེས་པ་ཧ་ཅང་རྩུབ་པོ་དེ་ལྟར་གཏོང་རྒྱུར་ཐག་གཅོད་ཅི་ལ་བྱེད་པ་རེད་དམ་ཞེས་འདྲིས་པར་འགྱུར། དེ་ཚོས་རང་གི་ཁྲིམས་འགལ་གང་གི་སྐྱོན་བརྗོད་དང་དེ་ཚོའི་དཀོན་མཆོག་གཙོ་བོ་དཀོན་མཆོག་གི་སྤྱན་སྔར་སྡིག་པ་གྱིས་ཡོད་སྐོར་འདྲི་པར་འགྱུར།

¹¹ དེ་དུས་དེ་ཚོ་ལ་གཙོ་བོ་དཀོན་མཆོག་གིས་བཀའ་གནང་བ་འདི་ལྟར་ཤོད་ཅིག ཁྱོད་ཀྱི་ཕ་མེས་ཚོས་ང་ལས་ངོ་ལོག་ཏེ་ལྷ་གཞན་ཚོར་མཆོད་ཅིང་ཞབས་ཕྱི་ཞུས་ཡོད། དེ་ཚོས་ང་སྤངས་ནས་ངའི་སློབ་སྟོན་ཚོ་ལ་ཉེན་མེད་དོ།

¹² འོན་ཀྱང་ཁྱོད་ཚོས་ཁྱོད་ཚོའི་རང་གི་ཕ་མེས་ཚོ་ལས་ཀྱང་ཧ་ཅང་སྡུག་པོ་བྱས་ཡོད། ཁྱོད་ཚོ་ཚང་མ་གྱོང་པོ་དང་ངན་པ་ཡིན་པས་ངའི་བཀའ་ལ་ཉན་གྱི་མེད་དོ།

¹³ དེ་འདྲ་སོང་ཙང་ཁྱོད་ཚོ་དང་ཁྱོད་ཚོའི་ཕ་མེས་ཚོས་མ་ཤེས་པའི་ཡུལ་ཞིག་ཏུ་ཕྱིར་འབུད་གཏོང་རྒྱུ་ཡིན། དེར་ཁྱོད་ཚོས་ཉིན་མཚན་མེད་པར་ལྷ་གཞན་ཚོའི་ཞབས་ཕྱི་ཞུ་བ་དང་ངས་ཁྱོད་ཚོར་སྙིང་རྗེ་བྱེད་རྒྱུ་མིན་ནོ༎

བཙན་བྱོལ་ནས་ཕྱིར་ལོག་པ།

¹⁴ གཙོ་བོ་དཀོན་མཆོག་གིས་བཀའ་གནང་བ། མི་མང་གིས་ཨིསི་རཱཨེལ་པ་རྣམས་ཨི་ཇིབ་ཡུལ་ནས་འདོན་མཁན་ང་འཚོ་བཞིན་པའི་དཀོན་མཆོག་གི་མཆན་ནས་མནའ་མི་བསྐྱེལ་བའི་དུས་ཚོད་ཅིག་ཡོང་བཞིན་ཡོད།

¹⁵ དེའི་ཚབ་ལ་དེ་ཚོས་ཨིསི་རཱཨེལ་གྱི་མི་མང་རྣམས་བྱང་གི་ཡུལ་དང་ངས་ཁ་སྟོར་བའི་ལུང་པ་རྣམས་ནས་འདོན་མཁན་འཚོ་བཞིན་པའི་དཀོན་མཆོག་ངའི་མིང་ཐོག་མནའ་བསྐྱེལ་བར་བྱེད་དོ། ངས་དེ་ཚོ་རང་གི་ཡུལ་དེ་ཚོའི་ཕ་མེས་ཚོར་སྤྲོད་པ་དེར་འཁྲིད་པར་བྱ་ཞེས། ང་གཙོ་བོ་དཀོན་མཆོག་གིས་སྨྲས་པ་ཡིན་ནོ༎

མ་འོངས་པའི་ཉེས་ཆད།

¹⁶ གཙོ་བོ་དཀོན་མཆོག་གིས་བཀའ་གནང་བ། ངས་ཉ་པ་མང་པོ་མི་མང་དེ་ཚོ་བཟུང་བའི་ཕྱིར་དེར་གཏོང་བཞིན་ཡོད། དེ་ནས་ངས་ཁྱི་ར་བ་མང་པོ་རི་བོ་རྣམས་དང་རི་ཕྲན་རྣམས་དང་བྲག་རིའི་ཁྲོད་ཀྱི་བྲག་ཕུག་བཅས་ཀྱི་ནང་དེ་ཚོ་འཚོལ་ཞིབ་བྱ་བར་གཏོང་རྒྱུ་ཡིན།

¹⁷ ངས་དེ་ཚོས་གང་བྱས་པ་རྣམས་མཐོང་གི་འདུག། ང་ནས་གང་ཡང་སྦས་མི་ཐུབ་བོ། དེ་ཚོའི་སྡིག་པ་རྣམས་ངའི་མིག་ནས་ཐར་མི་ཐུབ།

¹⁸ ངས་དེ་ཚོའི་སྡིག་པ་དང་སྤྱོད་ངན་རྣམས་ལན་གཉིས་ལྡབ་འཇལ་དུ་འཇུག་རྒྱུ་ཡིན། གང་ལ་ཟེར་ན། དེ་ཚོས་ངའི་ཡུལ་དེ་སྲོག་མེད་པའི་རོ་ལྟར་གྱི་སྐུ་འདྲས་མི་གཙང་བ་བཟོས་པ་དང་། དེ་ཚོའི་ལྷ་རྫུན་མ་ཚོས་བཀང་ཡོད་དོ༎

ཡེར་མི་ཡཱའི་གཙོ་བོ་དཀོན་མཆོག་ལ་བློས་འཁེལ་བའི་སྨོན་ལམ།

¹⁹ གཙོ་བོ་དཀོན་མཆོག་ཁྱེད་ནི་ང་སྐྱོབས་མཁན་དང་ང་ལ་ནུས་ཤུགས་གནང་མཁན་དེ་ཡིན་ནོ། ང་ལ་དཀའ་ངལ་བྱུང་སྐབས་ཁྱེད་ཀྱིས་ང་ལ་རོགས་རམ་གནང་ཡོད། མི་རིགས་ཚོ་ས་གཞིའི་མཐའ་ནས་ཡོང་ཞིང་ཁྱེད་ལ་འདི་ལྟར་ཞུས་ཡོང་། ང་ཚོའི་ཕ་མེས་ཚོར་ལྷ་རྫུན་མ་དང་ཕན་ཐོག་མེད་པའི་སྐུ་འདྲ་ཚོ་མ་གཏོགས་གཞན་གང་ཡང་མེད་དོ།

²⁰ མི་རང་ཉིད་ཀྱིས་རང་གི་ལྷ་བཟོ་ཐུབ་བམ། ཁོས་ཏན་ཏན་དེ་ལྟར་བཟོ་མི་ཐུབ། ཁོས་བཟོས་པ་ཡིན་ན་དེ་ཚོ་ལྷ་ངོ་མ་མ་ཡིན་ནོ།

²¹ གཙོ་བོ་དཀོན་མཆོག་གིས། དེར་བརྟེན་ངས་གཏན་གྱི་ཆེད་དུ་མི་རིགས་ཚོ་ལ་ངའི་ནུས་ཤུགས་དང་མཐུ་སྟོབས་ངོ་ཤེས་པ་བཟོ་རྒྱུ་ཡིན་ནོ། དེ་ཚོས་ང་གཙོ་བོ་དཀོན་མཆོག་ཡིན་པ་ཤེས་པར་འགྱུར་གསུངས་སོ༎