ཡེར་མི་ཡཱ 14 - Tibetan Old Testament 2011

འཐེན་པ་ཚབ་ཆེ།

¹ འཐེན་པའི་སྐོར་ལ་གཙོ་བོ་དཀོན་མཆོག་ཁོང་གིས་ང་ལ་གསུངས།

² ཡ་ཧུ་དཱ་ནི་མྱ་ངན་ངང་དུ་ཡོད། དེ་ཡི་གྲོང་ཁྱེར་ཚོ་ནི་འཆི་བཞིན་ཡོད། དེ་ཡི་མི་མང་སྡུག་བསྔལ་ངང་ས་རུ་ཉལ། ཡེ་རུ་ཤ་ལེམ་རོགས་རམ་ཆེད་དུ་འབོད།

³ ཕྱུག་པོའི་མི་ཚོས་རང་གཡོག་ཆུ་ལེན་བཏང་། ཁྲོན་པའི་ཁར་རུ་སོང་ཡང་ཆུ་མ་རྙེད། སྣོད་སྟོང་འཁྱེར་ནས་དེ་ཚོ་ཕྱིར་ལོག་ཡོང་། སེམས་ཤུགས་ཆགས་ཤིང་མགོ་ནི་འཐོམས་པར་འགྱུར། དེ་ཚོས་རང་གི་གདོང་པ་འགེབས་པར་བྱེད།

⁴ ཆར་པ་མ་བབས་རྐྱེན་གྱིས་ས་སྐམ་མོ། ཞིང་པ་ཚོ་ཡི་སེམས་འཁྲལ་བྱེད། དེ་ཚོས་རང་གི་གདོང་པ་འགེབས་པར་བྱེད།

⁵ ཞིང་ཁའི་ནང་དུ་ཤྭ་བ་ཨ་མ་ཡིས། རང་གི་ཤྭ་ཕྲུག་གསར་སྐྱེས་དོར་བར་བྱེད། གང་ལ་ཟེར་ན་དེ་ཚོར་རྩ་མེད་དོ།

⁶ རྐྱང་རྣམས་རི་བོའི་སྟེང་ལངས་ཤིང་། ཁྱི་སྤྱང་བཞིན་དུ་དབུགས་ཐུང་གཏོང་བར་བྱེད། དེ་ཡི་མིག་གི་མཐོང་བའི་ནུས་པ་མེད། གང་ལ་ཟེར་ན་དེ་ཚོར་ཟས་མེད་དོ།

⁷ ང་ཡི་མི་མང་ང་ལ་ཞུ་འབོད་བྱེད། ང་ཚོའི་སྡིག་པས་ང་ཚོར་སྐྱོན་འདོན་ཡང་། ཁྱེད་ཀྱིས་ཞལ་བཞེས་གནང་བ་དེ་བཞིན་དུ། གཙོ་བོ་དཀོན་མཆོག་ཁྱེད་ཀྱིས་ང་ཚོར་སྐྱོབས། ང་ཚོས་ཐེངས་མང་ཁྱེད་ལ་སྤངས་ཡོད་པས། ཁྱེད་ཀྱི་སྤྱན་སྔར་ང་ཚོས་སྡིག་པ་གྱིས།

⁸ སྐུ་ཉིད་ཁྱེད་ནི་ཨིསི་རཱཨེལ་པ་རྣམས་ཀྱི། རེ་བ་གཅིག་པོ་དེ་ནི་ཁྱེད་ཡིན་ནོ། ང་ཚོ་རྐྱེན་ངན་རྣམས་ལས་སྐྱོབས་མཁན་ཡིན། འགྲུལ་པ་མཚན་གཅིག་གནས་སར་སྡོད་མཁན་ལྟར། ཡུལ་འདི་ངོ་མ་ཤེས་ལྟར་ཅི་ལ་མཛད།

⁹ དམག་མི་རོགས་བྱེད་ནུས་པ་མེད་པ་ལྟར། མི་ཡི་བླུ་བུར་ཡ་མཚན་ཅི་ལ་མཛད། ཐེ་ཚོམ་མེད་པར་གཙོ་བོ་དཀོན་མཆོག་ཁྱེད། ང་ཚོ་མཉམ་དུ་ཡོད་ཅིང་ང་ཚོ་ནི། ཁྱེད་ཀྱི་མི་ལ་ཡི་སྤོང་བར་མ་མཛོད་ཅིག།

¹⁰ མི་མང་འདི་ཚོའི་སྐོར་གཙོ་བོ་དཀོན་མཆོག་གིས་བཀའ་གནང་བ། དེ་ཚོ་ང་ལས་བྲོས་འགྱུར་དགའ་བ་དང་རང་ཚོད་ཟིན་མི་ཐུབ། དེའི་རྐྱེན་ང་དེ་ཚོར་མི་དགའ་བས་ངས་དེ་ཚོའི་ནོར་འཁྲུལ་དྲན་རྒྱུ་དང་། དེ་ཚོའི་སྡིག་པའི་རྐྱེན་གྱིས་དེ་ཚོར་ཆད་པ་གཏོང་རྒྱུ་ཡིན་ནོ།

¹¹ གཙོ་བོ་དཀོན་མཆོག་གིས་ང་ལ་བཀའ་གནང་བ། ཁྱོད་ཀྱིས་ང་ལ་མི་དེ་ཚོར་རོགས་བྱེད་རོགས་མ་ལབ་ཅིག།

¹² དེ་ཚོས་སྨྱུང་གནས་བྱས་ན་ཡང་ངས་དེ་ཚོའི་ཞུ་འབོད་ལ་ཉན་རྒྱུ་མིན་ནོ། དེ་ཚོས་ང་ལ་སྦྱིན་སྲེག་གི་མཆོད་པ་དང་འབྲུའི་མཆོད་པ་ཕུལ་ན་ཡང་ང་དེ་ཚོ་ལ་དགའ་བར་མི་བྱེད། དེ་ལས་ལྡོག་ཏེ་ངས་དེ་ཚོ་ལ་དམག་འཁྲུགས་ནང་དང་མུ་གེ་དང་ནད་ཡམས་བཅས་ཀྱི་གསོད་རྒྱུ་ཡིན།

¹³ དེ་ནས་ངས་བླ་ན་མེད་པའི་གཙོ་བོ་དཀོན་མཆོག་གི་མཁྱེན་པ་ལྟར། ལུང་སྟོན་པ་ཚོས་ཁྱེད་ཀྱིས་ཞལ་བཞེས་གནང་བ་ལྟར་དམག་དང་མུ་གེ་མི་ཡོང་བ་དང་ང་ཚོའི་ཡུལ་དུ་བདེ་སྐྱིད་ཡོང་གི་རེད་ཅེས་མི་མང་ལ་ཤོད་བཞིན་འདུག་ཅེས་ཞུས་སོ།

¹⁴ འོན་ཀྱང་གཙོ་བོ་དཀོན་མཆོག་གིས་ང་ལ་བཀའ་གནང་བ། ལུང་སྟོན་པ་ཚོས་ངའི་མིང་ཐོག་རྫུན་གྱི་ལུང་སྟོན་ནོ། ངས་དེ་ཚོ་བཏང་མེད་པ་མ་ཟད་བཀའ་གང་ཡང་བཏང་མེད་པ་དང་། དེ་ཚོར་ཚིག་ཅིག་ཀྱང་བཤད་མེད། དེ་ཚོས་སྨྲ་བའི་ཞལ་གཟིགས་རྣམས་ངས་སྟོན་པ་མ་ཡིན། དེ་ཚོའི་མངོན་ཤེས་རྣམས་དེ་ཚོའི་བསམ་བློ་བཏང་བ་ལྟར་ཕན་མེད་འབའ་ཞིག་ཡིན་ནོ།

¹⁵ གཙོ་བོ་དཀོན་མཆོག་གིས། ཁྱོད་ལ་ངས་མ་བཏང་བའི་ལུང་སྟོན་པ་དེ་ཚོ་ངའི་མིང་ནས་ཡུལ་འདིར་དམག་དང་མུ་གེ་མི་ཡོང་ཟེར་མཁན་ཚོར་ཇི་བྱ་རྒྱུ་ཡིན་པ་དེ་ཁྱོད་ལ་ཤོད་རྒྱུ་ཡིན་ནོ། ངས་དེ་ཚོར་དམག་དང་མུ་གེས་གསོད་རྒྱུ་ཡིན་ནོ།

¹⁶ དེ་ཚོས་ཤོད་སའི་མི་ཚོ་ཡང་དེ་ལྟར་གསོད་པར་བྱེད་དེ། དེ་ཚོའི་རོ་རྣམས་ཡེ་རུ་ཤ་ལེམ་གྱི་རྒྱ་ལམ་སྟེང་དུ་དོར་བ་དང་། དེ་ཚོ་ལ་སྦས་མཁན་སུ་ཡང་མི་ཡོང་ངོ་། དེ་ཚོའི་ཆུང་མ་དང་བུ་དང་བུ་མོ་ཚོ་ཚང་མར་དེ་ལྟར་ཡོང་བར་འགྱུར། ངས་དེ་ཚོའི་སྤྱོད་ངན་གྱི་ལན་འཇལ་དུ་འཇུག་རྒྱུ་ཡིན་ནོ།

¹⁷ གཙོ་བོ་དཀོན་མཆོག་གིས་མི་མང་ལ་ངའི་སྡུག་བསྔལ་གྱི་སྐོར་ཤོད་དགོས་པའི་བཀའ་གནང་བ་དང་། འདི་ལྟར་ཤོད་གསུངས་བྱུང་། ང་ཡི་མིག་ཆུ་ཉིན་མཚན་མེད་པར་ཐོན། ང་ཡི་ངུ་རྒྱུ་བར་མཚམས་མ་ཆད་ཤོག། གང་ལ་ཟེར་ན་ང་ཡི་མི་མང་རྣམས། གཏིང་ཟབ་རྨས་ཤིང་ཚབ་ཆེན་མནར་ཡོད་དོ།

¹⁸ ང་ནི་ཞིང་ཁར་འགྲོ་བའི་སྐབས་དེ་ལ། དམག་ཏུ་བསད་པའི་མི་ཡི་རོ་མཐོང་ངོ་། ང་ནི་གྲོང་ཁྱེར་རྣམས་ནང་དུ་འགྲོ་བའི་སྐབས། ང་ཡིས་མི་མང་མུ་གེས་འཆི་བ་མཐོང་། ལུང་སྟོན་པ་དང་བླ་མ་རྣམས་ཀྱི་རང་ལས་བྱེད། བྱེད་མི་དེ་ཚོས་ཅི་བྱེད་མི་ཤེས་སོ༎

མི་མང་གིས་གཙོ་བོ་དཀོན་མཆོག་ལ་ཞུ་བ་ཕུལ་བ།

¹⁹ གཙོ་བོ་དཀོན་མཆོག་སྐུ་ཉིད་ངེད་ཚོ་ལ། ཡ་ཧུ་དཱ་རྣམས་སྤོང་བར་མཛད་ཡིན་ནམ། ཛི་ཡོན་མི་མང་སྡང་བར་བྱེད་ཡོད་དམ། ངེད་ཚོ་ནམ་ཡང་གསོ་བར་མི་འགྱུར་བའི། ཁྱེད་ཀྱིས་ང་ཚོར་དྲག་པོས་ཅི་ལ་མནར། ངེད་ནི་ཞི་བདེར་འདོད་ཀྱང་མ་ལེགས་སོ། ང་ཚོས་གསོ་བའི་རེ་བ་བྱས་ན་ཡང་། དེ་ཡི་ཚབ་ཏུ་འཇིགས་སྐྲག་འབའ་ཞིག་བྱུང་།

²⁰ གཙོ་བོ་དཀོན་མཆོག་ཁྱེད་ཀྱི་སྤྱན་སྔ་རུ། ང་ཚོས་སྡིག་པ་གྱིས་པ་ཡིན་པའི་སྟབས། ང་ཚོ་དང་ནི་ང་ཚོའིི་ཕ་མེས་ཚོས། སྡིག་པ་རྣམས་ལ་ཁས་ལན་ཞུས་རྒྱུ་ཡིན།

²¹ ཁྱེད་ཀྱིས་ཞལ་བཞེས་མཛད་པ་དྲན་པར་མཛོད། ཁྱེད་ཀྱིས་ང་ཚོར་སྨད་པར་མ་མཛོད་ཅིག། ཁྱེད་ཀྱི་བཞུགས་ཁྲི་གཟི་བརྗིད་ཅན་ཡོད་ནས། ཡེ་རུ་ཤ་ལེམ་ལ་ནི་དམའ་འབེབས་མ་གནང་ཤིག། ང་ཚོ་མཉམ་དུ་གནང་བའི་དམ་བཅའ་མ་སྤངས་ཤིག།

²² མི་མང་ཚོ་ཡི་སྐུ་འདྲ་ཞིག་ལ་ནི། ཆར་བ་འབེབས་པས་ནུས་པ་དེ་ཚོར་མེད། ནམ་མཁའ་ཉིད་ཀྱིས་ཆར་པ་འབེབས་མི་ཐུབ། གཙོ་བོ་དཀོན་མཆོག་ང་ཚོའི་དཀོན་མཆོག་ཁྱེད། དེ་ལྟར་མཛད་མཁན་གཅིག་པོ་ཁྱེད་ཡིན་པས། ང་ཚོས་ཁྱེད་ལ་རེ་བ་བཅོལ་ཡོད་དོ༎