ཡེར་མི་ཡཱ 15 - Tibetan Old Testament 2011

ཡ་ཧུ་དཱ་པའི་མི་མང་ལ་འཇིགས་པ།

¹ དེ་ནས་གཙོ་བོ་དཀོན་མཆོག་གིས་ང་ལ་བཀའ་གནང་བ། མོ་ཤེ་དང་ཤ་མུ་ཨེལ་གཉིས་འདིར་ལངས་ནས་ང་ལ་ཞུ་བ་ཕུལ་ན་ཡང་ངས་མི་མང་འདི་ཚོར་སྙིང་རྗེ་མི་བྱེད་དོ། དེ་ཚོ་ལ་ཕར་གཏོང་ཞིག། དེ་ཚོ་ངའི་མཐོང་ཡུལ་ནས་ཕར་གཏོང་ཞིག

² ཁྱོད་ལ་དེ་ཚོས་ང་ཚོ་གང་དུ་འགྲོ་དགོས་ཤེས་འདྲིས་པ་ཡིན་ན་ངས་ཇི་ལྟར་སྨྲས་པ་དེ་ཚོར་ཤོད་ཅིག འགའ་ཤས་ནད་ཀྱི་རྐྱེན་གྱིས་འཆི་བར་འགྱུར། དེ་ནི་དེ་ཚོའི་འགྲོ་ཡུལ་ཡིན། གཞན་ཚོ་དམག་ཏུ་ཕྱིན་ནས་འཆི་བར་འགྱུར། དེ་ནི་དེ་ཚོའི་འགྲོ་ཡུལ་ཡིན། འགའ་ཤས་མུ་གེས་རྐྱེན་གྱིས་འཆི་བར་འགྱུར། དེ་ནི་དེ་ཚོའི་འགྲོ་ཡུལ་ཡིན། གཞན་ཚོ་བཟུང་ནས་བཙོན་པར་འཁྲིད་པར་འགྱུར། དེ་ནི་དེ་ཚོའི་འགྲོ་ཡུལ་ཡིན།

³ ང་གཙོ་བོ་དཀོན་མཆོག་གིས་དེ་ཚོ་ལ་འཇིགས་སུ་རུང་བ་བཞི་ཡོང་བའི་ཐག་གཅོད་བྱས་པ་ཡིན། དེ་ཚོ་དམག་ཏུ་གསོད་པར་འགྱུར། དེ་ཚོའི་རོ་རྣམས་ཁྱིས་འདྲུད་པར་འགྱུར། དེ་ཚོ་བྱ་ཚོས་ཟ་བར་འགྱུར། ལྷག་མ་རྣམས་གཅན་གཟན་གྱིས་ཟ་བར་འགྱུར་རོ།

⁴ ཧི་ཛི་ཀི་ཡའི་བུ་མ་ནསེ་སཱེ་ཡ་ཧུ་དཱ་པའི་རྒྱལ་པོ་བྱེད་སྐབས་སུ། ཡེ་རུ་ཤ་ལེམ་དུ་གང་བྱས་པའི་རྐྱེན་གྱིས་ངས་འཛམ་བུ་གླིང་གི་མི་མང་རྣམས་ལ་དེ་ཚོར་འཇིགས་པར་བྱ་རྒྱུ་ཡིན་ནོ།

⁵ གཙོ་བོ་དཀོན་མཆོག་ཁོང་གིས་བཀའ་གནང་བ། ཡེ་རུ་ཤ་ལེམ་མི་མང་ཁྱོད་ཚོ་ལ། སུ་ཞིག་གིས་ནི་ཁྱོད་ཆོར་སྙིང་རྗེ་སྐྱེས། ཁྱོད་ཚོའི་ཆེད་དུ་མྱ་ངན་བྱེད་འགྱུར་རམ། ཁྱོད་ཚོ་ཇི་འདྲ་ཡོད་མེད་སུས་དྲིས་སམ།

⁶ མི་མང་ཁྱོད་ཚོས་ང་ལ་སྤོང་བར་བྱས། ཁྱོད་ཚོས་ང་ལ་རྒྱབ་བསྒྱུར་འགྱུར་ནས། ང་ཡི་ཁྲོ་བར་བཟོད་སྲན་གྱིས་ཆད་པས། ང་ཡི་ལག་པ་བརྐྱངས་ནས་ཁྱོད་ཚོ་མནར།

⁷ ཡུལ་གྱི་གྲོང་ཁྱེར་ཚང་མ་ཡི་ནང་དུ། ཁྱོད་ཚོ་སོག་མ་ལྟར་ངས་རླུང་བསྐྱུར། ང་ཡི་རང་གི་མི་མང་མེད་པར་བཟོས། ཁྱོད་ཚོའི་བུ་ཕྲུག་ང་ཡིས་བསད་པར་གྱིས། གང་ལ་ཟེར་ན་ཁྱོད་ཚོ་ཚང་མ་ཡིས། རང་གི་ངན་ལས་མཚམས་འཇོགས་བྱས་མེད་དོ།

⁸ རྒྱ་མཚོའི་འགྲམ་གྱི་བྱེ་མའི་གྲངས་ཀ་ལས། ཁྱོད་ཚོའི་ཡུལ་ནང་ཡུགས་ཟ་མ་ནི་མང་། ཁྱོད་ཚོའི་ན་གཞོན་དར་མའི་སྐབས་བསད་ནས། དེ་ཚོའི་མ་རྣམས་སྡུག་བསྔལ་མྱོང་དུ་བཅུག། དེ་ཚོར་བློ་བུར་སེམས་ནད་འཇིགས་སྐྲག་ཕབ།

⁹ ཕྲུ་གུ་བདུན་ཙམ་ཤི་བའི་མ་རྣམས་འགྱེལ། དབུགས་ནི་གཏོང་ལེན་བྱེད་སྐབས་འཐབ་རྩོད་བྱེད། མོ་ཡི་ཉིན་མོའི་འོད་རྣམས་མུན་པར་འགྱུར། དམའ་འབེབས་བྱུང་ཞིང་སེམས་ལ་ནད་བྱུང་ངོ་། ང་ཡི་ཁྱོད་ཚོའི་ལྷག་ལུས་དགྲས་གསོད་འཇུག། གཙོ་བོ་དཀོན་མཆོག་ང་ཡི་སྨྲས་པ་ཡིན༎

ཡེར་མི་ཡཱས་གཙོ་བོ་དཀོན་མཆོག་ལ་སྐྱོན་བརྗོད་ཞུ་བའི་སྐོར།

¹⁰ ང་ནི་དགའ་སྐྱིད་མེད་པའི་མི་ལྟར་ཡིན། ངའི་ཨ་མས་འཛམ་གླིང་འདིར་ཅི་ལ་སྐྱེས་རུ་འཇུག་པ་ཡིན་ནམ། ཡུལ་འདིའི་ནང་ངས་མི་ཚང་མ་དང་འཁྲུགས་རྩོད་རྒྱབ་དགོས་ཀྱི་འདུག ངས་སུ་ལ་ཡང་དངུལ་བུ་ལོན་བཏང་བ་དང་གཡར་བ་སོགས་གྱིས་མེད་དོ། ཚང་མས་ང་ལ་དམོད་ཀྱིས་འདུག།

¹¹ གཙོ་བོ་དཀོན་མཆོག་ངས་ཁྱེད་ལ་ཞབས་ཕྱི་གང་ལེགས་ཞུས་མེད་པ་དང་། ངའི་དགྲ་བོ་ཚོ་དཀའ་ངལ་དང་སྡུག་བསྔལ་ནང་ཡོད་སྐབས་སུ། ངས་ཁོ་ཚོའི་ཆེད་ཁྱེད་ལ་ཞུ་འབུལ་བྱས་མེད་པ་ཡིན་ན་དམོད་པ་རྣམས་དངོས་སུ་འགྱུར་བ་མཛོད་ཅིག

¹² (སུས་ཀྱང་བྱང་ཕྱོགས་ཀྱི་ལྕགས་ལི་དང་འདྲེས་པ་གཅོག་པར་མི་ནུས་སོ།)

¹³ གཙོ་བོ་དཀོན་མཆོག་གིས་ང་ལ་བཀའ་གནང་བ། ངའི་མི་མང་ཚོ་ཡུལ་ཡོངས་རྫོགས་སུ་སྡིག་པ་གྱིས་པའི་ཆེད་ཆད་པ་གཏོང་བའི་ཕྱིར་ངས་དེ་ཚོའི་དགྲ་བོ་རྣམས་ལ་དེ་ཚོའི་རྒྱུ་ནོར་དང་གཏེར་མཛོད་རྣམས་འཕྲོག་པར་གཏོང་རྒྱུ་ཡིན་ནོ།

¹⁴ ངས་དེ་ཚོ་ལ་རྒྱུས་མེད་པའི་ཡུལ་དུ་དེ་ཚོའི་དགྲ་བོ་ཚོའི་གཡོག་རྒྱུགས་སུ་འཇུག་གི་ཡིན། གང་ལ་ཟེར་ན། ངའི་ཁྲོ་བ་མེ་ལྟར་ཡིན་པ་དང་དེ་ནི་གཏན་གྱི་ཆེད་འབར་བར་འགྱུར་རོ།

¹⁵ དེ་ནས་ངས་ཞུས་པར། གཙོ་བོ་དཀོན་མཆོག་ཁྱེད་ཀྱིས་མཁྱེན་པ་ཡིན་པས། ང་ལ་དྲན་པ་གནང་ནས་རོགས་གནང་བར་མཛོད། ང་ལ་དེད་མཁན་ཚོར་དགྲ་ཤ་ལེན་དུ་འཇུག་པ་གནང་རོགས་གནང་། དེ་ཚོས་ང་གསོད་ཐུབ་རྒྱུར་ཁྱེད་ཀྱི་བཟོད་སྲན་མ་མཛད་རོགས་གནང་། ཁྱེད་ཀྱི་དོན་དུ་ང་ལ་དམའ་འབེབས་བྱས་པ་ཐུགས་དྲན་གསོས་པར་མཛོད།

¹⁶ ཁྱེད་ཀྱིས་ང་ལ་བཀའ་གནང་བ་ལྟར་ངས་བཀའ་ཚང་མ་སྒྲུབ་ཡོད། ཀུན་དབང་ཅན་གྱི་དཀོན་མཆོག་གཙོ་བོ་དཀོན་མཆོག་ང་ཁྱེད་ལ་བདག་པ་ཡིན་པས། ཁྱེད་ཀྱི་བཀའ་ཡིས་ངའི་སེམས་དགའ་བ་དང་བདེ་སྐྱིད་ཀྱིས་ཁེངས་པར་འགྱུར་རོ།

¹⁷ ངས་མི་གཞན་མཉམ་དུ་ངའི་དུས་ཚོད་དེ་གད་མོ་གད་ཅིང་སྐྱིད་པོ་བྱས་ནས་བསྡད་མེད། ཁྱེད་ཀྱི་བཀའ་ལ་ཉན་ཕྱིར་ང་གཅིག་པུར་གནས་པ་དང་ཁྲོ་བས་ཁེངས་པར་འགྱུར་རོ།

¹⁸ ཅི་ལ་ང་སྡུག་བསྔལ་མུ་མཐུད་མྱོང་དགོས་པ་ཡིན་ནམ། ངའི་རྨ་རྣམས་མི་གསོ་བ་ཅི་ཡིན་ནམ། དེ་ཚོ་མི་གསོ་བ་ཅི་ཡིན་ནམ། ཆུ་མིག་དབྱར་དུས་སུ་ཡང་སྐམ་པོ་གནས་པ་ལྟར། ཁྱེད་ཀྱིས་ང་ཡིད་མ་རངས་པར་བློ་ཕམ་དུ་འཇོག་པར་གནང་འདོད་ཡོད་པ་ཡིན་ནམ།

¹⁹ དེར་གཙོ་བོ་དཀོན་མཆོག་གིས་བཀའ་གནང་བ། ཁྱོད་ལོག་ཡོང་བ་ཡིན་ན། ངས་ཁྱོད་ལ་ངོས་ལེན་བྱ་རྒྱུ་དང་། ཁྱོད་ཡང་སྐྱར་ངའི་ཞབས་ཕྱིར་འགྱུར་རོ། དོན་མེད་ཀྱི་གཏམ་སྨྲ་བའི་ཚབས་སྙིང་པོ་ཅན་གྱི་འཕྲིན་གསལ་སྒྲགས་བྱོས་ཤིག་དང་། ཁྱོད་ཡང་སྐྱར་ངའི་ལུང་སྟོན་པར་འགྱུར། མི་མང་ཁྱོད་ཀྱི་སར་ཡོང་བས་ཁྱོད་ཁོ་ཚོའི་སར་འགྲོ་མི་དགོས་སོ།

²⁰ དེ་ཚོའི་ཆེད་དུ་ངས་ཁྱོད་ལིའིི་ལྕགས་རི་བརྟན་པོ་ཞིག་ལྟར་བཟོ་རྒྱུ་ཡིན། དེ་ཚོས་ཁྱོད་ལ་འཐབ་ན་ཡང་ཁྱོད་ཕམ་པར་བྱེད་མི་ཐུབ། ངས་ཁྱོད་སྐྱོབས་པ་དང་སྐྱོན་མེད་བརྟན་པོར་འཇོག་པའི་ཆེད་ཁྱོད་མཉམ་དུ་ཡོད།

²¹ ངས་ཁྱོད་སྤྱོད་ངན་ཚོའི་མཐུ་དང་དྲག་ཤུགས་ཅན་གྱི་མི་ཚོ་ལས་སྐྱོབས་རྒྱུ་ཡིན་ཞེས། ང་གཙོ་བོ་དཀོན་མཆོག་གིས་སྨྲས་པ་ཡིན་ནོ༎